1 Ndien edikem ete angel oro ɔdɔhɔ mi: Se, nyuŋ kut ubon fo, ndien nko ubon nditɔ eka fo iren. Ndien ami nse nyuŋ nkut isɔŋ eŋwɔŋɔ; ndien ami nkut mme otu owo, iŋ, tutu enye awak ke ibat nte ntan inyaŋ.

2 Ndien edikem ete ami nkut nte mme otu owo ebohode kiet ndinwana, kiet ye eken; ndien ami nkut mme ekɔŋ ye mme etop ekɔŋ, ye mme akwa uwak uwot owo ye ofut ke ufɔt mme owo.

3 Ndien edikem ete ami nkut nte ediwak emana ebede efep, ke utɔ usuŋ mme ekɔŋ ye mme eneni ke isɔŋ; ndien ami nkut ediwak obio, iŋ, tutu ete ami nkanke mbat mmɔ.

4 Ndien edikem ete ami nkut ata obubit ekim ke iso isɔŋ eŋwɔŋɔ; ndien ami nkut mme emireŋ-mireŋ, ndien ami nkop mme obuma, ye mme unyek-isɔŋ, ye kpukpru utɔ mme uyom ndutime; ndien ami nkut nte ererimbot ye mme itiat, nte mmɔ ewahade; ndien ami nkut mme obot esio mfiakŋkabade edi mbai; ndien ami nkut mme una-isɔŋ ererimbot nte ebomode; ndien ami nkut ediwak obio nte mmɔ esipde; ndien ami nkut ediwak nte efɔpde mmɔ ye ikaŋ; ndien ami nkut ediwak esiode mfiakŋkabade esim isɔŋ, ke ntak unyek-isɔŋ esie.

5 Ndien edikem ete ke ini mma ŋkokut mme ŋkpɔ emi, ami mma nkut uye ekim, nte enye ebede ɔwɔrɔ ke iso ererimbot; ndien sese, ami nkut mme otu owo emi mikiduɔhɔ ke ntak akwa ye mme enyene ndik ubiere ikpe Jehovah.

6 Ndien ami mma nkut nte mme enyɔŋ ekubɔre, ndien Eyen-erɔŋ Abasi ɔsuhɔre ɔwɔrɔ ke enyɔŋ; ndien enye ɔsuhɔre edi onyuŋ owut mmɔ idem esie.

7 Ndien ami nko mma nkut nyuŋ ntie ntiense nte ke Edisana Spirit ama ɔduɔ odoro duopeba efen ke idem; ndien edi Abasi ekenim mmɔ, onyuŋ emek mmɔ.

8 Ndien angel oro ɔdɔhɔ mi, ete: Sese mbet duopeba eke Eyen-erɔŋ, emi emekde ndinam utom nnɔ ubon fo.

9 Ndien enye ɔdɔhɔ mi ete: Afo emeti mme apostle Eyen-erɔŋ duopeba? Sese mmɔ edi mmɔ emi edi ibiere ikpe inɔ ubon Israel duopeba; ke ntre, mmɔ edi ibiere ikpe inɔ mme asaŋa utom duopeba eke ubon fo; koro afo edide eke ufɔk Israel.

10 Ndien mme asaŋa utom duopeba emi emi afo okutde eyebiere ikpe enɔ ubon fo. Ndien, sese, mmɔ edi nnen nnen ke nsinsi; koro ke ntak mbuɔtidem mmɔ ke Eyen-erɔŋ Abasi enam mme ɔfɔŋ mmɔ afia ke iyip esie.

11 Ndien angel oro ɔdɔhɔ mi ete: Sese! Ndien ami nse, nyuŋ nkut nte mme emana ita ebede efep ke nnen nnen ido; ndien mme ɔfɔŋ mmɔ ema efia kpa ukem ukem nte eke Eyen-erɔŋ Abasi. Ndien angel oro ɔdɔhɔ mi ete: Enam mmɔ emi efia ke iyip Eyen-erɔŋ, ke ntak mbuɔtidem mmɔ ke enye.

12 Ndien ami, Nephi, nko mma nkut ediwak emana inaŋ emi ekebede efep ke nnen nnen ido.

13 Ndien edikem ete ami mma nkut nte mme otu ererimbot ebohode ɔtɔkiet.

14 Ndien angel oro ɔdɔhɔ mi ete: Sese ubon fo, ndien nko ubon nditɔ eka fo iren.

15 Ndien ekedikem ete ami nse nyuŋ nkut mbon ubon mi eboho ɔtɔkiet ke uwak ekpere ubon nditɔ eka mi iren; ndien mmɔ ekeboho ɔtɔkiet man enwana.

16 Ndien angel oro ɔdɔhɔ mi, ete: Sese ntɔŋɔ ndedehe mmɔŋ emi ete fo okokutde; iŋ, kpa akpa emi enye ɔkɔdɔhɔde; ndien mme utuŋɔ mmɔ mme edi mme utuŋɔ hell.

17 Ndien mme ata obubit ekim oro edi mme idomo satan, emi enamde mme enyin edi nnan, ndien esɔŋ mme esit nditɔ owo, enyuŋ eda mmɔ eka ekesin ke mme usuŋ atarade, man mmɔ etak enyuŋ esop.

18 Ndien akamba ye ufɔk emi okponde oro, emi ete fo okokutde, edi mme ikpikpu ekikere ye ntaŋidem nditɔ owo. Ndien akamba ye enyene ndik ukpe abahare mmɔ; iŋ, kpa nnen nnen ikɔ eke Nsinsi Abasi, ye Messiah emi edide Eyen-erɔŋ Abasi, emi Edisana Spirit etiede ntiense abaŋa, tɔŋɔ ke eritɔŋɔ ererimbot tutu idaha emi, ndien tɔŋɔ ke idahaemi ka iso ye ke nsinsi.

19 Ndien ke ini angel oro eketiŋde mme ikɔ emi, ami nse nyuŋ nkut nte ke ubon nditɔ eka mi iren ema eŋwana ye ubon mi, nte ikɔ angel eke edide; ndien ke ntak ntaŋidem ubon mi, ye mme idomo satan, ami nkut nte ubon nditɔ eka mi iren ekande mme owo ubon mi.

20 Ndien edikem ete ami nse, nyuŋ nkut mme owo ubon nditɔ eka mi iren nte ke mmɔ ekan ubon mi; ndien mmɔ eka iso ke mme otu ke iso isɔŋ.

21 Ndien ami nkut mmɔ nte ebohode ɔtɔkiet ke mme otu; ndien ami nkut mme ekɔŋ ye mme etop ekɔŋ ke ufɔt mmɔ; ndien ke mme ekɔŋ ye mme etop ekɔŋ ami nkut ediwak emana ebede efep.

22 Ndien angel oro ɔdɔhɔ mi ete: Sese mmɔ emi eyetaha ke unana edinim.

23 Ndien edikem ete ami nkut, ke ini mmɔ ema eketaha ke unana edinim mmɔ ekabare ebre, enyuŋ ediɔk ata eti eti, enyuŋ edi mme ndedehe owo, eyɔhɔ ye ifu ye kpukpru utɔ mme mbubiam ido.