1 ’E i muri a’era, i muri iho i to’u, ’o Nephi, ’āfa’i-’ē-ra’a-hia atu e te Vārua, ’e tō’u ’itera’a i teie mau mea ato’a ra, ’ua ho’i atu ra vau i te ti’ahapa o tō’u ra metua tāne.

2 ’E i muri a’era, ’ua ’ite atu ra vau i tō’u nā tua’ana, ’e tē mārō ra rāua te tahi i te tahi nō ni’a i te mau mea tā tō’u metua tāne i parau atu ia rāua.

3 ’Oia mau ho’i, e rave rahi te mau mea rahi tāna i parau atu ia rāua, ’aore e ’itea-pāpū-hia maori rā ’ia ani atu te ta’ata i te Fatu ; ’e nō te ’eta’eta o tō rāua ’ā’au, nō reira ’aita rāua i ani atu i te Fatu mai tei ti’a ia rāua.

4 ’E i teienei, ’ua ’oto vau, ’o Nephi, nō te ’eta’eta o tō rāua ’ā’au, ’e nō te mau mea ho’i tā’u i ’ite ra, ’e ’ua ’ite ho’i au ē, e tupu mau ā taua mau mea ra nō te mau ’ohipa parauti’a ’ore rahi ho’i a te mau tamari’i a te ta’ata nei.

5 ’E i muri a’era, ’ua paruparu ihora vau nō tō’u mau ’ati, ’e ’ua mana’o vau ē, ’ua hau atu tō’u mau ’ati i tō te mau ta’ata ato’a, nō te ha’amoura’ahia tō’u ra mau ta’ata, nō te mea ’ua ’ite au i tō rātou pau.

6 ’E i muri a’era, ’ia fāri’i au i te pūai, ’ua paraparau atu ra vau i tō’u ra nā tua’ana, nō te hina’aro ’ia ’ite i te tumu nō tā rāua mau mārōra’a.

7 ’E ’ua nā ’ō mai ra rāua : Inaha, ’aore roa māua i māramarama i te mau parau tā tō tātou metua tāne i parau mai nō ni’a i te mau ’āma’a mau o te tumu rā’au ’ōlive ra, ’e nō ni’a ato’a i te mau ’Ētene.

8 ’E ’ua parau atu ra vau ia rāua : ’Ua ani ānei ’ōrua i te Fatu ?

9 ’E ’ua parau mai ra rāua iā’u : ’Aita māua i ani, nō te mea ’aita roa te Fatu e fa’a’ite mai i te hō’ē mea mai te reira te huru ia māua.

10 Inaha, ’ua parau atu ra vau ia rāua : Nō te aha ho’i ’aita ’ōrua e ha’apa’o i te mau fa’auera’a a te Fatu ? Nō te aha ho’i ’ōrua i hina’aro ai ’ia pohe, nō te ’eta’eta o tō ’ōrua ’ā’au ?

11 ’Aita ānei ’ōrua e ha’amana’o ra i te mau mea tā te Fatu i parau mai ?—’ia ’ore ’ōrua ’ia fa’a’eta’eta i tō ’ōrua ’ā’au, ’e ’ia ani mai iā’u ma te fa’aro’o, ma te ti’aturi ē, e roa’a mai tā ’ōrua, ’e ma te ha’apa’o māite ho’i i tā’u ra mau fa’auera’a, e fa’a’ite-mau-hia ïa taua mau mea ra ia ’ōrua.

12 Inaha, tē parau atu nei au ia ’ōrua, ’ua fa’aauhia te ’utuāfare o ’Īserā’ela i te hō’ē tumu rā’au ’ōlive e te Vārua o te Fatu, tei roto i tō tātou metua tāne ; ’e inaha, ’aita ānei tātou i tāpū-’ē-hia mai i te ’utuāfare o ’Īserā’ela, ’e e ’ere ānei ho’i tātou i te tahi ’āma’a nō te ’utuāfare o ’Īserā’ela ra ?

13 ’E i teienei, ’o te aura’a teie nō te mau mea tā tō tātou metua tāne i parau mai nō te poira’a i te mau ’āma’a mau nā roto i te ’īra’a nō te mau ’Ētene ra, ’oia ho’i, ’ia tae i te mau mahana hope’a, ’a paruparu ai te fa’aro’o o tō tātou hua’ai, ’oia ïa, nō te ārea e rave rahi matahiti te maoro, ’e e rave rahi ho’i u’i i muri a’e i tō te Mesia fa’a’ite-tino-ra’a mai iāna i te mau tamari’i a te ta’ata nei, ’ei reira e tae mai ai te ’īra’a nō te ’evanelia a te Mesia i te mau ’Ētene ra, e mai te mau ’Ētene ra i te toe’a o tō tātou hua’ai—

14 ’E ’ia tae i taua mahana ra, e ’ite ai te toe’a o tō tātou hua’ai ē, nō te ’utuāfare o ’Īserā’ela rātou, ’e e feiā rātou ’o tei fafau atu i te Fatu ; ’e i reira rātou e ’ite ai ’e e māramarama ai nō ni’a i tō rātou mau hui tupuna, ’e e māramarama ato’a ai nō ni’a i te ’evanelia a tō rātou Tāra’ehara, ’o tāna i ha’api’i atu i tō rātou mau metua ; nō reira, e māramarama rātou nō ni’a i tō rātou Tāra’ehara ’e te mau parau tumu ho’i nō tāna ra mau ha’api’ira’a tumu, ’ia ’ite rātou i te rāve’a nō te haere mai iāna ra ’e ’ia fa’aorahia.

15 ’E i taua mahana ra, e’ita ānei rātou e ’oa’oa ’e e ha’amaita’i i tō rātou Atua mure ’ore, tō rātou papa ’e tō rātou fa’aorara’a ? ’Oia ïa, i taua mahana ra, e’ita ānei rātou, e fāri’i i te pūai ’e te itoito nō te vine mau ra ? ’Oia ïa, e’ita ānei rātou e haere mai i te nana mau a te Atua ra ?

16 Inaha, tē parau atu nei au ia ’ōrua, ’Oia ïa, e ha’amana’o-fa’ahou-hia rātou i rotopū i te ’utuāfare o ’Īserā’ela ra ; ’e e poihia rātou i roto i te tumu rā’au ’ōlive mau ra, nō te mea e ’āma’a mau rātou nō te tumu rā’au ’ōlive ra.

17 ’O te reira ïa tei mana’ohia e tō tātou ra metua tāne ; ’e tē mana’o ra ho’i ’oia ē, e’ita te reira e tupu ē tae noa atu i te tau e ha’apurarahia ai rātou e te mau ’Ētene ; ’e tē mana’o ra ho’i ’oia e tae mai te reira nā roto mai i te mau ’Ētene, ’ia ti’a i te Fatu ’ia fa’a’ite mai i tōna ra mana i te mau ’Ētene, nō te mea e pāto’ihia ’oia ’e te mau ’āti Iuda, ’oia ho’i, te ’utuāfare o ’Īserā’ela.

18 Nō reira, ’aita tō tātou metua tāne i parau nō ni’a i tō tātou ana’e hua’ai, i te ’utuāfare pā’āto’a rā o ’Īserā’ela, i te fa’a’itera’a mai i te fafaura’a e fa’atupuhia i te mau mahana hope’a ra ; ’oia ho’i te fafaura’a tā te Fatu i fafau i tō tātou metua tāne ra ia Aberahama, i te nā-’ō-ra’a mai ē : nā roto i tō ’oe ra hua’ai e ha’amaita’ihia ai te mau ’ōpū ato’a o te ao nei.

19 ’E i muri a’era, e rave rahi te parau ta’u, tā Nephi, i parau atu ia rāua nō ni’a i taua mau mea ra ; ’oia ïa, ’ua parau atu vau ia rāua nō ni’a i te fa’aho’ira’ahia o te mau ’āti Iuda i te mau mahana hope’a ra ;

20 ’E ’ua ha’apāpū vau ia rāua i te mau parau a Isaia, ’o tei parau nō ni’a i te fa’aho’ira’ahia o te mau ’āti Iuda, ’oia ho’i te ’utuāfare o ’Īserā’ela ; ’e ’ia fa’aho’ihia mai rātou, ’aita rātou e ’āno’i-haere-fa’ahou-hia, ’e ’aita ato’a ho’i e ha’apurara-fa’ahou-hia. ’E i muri a’era, e rave rahi mau parau tā’u i parau atu i tō’u ra nā tua’ana, ’e ’ua hau rāua ’e ’ua fa’aha’eha’a ihora ia rāua iho i mua i te Fatu ra.

21 ’E i muri a’era, ’ua parau fa’ahou mai ra rāua iā’u, nā ’ō mai ra : E aha te aura’a o teie mea tā tō tātou metua tāne i ’ite i roto i te moemoeā ? E aha ho’i te aura’a nō teie tumu rā’au tāna i ’ite ra ?

22 ’E ’ua parau atu ra vau ia rāua : E fa’aaura’a te reira i te tumu rā’au nō te ora.

23 ’E ’ua parau mai ra rāua iā’u : E aha te aura’a nō te ’āuri tāpe’ara’a tā tō tātou metua tāne i ’ite, ’o tē tae atu i te tumu rā’au ra ?

24 ’E ’ua parau atu ra vau ia rāua, ’o te parau ïa a te Atua ; ’e te ta’ata ato’a ’o tē ha’apa’o i te parau a te Atua ’e ’o tē mau māite i te reira, e ’ore ïa rātou e pohe, e ’ore ho’i te mau fa’ahemara’a ’e te mau ihe auahi a te enemi ra e ha’apōiri ia rātou, nō te arata’i ia rātou i te pohe.

25 Nō reira, ’ua a’o atu vau, ’o Nephi, ’ia rāua ’ia ha’apa’o i te parau a te Fatu ; ’oia ïa, ’ua a’o atu vau ia rāua ma te pūai ato’a o tō’u vārua, ’e ma te pa’ari ato’a i roto iā’u nei, ’ia ha’apa’o rāua i te parau a te Atua ’e ’ia ha’amana’o ho’i i te ha’apa’o i tāna mau fa’auera’a i te mau mea ato’a ma te tu’utu’u ’ore.

26 ’E ’ua parau mai ra rāua iā’u : E aha te aura’a nō te ’ānāvai pape tā tō tātou metua tāne i ’ite atu ?

27 ’Ua parau atu ra vau ia rāua, ’o te pape tā tō’u metua tāne i ’ite ra, ’o te vi’ivi’i ïa ; ’e nō te mea tei ni’a tōna mana’o i te tahi atu mau mea ’ē, i ’ore ai ’oia i ’ite i te vi’ivi’i o taua pape ra.

28 ’E ’ua parau atu ra vau ia rāua, ’o te ārea rahi ïa, ’o tei fa’ata’a ’ē atu i te feiā parauti’a ’ore i te tumu rā’au nō te ora ’e i te feiā mo’a ato’a ho’i o te Atua ra.

29 ’E ’ua parau atu ra vau ia rāua, ’ua fa’aauhia te reira i taua hade ri’ari’a ra ’o tā te melahi i parau mai iā’u ē ’ua ha’apa’ohia ïa nō te feiā parauti’a ’ore.

30 ’E ’ua parau atu ra vau ia rāua, ’e ’ua ’ite ato’a tō mātou metua tāne i te parauti’a o te Atua, tei fa’ata’a ’ē i te feiā parauti’a ’ore i te feiā parauti’a ; ’e ’ua au ho’i te hanahana o te reira i te auahi ura ra, ’o tē tae roa atu i ni’a i te Atua ra ē a muri ē a muri noa atu, ’aore ho’i e hope’a tō reira.

31 ’E ’ua parau mai ra rāua iā’u : ’Ua fa’aauhia ānei te reira i te mamae rahi o te tino i te mau mahana ’a ora ai te ta’ata i ni’a i teie nei ao, ’e ’aore rā ’ua fa’aauhia ānei te reira i te orara’a hope’a o te vārua i muri a’e i te pohera’a o te tino ta’ata nei, ’e ’aore rā e parau ana’e ānei te reira nō te mau mea o te tino nei ?

32 ’E i muri a’era, ’ua parau atu ra vau ia rāua, e fa’aaura’a te reira i te mau mea nō te pae tino nei ’e te pae vārua ho’i ; e tae mai ho’i te mahana ’ia ha’avāhia rātou i tā rātou ra mau ’ohipa e ti’a ai, ’oia ïa, i te mau ’ohipa tā rātou i rave i te tino nei i te mau mahana ’a pārahi ai rātou i te ao nei.

33 Nō reira, mai te mea e pohe rātou i roto i tā rātou mau ’ohipa parauti’a ’ore, e fa’a’erehia rātou i te mau mea pae vārua, ’oia ho’i i te mau mea parauti’a ; nō reira, ’ia ti’a rātou i mua i te Atua e ti’a ai, ’ia ha’avāhia nō tā rātou mau ’ohipa ; ’e mai te mea e mea vi’ivi’i tā rātou mau ’ohipa, tē vi’ivi’i noa ra ïa rātou ; ’e mai te mea tē vi’ivi’i noa ra rātou, e ’ore roa ïa rātou e pārahi i te bāsileia o te Atua ; ’āhiri rātou e pārahi i roto i te reira e vi’ivi’i ato’a ïa te bāsileia o te Atua.

34 Inaha rā, tē parau atu nei au ia ’ōrua, e ’ere te bāsileia o te Atua i te mea vi’ivi’i, ’e ’aita ho’i te hō’ē mea vi’ivi’i e ō atu i roto i te bāsileia o te Atua ; nō reira e mea ti’a roa ïa ’ia fa’aineinehia te hō’ē vāhi vi’ivi’i nō te mau mea vi’ivi’i.

35 ’E ’ua ha’apa’ohia ho’i te tahi vāhi, ’oia ïa, taua hade ri’ari’a tā’u i parau ra, ’e nā te diabolo ho’i i fa’aineine i te reira ; nō reira, ’ei te hope’a ra, e pārahi ai te vārua o te ta’ata i te bāsileia o te Atua ra, ’e ’aore rā, e hurihia ïa rātou i rāpae nō te parauti’a ho’i ’o tā’u i parau ra.

36 Nō reira, e fa’ata’ahia ai te feiā parauti’a ’ore i te feiā parauti’a, ’e i taua tumu rā’au nō te ora ato’a ho’i, ’e ’ua hau ’ē tōna hotu i te maita’i ’e te hina’arohia i tō te mau hotu ato’a, ’oia ïa, ’o te hōro’a rahi roa a’e ïa nō te mau hōro’a ato’a a te Atua. ’Ua nā reira vau i te parau atu i tō’u ra nā tua’ana. ’Āmene.