1 Ekpaŋutɔŋ enyuŋ ekop emi, O ufɔk Jacob, emi ekotde ke enyiŋ Israel, enyuŋ etode ke mme mmɔŋ Judah ewɔrɔ, mme ewɔrɔde ke mme mmɔŋ baptism, emi etomode ke enyiŋ Jehovah, ndien etiŋ ebaŋa Abasi Israel, edi mmɔ itomoke ke akpanikɔ mme ke edinen ido.

2 Edi, mmɔ ekot idem mmɔ eke edisana obio, edi mmɔ ibuɔtke idem mmɔ ke Abasi Israel, emi edide Jehovah mme Udim; iŋ, Jehovah mme Udim edi enyiŋ esie.

3 Sese, ami mmetiŋ tɔŋɔ ke eritɔŋɔ mme ŋkpɔ emi ekebemde iso; ndien mmɔ eto inua mi ewɔrɔ, ndien ami mma nnam ekop mmɔ. Ami mma ntiŋ mmɔ ke ibumere.

4 Ndien ami ŋkanam enye koro ami ŋkɔfiɔkde ke afo ɔsɔsɔŋ ibuot, ndien itɔŋ fo edi idut ukwak, ndien ɔkpɔiso fo edi brass.

5 Ndien ami ke akpanikɔ ke ŋkedɔhɔ fi tɔŋɔ ke eritɔŋɔ nte; mbemiso enye edikem ami mma ntiŋ nnɔ fi; ndien ami ŋketiŋ ke ndik mbak afo ududɔhɔ ete—Ndem mi anam mmɔ, ye edisɔi mbiet mi, ndien editara mbiet mi ɔnɔ mmɔ uyo.

6 Afo ama okut onyuŋ okop kpukpru emi; ndien ndi afo udutiŋke mmɔ? Ndien ete ke ami mmɔdɔhɔ fi mbufa ŋkpɔ tɔŋɔ ke ini emi, kpa mme ndedibe ŋkpɔ, ndien afo ufiɔkke mmɔ.

7 Ebot mmɔ idaha emi, ndien idihe tɔŋɔ ke eritɔŋɔ, tutu mbemiso usen emi afo mukukopke mmɔ ema etiŋ mmɔ enɔ fi, mbak afo edidɔhɔ ete—Sese ami mma mfɔfiɔk mmɔ.

8 Iŋ, ndien afo ukopke; iŋ, afo ufiɔkke; iŋ, tɔŋɔ ke ini oro utɔŋ fo ikonyuŋ itarake; koro ami mma mfiɔk nte ke afo ayabiaŋa eti eti, ndien ekot fi edue ibet tɔŋɔ ke idibi.

9 Edi, kabaŋa enyiŋ mi ami nyekpɔnɔre kaŋa iyaresit mi, ndien kabaŋa itoro mi ami nyesio idem mfep mkpɔŋ fi, mbak ndisibe fi mfep.

10 Koro, sese, ami mmatara fi, ami mmek fi ke akamba ikaŋ ukut.

11 Ke ntak idem mi, iŋ, ke ntak idem mi ke ami ndinam emi, koro ami ndiyakke esabare enyiŋ mi, ndien ami ndinɔhɔ owo efen ubɔŋ mi.

12 Kpaŋutɔŋ nnɔ mi, O Jacob, ye Israel emi ami ŋkotde, koro ami ndi enye; ami ndi akpa, ndien ami nko ndi akpatre.

13 Ubɔk mi ŋko ekenim itiat idak isɔŋ ererimbot, ndien ubɔk nnasia mi eneŋere mme ikpa enyɔŋ. Ami ŋkot mmɔ ndien mmɔ edaha eda kiet.

14 Kpukpru mbufo, esop idem mbufo, enyuŋ ekop; anie ke otu mmɔ eketiŋ mme ŋkpɔ emi ɔnɔ mmɔ? Jehovah ama ama enye; iŋ, ndien enye ayanam ikɔ esie osu emi enye eketiŋde ɔnɔ mmɔ; ndien enye eyenam se amade ke Babylon, ndien ubɔk esie eyedi kabaŋa mme Chaidean.

15 Nko, Jehovah ɔdɔhɔ; ami Jehovah, iŋ, ami metiŋ; iŋ, ami mmokot enye nte etiŋ, ami mmada enye ndi, ndien enye ayanam usuŋ esie oforo.

16 Mbufo esaŋa ekpere mi; ami ntiŋke ke ndibe; tɔŋɔ ke eritɔŋɔ, tɔŋɔ ke ini emi eketiŋde enye ke ami ndɔhɔ; ndien Jehovah Abasi, ye Spirit esie, edɔŋ mi.

17 Ndien ntem ke Jehovah ɔdɔhɔ, Andifak mbufo, Edisana Abasi Israel; ami ndɔŋ enye, Jehovah Abasi mbufo emi ekpepde mbufo ndiforo, emi adade mbufo ke usuŋ emi anade mbufo eka, anam enye.

18 O ete ke afo akpakam akpaŋutɔŋ ɔnɔ ibet mi—idaha oro ke emem fo ekpedi akpa, ndien edinen ido fo nte mbufut inyaŋ.

19 Ubon fo nko ekedi nte ntan; nditɔ mme idibi fo nte itiat esie; ikpisibeheke isio inyuŋ isoboke enyiŋ esie ke iso mi.

20 Mbufo eto ke Babylon ewɔrɔ, efehe ekpɔŋ mme Chaldean, ye uyo ikwɔ mbufo etiŋ, ebuk emi, etiŋ tutu utit ererimbot; mbufo edɔhɔ ete: Jehovah afak owo esie Jacob.

21 Ndien itɔŋ isatke mmɔ; enye ada mmɔ ebe ke mme desert; enye anam mme mmɔŋ ewɔrɔ ke itiat ɔnɔ mmɔ; enye obom itiat nko ndien mme mmɔŋ efehe ewɔrɔ.

22 Edi isehe ete ke enye anam kpukpru emi, ye se ikponde ikan oro nko, emem iduhe, Jehovah ɔdɔhɔ, inɔ idiɔk owo.