1 Ndien eyedikem, ete edieke mme Gentile edikpaŋde utɔŋ inɔ Eyen-erɔŋ Abasi ke usen oro emi enye ediyarare idem esie inɔ mmɔ ke ikɔ, ye nko ke odudu, ke ata edinam, man etaŋ mme itiat iduɔ mmɔ efep—

2 Ndien isɔŋke esit mmɔ ye Eyen-erɔŋ Abasi, eyebat mmɔ esin ke ubon ete fo; iŋ, eye ebat mmɔ esin ke ufɔk Israel; ndien mmɔ eye edi mme owo emi ediɔŋde ke isɔŋ enwɔŋɔ ke nsinsi; owo idifiakke ida mmɔ isuhɔre iduk ke nkpɔkɔbi; ndien ufɔk Israel iditimekere aba.

3 Ndien akamba obube oro, emi akamba ye mbubiam ufɔk Abasi eketibide ɔnɔ mmɔ, emi satan ye nditɔ esie eke esiakde, man enye ada mme ukpɔŋ owo ɔwɔrɔ ɔsuhɔre aka hell—iŋ, akamba obube oro emi eketibide ebaŋa nsobo owo ɔyɔyɔhɔ ye mbon emi eketibide enye, tutu mmɔ esobo ofuri ofuri, Eyen-erɔŋ Abasi ɔdɔhɔ; idihe nsobo ukpɔŋ, ibɔhɔke edi ndibin enye nsin ke hell oro emi minyeneke utit.

4 Koro sese, emi edi nte nkpɔkɔbi satan edide, ndien nko nte mbet Abasi edide, ɔnɔ kpukpru mmɔ oro emi edinamde ibak ye mbubiam ido ke iso esie.

5 Ndien edikem ete angel oro ɔdɔhɔ mi, Nephi, ete: Afo omokut ete ke edieke mme Gentile ekabare esit eye ɔfɔn ye mmɔ; ndien afo nko emefiɔk kabaŋa mme ediomi Jehovah ɔnɔ ufɔk Israel; ndien afo nko omokop ete owo eke ededi emi mikabakere esit ana atak.

6 Ke ntak oro, ɔyɔdiɔk ɔnɔ mme Gentile edieke edide ete ke mmɔ esɔŋ mme esit mmɔ ye Eyen-erɔŋ Abasi.

7 Koro ini kedi, Eyen-erɔŋ Abasi ɔdɔhɔ, emi ami ndinamde akamba ye utibe utom ke ufɔt nditɔ owo; utom emi edide nsinsi, mme ke ubɔk kiet mme ke eken—kiet eke ededi ndinam mmɔ ekpuhɔre ekikere enɔ emem ye nsinsi uwem, mme enɔ ubɔhɔ mmɔ ke nsɔŋ esit mmɔ ye nnan mme esit mmɔ enɔ ndida mmɔ nsuhɔre nduk nkpɔkɔbi, eke obukidem ye eke spirit, man ekekem ke nkpɔkɔbi eke andidiɔk, emi ami nketiŋde.

8 Ndien edikem ete ke angel oro ama eketiŋ mme ikɔ emi, enye ɔdɔhɔ mi ete: Afo emeti mme ediomi Ete ɔnɔde ufɔk Israel? Ami ndɔhɔ enye nte, Iŋ.

9 Ndien edikem ete enye ɔdɔhɔ mi ete: Se, nyuŋ kut akamba ye mbubiam ufɔk Abasi, emi edide eka mme mbubiam ido, emi andisiak edide satan.

10 Ndien enye ɔdɔhɔ mi ete: Sese edi ufɔk Abasi iba ikpɔŋ edu; kiet edi ufɔk Abasi Eyen-erɔŋ Abasi, ndien enyeken edi ufɔk abasi satan; ke ntre, owo ekededi emi midihe owo ufɔk Abasi Eyen-erɔŋ edi owo akamba ufɔk Abasi oro, emi edide eka mme mbubiam ido; ndien enye edi akpara kpukpru ererimbot.

11 Ndien edikem ete ami nse nyuŋ nkut akpara kpukpru ererimbot, ndien enye etie ke ediwak mmɔŋ; ndien enye enyene ukara ke kpukpru ererimbot, ke ufɔt kpukpru idut, mme iman, mme usem, ye mme owo.

12 Ndien edikem ete ami nkut ufɔk Abasi Eyen-erɔŋ Abasi, ndien mme ibat esie iwakke, ke ntak ibak ye mme mbubiam ido akpara emi eke etiede ke ediwak mmɔŋ; edi, ami nkut ete ke ufɔk Abasi Eyen-erɔŋ, emi edide ndisana ikɔt Abasi, edu nko ke kpukpru iso isɔŋ; ndien ukara mmɔ ke iso isɔŋ ekedi ekpri, ke ntak ibak akamba akpara emi ami nkekutde.

13 Ndien edikem ete ami nkut nte ke akamba eka mme mbubiam ama ataŋ mme otu owo obok kiet ke iso kpukpru ererimbot, ke ufɔt mme idut mme Gentile, man enwana ye Eyen-erɔŋ Abasi.

14 Ndien edikem ete ami, Nephi, nkut odudu Eyen-erɔŋ Abasi, ete ke enye ɔsuhɔre odoro ke ndisana owo ufɔk Abasi Eyen-erɔŋ, ye ke mbio ediomi Jehovah, emi eke esuande ke kpukpru iso isɔŋ; ndien mmɔ enyene nnen nnen ido ndien ye odudu Abasi ke akamba ubɔŋ.

15 Ndien edikem ete ami nkut nte ke ema eŋwaŋa iyaresit Abasi edori ke akamba ye mbubiam ufɔk Abasi oro, tutu ete ke mme ekɔŋ ye mme etop ekɔŋ ama odu ke ufɔt kpukpru idut ye mme iman ererimbot.

16 Ndien nte mme ekɔŋ ye mme etop ekɔŋ ɔtɔŋɔde ndidu ke ufɔt kpukpru idut emi esinede ke eka mme mbubiam, angel oro ɔdɔhɔ mi, ete: Sese, iyaresit Abasi odoro eka iban akpara ke idem; ndien sese, afo omokut kpukpru mme ŋkpɔ emi—

17 Ndien ke ini usen edidide ete eŋwaŋa iyaresit Abasi edori eka iban akpara ke idem, emi edide akamba ye mbubiam ufɔk Abasi kpukpru ererimbot, emi andisiak edide satan, ndien, ke usen oro, utom Ete eye ɔtɔŋɔ, ke nditim usuŋ nnim nnɔ ndinam mme ediomi esie, emi enye eke anamde ɔnɔ mme owo esie emi edide eke ufɔk Israel.

18 Ndien edikem ete angel oro ɔdɔhɔ mi, ete: Sese!

19 Ndien ami nse nyuŋ nkut owo kiet, ndien enye eke esine afia ɔfɔŋ.

20 Ndien angel oro ɔdɔhɔ mi ete: Sese kiet ke mme apostle duopeba Eyen-erɔŋ.

21 Sese, enye eye okut onyuŋ ewet mme nyɔhɔ nsuhɔ ŋkpɔ emi; ndien nko ediwak ŋkpɔ emi ekedude.

22 Ndien enye nko eye ewet abaŋa utit ererimbot.

23 Ke ntre, mme ŋkpɔ emi enye ediwetde edi edinen ye akpanikɔ; ndien sese ewet mmɔ ke ŋwed emi afo okokutde nte ɔwɔrɔde ke inua Jew; ndien ke ini emi mmɔ ekewɔrɔde ke inua oro, mme, ke ini emi ŋwed oro ekewɔrɔde ke inua Jew oro, mme ŋkpɔ emi ekewetde ama aŋwaŋa onyuŋ edi nnen nnen, onyuŋ ɔfɔn akan ndien edi se iŋwaŋade kpukpru owo.

24 Ndien sese, mme ŋkpɔ emi apostle Eyen-erɔŋ ediwetde edi ediwak ŋkpɔ emi afo eke esede; onyuŋ okutde, nyɔhɔ nsuhɔ afo eye okut.

25 Edi mme ŋkpɔ emi afo edikutde ke emi ama ekebe afo uduwetke; koro Jehovah Abasi ama enim apostle Eyen-erɔŋ ete enye ewet mmɔ.

26 Ndien nko mbon efen emi ekedude, mmɔ ke enye owut kpukpru ŋkpɔ, ndien mmɔ ewet mmɔ; ndien ekɔbi mmɔ ete ekpe ewɔrɔ edi ke akpanikɔ mmɔ, etiene akpanikɔ emi odude ke eyen-erɔŋ, ke ekemini Jehovah, ɔnɔ ufɔk Israel.

27 Ndien ami, Nephi, nkop nyuŋ ntie ntiense, nte ke enyiŋ apostle eyen-erɔŋ oro ekedi John, nte ikɔ angel oro ekedide.

28 Ndien sese, ami, Nephi, ekpan mi ete ami nkuwet mme nyɔhɔ nsuhɔ ŋkpɔ emi ami nkekutde nyuŋ nkopde; ke ntre mme ŋkpɔ emi ami ŋwetde ekem mi; ndien ami ŋwet ekpri ubak mme ŋkpɔ emi ami nkekutde.

29 Ndien ami ntie ntiense nte ke ami mma nkut mme ŋkpɔ emi ete mi eke okutde, ndien angel Jehovah anam mi mfiɔk mmɔ.

30 Ndien idaha emi ami ntre nditiŋ ikɔ mbaŋa mme ŋkpɔ emi ami nkokutde ke ini ekemende mi ewɔrɔ ke Spirit; ndien owo miwetke kpukpru ŋkpɔ emi ami nkekutde, mme ŋkpɔ emi ami ŋwetde edi akpanikɔ. Ndien ntre ke edi. Amen.