1 Kag matabo ini, nga kon ang mga Gentil magapamati sa Kordero sang Dios sa sina nga adlaw nga igapahayag niya ang iya kaugalingon sa ila sa pulong, kag amo man sa gahum, sa pagkamatuod, tubtob sa pagkuha sang ila mga kasandaran—

2 Kag indi magpatig-a sang ila mga tagipusuon batok sa Kordero sang Dios, pagaisipon sila sa tunga sang kaliwatan sang imo amay; huo, pagaisipon sila sa panimalay ni Israel; kag mangin isa sila ka ginpakamaayo nga katawhan sa duta nga ginpanaad sa wala’y katapusan; indi na sila pagdal-on sa pagkabihag; kag ang panimalay ni Israel indi na liwat magtalang-talang.

3 Kag inang dako nga buho, nga ginkutkot para sa ila sinang dako kag makangilil-ad nga simbahan, nga gintukod sang yawa kag sang iya mga anak, agud nga madala niya ang mga kalag sang mga tawo paidalom sa impiyerno—huo, inang dako nga buho nga ginkutkot para sa kalaglagan sang mga tawo mapuno sang mga nagkutkot sini, padulong sa ila lubos nga kalaglagan, siling sang Kordero sang Dios; indi ang kalaglagan sang kalag, luwas sa paghaboy sini sa sinang impiyerno nga wala sing katapusan.

4 Kay tan-awa, ini suno sa pagkabihag sang yawa, kag amo man suno sa hustisya sang Dios, sa tanan nga magahikot sang kalainan kag kangil-aran sa iya atubang.

5 Kag natabo ini nga ang anghel naghambal sa akon, si Nefi nga nagasiling: Imo nakita nga kon ang mga Gentil magahinulsol mangin maayo ini sa ila; kag imo man nahibal-an ang parte sa mga kasugtanan sang Ginuo sa panimalay ni Israel; kag imo man nabatian nga kon sin-o man ang indi maghinulsol pat-od gid nga madula.

6 Gani, kalisud sa mga Gentil kon patig-ahon nila ang ila mga tagipusuon batok sa Kordero sang Dios.

7 Kay ang tion magaabot, siling sang Kordero sang Dios, nga magahikot ako sing isa ka dako kag isa ka dalayawon nga buluhaton sa tunga sang mga anak sang katawhan; isa ka buluhaton nga mangin wala’y katubtuban, sa isa man ka bahin ukon sa pihak—sa pagpapati sa ila padulong sa paghidaet kag kabuhi nga wala’y katapusan, ukon padulong sa pagtugyan sa ila sa katig-a sang ila mga tagipusuon kag pagkabulag sang ila mga kaisipan padulong sa pagdala sa ila sa pagkabihag, kag amo man sa kalaglagan, nga dutan-on kag espirituhanon, suno sa pagkabihag sang yawa, nga akon ginhambal.

8 Kag natabo ini nga sang makahambal ang anghel sining mga pulong, nagsiling sia sa akon: Nadumduman mo bala ang mga kasugtanan sang Amay sa panimalay ni Israel? Nagsiling ako sa iya, Huo.

9 Kag natabo ini nga nagsiling sia sa akon: Tuloka, kag tan-awa inang dako kag makangilil-ad nga simbahan, nga amo ang iloy sang mga kangil-aran, nga ang tagtukod sini amo ang yawa.

10 Kag nagsiling sia sa akon: Tan-awa, may duha gid lamang ka simbahan; ang isa amo ang simbahan sang Kordero sang Dios, kag ang isa naman amo ang simbahan sang yawa; gani, kon sin-o man ang wala naisip nga miyembro sang simbahan sang Kordero sang Dios naisip sa sinang dako nga simbahan, nga amo ang iloy sang mga kangil-aran; kag sia ang makihilawason sang bug-os nga duta.

11 Kag natabo ini nga nagtulok ako kag nakita ang makihilawason sang bug-os nga duta, kag nagapungko sia sa madamo nga mga tubig; kag may gahum sia sa bug-os nga duta, sa tunga sang mga nasyon, mga kaliwat, mga lengguahe, kag katawhan.

12 Kag natabo ini nga nakita ko ang simbahan sang Kordero sang Dios, kag diutay lang ang kadamuon sini, tungod sang kalainan kag mga kangil-aran sang makihilawason nga nagapungko sa madamo nga mga tubig; apang, nakita ko nga ang simbahan sang Kordero, nga amo ang mga santos sang Dios, yara man sa bug-os nga ibabaw sang duta; kag ang ila mga nasakopan sa ibabaw sang duta diutay lang, tungod sang kalainan sang dakong makihilawason nga akon nakita.

13 Kag natabo ini nga nakita ko nga ang dakong iloy sang mga kangil-aran nagtipon sang mga kadam-an sa ibabaw sang bug-os nga duta, sa tunga sang tanan nga mga nasyon sang mga Gentil, sa pagpakig-away batok sa Kordero sang Dios.

14 Kag natabo ini nga ako, si Nefi, nakakita sang gahum sang Kordero sang Dios, nga nagpanaog ini sa mga santos sang simbahan sang Kordero, kag sa katawhan sang kasugtanan sang Ginuo, nga ginpanglapta sa bug-os nga ibabaw sang duta; kag naarmasan sila sang pagkamatarong kag kaupod ang gahum sang Dios sa dako nga himaya.

15 Kag natabo ini nga nakita ko nga ang kaakig sang Dios ginbubo sa sinang dako kag makangilil-ad nga simbahan, sa bagay nga may mga giyera kag mga huring-huring sang mga giyera sa tanan nga nasyon kag kaliwat sang duta.

16 Kag tungod nagsugod ang mga giyera kag mga huring-huring sang mga giyera sa tunga sang tanan nga nasyon nga iya sang iloy sang mga kangil-aran, ang anghel naghambal sa akon nga nagasiling: Tan-awa, ang kaakig sang Dios yara sa iloy sang mga makihilawason; kag tan-awa, nakita mo ang tanan sining mga butang—

17 Kag kon ang adlaw magaabot nga ang kaakig sang Dios igabubo sa iloy sang mga makihilawason, nga amo ang dako kag makangilil-ad nga simbahan sang bug-os nga duta, nga ang tagtukod sini amo ang yawa, dayon, sa sina nga adlaw, ang buluhaton sang Amay magasugod, sa paghanda sang dalan para sa katumanan sang iya mga kasugtanan, nga iya ginhimo sa iya katawhan nga iya sang panimalay ni Israel.

18 Kag natabo ini nga ang anghel naghambal sa akon nga nagasiling: Tuloka!

19 Kag nagtulok ako kag nakita ang isa ka lalaki, kag nagasuksok sia sing isa ka puti nga panapton.

20 Kag ang anghel nagsiling sa akon: Tan-awa ang isa sang dose ka apostoles sang Kordero.

21 Tan-awa, makita niya kag isulat ang nabilin sining mga butang; huo, kag amo man ang madamo pa nga butang nga nagkalatabo na.

22 Kag magasulat man sia parte sa katapusan sang kalibutan.

23 Gani, ang mga butang nga iya igasulat matarong kag matuod; kag tan-awa ginasulat ang mga ini sa libro nga imo nakita nga nagagwa sa baba sang Judio; kag sa tion nga magagwa ang mga ini sa baba sang Judio, ukon, sa tion nga ang libro magagwa sa baba sang Judio, ang mga butang nga ginsulat maathag kag puraw, kag labing importante kag mahapos sa panghangop sang tanan nga tawo.

24 Kag tan-awa, ang mga butang nga igasulat sining apostoles sang Kordero amo ang madamo nga butang nga imo nakita; kag tan-awa, imo makita ang nabilin.

25 Apang ang mga butang nga imo makita pagkatapos sini indi mo pag-isulat; kay ang Ginuong Dios nag-ordin sang apostoles sang Kordero sang Dios agud nga sia ang magsulat sang mga ini.

26 Kag amo man sa iban pa sadto, sa ila ginpakita niya ang tanan nga butang, kag ginsulat nila ang mga ini; kag ginselyohan ang mga ini agud nga maggwa ang mga ini sa ila kaputli, suno sa kamatuoran nga yara sa Kordero, sa kaugalingon nga natalana nga tion sang Ginuo, padulong sa panimalay ni Israel.

27 Kag ako, si Nefi, nakabati kag nagapamatuod, nga ang ngalan sang apostoles sang Kordero amo si Juan, suno sa pulong sang anghel.

28 Kag tan-awa, ako, si Nefi, gindumilian nga isulat ko ang nabilin sang mga butang nga akon nakita kag nabatian; gani ang mga butang nga akon ginsulat tama na sa akon; kag ginsulat ko ang diutay nga bahin lamang sang mga butang nga akon nakita.

29 Kag nagapamatuod ako nga nakita ko ang mga butang nga nakita sang akon amay, kag ang anghel sang Ginuo amo ang nagpahibalo sang mga ini sa akon.

30 Kag karon ginatapos ko na ang pagsugid parte sang mga butang nga akon nakita samtang gindala ako sa Espiritu; kag kon ang tanan nga butang nga akon nakita wala masulat, ang mga butang nga akon nasulat matuod. Kag gani amo sini. Amen.