1 Ja’ o ta tsacal ti vu’un Nefiune, ti c’alal laj co’nton ta sc’opanel ti jbanquiltaque, ja’ o jech la jyalbicun ti stuquique: Vo’ote tu jtsotsic ti c’usi la valbuncutique, ech’em to stsatsal ti bu c’alal xu’ cu’uncutic ta jpascutique.

2 Ja’ o jech te la jcalbeic ti vu’un jna’oj ti tsots c’usi la jcalbeic ta sventa ti boch’otic mu sch’unic mantaletique, jech ti c’u x-elan ta bats’imelele. Ti boch’o lequique jech la jq’uelbeic stalelic, xchi’uc la jcal ta jamal ti ja’ oy xcuxlejalic ta slajebal c’ac’ale, jech ti boch’o oy smulique ta staic c’usitic tsots ta bats’imelel, ti jech ta xlajic o lec ta o’lole.

3 Jech lec tana jbanquiltac, ti me lecoxuque xchi’uc ti me chac’an cha va’ybeic lec smelolal ti c’usi ja’ ta bats’imelele, xchi’uc me cha vac’ achiquinic ta ya’yel ti c’uxi lec cha xanoic ta sat ti Rioxe, mu xa mucul c’opojic ta sventa ti c’usi ja’ ta bats’imelele, me ja’uc jech xavalic: Ti vo’ote tu jtsotsic ti c’usi chavalbuncutic ta jtojolalcutique.

4 Ja’ o jech ti vu’un, Nefiune, te tsots la jcalbeic ti jbanquiltac ti ac’o spasbeic smantaltac ti Cajvaltique.

5 Ja’ o jech la sbic’tajes sbaic ta stojolal Cajvaltic, jech te la jta xcuxetel co’nton xchi’uc te xa la jna’o ti yu’un ja’ xa ta xanoic o ta sventa ti c’usitic lequique.

6 Jech, scotol jech la yich’ alel xchi’uc jech la jyich’ pasel ti c’alal te oy ti jtot ta sna ta poc’ ti te ta stenlejal osil bu la jyac’be sbiin Lemuele.

7 Ja’ o ti vu’un, Nefiune, te la jcajnilinbe jun yantsil xnich’on Ismael, ja’ jechic ec ti jbanquiltaque la jyajnilinbeic ti yantsil nich’nab Ismaele. Jech ti Zorame ja’ la jyajnilinbe vixil yantsil nich’on ti Ismaele.

8 Ja’ jech ti jtote cuch yu’un spasel scotol ti smantaltac Cajvaltic ti c’u x-elan la jyich’ pasel ta mantale. Jech ti vu’un Nefiune, te ep la jyac’bun sbenticion ti Cajvaltique.

9 Ja’ o c’opoj ti Cajvaltic ta jtot ta yac’ubalile, ti ta sob yoc’omal ac’o xanouc batel yan velta ta xocol banamile.

10 Jech c’alal lic ti jtot ta sobe, jech te bat ti ta sti’ sna ta poq’ue te tu jxi’el ic’ot yu’un te la jyil jun volvol tsatsal taq’uin ti bu tu jlec’ xu’ yu’une, ti tu jlec’ meltsanbile; te ta yute oy chib acuxa, ti june ja’ ta xac’tal ilel jbecutic ti c’uxi xu’ chi xanocutic batel ta xocol banamile.

11 Ja’ o jech la jtsac-cutic ti c’usitic la jquich’cutic batel ta xocol banamile, xchi’uc scomelaltac ti c’usitic chtun cu’uncutic ti Cajvaltic la jyac’buncutique; jech te la jtsobcutic sbec’ jts’unub te’cutic yu’un ta xquich’cutic batel ta xocol banamil.

12 Jech te la jquich’cutic ti jnacutic ta poq’ue li batcutic ti ta xocol banamile, te ta sts’el yuc’umal Lamán.

13 Ja’ jech chanib c’ac’al li xanocutic batel te ta xocon jutuc smaleb c’ac’al, te la jpascutic yanvelta ti jnacutic ta poq’ue. Shazer la jcac’becutic sbiin ti te banamile.

14 Ja’ o jech la jtsac-cutic ti j-arcocutique xchi’uc ti t’ilubte’cutique li batcutic ta xocol banamil ta smilel chon bolometic, ti c’uxi xu’ ta jta jve’elcutic xchi’uc yajval jnacutique. Ta ts’acal ti c’alal jtaojcutic xa ox ti sve’elique, li sutcutic batel ti te bu’oy ti jnailalcutic ta xocol banamilil ti ja’ sbi shazere. Jech te li xanocutic batel yanvelta ti ta xocol banamile, ja’ no’ox te li batcutic yan velta ti te ta xyaxalaltic xocol banamile ti te ta sti’tac batel tsajal nabe.

15 Ja’ jech te ep c’ac’al li xanocutic batel, ti ta jmilcutic batel chon bolometic ti c’uxi tsacaluncutic o batele, xchi’uc ti j-arcocutique, xchi’uc ti jt’ilubte’cutique, xchi’uc ti jtoncutique xchi’uc ti jimich’cutique.

16 Ja’ te li batcutic ti bu chac’ ta ilel ti volvol tsatsal taq’uine, ja’ te la jyic’uncutic batel ti te ta xyaxalaltic xocol banamile.

17 Ta ts’acal ti c’alal ep xa ox c’ac’al ti li xanocutique, te la jpascutic jnacutic ta poc’ jayibuc no’ox c’ac’al ti c’uxi xu’ ta jcuxcutique xchi’uc ti c’uxi xu’ ta jsa’ jve’elcutic xchi’uc jnailalcutique.

18 Ja’ o jech ti vu’un, Nefiune, ti c’alal jech li loc’ ta sa’el ti chon bolometique, jech, la jc’as ti j-arcoe, ti ja’ lec pasbil ta tsatsal taq’uine; ta ts’acal ti c’alal la jc’as ti j-arcoe ti jbanquiltaque la sjapoicun ta utel, ta sventa ti jech ich’ay o ti j-arcoe, ti yu’un mu xa c’uxi xu’ ta jta jve’elcutique.

19 Jech muyuc jve’elcutic li sutcutic batel ti te bu’oy jnailalcutique, ti jech lubenic ta sventa ti c’u x-elan ixanoique, te la jyilic vocol ta sventa ti muyuc sve’elique.

20 Ja’ o jech ti Lamán xchi’uc ti Lemuele, xchi’uc ti snich’nab Ismaele, sjapoic mucul c’op ta sventa ti c’u x-elan abul sbaic yu’un svocolic cha’yic ta xocol banamile, xchi’uc ti jtote sjapo mucul c’op ta stojol yajval ti ja’ Srioxe; jech scotolic abul sbaic ta xa’yic, ja’ yu’un jech mucul c’opojic ta stojolal ti Cajvaltique.

21 Ja’ o jech ti vu’un, Nefiune, ti jech la jcat co’ntoncutic xchi’uc ti jbanquiltac ta sventa ti jech ch’ay ti j-arcoe, yu’un ti stuquique la xch’aybeic xach’xach’ uli’al ti s-arcoique, te ep la jnopcutic, ti yu’un mu xa c’uxi jta jve’elcutique.

22 Ja’ to ti vu’un, Nefiune, te ep la jc’opan ti jbanquiltaque, yu’un la stsatsubtasic no’ox yanvelta ti yo’ntonique, ti jech ta xa sc’anbeic parteal Cajvaltic ti ja’ Srioxique.

23 Ja’ o jech ti vu’un Nefiune, te la jpas jun j-arco te’, xchi’uc jun Tilub te’ ta bats’i te’ lec tuc’; ja’o jech la jta ti cabtejeb ti jun j-arco xchi’uc ti jun jt’ilubte’e, xchi’uc ti jun jimich’e xchi’uc ti jtoncutique, te la jcalbe ti jtote; ¿bu xu’ chibat chba jsa’tal ti jve’eltique?

24 Ja’ o jech la sjac’be Cajvaltic ti stuque, yu’un jech la sbic’tajes sbaic ta sventa ti c’usi la jcale; jech te ep c’usi la jcalbeic ta scotol yip jch’ulel.

25 Ja’ o jech ti Cajvaltique la sc’opan ti jtote, ta bats’imelel la jyich’ utel ta sventa ti mucul c’opoj ta sventa ti Cajvaltique, ja’ to te la jya’ay muc’ta at o’ntonal.

26 Jech la jyal ti Cajvaltique, q’uel avil ti volvol tsatsal taq’uine, xchi’uc q’uel avil ti c’usitic te tsi’babile.

27 Ja’ o jech ti c’alal la jyil ti jtot ti c’usitic te ts’ibabil ti te ta volvol tsatsal taq’uine, te ixi’ xchi’uc te tsots inic, jechic ec ti jbanquiltaque xchi’uc ti snich’nab Ismaele xchi’uc ti cajniltaccutique.

28 Ja’ o jech ti vu’un, Nefiune, la jquil ti yacuxailtac ti volvol tsatsal taq’uine, ti ja’ jech ta x-abtej jech chac c’u x-elan xch’unolajel co’ntoncutique, ja’ jech chac c’u cha’al ta jc’uxubincutic xchi’uc ti c’u x-elan ta jq’uelcutic ti vu’uncutique.

29 Xchi’uc te ts’ibabil ta sba ti ja’ jun ach’ ts’ibil ti ja’ lec c’un ta q’uelele, ti ja’ ta xac’ jna’cutic ti be ta sventa Cajvaltique, xchi’uc ja’ ta sts’iba xchi’uc ta sjel sba ta baq’uintic, jech ti c’u x-elan ti xch’unolajel co’ntoncutic xchi’uc ti c’u x-elan ta jc’uxubincutic ti vu’uncutique. Ja’ jech la jquilcutic o ti ta c’usitic no’ox biq’uitic ta xac’ ta ilele xu’ ta spas c’usitic muc’tic abtelal ti Cajvaltique.

30 Ja’ o jech ti vu’un, Nefiune, te li muy batel ti te to ta ba abnaltic jech chac c’u cuo’al ta xac’ ta ilel ti volvol tsatsal taq’uine.

31 Ja’ o te la jmil te’tical chon bolometic, ti c’uxi la jta jve’elcutic xchi’uc ti jnailalcutique.

32 Ja’ o jech te li sut batel ti te ta jnacutic ta poq’ue, jech te quich’ojan batel ti chon bolometic la jmile; ti c’alal la jyilic ti vu’un lajxa jta jve’elcutique, ¡jech te ep la sta xcuxetel yo’ntonic! xchi’uc te la sbic’tajes sbaic ta stojolal ti Cajvaltic xchi’uc te la stojbeic ta vocol.

33 Ja’ o jech japocutic batel yanvelta ti cabtelcutique, japocutic batel ti xanubale ja’ te la jtambecutic stuq’uil batel ti bu li xanocutic ta bayuque, ta ts’acal ti c’alal ep xa ox c’ac’al li xanocutique, te la jpascutic yan velta jnacutic ta poc’ ti c’uxi te xi naquicutic jayibuc no’ox c’ac’ale.

34 Ja’ o jech te icham ti Ismaele, ja’ te yich’ muquel te ta banamil sbi Nahom.

35 Jech ti stsebetic Ismaele ep la jya’yic Me’nal ti ta sventa cham stotique xchi’uc ti ta sventa yatel yo’ntonic ta xocol banamile, jech te mucul c’op ojic ta stojolal jtot ta sventa ti jech yich’ic loq’uesel ta yosilal Jerusalene, jech ta xalic; ti jtotique icham xa, jech ti vu’tique ja’ no’ox ti bu xi jloc’ xi j-ech’ ta xocol banamile, xchi’uc ti ep xa jtaoj jvocoltique, jvi’nalutic, jtaqui o’nalutic xchi’uc at o’ntonalutic, jech ti c’uyepal xa ech’em xa cu’untic ti vocolile, jech ta to xquiltic vocolil ta vi’nal li’ ta xocol banamil.

36 Ja’ jech x-elan ti ta xmucul c’opojic ti ta stojolal ti jtote xchi’uc ti ta jtojolal vu’une; yu’un jech ta sc’anic ta sutic batel ta Jerusalen.

37 Ti Lamane jech la jyalbe Lemuel, xchi’uc snich’nab Ismael: Jech tana jmiltic ti jtotique xchi’uc ti quits’intic Nefie, ti ja’ xa spasoj sba ta ajvalilal xchi’uc ta maistroal ta jtojolaltic ti vu’tic sbanquilutique.

38 Ti ta xal ti Cajvaltic yich’oj chi’nel ta lo’ile, xchi’uc ti yiloj epal abatetique. Jech ti vu’tique jna’ojtic ti naca ta xalbutique; ti c’alal jech ta xalbutique, ti jech ep xa ta xac’ ta ilel yabtele xchi’uc ti c’usi sna’ spasele ja’ ti c’uxi xu’ ta slo’lautic ta jsattique, yu’un van ta snop, me chi jyic’utic batel ta yan xocol banamil ti bu mu xcotquintic xa e, ti c’alal me la jyic’utic batele, yu’un van snopoj tspas sba ta Jreytic xchi’uc ta j-ajvaliltic ti c’uxi xu’ ta x-abtej ta jtojolaltic ti c’usi tsc’an stuc tspase. Ja’ jech x-elan chac c’u cha’al jbanquil Lamane, yu’un nojem ti yo’ntonic ta ilinele.

39 Jech ti Cajvaltique te la xchi’nuncutic, jech, te ital ya’yej ti Cajvaltique te ep la jyich’ic chi’nel ta lo’il, te tsots la jyich’ic c’opanel, ta ts’acal ti c’alal yich’ic c’opanel yu’un ti Cajvaltique, te ich’abi ti sc’ac’al yo’ntonique xchi’uc te la sutes yo’ntonic yu’un smulic, jech ti Cajvaltique la jyac’buncutic jve’elcutic ta sbenticion, ti c’uxi mu xi chamcutic oe.