1 Ta jc’an ti ac’o xa na’ic ti c’alal laj yo’nton ti jtot Lehi ta xcholel ti mantaletic ta snich’nabtaque, ti Cajvaltique ic’opoj yan velta, ti mu smeloluc ti ja’ no’ox Lehi, ta xic’ batel snailal ti ta xocol banamile, yu’un ti snich’nabe stac’ ta xiq’uic batel antsetic ta sventa chajnilinic o ti c’uxi xu’ oyuc xnich’nabic ta sventa Cajvaltic ti te ta t’ujbilal banamil yu’un Rioxe.

2 Ja’ o jech ti Cajvaltic la spasun ta mantal ti vu’un, Nefiune, ti a ac’o xi sutcutic batel xchi’uc jbanquiltac, ti ta slumal Jerusalen, ti jech ac’o bat quic’cutictal Ismael xchi’uc snailal ti li’ ta xocol banamile.

3 Ja’o jech ti vu’un Nefiune, xchi’uc ti jbanquiltaque li loc’cutic batel yanvelta ti ta xocol banamil ti c’alal jech li batcutic ta Jerusalene.

4 Jech ti c’alal li c’otcutic ti ta sna Ismaele, te lec la sc’anuncutic ta sat, ti c’uxi xu’ la jcalbecutic ya’yej Cajvaltique.

5 Ja’ jech Cajvaltic la sc’unibtasbe yo’nton ti Ismaele xchi’uc ti boch’otic te oyic ta snae. Ja’ jech, te ixanoic batel jchi’uccutic ti ta xocol banamil ti te bu’oy sna ta poc’ jtote.

6 Ti c’alal chi xanocutic batel ta xocol banamile, ja’o jech ti Lamán xchi’uc ti Lemuele, xchi’uc chib stseb, xchi’uc chib squeremutic ti Ismaele xchi’uc ti ta snailale, ilinic ta jtojolalcutic, ja’ xcaltic, ti ta jtojolal vu’un Nefiune, xchi’uc ta stojolal Sam xchi’uc ta stojolal Ismael, xchi’uc yajnil xchi’uc ti yantic oxib stsebetique.

7 Ti c’alal jech ta x-ilinique yu’un tsc’an ta sutic batel ta slumal Jerusalen.

8 Ti vu’un Nefiune, cat co’nton ta sventa stsatsal yo’ntonic, jech la jc’opanic, ti Lamán xchi’uc ti Lemuele, jech la jcalbeic; quelavil ti vo’xuque, vo’xuc jbanquiloxuc, ¿c’uyu’un ti tu jtsots ti avo’ntonique ti jech mu xa va’ybeic smelolale, ti ja’ to cha c’anic ti vu’un a avits’inicun chacalboxuque, ti jech cha c’anic ti vu’un ba’yuc ta xc’ac ta ilele?

9 ¿C’uxi ya’eluc ti muyuc a va’yojbeic smelolal ti c’usi yaloj ti Cajvaltique?

10 ¿C’uxi ya’eluc ti ch’ayem ta avo’ntonic ti avilojbeic ti yabat Cajvaltique?

11 Jech, xchi’uc ¿c’uxi ya’el ti ch’ayem ta avo’ntonic ti c’usi ep la spas ta jtojolaltic ti Cajvaltique ti c’uxi la spojutic ta sc’ob Labán, xchi’uc ti c’uxi la jquich’tic ti poco’ lo’iletique.

12 Jech, xchi’uc ¿c’uxi ya’el ti ch’ayem ta avo’ntonic c’u x-elan slequil yo’nton ti Cajvaltique, xchi’uc ti oy stsatsal ta spasel scotol ti c’usitic tsc’an tspas ta stojolal xnich’nab viniquetic, ti me ta xac’ ta ilel xch’unolajel yo’ntonic ta stojolale? Jech, tsc’an lecuc jpasbatic.

13 Ti c’alal me lec ta jpasbatique, ja’ ta jtatic ti banamil bu o no’ox albile; me xa na’ic ti ta baq’uine, ta xc’ot ta pasel ti c’usi yaloj Cajvaltic ti jech ta xich’ vuq’uesel ti jteclum Jerusalene, yu’un scotol ti c’usi yaloj ti Cajvaltic ti jech chich’ vuq’uesele, ta xc’ot ta pasel.

14 Yu’un jech, ti S-espíritu Cajvaltique jutuc xa sc’an xlaj yo’nton la pas c’op ta stojolalic; yu’un muyuc sc’an la jya’ybeic sc’op ti lequil viniquetique xchi’uc la stiq’uic ta chuquel ti Jeremiase. Xchi’uc ta sc’anic ox ta smilic ti jtote, xchi’uc ti sc’anic xa ox snutsic loq’uel ti ta jteclume.

15 Jech tana, ta xa calboxuc ti me chasutic batel ti ta Jerusalene, yu’un te no’ox me cha chamic a xchi’uquic. Jech ti me yu’un cha c’an cha sutic batel ti tee, ja’ no’ox me xa na’ic ti c’usi ta xcale, ti me yu’un cha batique te no’ox me cha chamic yu’un jech me la jyalbun S-espíritu Cajvaltic.

16 Ja’ o jech ti vu’un, Nefiune, c’alal la jcalbeic jech ti jbanquiltaque te ilinic ta jtojolal. Te la stsaquicun, yu’un ep no’ox i ilinic, jech la xchuquicun ta ch’ojon, yu’un ta sc’anic ox chi smilic, ti yu’un te comcun yu’nic ta xocol banamile, ti jech te lajcun ta ti’el ta xchon bolomal te’tique.

17 Ja’o jech la jc’opan Cajvaltic, jech la jcal: ¿Vo’ot Cajval jech ti c’u x-elan xch’unolajel c’onton ta a tojolale, coltaun ti li’ ta sc’obic jbanquiltaque, jech, ac’bun jpersatac ti c’uxi ac’o tuch’uc cu’un ti li’ ch’ojon bu chuculun o e.

18 Ti c’alal jech la jcale, ja’o, jitujanan ti xch’ajunaltac coc, jc’obe te la jc’ac jba ta satic ti jbanquiltaque, te la jc’opanic yan velta.

19 Jech te cha’ ilinic yan velta ta jtojolal no’oxtoc xchi’uc ta ox sc’anic chi stsaquicun; ja’ to te jun stseb ti Ismaele, jech xchi’uc sme’ xchi’uc jun squerem ti Ismaele, jech te la sc’opanic jbanquiltac ti c’uxi xu’ sc’unibtasbeic yo’ntonique, jech te muyuc la smilicun.

20 Jech te la staic ta na’el ti c’usi chopol spasojique. Ja’ o jech te la sbic’tajes sbaic ta jtojolal, te la jyalbicun ti ac’o jpasbeic pertonal ti c’usi la spasbicune.

21 Ja’ o jech la jpasbeic pertonal scotol ta bats’imelel ti c’usi chopol la spasbicune, jech te la jcalbeic xtoc ti ac’o sc’anbeic pertonal Cajvaltic ti ja’ Srioxique. Ja’ jech c’ot ta pasel yu’nic. Ta ts’acal ti c’alal laj xa ox sc’opanic ti Cajvaltique, jech te li xanocutic batel yanvelta ti ta stuq’uil sna ta poc’ jtotcutique.

22 Ja’ o jech te li yalcutic batel ti te ta sna ta poc’ ti jtotcutique, ti c’alal li c’otcutic ti vu’un, jbanquiltac xchi’uc snailal Ismael ti te ta sna ta poc’ ti jtote, te la stojbeic ta vocol Cajvaltic ti ja’ Srioxique, te la xchiq’uic chon bolometic.