1 Kag natabo ini nga ang anghel nagsiling sa akon: Tuloka, kag tan-awa ang imo kaliwatan, kag amo man ang kaliwatan sang imo mga kauturan. Kag nagtulok ako kag nakita ang duta sang panaad; kag nakita ko ang kadam-an sang katawhan, huo, bisan ang kadamuon sini nga pareho kadamo sa balas sang dagat.

2 Kag natabo ini nga nakita ko ang kadam-an nga nagtililipon sa pag-inaway, ang isa batok sa isa; kag nakita ko ang mga giyera, kag mga huring-huring sang mga giyera, kag dalagko nga mga pagpinatyanay paagi sa espada sa tunga sang akon katawhan.

3 Kag natabo ini nga nakita ko ang madamo nga henerasyon nga nagtaliwan, suno sa mga giyera kag pagbinaisay sa kadutaan; kag nakita ko ang madamo nga siyudad, huo, bisan nga indi ko maisip ang mga ini.

4 Kag natabo ini nga nakita ko ang panganod sang kadudulman sa ibabaw sang duta sang panaad; kag nakita ko ang mga kilat, kag nabatian ang mga pagpanaguob, kag mga linog, kag tanan nga sari sang magamo nga mga kinagahod; kag nakita ko ang duta kag ang mga bato, nga nagkalabuka ang mga ini; kag nakita ko ang mga bukid nga nagkalatiphag sa mga tinipik; kag nakita ko ang mga kapatagan sang duta, nga naglilitik ang mga ini; kag nakita ko ang madamo nga siyudad nga nagkalalubog ang mga ini; kag nakita ko ang madamo nga nagkalasunog sa kalayo; kag nakita ko ang madamo nga nagkalarumpag sa duta, tungod sang pagtay-og sini.

5 Kag natabo ini pagkatapos nga nakita ko ining mga butang, nakita ko ang usbong sang kadudulman, nga nadula ini halin sa ibabaw sang duta; kag tan-awa, nakita ko ang kadam-an nga wala malaglag tungod sang dako kag makakululba nga mga paghukom sang Ginuo.

6 Kag nakita ko nga nabuksan ang mga langit, kag ang Kordero sang Dios nga nagapanaog halin sa langit; kag nagpanaog sia kag nagpakita sang iya kaugalingon sa ila.

7 Kag nakita ko man kag nagapamatuod nga ang Balaan nga Espiritu nagpanaog sa dose ka iban pa; kag gin-ordinan sila sang Dios, kag pinili.

8 Kag ang anghel naghambal sa akon nga nagasiling: Tan-awa ang dose ka disipulo sang Kordero, nga pinili sa pag-alagad sa imo kaliwatan.

9 Kag nagsiling sia sa akon: Nadumduman mo pa bala ang dose ka apostoles sang Kordero? Tan-awa sila inang magahukom sa dose ka tribo sang Israel; gani, ang dose ka alagad sang imo kaliwatan pagahukman nila; kay iya kamo sang panimalay ni Israel.

10 Kag ining dose ka alagad nga imo ginatan-aw amo ang magahukom sa imo kaliwatan. Kag, tan-awa, mga matarong sila tubtob sa wala’y katapusan; kay tungod sang ila pagtuo sa Kordero sang Dios ang ila mga biste nahimo nga maputi sa iya dugo.

11 Kag ang anghel nagsiling sa akon: Tuloka! Kag nagtulok ako, kag nakita ang tatlo ka henerasyon nga nagtaliwan sa pagkamatarong; kag maputi ang ila mga biste pareho sa Kordero sang Dios. Kag ang anghel nagsiling sa akon: Nahimo nga maputi ang mga ini sa dugo sang Kordero, tungod sang ila pagtuo sa iya.

12 Kag ako, si Nefi, nakakita man sang madamo sang ika-apat nga henerasyon nga nagtaliwan na sa pagkamatarong.

13 Kag natabo ini nga nakita ko ang kadam-an sang duta nga nagtililipon.

14 Kag ang anghel nagsiling sa akon: Tan-awa ang imo kaliwatan, kag ang kaliwatan man sang imo mga kauturan.

15 Kag natabo ini nga nagtulok ako kag nakita nga ang katawhan sang akon kaliwatan nagtililipon sing tuman kadamo batok sa kaliwatan sang akon mga kauturan; kag nagtililipon sila agud magpakig-away.

16 Kag ang anghel naghambal sa akon nga nagasiling: Tan-awa ang tuburan sang mahigko nga tubig nga nakita sang imo amay; huo, bisan ang suba nga iya ginhambal; kag ang kadalumon sini amo ang kadalumon sang impiyerno.

17 Kag ang mga panganod sang kadudulman amo ang mga pagsulay sang yawa, nga nagabulag sang mga mata, kag nagapatig-a sang mga tagipusuon sang mga anak sang katawhan, kag nagadala sa ila pakadto sa malapad nga mga dalanon, agud nga madula sila kag magtalang.

18 Kag ang dako kag maligwa nga bilding, nga nakita sang imo amay, amo ang wala’y kapuslanan nga mga imahinasyon kag bugal sang mga anak sang katawhan. Kag isa ka dako kag makahaladlok nga kadadalman ang nagatunga sa ila; huo, bisan ang pulong sang hustisya sang Wala’y Katapusan nga Dios, kag sang Mesias nga amo ang Kordero sang Dios, nga parte sa iya nagasaksi ang Balaan nga Espiritu, halin sa pagsugod sang kalibutan tubtob sa sini nga tion, kag halin sa sini nga tion, padayon tubtob sa wala’y katapusan.

19 Kag samtang ang anghel nagahambal sining mga pulong, natan-awan ko kag nakita nga ang kaliwatan sang akon mga kauturan nagpakig-away batok sa akon kaliwatan, suno sa pulong sang anghel; kag tungod sang bugal sang akon kaliwatan, kag sang mga pagsulay sang yawa, nakita ko nga gindaug sang kaliwatan sang akon mga kauturan ang katawhan sang akon kaliwatan.

20 Kag natabo ini nga natan-awan ko, kag nakita ang katawhan sang kaliwatan sang akon mga kauturan nga nadaug nila ang akon kaliwatan; kag nagdamo sila sa ibabaw sang duta.

21 Kag nakita ko sila nga nagtililipon nga tuman kadamo; kag nakita ko ang mga giyera kag mga huring-huring sang mga giyera sa tunga nila; kag sa mga giyera kag mga huring-huring sang mga giyera nakita ko ang madamo nga henerasyon nga nagtaliwan.

22 Kag ang anghel nagsiling sa akon: Tan-awa ang mga ini magausmod sa pagkawala’y pagtuo.

23 Kag natabo ini nga nakita ko, pagkatapos nga nag-usmod sila sa pagkawala’y pagtuo nangin isa sila ka maitom, kag makangilil-ad, kag isa ka mahigko nga katawhan, nga puno sang katamad kag tanan nga sari sang mga kangil-aran.