1 Kag natabo ini nga ang anghel naghambal sa akon nga nagasiling: Tuloka! Kag nagtulok ako kag nakita ang madamo nga nasyon kag mga ginharian.

2 Kag ang anghel nagsiling sa akon: Ano ang ginatan-aw mo? Kag nagsiling ako: Ginatan-aw ko ang madamo nga nasyon kag mga ginharian.

3 Kag nagsiling sia sa akon: Amo ini ang mga nasyon kag mga ginharian sang mga Gentil.

4 Kag natabo ini nga nakita ko sa tunga sang mga nasyon sang mga Gentil ang pagkatukod sing isa ka dako nga simbahan.

5 Kag ang anghel nagsiling sa akon: Tan-awa ang pagkatukod sing isa ka simbahan nga labing makangilil-ad sa tanan nga iban pa nga simbahan, nga nagapatay sang mga santos sang Dios, huo, nagapintas sa ila kag nagagapos sa ila, kag nagagota sa ila sing isa ka gota nga salsalon, kag nagadala sa ila sa pagkabihag.

6 Kag natabo ini nga nakita ko ining dako kag makangilil-ad nga simbahan; kag nakita ko ang yawa nga sia ang tagtukod sini.

7 Kag nakita ko man ang bulawan, kag pilak, kag mga sida, kag mga masili nga pula, kag lino nga manipis, kag tanan nga sari sang malahalon nga biste; kag nakita ko ang madamo nga makihilawason.

8 Kag ang anghel naghambal sa akon nga nagasiling: Tan-awa ang bulawan, kag ang pilak, kag ang mga sida, kag ang mga masili nga pula, kag ang lino nga manipis, kag ang malahalon nga biste, kag ang mga makihilawason, amo ang mga handum sining dako kag makangilil-ad nga simbahan.

9 Kag tungod man sang pagdayaw sang kalibutan ila ginalaglag ang mga santos sang Dios, kag ginadala sila sa pagkabihag.

10 Kag natabo ini nga nagtulok ako kag nakita ang madamo nga mga tubig; kag ginahamulag sang mga ini ang mga Gentil sa kaliwatan sang akon mga kauturan.

11 Kag natabo ini nga ang anghel nagsiling sa akon: Tan-awa ang kaakig sang Dios yara sa kaliwatan sang imo mga kauturan.

12 Kag nagtulok ako kag nakita ang isa ka lalaki sa tunga sang mga Gentil, nga naseparar sa kaliwatan sang akon mga kauturan sang madamo nga mga tubig; kag nakita ko ang Espiritu sang Dios, nga nagpanaog ini kag nag-impluwensya sa lalaki; kag nagpalayag sia sa madamo nga mga tubig, bisan tubtob nga makaabot sa kaliwatan sang akon mga kauturan, nga yara sa duta nga ginpanaad.

13 Kag natabo ini nga nakita ko ang Espiritu sang Dios, nga nag-impluwensya ini sa iban pa nga mga Gentil; kag nakabuhi sila halin sa pagkabihag, sa madamo nga mga tubig.

14 Kag natabo ini nga nakita ko ang madamo nga kadam-an sang mga Gentil sa duta sang panaad; kag nakita ko ang kaakig sang Dios, nga nagtupa ini sa kaliwatan sang akon mga kauturan; kag naglapta sila sa atubang sang mga Gentil kag nalupig.

15 Kag nakita ko ang Espiritu sang Ginuo, nga yara ini sa mga Gentil, kag nag-uswag sila kag naangkon ang duta nga ila mangin palanublion; kag nakita ko nga maputi sila, kag tuman kaanyag kag katahum, pareho sang akon katawhan sang wala pa sila magkalamatay.

16 Kag natabo ini nga ako, si Nefi, nakakita nga ang mga Gentil nga nagpalayag halin sa pagkabihag nagpaubos sang ila mga kaugalingon sa atubang sang Ginuo; kag ang gahum sang Ginuo yara sa ila.

17 Kag nakita ko nga ang ila iloy nga mga Gentil nagtililipon sa mga tubig, kag sa duta man, sa pagpakig-away batok sa ila.

18 Kag nakita ko nga ang gahum sang Dios yara sa ila, kag amo man nga ang kaakig sang Dios nagtupa sa tanan sang nagtililipon agud makig-away batok sa ila.

19 Kag ako, si Nefi, nakakita nga ang mga Gentil nga naggwa halin sa pagkabihag ginluwas paagi sa gahum sang Dios halin sa mga kamot sang tanan nga iban pa nga nasyon.

20 Kag natabo ini nga ako, si Nefi, nakakita nga nag-uswag sila sa duta; kag nakita ko ang isa ka libro, kag ginadala-dala ini sa tunga nila.

21 Kag ang anghel nagsiling sa akon: Nahibal-an mo bala ang kahulugan sang libro?

22 Kag nagsiling ako sa iya: Wala ako nakahibalo.

23 Kag nagsiling sia: Tan-awa nagahalin ini sa baba sing isa ka Judio. Kag ako, si Nefi, nakakita sini; kag nagsiling sia sa akon: Ang libro nga imo ginatan-aw amo ang isa ka kasulatan sang mga Judio, nga nagaunod sang mga kasugtanan sang Ginuo, nga iya ginhimo sa panimalay ni Israel; kag ini nagaunod man sang madamo nga propesiya sang balaan nga mga propeta; kag isa ini ka kasulatan pareho sang mga kinurit nga yara sa mga lamina nga saway, lamang nga indi ini tuman kadamo; apang, nagaunod ang mga ini sang mga kasugtanan sang Ginuo, nga iya ginhimo sa panimalay ni Israel; gani, tuman kaimportante ang mga ini sa mga Gentil.

24 Kag ang anghel sang Ginuo nagsiling sa akon: Imo nakita nga ang libro naghalin sa baba sing isa ka Judio; kag sang maghalin ini sa baba sing isa ka Judio nagaunod ini sang kabug-osan sang ebanghelyo sang Ginuo, nga ginapamatud-an sang dose ka apostoles; kag nagapamatuod sila suno sa kamatuoran nga yara sa Kordero sang Dios.

25 Gani, ining mga butang nagagwa halin sa mga Judio nga putli padulong sa mga Gentil, suno sa kamatuoran nga yara sa Dios.

26 Kag pagkatapos nga maggwa ang mga ini paagi sa kamot sang dose ka apostoles sang Kordero, halin sa mga Judio padulong sa mga Gentil, imo nakita ang pagkatukod sinang dako kag makangilil-ad nga simbahan, nga amo ang labing makangilil-ad sa tanan nga iban pa nga simbahan; kay tan-awa, kinuha nila halin sa ebanghelyo sang Kordero ang madamo nga bahin nga maathag kag labing importante; kag kinuha man nila ang madamo nga kasugtanan sang Ginuo.

27 Kag ini tanan ila ginhimo agud mapatiko nila ang husto nga mga dalanon sang Ginuo, agud mabulag nila ang mga mata kag mapatig-a ang mga tagipusuon sang mga anak sang katawhan.

28 Gani, nakita mo nga pagkatapos nga maggwa ang libro paagi sa mga kamot sang dako kag makangilil-ad nga simbahan, nga may madamo nga maathag kag importante nga butang nga kinuha sa libro, nga amo ang libro sang Kordero sang Dios.

29 Kag pagkatapos nga nakuha ining maathag kag importante nga mga butang naglapnag ini sa tanan nga nasyon sang mga Gentil; kag pagkatapos nga naglapnag ini sa tanan nga nasyon sang mga Gentil, huo, sa tabok sang madamo nga mga tubig nga imo nakita nga may mga Gentil nga nagpalalagyo sa pagkabihag, imo nakita—tungod sang madamo nga maathag kag importante nga mga butang nga kinuha sa libro, nga madali mahangpan sang mga anak sang katawhan, suno sa kaathagan nga yara sa Kordero sang Dios—tungod sining mga butang nga kinuha sa ebanghelyo sang Kordero, tuman kadamo ang nasandad, huo, sa bagay nga si Satanas may dako nga gahum sa ila.

30 Apang, imo nakita nga ang mga Gentil nga nagpalalagyo sa pagkabihag, kag ginbayaw sang gahum sang Dios labaw sa tanan nga iban pa nga nasyon, sa ibabaw sang duta nga pinili sa tanan nga iban pa nga duta, nga amo ang duta nga ginhisugtan sang Ginuong Dios sa imo amay nga pagaangkonon sang iya kaliwatan bilang ila duta nga palanublion; gani, imo nakita nga ang Ginuong Dios indi magtugot nga ang mga Gentil lubos nga maglaglag sang pagsinamo sang imo mga kaliwatan, nga yara sa tunga sang imo mga kauturan.

31 Indi man sia magtugot nga pagalaglagon sang mga Gentil ang kaliwatan sang imo mga kauturan.

32 Indi man pag-itugot sang Ginuong Dios nga ang mga Gentil magapabilin tubtob sa wala’y katapusan sa sinang makahaladlok nga kahimtangan sang pagkabulag, nga imo nakita nga ila natup-an, tungod sang maathag kag labing importante nga mga bahin sang ebanghelyo sang Kordero nga gindumili sinang makangilil-ad nga simbahan, nga ang iya pagkatukod imo nakita.

33 Gani siling sang Kordero sang Dios: Mangin maluluy-on ako sa mga Gentil, tuhoy sa pagsilot sang nagkalabilin sang panimalay ni Israel sa dako nga paghukom.

34 Kag natabo ini nga ang anghel sang Ginuo naghambal sa akon nga nagasiling: Tan-awa, nagasiling ang Kordero sang Dios, pagkatapos nga masilotan ko ang nagkalabilin sang panimalay ni Israel—kag ining nabilin nga akon nasambit amo ang kaliwatan sang imo amay—gani, pagkatapos nga masilotan ko sila sa paghukom, kag mahampak ko sila paagi sa kamot sang mga Gentil, kag pagkatapos nga makasandad sing tuman ang mga Gentil, tungod sang labing maathag kag importante nga mga bahin sang ebanghelyo sang Kordero nga gindumili sinang makangilil-ad nga simbahan, nga amo ang iloy sang mga makihilawason, siling sang Kordero—mangin maluluy-on ako sa mga Gentil sa sina nga adlaw, sa bagay nga pagadal-on ko sa ila, sa akon kaugalingon nga gahum, ang kalabanan sang akon ebanghelyo, nga mangin maathag kag importante, siling sang Kordero.

35 Kay, tan-awa, siling sang Kordero: Igapakita ko ang akon kaugalingon sa imo kaliwatan, agud nga magasulat sila sang madamo nga butang nga akon igapahayag sa ila, nga mangin maathag kag importante; kag pagkatapos nga malaglag ang imo kaliwatan, kag mag-usmod sa pagkawala’y pagtuo, kag amo man ang kaliwatan sang imo mga kauturan, tan-awa, ining mga butang pagataguon, agud nga maggwa sa mga Gentil, paagi sa dulot kag gahum sang Kordero.

36 Kag sa mga ini igasulat ang akon ebanghelyo, siling sang Kordero, kag akon bato kag akon kaluwasan.

37 Kag bulahan sila nga magapaninguha sa pagpahamtang sang akon Sion sa sina nga adlaw, kay mangin ila ang dulot kag ang gahum sang Balaan nga Espiritu; kag kon magpadayon sila tubtob sa katapusan pagabayawon sila sa katapusan nga adlaw, kag maluwas sa wala’y katubtuban nga ginharian sang Kordero; kag kon sin-o man ang magabantala sang paghidaet, huo, sang mga balita sang dako nga kalipay, mangin daw ano katahum sa ila sa ibabaw sang mga bukid.

38 Kag natabo ini nga nakita ko ang nagkalabilin sang kaliwatan sang akon mga kauturan, kag amo man ang libro sang Kordero sang Dios, nga naghalin sa baba sang Judio, nga naggwa ini halin sa mga Gentil padulong sa nabilin sang kaliwatan sang akon mga kauturan.

39 Kag pagkatapos nga nakaabot ini sa ila nakita ko ang iban pa nga mga libro, nga nag-abot paagi sa gahum sang Kordero, halin sa mga Gentil padulong sa ila, tuhoy sa pagpapati sa mga Gentil kag sa nagkalabilin sang kaliwatan sang akon mga kauturan, kag amo man sang mga Judio nga ginpanglapta sa bug-os nga ibabaw sang duta, nga ang mga kasulatan sang mga propeta kag sang dose ka apostoles sang Kordero matuod.

40 Kag ang anghel naghambal sa akon nga nagasiling: Ining katapusan nga mga kasulatan, nga imo nakita sa tunga sang mga Gentil, magapalig-on sang kamatuoran sang nauna, nga naghalin sa dose ka apostoles sang Kordero, kag magapahibalo sang maathag kag importante nga mga butang nga kinuha sa mga ini; kag magapahibalo sa tanan nga kaliwat, lengguahe, kag katawhan, nga ang Kordero sang Dios amo ang Anak sang Wala’y Katapusan nga Amay, kag ang Manluluwas sang kalibutan; kag nga ang tanan nga tawo kinahanglan gid nga magpalapit sa iya, indi gani indi sila maluwas.

41 Kag kinahanglan gid sila nga magpalapit suno sa mga pulong nga pagalig-unon sang baba sang Kordero; kag ang mga pulong sang Kordero igapahibalo sa mga kasulatan sang imo kaliwatan, kag amo man sa mga kasulatan sang dose ka apostoles sang Kordero; gani pareho sila nga pagalig-unon sa isa; kay may isa lamang ka Dios kag isa ka Manugpahalab sa bug-os nga duta.

42 Kag magaabot ang tion nga igapakita niya ang iya kaugalingon sa tanan nga nasyon, sa mga Judio kag amo man sa mga Gentil; kag pagkatapos nga mapakita niya ang iya kaugalingon sa mga Judio kag amo man sa mga Gentil, igapakita niya ang iya kaugalingon sa mga Gentil kag amo man sa mga Judio, kag ang naulihi magauna, kag ang nauna maulihi.