1 Ja’o jech la yich’ic ta muc’ ti Cajvaltique, te bat xchi’nicun; te la jpascutic te’etic lec la jq’uelcutic; Ti Cajvaltique te ta xac’bun quil ta baq’uintic ti c’u x-elan xu’ ta xcabtelan ti te’etic sventa barcoe.

2 Ja’ o jech, ti vu’un, Nefiune, mu jechuc la jpas ti te’etic jech cha c’u cha’al la jchan yu’un viniquetique, xchi’uc mu jechuc la jpas ti barco jech cha c’u cha’al tspasic viniquetique, yu’un ja’ jech la jpas jech chac c’u cha’al la jyac’bun quil ti Cajvaltique, ja’ jech mu jechuc lec c’ot chac c’u cha’al tspasic ti viniquetique.

3 Jech ti vu’un Nefiune, jech te chi muy batel ti ta te’tique te chba jc’opan ti Cajvaltique, jech ti Cajvaltique te ep c’usitic la jyalbun.

4 Jech ti c’alal laj xa ox jpas ti barcoe, jech chac c’u cha’al la jyal ti Cajvaltique, te la jyilic ti jbanquiltac ti yu’un ja’ leque xchi’uc ti yu’un ja’ lec c’ot ta pasel ta bats’imelele, jech la sbic’tajes sbaic ta stojolal Cajvaltic yan velta.

5 Ja’ o jech c’ot ta stojolal jtot ya’yej Cajvaltic ti jech ac’o xi lic cutic xchi’uc ti ac’o xi ochcutic ti ta barcoe.

6 Ja’ o jech ti ta yoc’omale, ti c’alal laj xa ox jmeltsancutic scotol ti c’usitic oy cu’uncutique, epal sat te’etic xchi’uc tiboletic ti ta xocol banamile xchi’uc oy epal pom xchi’uc ti c’usi chi yac’buncutic yalojbuncutic ti Cajvaltique, te li ochcutic ta barco xchi’uc scotol quicatscutic xchi’uc scotol sbec’ jts’unubcutic xchi’uc scotol ti c’usi quich’ojcutic talele, ti jujunique ja’ jech chac c’u cha’al sjabilalique; ja’ jech jcotolcutic li ochcutic ti ta barcoe, xchi’uc cajniltaccutic, xchi’uc jnich’nabcutic.

7 Ja’ o jech ti jtote, la sta chib snich’on ti ta xocol banamile, ti banquilale ja’ sbi Jacob, xchi’uc José ti its’inale.

8 Ta ts’acal ti c’alal li ochcutic jcotolcutic ti ta barcoe, la jquich’cutic batel ti c’usitic la jquich’cutic ac’bele xchi’uc ti c’usitic oy cu’uncutic ti jech la jquich’cutic pasel ta mantale, te li ochcutic ta nab, te la snet’uncutic batel ic’ te ta banamil ti bu albil o no’ox sc’oplale.

9 Ta ts’acal ti c’alal jech ne’tbil li batcutic ta ic’ epal c’ac’ale, jech ti jbanquiltaque xchi’uc snich’nab Ismaele, xchi’uc ti yajniltaquique. Staic xcuxetel yo’ntonic jech sjapoic ac’otajel xchi’uc q’uejimol, xchi’uc te bol c’opojic, jech te ch’ay ta yo’ntonic ti boch’o ta svu’el ti jech la jyich’ic iq’uel batel ti tee, jech mu xa no’ox bisbiluc ti itsatsubique.

10 Jech ti vu’un Nefiune, te ep li xi’ ta jmec, ti me jech x-ilin Cajvaltic ta jtojolalcutique, ti me jech xtuch’esuncutic ta sventa jbolilcutique, ti me jech xi ts’untsajcutic yalel ta xchac nabe, ja’, o jech, ti vu’un, Nefiune, te lic jc’opanic lec ta bats’imelel; ja’ jech te ilinic ta jtojolal; jech la jyalic: Mu jc’antic ti ja’ chcom ta ajvalilal ti quits’intique.

11 Ja’ o jech ti Lamán xchi’uc ti Lemuele, lic stsaquicun la xchuquicun ta ch’ojon, jech te ep la jyuts’intaicun; ja’ to mu ta jaluc, ti Cajvaltique la jyac’ ta q’uelel stsatsal ti c’uxi c’otuc ta pasel ti c’usi o no’ox yaloj ta sventa boch’o chopolique.

12 Jech ta ts’acal ti c’alal laj xa xchuquicun ti jech mu xa xu’ xi baq’ue, ti acuxa bu smeltsanoj Cajvaltic ta sventa vu’uncutique, jech paj ta abtel.

13 Jech mu xa sna’ic c’uxi jotucal chaq’uic batel ti barcoe; ja’ jech te lic chauquil vo’ xchi’uc ta ic’, jech, tu jtsatsal vo’ xchi’uc tu jxibal sva, jech te ne’tbil li sutcutic oxib c’ac’al ti te ta vo’etique, jech te xi’ic ti me te xa xjic’ovic o ti te ta nabe, jech te muyuc la sjitunicun o ti va’aye.

14 Ti ta xchanibal xa ox c’ac’al ti c’alal jech te ne’tbiluncutic sutele, ti chauquil vo’e ech’em to tsatsub.

15 Ja’ o jech, jutuc xa mu la sbic’uncutic ti chac nabe, ta ts’acal ti c’alal chanib xa ox c’ac’al ti ne’tbiluncutic sutel ti te ta vo’etique, ja’ to te la jyilic jbanquiltac ti yu’un Riox chq’uelbat stalelique, yu’un jech xu’ xchamic ti me muyuc la sutes yo’ntonic ta sventa ti bolilique. Ja’ o jech te c’otic ta jtojolal te la sjitunic ti xch’ajunal snuc’nuc’ jc’obe, jech te situbenic xa, jech ti snuc’nuc’ cacane ja’ ech’em situbenic, jech ti xc’uxule tu jtsots ta jmec.

16 Ja’ jech, te la jna’ xchi’uc te la jquich’ ta muc’ sbejel c’ac’al ti Rioxe, jech muyuc bu li mucul c’opoj ta stojolal Cajval ti ta sventa jvocole.

17 Jech ti jtot Lehie ep xa ox c’usi yalojbeic, xchi’uc ti snich’nab Ismaele, ja’ tsc’anic tsibtasic ti c’uxi mu xc’opoj ta jpojele, jech ti jtote xchi’uc ti jme’e tu jmol me’elic xa ta jmec, ti jech ep staojic vocolil ta sventa snich’nabique, te yalic ta chamel, jech te mochtsajic ta svayabic.

18 Ta sventa xc’uxul yo’ntonic xchi’uc ta sventa yatel yo’ntonic ta sventa sbolilic ti jbanquiltaque, yu’un jutuc xa muc x-ic’atic batel ta stojolal ti Srioxique; jech ti saquil sjolique jutuc xa mu yich’ aq’uel batel ta pucuc; jech, ja’ to ti c’uxi jutuc xa mu yich’ic muquel batel ta xc’uxul vo’etic.

19 Jechic ec ti Jacob xchi’uc ti Josee, ti jech queremic toe, ti yu’un jech ta to sc’anic lec q’uele, te la jyat yo’ntonic ta sventa ti sme’ique; ti cajnile muyuc bu xc’unib yo’ntonic yu’un ti ta ya’lel sate xchi’uc ti la svocoletane xchi’uc ti jnich’nabe muyuc bu xc’unib yo’ntonic ti jbanquiltac ti jech ac’o scoltaicune.

20 Muyuc boch’o oy ja’ no’ox ti stsatsal Rioxe, ti jech ta smiluncutic xa yilel ti c’uxi xu’ sc’unibtasbeic yo’ntonique, ja’ jech ti c’alal la jyilic ti jutuc xa mu la jyich’ic muquel yalel ta chac nabe, la sutes yo’ntonic ta sventa ti c’usi la spasbicune, ja’ to jech la sjitunicun.

21 Ta ts’acal ti c’alal laj xa ox sjitunicune, ja’ o jech la jtsac ti acuxae, te sjapo abtel jech chac c’u cha’al ta jc’ane, ja’ o jech, la jc’opan ti Cajvaltique, ta ts’acal ti c’alal la jc’opane, ti iq’uetique ich’abiic, ti chauquil vo’e ch’ab xi, jech te ch’ab xi scotol o.

22 Ja’ o jech ti vu’un, Nefiune, jech te la jquic’ batel ti barco te ta banamil ti bu albil o no’ox sc’oplale.

23 Ja’ o jech ti c’alal li xanocutic xa ox batel epal c’ac’al ti ta nabe, li c’otcutic ti te ta banamil ti bu albil o no’ox sc’oplale, te li muycutic batel ti te ta banamile, te la jpascutic jnacutic ta poq’uetic, te la jcac’becutic sbiin ac’bilal banamil (prometida).

24 Ja’ o jech te la japocutic yabtelanel ti banamile te la jts’unancutic ti sbec’ jts’unubcutic quich’ojcutic talel o no’ox ta slumal Jerusalene. Jech tu j-ech’em lec ich’ianantal ta jmec; yu’un te ep la jtacutic benticion.

25 Ja’ o jech te la jtacutic ti te ta banamil ti bu albil o no’ox sc’oplale. Ti c’alal jech chi xanocutic batel ti ta xocol banamile, oy ep ta chop chon bolometic ti ta te’tique, ti c’u cha’al me’ vacaxe, xchi’uc tot vacaxe, xchi’uc buro, xchi’uc ca’, xchi’uc tentsun, xchi’uc te’tical chij, scotol ta chop xchon bolomal te’tic, ti c’u x-elan xu’ ta stunesic ti viniquetique. Xchi’uc jtacutic ep ta chop taq’uinetic chac c’u cha’al c’anal taq’uine, saquil taq’uine, xchi’uc ti c’anal c’unil taq’uine.