1 ’E a muri a’era, mai te mea e fa’aro’o te mau ’Ētene i te ’Ārenio a te Atua i taua mahana ra, e fa’a’ite mai ai ’oia iāna iho ia rātou nā roto i te parau, ’e nā roto ato’a i te mana, ’e te ’ohipa, nō te fa’a’orera’a i tō rātou ra mau turorira’a—

2 ’E ’ia ’ore rātou ’ia fa’a’eta’eta i tō rātou ’ā’au i te ’Ārenio a te Atua, e tai’ohia rātou i rotopū i te hua’ai o tō ’oe ra metua tāne, ’oia ïa, e tai’ohia rātou i rotopū i te ’utuāfare o ’Īserā’ela ; ’e e riro rātou ’ei nūna’a ha’amaita’ihia i ni’a i te fenua i fafauhia ra ē a muri noa atu ; e ’ore rātou e tu’u-fa’ahou-hia i raro i te fa’atītīra’a ; ’e e ’ore ho’i te ’utuāfare o ’Īserā’ela e ’āno’i-haere-hia.

3 ’E taua ’āpo’o rahi ra i ’ōhia nō rātou e taua ’ēkālesia rahi ra ’e te vi’ivi’i, ’e ’o tei fa’ati’ahia e te diabolo ’e tāna ra mau tamari’i, ’ia ti’a iāna ’ia arata’i ’ē atu i te mau vārua o te ta’ata i raro i hade—’oia ïa, taua ’āpo’o rahi ra i ’ōhia nō te ha’amou i te mau ta’ata, e fa’a’īhia ïa i te mau ta’ata i’ō i te reira ; ’e e ha’amou-roa-hia rātou, tē nā reira mai ra te ’Ārenio a te Atua ; e ’ere i te ha’amoura’a o te vārua, maori rā ’o te hurira’a ïa i roto i taua hade hope ’ore ra.

4 Inaha ho’i, e au te reira i te fa’atītīra’a a te diabolo ra, ’e e au ato’a ho’i i te parauti’a a te Atua ra i ni’a i te feiā ato’a e rave i te ’ohipa parauti’a ’ore ’e te mau ’ohipa vi’ivi’i i mua iāna ra.

5 ’E i muri a’era, ’ua parau mai ra te melahi iā’u, ’ia Nephi, nā ’ō mai ra : ’Ua ’ite ’oe ē, mai te mea e tātarahapa te mau ’Ētene, e maita’i rātou ; ’e ’ua ’ite ato’a ’oe i te mau fafaura’a a te Fatu i te ’utuāfare o ’Īserā’ela ; ’e ’ua fa’aro’o ato’a ho’i ’oe ē, ’o tē ’ore e tātarahapa, e pohe ïa ’oia.

6 Nō reira, ’auē ho’i te mau ’Ētene ē, mai te mea e fa’a’eta’eta rātou i tō rātou ’ā’au i te ’Ārenio a te Atua.

7 E tae mai ho’i te tau, tē nā reira mai ra te ’Ārenio a te Atua, e rave ai au i te hō’ē ’ohipa rahi ’e te māere i rotopū i te mau tamari’i a te ta’ata nei ; te hō’ē ’ohipa ’o tē riro ’ei mea mure ’ore, i te hō’ē pae ’e ’aore rā i te tahi—nō te fa’a’ite-pāpū-ra’a ia rātou ’ia mā’iti i te hau ’e te ora mure ’ore, ’e ’aore rā i te vaiihora’a ia rātou i te ’eta’eta o tō rātou ’ā’au ’e te pōiri ho’i o tō rātou mau mana’o ē tae roa atu i te fa’atītīra’a, ’e te ha’amoura’a i te pae tino ’e te pae vārua ato’a ho’i, ’ia au i te fa’atītīra’a a te diabolo ’o tā’u i parau ra.

8 ’E i muri a’era, ’ia oti a’era tā te melahi paraura’a mai i teie mau parau ra, ’ua nā ’ō mai ra ’oia iā’u : Tē ha’amana’o ra ānei ’oe i te mau fafaura’a a te Metua i te ’utuāfare o ’Īserā’ela ra ? ’Ua parau atu ra vau iāna, ’Ē.

9 ’E i muri a’era, ’ua parau mai ra ’oia iā’u : ’A hi’o na, ’a hi’o na i taua ’ēkālesia rahi ’e te vi’ivi’i, ’oia te metua vahine nō te mau ’ohipa vi’ivi’i, ’e ’o te diabolo ho’i tōna fa’atere.

10 ’E ’ua parau mai ra ’oia iā’u : Inaha, tē vai nei e piti noa iho ’ēkālesia ; te hō’ē ra, ’o te ’ēkālesia ïa a te ’Ārenio a te Atua, ’e te tahi ra, ’o te ’ēkālesia ïa a te diabolo ; nō reira, ’o ’oia ’o tē ’ore e fāri’i i te ’ēkālesia a te ’Ārenio a te Atua, nō taua ’ēkālesia rahi ra ïa ’oia, ’oia te metua vahine nō te mau ’ohipa vi’ivi’i ; ’o te vahine tai’ata ho’i ’oia o te ao ato’a nei.

11 ’E i muri a’era, ’ua hi’o atu ra vau ’e ’ua ’ite atu ra i te vahine tai’ata o te ao ato’a nei, ’e tē pārahi ra ’oia i ni’a i te mau pape e rave rahi ; ’e e mana tōna i ni’a iho i te fenua ato’a nei, i rotopū i te mau nūna’a ato’a, te mau ’ōpū ato’a, te mau reo ato’a, ’e te mau ta’ata ato’a.

12 ’E i muri a’era, ’ua ’ite atu ra vau i te ’ēkālesia a te ’Ārenio a te Atua, e mea iti roa ho’i tōna mau melo, nō te mau ’ohipa parauti’a ’ore ’e te mau ’ohipa vi’ivi’i a te vahine tai’ata i pārahi i ni’a i te mau pape e rave rahi ra ; ’āre’a rā, ’ua ’ite atu vau i te ’ēkālesia a te ’Ārenio, ’oia ho’i te feiā mo’a o te Atua, i ni’a ato’a rātou i te ao ato’a nei ; ’e e mea iti roa tō rātou mau mana i ni’a i te fenua nei, nō te mau ’ohipa parauti’a ’ore a te vahine tai’ata rahi ’o tā’u i ’ite.

13 ’E i muri a’era, ’ua ’ite atu ra vau i te metua vahine rahi nō te mau ’ohipa vi’ivi’i i te ha’aputuputura’a mai i te mau pupu ta’ata i ni’a i te fenua ato’a ra, i rotopū i te mau nūna’a ato’a o te mau ’Ētene, nō te tama’i mai i te ’Ārenio a te Atua ra.

14 ’E i muri a’era, ’ua ’ite atu ra vau, ’o Nephi, i te mana o te ’Ārenio a te Atua i te poura’a mai i ni’a iho i te feiā mo’a o te ’ēkālesia a te ’Ārenio ra, ’e i ni’a iho ho’i i te feiā i fafau atu i te Fatu, ’o tei ha’apurarahia nā roto i te ao ato’a nei ; ’e ’ua fa’a’ahuhia rātou i te parauti’a ’e te mana o te Atua ma te hanahana rahi.

15 ’E i muri a’era, ’ua ’ite atu ra vau i te riri ’ū’ana o te Atua i te nīni’ira’ahia mai i ni’a iho i taua ’ēkālesia rahi ’e te vi’ivi’i ra, ’e nō reira ho’i ’ua tupu a’era te mau tama’i ’e te mau parau tama’i i rotopū i te mau nūna’a ato’a ’e te mau ’ōpū ato’a o te ao nei.

16 ’E ’a tupu ai te mau tama’i ’e te mau parau tama’i i rotopū i te mau nūna’a ato’a o te metua vahine nō te mau ’ohipa vi’ivi’i ra, ’ua parau mai ra te melahi iā’u, nā ’ō mai ra : Inaha, tei ni’a iho te riri ’ū’ana o te Atua i te metua vahine o te mau vahine tai’ata ; ’E inaha, ’ua ’ite ho’i ’oe i taua mau mea nei—

17 ’E ’ia tae mai te mahana e nīni’ihia mai ai te riri ’ū’ana o te Atua i ni’a iho i te metua vahine o te mau vahine tai’ata, ’oia ho’i te ’ēkālesia rahi ’e te vi’ivi’i o te ao ato’a nei, ’e ’o te diabolo ho’i tōna fa’atere, ’e i taua mahana ra e ha’amatahia ai te ’ohipa a te Metua, i te fa’aineinera’a i te ’ē’a nō te fa’atupura’a i tāna mau fafaura’a, ’o tāna i fa’aau i tōna ra mau ta’ata nō te ’utuāfare o ’Īserā’ela.

18 ’E i muri a’era, ’ua parau mai ra te melahi iā’u, nā ’ō mai ra : ’A hi’o na !

19 ’E ’ua hi’o atu ra vau ’e ’ua ’ite atu ra i te hō’ē ta’ata, ’e ’ua fa’a’ahuhia ’oia i te ’ahu teatea.

20 ’E ’ua parau mai ra te melahi iā’u : ’A hi’o na i te hō’ē o te tino ’ahuru ’e ma piti ’āpōsetolo a te ’Ārenio.

21 Inaha, e ’ite ’oia ’e e pāpa’i ho’i ’oia i te toe’a o teie mau mea ; ’oia ïa, ’e te tahi atu ā mau mea i tupu ’ē na.

22 ’E e pāpa’i ato’a ho’i ’oia nō ni’a i te hope’a o te ao nei.

23 Nō reira, e mea tano ’e e parau mau ho’i te mau mea tāna e pāpa’i ; ’E inaha, ’ua pāpa’ihia ïa i roto i te buka tā ’oe i hi’o i te taera’a mai nā roto mai i te vaha o te ’āti Iuda ra ; ’e i te tau i tae mai ai te reira nā roto mai i te vaha o te ’āti Iuda ra, ’oia ho’i, i te tau i tae mai ai taua buka ra nā roto mai i te vaha o te ’āti Iuda ra, e mea pāpū ’e te ti’a, ’e te faufa’a rahi ’e te ’ite-’ōhie-hia e te mau ta’ata ato’a te mau mea i pāpa’ihia ra.

24 ’E inaha, te mau mea tā teie ’āpōsetolo a te ’Ārenio e pāpa’i, ’o te mau mea ïa e rave rahi tā ’oe i ’ite ; ’e inaha, e ’ite ato’a ’oe i te toe’a ra.

25 ’Āre’a rā te mau mea tā ’oe e ’ite a muri a’e, ’eiaha ’oe e pāpa’i ; nō te mea ’ua fa’atōro’a te Fatu te Atua i te ’āpōsetolo a te ’Ārenio a te Atua ’ia pāpa’i ’oia i te reira.

26 ’Ua fa’a’ite ato’a na ’oia i te mau mea ato’a ia vetahi ’ē mau ta’ata i muta’a ihora, ’e nā rātou ho’i i pāpa’i i te reira ; ’e ’ua tā’atihia te reira ’ia fa’aho’ihia mai, ma te ruri-’ē-’ore-hia, ’e mai te au i te parau mau i roto i te ’Ārenio ra, ’e i te tau mau o te Fatu ra, i te ’utuāfare o ’Īserā’ela ra.

27 ’E ’ua fa’aro’o vau, ’o Nephi, ’e tē fa’a’ite pāpū nei ho’i au ē, ’o Ioane te i’oa o taua ’āpōsetolo a te ’Ārenio ra, ’o tei fa’a’itehia mai e te melahi ra.

28 ’E inaha, ’ua ’ōpanihia vau, ’o Nephi, ’ia pāpa’i i te toe’a o te mau mea tā’u i ’ite ’e i fa’aro’o ; nō reira ’ua nava’i ïa te mau mea i oti i te pāpa’ihia e au ra ; ’e ’ua pāpa’i ho’i au i te hō’ē pae iti nō te mau mea tā’u i ’ite ra.

29 ’E tē fa’a’ite pāpū atu nei au ē, ’ua ’ite ato’a vau i te mau mea tā tō’u metua tāne i ’ite ra, ’e nā te melahi a te Fatu i fa’a’ite mai i te reira iā’u.

30 ’E i teienei, tē fa’aoti nei au i te parau i te mau mea tā’u i ’ite, ’a vai noa ai au i raro a’e i te fa’aurura’a a te Vārua ; ’e noa atu ā ’aita i hope te mau mea ato’a tā’u i ’ite i te pāpa’ihia, e parau mau roa ïa te mau mea ato’a tā’u i pāpa’i. ’E ’oia mau roa. ’Āmene.