1 Ndien edikem ete ke ini ami, Nephi, mma ŋketre nditiŋ ikɔ nnɔ nditɔ eka mi iren, sese mmɔ edɔhɔ mi ete: Afo ɔmɔdɔhɔ nnyin mme ɔkpɔsɔŋ ŋkpɔ, awak akan se nnyin ikande iyɔ.

2 Ndien edikem ete ami ndɔhɔ mmɔ nte ke mmɔfiɔk ke ami ntiŋ mme mkpɔsɔŋ ŋkpɔ ye idiɔk owo, etiene akpanikɔ; ndien edinen owo ke ami nnam ikpe asana, ndien ntie ntiense nte ke ana emenere mmɔ ke akpatre usen; ke ntre, anam ndudue ada akpanikɔ nte edi ɔkpɔsɔŋ, koro enye esibede mmɔ esin ata ufɔt.

3 Ndien idaha emi nditɔ eka mi iren, edieke mbufo ekpedide ndinen owo enyuŋ enyime ndinam akpanikɔ, ndien ekpaŋ utɔŋ enɔ enye, man mbufo esaŋa nnen nnen ke iso Abasi, ndien mbufo idikunike ke ntak akpanikɔ, enyuŋ edɔhɔ ete: Afo etiŋ mme ɔkpɔsɔŋ ŋkpɔ ye nnyin.

4 Ndien edikem ete ami, Nephi, mma nteme nditɔ eka mi iren, ye kpukpru ifik, ete enim mme ibet Jehovah.

5 Ndien edikem ete mmɔ ema esuhɔre idem mmɔ ke iso Jehovah; tutu ami nyene idaresit ye mme akamba idorenyin ke mmɔ, ete ke mmɔ eye esaŋa ke mme usuŋ nnen nnen ido.

6 Idaha emi, kpukpru ŋkpɔ emi eke etiŋ enyuŋ enam nte ete mi eke odude ke tent ke ebedeŋ emi ekotde Lemuel.

7 Ndien edikem ete ami, Nephi, nda eyen anwan Ishmael kiet nte nwan; ndien nko, nditɔ eka mi iren eda nditɔ iban Ishmael nte iban; ndien nko Zoram ada eyen anwan Ishmael emi okponde akan nte nwan.

8 Ndien ke ntak oro ete mi ama enim kpukpru mme ibet Jehovah emi eke enɔde enye. Ndien nko, ami, Nephi, Jehovah ama ɔdiɔŋ mi ata eti eti.

9 Ndien edikem ete uyo Jehovah ɔdɔhɔ ete mi ke okoneyo, onyuŋ ɔnɔ enye uyo ete mkpɔŋ yak enye emen isaŋ esie aka ke wilderness.

10 Ndien edikem ete ete mi adaha ada ke usen ubɔk, onyuŋ aka ke usuŋ tent, ke akamba mkpaidem esie enye okut ke isɔŋ ekara ekara nyori emi ekedade ini enam; ndien enye eke edi eke ediye brass. Ndien ke esit nyɔri emi mme eto ufiak iba edu; ndien kiet owut usuŋ emi mmɔ anade nte eka ke wilderness.

11 Ndien edikem ete nnyin ima itaŋ ibok kiet kpukpru mme ŋkpɔ ekededi emi nnyin ikikande imen ika wilderness, ndien kpukpru mme nyɔhɔ nsuhɔ ŋkpɔ udia emi Jehovah ɔkɔɔnɔde nnyin; ndien nnyin ima itaŋ kpukpru oruk mkpasip emi nnyin ikikande itaŋ ika wilderness.

12 Ndien edikem ete nnyin imen mme tent nnyin inyuŋ iwɔrɔ ika wilderness, ibe akpa Laman.

13 Ndien edikem ete nnyin isaŋa ke ufaŋ usen inaŋ, ikpere ubɔk usuk-usuk, ndien nnyin ima ifiak iwuk mme tent nnyin; ndien nnyin ima ikot enyiŋ ebiet oro Shazer.

14 Ndien edikem ete nnyin imen mme utigha ye mme idaŋ nnyin, inyuŋ ika ke wilderness man iwot ŋkpɔ udia inɔ mbon ufɔk nnyin; ndien ke ima ike owot udia inɔ mbon ufɔk nnyin nnyin ifiak inyɔŋ ibine mbon ufɔk nnyin ke wilderness, ke ebiet Shazer. Ndien nnyin ifiak ika wilderness, itiene ukem ukem usuŋ oro, idu ke mme ubak wilderness emi eke ɔfɔnde ŋkpɔ akan, emi okodude ke mme adaŋa emi ekperede Ididuot Inyaŋ.

15 Ndien edikem ete ke nnyin ima isaŋa ke ufaŋ ediwak usen, iwot udia ke usuŋ, ye mme utigha ye mme idaŋ nnyin ye mme itiat nnyin ye mme ikaŋ ɔkpɔ nnyin.

16 Ndien nnyin ima itiene mme usuŋ nyɔri oro, emi eke adade nnyin aka mme ubak wilderness emi eke ɔfɔnde ŋkpɔ akan.

17 Ndien ke nnyin ima ikisaŋa ke ufaŋ ediwak usen, nnyin iwuk mme tent nnyin ke ufaŋ ini, man nnyin ifiak iduɔk odudu idem nnyin inyuŋ inyene udia inɔ mbon ufɔk nnyin.

18 Ndien edikem ete nte ami, Nephi, nkekade ndiyom udia, sese, ami mbuŋ utigha mi, emi ekedade ediye okpoho enam; ndien ke mma nkobuŋ utigha mi, sese, mme nditɔ eka mi iren ema eyat esit ye ami ke ntak utigha mi ɔkɔbuŋɔde, koro nnyin ikenyeneke udia.

19 Ndien edikem ete nnyin ima inyɔŋ ubɔk ubɔk ibine mbon ufɔk nnyin, ndien sia idem ekememde eti eti, ke ntak isaŋ mmɔ, mmɔ ema enyene ndutuhɔ eti eti ke ntak unana udia.

20 Ndien edikem ete Laman ye Lemuel ye nditɔ iren Ishmael ema etɔŋɔ ndikuni ata eti eti, ke ntak mme ndutuhɔ ye mme ukut mmɔ ke wilderness; ndien nko ete mi ɔtɔŋɔ ndikuni ye Jehovah Abasi esie; iŋ, ndien kpukpru mmɔ ema efuhɔ ata eti eti, tutu ete mmɔ ema ekuni ye Jehovah.

21 Idahaemi edikem ete ami, Nephi, ke mma nke okut ukut ye nditɔ eka mi iren ke ntak utigha mi eke ɔbuŋɔde, ndien ke mme uruk ke mme utigha mmɔ ama ekesibe, enye ɔtɔŋɔ ndisɔŋ ata eti eti, iŋ, tutu ete nnyin ikikanke inyene udia.

22 Ndien edikem ete ami, Nephi, mma ntiŋ ediwak ikɔ nnɔ nditɔ eka mi iren, koro mmɔ ema efiak esɔŋ esit mmɔ, tutu esim nditɔhɔ ye Jehovah Abasi mmɔ.

23 Ndien edikem ete ami, Nephi, mma nda eto nnam utigha, ndien oto ke nnen nnen eto, idaŋ; ke ntre, ami mma nkama ke idem mi utigha ye idaŋ, ye uduk ye mme itiat. Ndien ami ndɔhɔ ete mi nte: Mmɔŋ ke ana ami nka man nyene udia?

24 Ndien edikem ete enye ama obup Jehovah, koro mmɔ ema esuhɔre idem ke ntak mme ikɔ mi; koro ami mma ntiŋ ediwak ŋkpɔ nnɔ mmɔ ye odudu ukpɔŋ mi.

25 Ndien edikem ete uyo Jehovah edi ɔnɔ ete mi; ndien ema etim etunɔ enye ke ntak edikuni esie ye Jehovah, tutu ete ke ema eda enye esuhɔre eduk mme utuŋɔ ndutuhɔ.

26 Ndien edikem ete uyo Jehovah ɔdɔhɔ enye ete: Se nyɔri oro, nyuŋ kut mme ŋkpɔ emi eke ewetde.

27 Ndien edikem ete ke ini ete mi esede mme ŋkpɔ emi eke ewetde ke nyori oro, enye ama efehe ndik onyuŋ enyek idem ata eti eti, ndien ŋko nditɔ eka mi iren ye nditɔ iren Ishmael ye iban mmɔ.

28 Ndien edikem ete ami, Nephi, ŋkut mme eto ufiak emi eke odude ke nyori oro, ete ke mmɔ esaŋa nte mbuɔtidem ye ifik ye mkpaŋ utɔŋ emi nnyin ikinɔde mmɔ.

29 Ndien ema ewet ke mmɔ nko obufa ŋwet, emi akaŋwaŋade ndikot, emi eke ɔnɔde nnyin ifiɔk ke abaŋa mme usuŋ Jehovah, ndien ema ewet enye enyuŋ ekpuhɔ ke ini ke ini, nte mbuɔtidem ye ifik emi nnyin inɔde enye. Ke emi nnyin ikut ete ke oto ke mme mkpri ŋkpɔ Jehovah ekeme ndida mme ikpɔ ŋkpɔ ndi.

30 Ndien edikem ete ami, Nephi, mma ndɔk nka enyɔŋ obot, ntiene mme ndausuŋ emi ekenɔde ke nyɔri oro.

31 Ndien edikem ete ami mma nwot mme unam ikɔt, tutu ete ke ami mma nyene udia nnɔ mbon ufɔk nnyin.

32 Ndien edikem ete ami nyɔŋ nka mme tent nnyin, nkama mme unam emi ami nke owotde; ndien idahaemi ke ini mmɔ eke ekutde ke ami mme enyene udia, didie ke idaresit mmɔ okokpoŋ! Ndien edikem ete mmɔ ema esuhɔre idem mmɔ ke iso Jehovah, ndien ema enɔ enye ekɔm.

33 Ndien edikem ete nnyin ifiak imen isaŋ nnyin, isaŋa ikpere ke ukem ukem usuŋ nte ke akpa; ndien ke nnyin ima ikesaŋa ke ufaŋ ediwak usen nnyin ifiak iwuk mme tent nnyin, man nnyin idu ke ufaŋ ini.

34 Ndien edikem ete Ishmael akpa, enyuŋ ebuk enye ke ebiet emi eke ekotde Nahom.

35 Ndien edikem ete nditɔ iban Ishmael ema efuhɔ ata eti eti, ke ntak mkpa ete mmɔ, ye ke ntak mme ukut mmɔ ke wilderness; ndien mmɔ ema ekuni ye ete mi, koro enye ekedade mmɔ ɔwɔrɔ ke isɔŋ Jerusalem, ete: Ete nnyin akpa; iŋ, ndien nnyin imiyo eti eti ke wilderness, ndien nnyin ima ikut ukut eti eti, biɔŋ, nsat itɔŋ, ye mmem idem; ndien ke ini kpukpru mme ufen emi ama eke ebe ana nnyin itak ke wilderness ye biɔŋ.

36 Ndien ntem ke mmɔ ekekuni ye ete mi, ndien nko ye ami; ndien mmɔ ema enyene udɔŋ ndifiak nyɔŋ Jerusalem.

37 Ndien Laman ɔdɔhɔ Lemuel ndien nko ye nditɔ iren Ishmael ete: Sese, yak nnyin iwot ete nnyin, ndien nko eyen eka nnyin Nephi, emi enyimede ke idem esie ndidi andikara nnyin ye andikpep nnyin, emi idide nditɔ eka esie iren emi ikponde ikan enye.

38 Idahaemi, enye ɔdɔhɔ ete ke Jehovah etiŋ ikɔ ye enye, ndien nko ke mme angel enam utom enɔ enye. Edi sese, nnyin imɔfiɔk ete ke enye osu nsu ɔnɔ nnyin; ndien enye ɔdɔhɔ nnyin mme ŋkpɔ emi, ndien enye anam ediwak ŋkpɔ ke ŋkari esie, man enye abiaŋa mme enyin nnyin, ekere, ke ekeme ndidi, ete enye ekeme ndida nnyin nka esien wilderness; ndien ke enye ama ada nnyin aka, enye ekere ndinam idem esie edidem ye andikara nnyin, man enye anam ye nnyin nte udɔŋ ye ekikere esie edide. Ndien ke utɔ usuŋ emi ke eyen eka mi Laman eke edemere mme esit mmɔ ke iyaresit.

39 Ndien edikem ete Jehovah ama odu ye nnyin, iŋ, ke akpanikɔ uyo Jehovah ama edi onyuŋ etiŋ ediwak ikɔ ye mmɔ, onyuŋ ɔtunɔ mmɔ ata eti eti; ndien ke ini uyo Jehovah ama eketunɔ mmɔ mmɔ ema etre iyaresit mmɔ, enyuŋ ekabere esit ke abaŋa mme idiɔk ŋkpɔ mmɔ, tutu Jehovah ama afiak ɔdiɔŋ nnyin ye udia, ndien nnyin ikitikke.