1 Ja’o jech, ti Cajvaltic la sc’opan ti jtote, jech, ta svayech, jech la jyalbe: ep benticion a vu’un Lehi, ta sventa ti c’usi a pasoje, xchi’uc yu’un tuc’ a pasoj aba, yu’un laj xa aval ta scotol jteclum ti c’usi la jcalbote, ja’ jech, ti ta sc’an cha smilique.

2 Ja’o jech ti Cajvaltic la spas ta mantal ti jtot, ta svayeche, ti ac’o batuc ta xocol banamil xchi’uc snailale.

3 Jech la xch’unbe ti ya’yej Cajvaltique, la spas ti c’usi la jyich’ albel spase.

4 Ja’o jech ti c’alal loc’ batel ta xocol banamile, la scomtsan ti snae, xchi’uc ti spuculal osile, xchi’uc ti sc’anal taq’uine, xchi’uc ti saquil taq’uine, xchi’uc ti c’usitic alaq’uic sba yu’une, yu’un muyuc c’usi la jyich’ batel, ja’ no’ox ti snailale, xchi’uc ti c’usi xtun yu’un ti spas o sna ta poq’ue, jech loc’ batel ta xocol banamil.

5 Ja’o jech te c’ot ta sts’ac nopol sti’ tsajal nab, te xano batel ta xocol banamil te ta nopol batel xocon ti nabe, jech te xano batel ta xocol banamil xchi’uc snailal te oy ti jme’ Saríah, xchi’uc Lamán, Lemuel xchi’uc Sam, ti ja’ jbanquiltaque.

6 Ja’o jech ta ts’acal ti c’alal xano batel oxib c’alal ti ta xocol banamile, te la spas sna ta poc’ ta jun stenlejal te ta xocon jun yuc’umal vo’.

7 Te la spas jun chac’alte’ ton, ja’ te la jyac’be smoton Cajvaltic, la stojbe ta vocol Riox ti ja’ JRioxtique.

8 Ti uc’um ti te x-ul ta tsajal na’be la jyac’be sbiin Lamán, ti stenlejal ti te xlic ta ti’ uc’um ti ja’ to te xc’ot ta nopol xa ti te bu xc’ot ta ulele.

9 Ti c’alal la jyil jtot ti te x-ul ya’lel uc’um ti te bu xloc’ ti ya’lel tsajal nabe, jech la sc’opan Lamán, jech la jyalbe: ¡Ti ja’uc jechucan jech chac c’u cha’al uc’um li’e, ti lec tuc’ ta xloq’uilan o ta sloq’uem ta scotol c’ac’ale!

10 Jech la jyalbe ec ti Lemuele: ¡Ti ja’uc jechucan jech chac c’u cha’al stenlejal li’e, ti lec tuc’, ti te no’ox oy mu sna’ bu xbat, ti ja’ no’ox ta spasbe ti smantal Cajvaltique!

11 Ja’ jech la jyal ta sventa sts’ialic ti Lemuel xchi’uc ti Lamane, yu’un ep c’usi chopol mucul c’opojic ta sventa stotic, ti yu’un ja’ jun vinic oy c’usi ch-ac’bat yil yu’un Cajvaltique, xchi’uc ti jech yich’ic loq’uesel ta sbanamil Jerusalene, ti jech la scomtsanic ti spuculal yosilique, xchi’uc ti sc’anal taq’uinique, xchi’uc ti saquil taq’uinique xchi’uc ti c’usitic ala q’uic sba yu’nique, ti jech ibatic ta xocol banamile, yu’un la jyalic ti c’alal jech la spase, yu’un chopol c’usi ta snop ta yo’nton ti scuyojique.

12 Ja’ic jechic ti Lamán xchi’uc ti Lemuele, ti ja’ic banquilaletique, ta smuc’ul c’optaic ti stotique, ti jech ta spasique yu’un mu xotquinic ti c’usi ta spas ti Riox ti boch’o la jyich’ic pasele.

13 Xchi’uc mu xch’unic no’oxtoc ti muc’ta jteclum Jerusalen ta xich’ vuq’uesel jech chac c’u cha’al la jyalic ti lequil viniquetique: yu’un ja’ co’ol sbaic xchi’uquic Judioetic ti te to ox oyic ta Jerusalen ti c’alal sc’an ta smilic ti jtote.

14 Ja’o jech ti jtote te lic c’opojuc ta stsatsal te ta stenlejal osil Lemuel, yu’un ja’o nojem ta ch’ul espíritu, jech te it’elic yu’un ta stsatsal te ta sat. Jech muyuc xa’ybeic smelolal, ti c’alal jech muyuc xa c’usi xalic ta stojolale, ja’ jech, la spasic ti c’usi la jyich’ic pasel ta mantale.

15 Ja’ jech te nacal ti jtot ta sna ta poq’ue.

16 Ja’o jech ti vu’un, Nefiune, ti vu’un queremuntoe ac’o me muc’ xa ti jnatile, ta xa ono’ox ta jc’an ta xcotquin c’u x-elan smantaltac ti Rioxe, xchi’uc ja’ jech la jc’anbe ti Cajvaltique ja’ o jech la svu’lanun xchi’uc la jyunintasbun co’nton, ti c’uxi xu’ ta jch’un scotol ti c’usi yaloj ti jtote: ja’ jech muyuc bu li ilin ta stojolal jech chac c’u cha’al la spasic jbanquiltaque.

17 Jech te la jc’opan ti Same, te la jcalbe scotol ti c’usi la jyalbun Cajvaltic ta stsatsal xch’ul Espíritue, jech te la xch’unbun ti c’usi la jcale.

18 Ja’uc ti Lamán xchi’uc ti Lemuele mu sc’an xaybicun ti jc’ope, yu’un, ja’ ip cha’yic ti stsatsal yo’ntonique, jech te la jc’opanbeic Cajvaltic ta stojolalic.

19 Ja’o jech ti Cajvaltique la sc’opanun, jech la jyal, ep benticion a vu’un Nefi, ta sventa ti xch’unolajel avo’ntone, yu’un la t’unun ta scotol xchi’uc ta slequil a vo’nton.

20 Jech ti c’u x-elan me la pas ti jmantaltaque, cha ta a cuxlejal xchi’uc ja’ te cha bat ti te ta jt’ujbil banamile, jech, ti bu vu’un jmeltsanoj ta atojolalique, ja’ jun banamil t’ujbil ta stojolal yantic.

21 Jech ti me ilinic ti abanquiltac ta atojolale, jech ta xich’ic loq’uesel ta stojolal Cajvaltic.

22 Jech ti c’u x-elan cha pas ti jmantaltaque, cha c’ot ta ajvalilal xchi’uc ta jchanubtasvanej yu’un a banquiltac.

23 Yu’un, ti baq’uin ta x-ilinic ta jtojolale, vu’un xu’ ta xcaq’uic batel ta ch’ayel, ta at o’ntonal ch’ayel, xchi’uc jech muyuc jlec’uc stsatsalic ta stojolal a nich’nabic ta baq’uin, ja’ xa no’ox ti me ilinic ta jtojolaleq’ue.

24 Ti me a nich’nabic ilinic ta jtojolale ja’ ta xich’ic vocolil a nich’nabic ti c’uxi xu’ sna’icun vu’une.