1 Ut kik’ulman naq chirix naq laa’in, aj Nefi, kink’ame’ chaq sa’ li Musiq’ej, ut kiwil chixjunil li k’a’aq re ru a’in, kinsutq’i sa’ lix muheb’aal t’ikr lin yuwa’.

2 Ut kik’ulman naq ke’wil li was, ut yookeb’ chixwech’inkil rib’ chirib’ileb’ rib’ chirix li k’a’aq re ru kiraatinaheb’ wi’ chaq lin yuwa’.

3 Xb’aan naq relik chi yaal naq a’an kixye k’iila xninqal ru na’leb’ reheb’, li ch’a’aj xtawb’al ru, wi ink’a’ taapatz’oq jun li winq chiru li Qaawa’; ut eb’ a’an rik’in naq kaweb’ li raam, ink’a’ neke’xsik’ li Qaawa’ jo’ li tento raj chiruheb’.

4 Ut anajwan laa’in, aj Nefi, kiraho’ inch’ool sa’ xk’ab’a’ lix kawileb’ li raam, ut jo’kan ajwi’, sa’ xk’ab’a’ li k’a’aq re ru wilom chaq, ut kinnaw naq taak’ulmanq chi maak’a’ xjalb’al, sa’ xk’ab’a’ xnimal lix maa’usilaleb’ li ralal xk’ajoleb’ li winq.

5 Ut kik’ulman naq kinlukta sa’ xk’ab’a’ lin ch’a’ajkilal, xb’aan naq kink’oxla naq q’axal nim wi’chik inch’a’ajkilal chiru chixjunil, xb’aan lix sachlijik lin tenamit, xb’aan naq wilom chaq lix t’anikeb’.

6 Ut kik’ulman naq chirix naq kink’ul wi’chik inmetz’ew, kiwaatinaheb’ li was, kiwaj xnawb’al rik’ineb’ k’a’ut naq yookeb’ chixwech’inkil rib’.

7 Ut eb’ a’an ke’xye: K’e reetal, ink’a’ nokoru chixtawb’al xyaalal li aatin ki’aatinak wi’ li qayuwa’ chirix lix tz’aqal uq’ lix toonal li che’ olivo, ut jo’kan ajwi’ chirixeb’ laj Gentil.

8 Ut laa’in kinye reheb’: Ma xexpatz’ok chiru li Qaawa’?

9 Ut eb’ a’an ke’xye we: Ink’a’ xqapatz’; xb’aan naq li Qaawa’ moko naxk’e ta chiqanaw xkomon li na’leb’ a’an.

10 K’ehomaq reetal, laa’in kinye reheb’: K’a’ put naq ink’a’ nekepaab’ lix taqlahom li Qaawa’? K’a’ put naq tex’oso’q, sa’ xk’ab’a’ lix kawil eeraam?

11 Ma ink’a’ jultik eere li k’a’aq re ru kixye li Qaawa’?—Wi ink’a’ teekawob’resi lee raam, ut wi texpatz’oq we rik’in paab’aal, rik’in xpaab’ankil naq teek’ul, chi yalb’il eeq’e chixpaab’ankil lin taqlahom, relik chi yaal naq taak’ehe’q chenaw li na’leb’ a’in.

12 K’ehomaq reetal, ninye eere, naq lix junkab’al laj Israel kijuntaq’eetaak rik’in jun xtoonal li che’ olivo, xb’aan lix Musiq’ li Qaawa’ li kiwan rik’in li qayuwa’, ut k’ehomaq reetal, ma ink’a’ tab’i’ toqb’ilo chaq sa’ lix junkab’al laj Israel, ut ma maawa’o tab’i’ jun ruq’ lix toonal lix junkab’al laj Israel?

13 Ut anajwan, li k’a’ru naraj naxye li qayuwa’ chirix xletzb’al wi’chik lix tz’aqal uq’ lix toonal xb’aan lix tz’aqalileb’ laj Gentil, a’an naq sa’ roso’jik li kutan, naq akaq xe’laj li qiyajil chi maak’a’aqeb’ xpaab’aal, relik chi yaal, chiru xnumik k’iila chihab’, ut k’iila tasal tenamit chirix naq li Mesias taak’utb’esimanq sa’ li tz’ejwalej chiruheb’ li ralal xk’ajoleb’ li winq, chirix a’an taawulaq lix tz’aqalil lix evangelio li Mesias rik’ineb’ laj Gentil, ut taachalq chaq rik’ineb’ laj Gentil, taaxik rik’in li rela’eb’ li qiyajil—

14 Ut sa’ li kutan a’an, te’xnaw li rela’eb’ li qiyajil naq wankeb’ sa’ lix junkab’al laj Israel, ut naq a’aneb’ lix tenamit li Qaawa’ re li sumwank; toja’ ut naq te’xnaw ut te’k’ame’q chixnawb’al chirixeb’ lix xe’toonileb’, jo’ ajwi’ chixnawb’al chirix lix evangelio laj Tojoleb’ rix, li kich’olob’aak chiruheb’ lix yuwa’ xb’aan ajwi’ a’an; jo’kan ut, te’k’ame’q chixnawb’al chirix laj Tojol rixeb’, jo’ ajwi’ tz’aqal li jar raqal re lix tzol’leb’, re te’xnaw chan ru naq te’chalq rik’in a’an ut te’kole’q.

15 Toja’ ut naq sa’ li kutan a’an ma ink’a’ te’saho’q sa’ xch’ool ut te’xnima ru lix Dios li junelik nawan, a’an lix saqoonaq ut lix kolb’aleb’? Relik chi yaal, sa’ li kutan a’an, ma ink’a’ te’xk’ul xmetz’eweb’ ut xch’olaninkileb’ rik’in li tz’aqal toon che’? Relik chi yaal, ma ink’a’ te’ok sa’ lix tz’aqal korral li Dios?

16 K’ehomaq reetal, ninye eere, Hehe’; te’k’ehe’q wi’chik chi jultikaak sa’ xyanq lix junkab’al laj Israel; te’letze’q wi’chik, jo’ xtz’aqal uq’ lix toonal li che’ olivo, sa’ lix tz’aqal toonal li che’ olivo.

17 Ut a’in li naraj naxye li qayuwa’; ut naraj naxye naq ink’a’ taak’ulmanq toj reetal naq te’jek’iiq xb’aaneb’ laj Gentil, ut naraj naxye naq taa’uxmanq rik’in ruq’eb’ laj Gentil, re naq li Qaawa’ tixk’ut lix wankilal chiruheb’ laj Gentil, xb’aan ajwi’ naq a’an taatz’eqtaanaaq xb’aaneb’ laj Judio, malaj xb’aan lix junkab’al laj Israel.

18 Jo’kan ut, li qayuwa’ moko ka’aj ta wi’ chirixeb’ li qiyajil ki’aatinak, chirix aj b’an wi’ chixjunil lix junkab’al laj Israel, rik’in xk’utb’al xyaalal li sumwank li taatz’aqloq ru sa’ roso’jik li kutan, a’an li sumwank kixk’uub’ li Qaawa’ rik’in laj Abraham li qayuwa’, li naxye: Rik’ineb’ laa wiyajil te’osob’tesiiq chixjunileb’ li junkab’al re li ruchich’och’.

19 Ut kik’ulman naq laa’in, aj Nefi, naab’al kiwaatinaheb’ chirix li k’a’aq re ru a’in; relik chi yaal, kiwaatinaheb’ chirix lix k’ojlajikeb’ wi’chik laj Judio sa’ roso’jikeb’ li kutan.

20 Ut kinnumsi chiruheb’ li raatin laj Isaias, li ki’aatinak chirix lix k’ojlajikeb’ wi’chik laj Judio, malaj lix junkab’al laj Israel; ut chirix naq xe’k’ojob’aak wi’chik ink’a’ chik te’sache’q xna’leb’, chi moko chik te’jek’iiq. Ut kik’ulman naq kinye k’iila aatin reheb’ li was, jo’kan naq ke’tuqub’aak xch’ool ut ke’xtuulanob’resi rib’ chiru li Qaawa’.

21 Ut kik’ulman naq kine’raatina wi’chik, ut ke’xye: K’a’ru xyaalal li na’leb’ a’in kiril li qayuwa’ sa’ jun li matk’? K’a’ru xyalal lix toonal li che’ li kiril?

22 Ut laa’in kinye reheb’: A’an reetalil li che’ re li yu’am.

23 Ut eb’ a’an ke’xye we: K’a’ru xyaalal li b’arb’ookil ch’iich’ kiril li qayuwa’, li naxk’am rik’in lix toonal li che’?

24 Ut laa’in kinye reheb’ naq a’an li raatin li Dios; ut ani te’ab’inq chiru li raatin li Dios, ut te’chapoq chiru chi kaw, maajo’q’e te’oso’q, chi moko taaruuq taanumtaaq sa’ xb’eeneb’ li aleek ut li lochlookil tzimaj re li xik’ na’ilok reheb’ re te’mutz’e’q ru, re xk’amb’aleb’ xb’e sa’ li sache’k.

25 Jo’kan naq laa’in, aj Nefi, kin’elajin chiruheb’ naq che’xk’ehaq xxik rik’in li raatin li Qaawa’; relik chi yaal, kin’elajin chiruheb’ chi anchal lix metz’ew li waam, ut rik’in chixjunil li seeb’al li wan wik’in, naq te’xk’e xxik rik’in li raatin li Dios ut taajultiko’q reheb’ naq te’xpaab’ junelik lix taqlahom sa’ chixjunil li k’a’aq re ru.

26 Ut eb’ a’an ke’xye we: K’a’ru xyaalal lix ha’il li nima’ li kiril li qayuwa’?

27 Ut laa’in kinye reheb’ naq li ha’ kiril lin yuwa’ a’an tz’ajleb’aal ru; ut maak’a’jo’ naq laatz’anb’il lix k’a’uxl rik’in k’a’aq chik re ru, jo’kan naq ink’a’ kixk’e reetal lix tz’ajnil ru li ha’.

28 Ut kinye reheb’ naq a’an jun li jul xuwajel rilb’al, li naxjacheb’ ru laj maak rik’in lix toonal li che’ re li yu’am, ut jo’kan ajwi’ rik’ineb’ laj santil paab’anel re li Dios.

29 Ut kinye reheb’ naq a’an reetalil li xuwajel xb’alb’a a’an, li kixye wi’ we li anjel naq kawresinb’il choq’ reheb’ laj maak.

30 Ut kinye ajwi’ reheb’ naq li qayuwa’ kiril ajwi’ naq lix tiik ruhil na’leb’ li Dios kixjach ajwi’ ruheb’ laj maak rik’ineb’ li tiikeb’ xch’ool; ut lix lemtz’unkil ru chanchan lix lemtz’unkil jun li xam naxamnak, li nataqe’ chiru li Dios chi junelik q’e kutan, ut maajun roso’jik wan.

31 Ut eb’ a’an ke’xye we: Ma naraj naxye li na’leb’ a’in li rahilal naxk’ul li tz’ejwalej sa’ xkutankil lix yalb’al rix, malaj ma naraj naxye lix wanjik li aamej sa’ roso’jik, chirix lix kamik li tz’ejwalej sa’ li yu’am a’in, malaj ut na’aatinak chirix li k’a’aq re ru re li yu’am a’in?

32 Ut kik’ulman naq laa’in kinye reheb’ naq a’an jun reetalil li k’a’aq re ru re li yu’am a’in jo’ ajwi’ re li musiq’ej; xb’aan naq taachalq li kutan naq tento taaraqmanq aatin chirixeb’ xb’aan lix k’anjeleb’, relik chi yaal, li k’anjel b’aanunb’il ajwi’ xb’aan li tz’ejwalej re li yu’am a’in, sa’ xkutankil lix yalb’aleb’ rix.

33 Jo’kan ut, wi te’kamq sa’ xmaa’usilaleb’ tento ajwi’ te’tz’eqe’q, chirix li k’a’aq re ru re li musiq’ej, a’an li naxk’am rib’ rik’in li tiikilal; jo’kan naq tento te’k’ame’q chaq chi xaqliik chiru li Dios, re taaraqmanq aatin chirixeb’ xb’aan xk’anjeleb’; ut wi tz’ajnil chaq lix k’anjeleb’, tz’ajaqeb’ ajwi’ ru naq tento te’kanaaq; ut wi tz’ajeb’ ru, tento naq ink’a’ neke’ru chi wank sa’ li rawa’b’ejihom li Dios; wi ta jo’kan, tz’aj raj ajwi’ ru li rawa’b’ejihom li Dios.

34 A’b’anan k’ehomaq reetal, ninye eere, li rawa’b’ejihom li Dios moko tz’aj ta ru, ut maak’a’ k’a’ru tz’aj naru taa’ok sa’ li rawa’b’ejihom li Dios; jo’kan naq tento taawanq jun xna’aj li tz’ajnil, kawresinb’il choq’ re li k’a’ru tz’aj.

35 Ut wan jun li na’ajej kawresinb’il, relik chi yaal, a’an li xuwajel xb’alb’a a’an li kin’aatinak wi’, ut a’an laj tza laj k’uub’anel re; jo’kan naq lix wanjikeb’ li raameb’ li winq sa’ roso’jik, a’an naq te’wanq sa’ li rawa’b’ejihom li Dios, malaj te’isiiq chaq sa’ xk’ab’a’ li tiik ruhil na’leb’ a’an li kin’aatinak wi’.

36 Jo’kan ut, tz’eqtaananb’ileb’ laj maak chiruheb’ li tiikeb’ xch’ool, ut chiru ajwi’ lix toonal li che’ a’an re li yu’am, li q’axal wi’chik loq’ ut q’axal wi’chik atawal ru chiru chixjunil chik li ru che’; relik chi yaal, ut a’an li q’axal nim reheb’ chixjunil li maatan re li Dios. Ut chi jo’ka’in kiwaatinaheb’ li was. Amen.