1 Ja’ jech la jc’opan ti jbanquiltaque jech la jcalbeic: Sutcutic batel ta Jerusalen, la’ tuc’uticuc ta spasel ti smantaltac Cajvaltique, yu’un Ja’ xu’ yu’un ta scotol banamil. ¿C’uyu’un ma’uc tsots a vu’un jech chac c’u cha’al Labán ti ta spas ta mantal ti lajuneb yoxvinique, ac’ouc me ta lajunmil no’ox?

2 Batic cha’e, tsotsuticuc jech chac c’u cha’al Moisés; yu’un ti stuque jech la sc’opan ya’lel tsajal nab, ti jech la sbe sba ta jujujot, ti c’uxi loq’uic batel ta chuquel jtotic ti batic ta taquinal banamile, jech ti soltarotac Faraone nutsbanic batel jech te jic’oic ta ya’lel tsajal nab.

3 Jech ti vo’xuque xa na’ic xa ti c’usi li’e, xchi’uc a na’ojic ti ja’ ta melele; jech no’oxtoc ana’ojic ti jun yabat Cajvaltic ic’opoje; ¿c’uyu’un, ti mu xa ch’unique? batic le’e, Cajvaltic ta spojutic jech chac c’u cha’al jtotic, jech stac’ smil Labán chac c’u cha’al Egipcioetic.

4 Ti c’alal jech la jcale, jech yilel ch-ilinic o, jech sjapoic mucul c’op; jech te la xchi’nicun batel ja’ to ti c’alal li c’otcutic ta sc’al scoral tonil Jerusalene.

5 Jech ac’ubal xa ox, te la jca’c snac’ sbaic te ta spat coral ton, ti c’alal laj xa ox snac’ sbaique, ti vu’un, Nefiune, te li och batel ta mucul ti ta jteclume te libat ta sna ti Labane.

6 Jech yic’ojun batel Espíritu, yu’un mu jna’ jlec’uc ti c’usi ta jpase.

7 Ja’ jech te li xano batel, ti c’alal chi nopaj xa batel ta sna ti Labane te la jquil jun vinic, te yal ta lum ta jsat, yu’un yacuben ta pox.

8 Ti c’alal li nopaj batele, ja’ to te la jquil ti ja’ Labane.

9 Te la jquilbe ti smachitae, te la loq’uesbe ta sna; ja’ te la jquilbe ti yoc’ xmachitae pasbil ta c’anal taq’uin. Yu’un tu jlec’ meltsanbil, jech ti xmachitaile ja’ pasbil ta tsatsal taq’uin lec xcuch yu’un.

10 Jech ti Espíritue te la sujun ti ac’o jmil ti Labane, jech la jcal ta co’nton: ti vu’une muyuc bu jmalojbe xch’ich’al jun quirisiano. Jech te la jmuts jba yu’un mu jc’an ta jmil.

11 Ti Ch’ul Espíritue jech la jyalbun yan velta: yu’un Cajvaltic la jyac’ ta ac’ob, jech, jna’oj xa ono’ox ti sc’an chi smilune, yu’un mu sc’an xaybe smantaltac ti Cajvaltique; xchi’uc ja’ xa te yich’ojbuncutic ti c’usitic lec oy cu’uncutique.

12 Jech la jyalbun yanvelta no’oxtoc ti Ch’ul Espíritue: Milo yu’un Cajvaltic la jyac’bot ta ac’ob.

13 Xchi’uc ti Cajvaltique ta smilanan scotol ti boch’otic chopolique ti c’uxi xu’ xc’ot ta pasel ti c’usi lec sc’an stuque. Yu’un ja’ lec me ja’ cham jun vinique, ja’ chopol me ja’ chcac’tic socuc jun muc’ta jteclum ta sventa smulique.

14 Ti c’alal vu’un, Nefiun, la jca’ay ti va’ay lo’iletique, te vul ta jol ti c’usi yalojbun xa o no’ox ti Cajvaltic ta xocol banamile, ti jech la jyal: Ti c’alal me la xch’unic mantaletic ti a xnich’nabique, ja’ te chbatic ti te ta t’ujbilal banamile.

15 Te la jna’ ti mu xu’ spasic smantaltac Cajvaltic jech chac c’u cha’al smantaltac Moisese. Ja’ xa no’ox ti me oy yu’nic jech mantaletique.

16 Xchi’uc jna’oj o no’ox ti ja’ te ts’ibabil ti mantaletic ta sba c’unil c’anal taq’uin vunetique.

17 Xchi’uc jna’oj o no’ox ti Cajvaltique la jyac’ ta jc’ob ti Labán ta sventa: ti c’uxi xu’ ta xquich’ ti poco’ lo’iletique, jech chac c’u cha’al o no’ox ta smantaltaque.

18 Ja’o jech, la jch’unbe ya’yej ti Espíritue la jtsacbe ta sjol ti Labane, la jbojbe snuc’ ta xmachita no’ox stuc.

19 Ti c’alal la jbojbe xa ox ti sjol ta xmachita stuque, la jtsacbe sc’u’ ti Labane la jlapbe, la jlapbe scotol, xchi’uc la jtsinanan jlomo ta yabtejebtac.

20 Ti c’alal la jpas scotol ti va’aye, te li bat ti te bu snac’unajeb Labane, ti c’alal li nopaj batel ti tee, te la jta jun yaj abtel Labán ti ja’ boch’o snac’ojbe sllavial nac’unajebale, ja’ jech la jpas chac c’u cha’al xc’opoj yajval, te la jcalbe ti ac’o bat xchi’nun ti te bu’oy nac’unajebale.

21 Ti stuque la snop me vu’un yajvalun Labán, yu’un la jyil ti ja’ sc’u’ xchi’uc ti ja’ smachita chucul ta jch’ute.

22 Te la jyalbun sventa moletic yu’nic Judioetic, yu’un sna’oj ti yajval Labán, ti te la xchi’in sbejel ac’ubale.

23 Te lec la jc’opan jech chac c’u cha’al Labanun ya’eluc.

24 Te la jcalbe ti vu’un ta xquich’ batel ti c’usi ts’ibabil, te ta sba c’unil c’anal taq’uin ta quermanotac, ti te oyic ta jot coral tone.

25 Te la jcalbe ti ac’o xchi’nun batele.

26 Yu’un la snop me ja’ la jcalbe ta sventa hermanoetic ta sventa ch’ulna, yu’un ti me ja’ ta melel ti Labán, ti boch’o la jmile, te la xchi’nun batel.

27 Te ep ta velta la jyalbun ti ta sventa moletic yu’nic Judioetique, ti c’alal chi xanocutic batel ti te buoyic jbanquiltac ti ta jot coral tone.

28 Ja’o jech, c’alal la jyilun ti Lamane, tu jxi’el no’ox ic’ot, jech ec ti Lemuele, xchi’uc ti Same, jech te jatoic ta jtojolal, yu’un la snopic me ja’ Labán, xchi’uc ti me yu’un la xa smilune. La snopic ti me yu’un jech bat yich’ic milel ti stuquique.

29 Ja’o jech la jc’opanic, jech te la jya’yicun; ja’ jech te muyuc xjatoic batel ta jtojolal.

30 C’alal la jyil jbanquiltac ti yaj abtel Labane, te it’elquinaj, jech te ta xa ox sc’an xjato ta jtojolal yu’un tsut batel yanvelta ta jteclum Jerusalen.

31 Vu’un Nefiun, Ti vu’un lec muc’ta vinicune, jech te ep jta jpersa ta sventa Cajvaltic, te la jchuc ti yaj abtel Labán ti c’uxi mu xjato batele.

32 Te la jcalbe me sc’an ta xa’ybun jc’op, ti c’u x-elan cuxul ti Cajvaltique, xchi’uc ti c’uxi cuxulun vu’une, ti me sc’an ta xa’ay ti c’usi chcalcutique jech te to ta xcac’cutic cuxluc.

33 Te la jcalbe, jech te la jtsac ta textico Riox, ti ac’o mu xi’uque; ti jech muyuc xa boch’o ta xich’ ich’el ta venta chac’ c’u cha’al vu’uncutic ti me bat xchi’nuncutic ta xocol banamile.

34 Xchi’uc la jcalbe ti ta melel ti Cajvaltic la spasuncutic ta mantal ti jech ta jpascutique, xchi’uc, ti tsc’an mu aniluc jpastic ti smantaltac Cajvaltique? jech, ti me cha bat ta xocol banamil ti te bu’oy jtote, oy te avavil xchi’uc vu’uncutic.

35 Ja’o jech ti Zoram, ti ja’ sbi ti j-abtele, te vul xch’ulel ti c’alal la jya’ay ti c’usi la jcalbee, te la jyal ti ta xbat ta xocol banamil ti te bu’oy ti jtote, xchi’uc la stsac ta texticoal Riox ti yu’un te xa ta xchi’nuncutic o scotol c’ac’ale.

36 Ja’ jech smelolal ti ta jc’ancutic xbat jchi’incutique: ja’ ti c’uxi mu sna’ic Judioetic ti c’uxi li jatocutic batel ta xocol banamile, ti c’uxi mu snutsuncutic xchi’uc ti c’uxi mu xbat smiluncutique.

37 Jech ti c’alal la stsac ta texticoal Riox ti Zorame, te xa muyuc c’usi xal co’ntoncutic ta stojolal.

38 Ja’o jech la jquich’cutic ti c’unil c’anal taq’uin vunetique xchi’uc ti yaj abtel Labane, li batcutic ti ta xocol banamile ja’ te li batcutic ti te bu’oy sna ta poc’ jtotcutique.