1 Ja’ jech te li xanocutic batel ti ta xocol banamile te li batcutic ta stuq’uil batel jutuc sloq’uem c’ac’al te ta sjelovel el. Te li jelocutic ta vocol xchi’uc la jta jvocolcutic ti te ta xocol banamile; ti cajniltaccutique te voc’ yolic ti te ta banamil bu muyuc yajvale.

2 Te muc’ no’ox la jtacutic ti sbenticion Cajvaltic ta jtojolalcutique, jech ac’o me ta tseil tiboletic cuxuluncutic ti ta xocol banamile, jech ti cajniltaccutique ep no’ox ti ya’lel xchi’uc sventa yolique, jech te la sta stsatsalic, jech chac c’u cha’al viniquetic; jech te cuch yu’nic ti xanubale jech muyuc xa xmucul c’opojic o.

3 Ja’ jech chquiltic o ti smantaltac Riox ti jech tsc’an ch’unele. Ti me la xch’unic smantaltac Riox ti snich’nab viniquetique, ta xich’ic ac’bel sve’elic xchi’uc ta x-ac’bat stsatsalic, xchi’uc ja’, ta sq’uel c’uxi xu’ c’otuc ta pasel yu’nic ti c’usi tspasatic ta mantale, ja’ jech, ja’ la jyac’buncutic ti c’usi tun cu’uncutic ti c’alal te oyuncutic ta xocol banamile.

4 Ti jech epal jabil te oyuncutique, jech, vaxaquib jabil oyuncutic ta xocol banamil.

5 Te li c’otcutic te ta banamil ti bu la jcac’becutic sbiin Ep c’usitic oy (Abundancia) yu’un ta sventa oy ep sat te’etic xchi’uc epal te’tical pometic, ti Cajvaltic la smeltsan ta sventa ti c’uxi mu xi chamcutique. La jquilcutic ti nabe, ti bu la jcac’becutic sbiin Irreántum, epal vo’etic ti xi smelolale.

6 Ja’ o jech te la jpascutic jnacutic ta poc’ ti te ta ti’ nabe; ac’o me jech ep xa quilojcutic ti vocolile, xchi’uc ti at o’ntonale, xchi’uc ti c’usi chopolique, ti jech mu xu’ cu’uncutic ta jts’ibacutic scotole, te xcuxet no’ox co’ntoncutic jcotolcutic ti c’alal li c’otcutic ti te ta ti’ nabe ti la jcac’becutic sbiin ep c’usitic oy (Abundancia), ta sventa ti yu’un ep c’usitic tee.

7 Ja’ o jech ta tsacal ti vu’un, Nefiune, ti ep xa ox c’ac’al te oyun ti ta banamil yo bu Ep c’usitic oye. Ti ya’yej Cajvaltique vul ta jtojolal, jech la jyal: Lican muyan batel ti te ta te’tique xi, ja’ o jech ti vu’une li lic li muy batel ti te ta te’tique, te la jc’opan Cajvaltic.

8 Ja’ o jech ti Cajvaltique la sc’opanun, jech la jyal: cha pas jun barco, ja’ jech chac c’u cha’al cha cac’bot avile, ti c’uxi xu’ ta xquic’batel alumal ti li’ ta va vo’etique xi.

9 Ti vu’une jech la jcal; Cajval ¿Bu chbat jtatalel ti staq’uinaltac ti ta jpas oe, ti c’uxi xu’ ta jpas o ti cabtejebtac ta sventa ti c’uxi xu’ ta jpas o ti barcoe, jech chac c’u cha’al avac’ojbun ta ilele?

10 Ja’ o jech Cajvaltic la jyac’bun quil ti bu chba jtatalel ti taq’uinetic ti c’uxi xu’ ta jpas o ti cabtejebtaque.

11 Ja’ o jech ti vu’un Nefiune, la jpas sjububil jc’oc’ pasbil ta snuculil chon bolometic, ti c’uxi xu’ ta xjub o ti jc’oq’ue; ta ts’acal ti c’alal la jpas ti sjububil jc’oq’ue, ja’ sc’anto ti c’uxi xu’ ta xtil o ti jc’oq’ue, la jch’ijulan chabej ton, ti c’uxi xu’ stsan o ti jc’oq’ue.

12 Yu’un ti Cajvaltique mu o no’ox sc’an ti jpascutic ep jc’oc’cutic ti c’alal chi xanocutic batel ta xocol banamile; jech la jyal: Vu’un ta jpas ti ac’o oyuc smuil ti ave’elic ti jech muyuc cha panique.

13 Xchi’uc vu’un a lusicun ti ta xocol banamile; xchi’uc ta jmeltsan a beic ja’ no’ox venta ti me chapasic ti jmantaltaque, xchi’uc ja’ jech ti c’uyepal ti cha ch’unbicun ti jmantaltaque, ja’ te cha vich’ic aq’uel batel ti te ta banamil ti bu albil o no’ox sc’oplale, xchi’uc xa na’ic ti vu’un chi ac’van batele xi.

14 Jech, ti Cajvaltique jech la jyal xtoc; Ta ts’acal ti c’alal me la c’ot ti ta banamil ti bu albil o no’ox sc’oplale, te cha na’ic ti vu’un Avajvalicun, ti vu’un Rioxun; xchi’uc ti vu’un a Vajvalicun ti la jpojoxuc ta milel ti c’alal la jloq’uesoxuc ta stesclumal Jerusalene xi.

15 Ja’ o jech ti vu’un, Nefiune, te la jca’c persa spasel ti smantaltac ti Cajvaltique; te la calbeic jbanquiltac ti ac’o tuq’uicuc xchi’uc ti ac’o jch’unej mantaleticuque.

16 Ja’ o jech te la jpas cabtejebtac ta taq’uin ti te la loq’ues ta ch’entique.

17 C’alal la jyilic jbanquiltac ti yu’un xa ta jpas ti jun barcoe, sjapoic mucul c’opojel ta jtojolal, jech ta xalic: Ti quits’intique yich’oj chuvaj, ta snop ti xu’ yu’un ta spas jun barcoe, xchi’uc ta snop ti xu’ ta xjelo batel ta sbarco ti li’ ta muc’tiquil vo’etique.

18 Ja’ jech chmucul c’opojic ti jbanquiltac ta jtojolale, jech muyuc sc’an x-abtejic, jech muyuc la xch’unic ti xu’ cu’un ta jpas ti jun barcoe, xchi’uc muyuc la xch’unic ti me yu’un jech la jyalbun Cajvaltique.

19 Ja’ o jech ti vu’un, Nefiune, te ep la jcat co’nton ca’ay ta sventa ti stsatsal yo’ntonique; ti c’alal la jyilic ti jech ta xcat co’ntone, te xcuxet yo’ntonic liquel xchi’uc te i tse’inic ta jtojolal, jech la jyalic: jna’ojcutic ti mu xu’ avu’un spasel jun barcoe, yu’un muyucto chanoplec ti c’usi chapase, tana un, mu xu’ avu’un spasel muc’tiquil abtelal.

20 Ti vo’ote xco’laj jech chac c’u cha’ al jtotic ti ja’ la xch’unbe ti xchuvajil ya’yej yo’ntone; ti jech la sloq’uesutic ta yosilal Jerusalene, ti ja’ no’ox bu’ xi jloc’ xi j-ech’ ta xocol banamil epal jabil xae, ti cajniltactique abtejemic, ti jech oy xch’utique, ti jech voc’ yolic ta xocol banamile, jech e’ch’em yu’nic ep vocolil ja’xa no’ox ti muyuc xchamique, ja’lec jechuc ti yu’nuc chamicuc o no’ox ti c’alal sc’an to’ox xloq’uictal ta Jerusalene, ti c’alal jech ta xilic scotol ti at o’ntonale.

21 Jech ti li’e ep xa jabil li’oyutic ti ta xocol banamile; ti va’ay xa yepal c’ac’ale te xa ep c’usi la jtatic ta jpuculal osiltic ti jechuque, jech, xchi’uc te xcuxet co’ntontic ti jechuque.

22 Jna’ojtic ti viniquetic ti te oy ta slumal Jerusalene, ti ja’ lec jch’unej mantaletique, yu’un ja’ ta spasic ti smantaltac xchi’uc ti c’usi chal ti Cajvaltique, ja’ jech chac c’u cha’al scotol smantaltac chac c’u cha’al ta smantal Moisés; ja’ jech jna’ojcutic ti li’ jteclume lec jch’unej mantaletic; jtotic la sq’uelbe stalelic, ti jech la sloq’uesutique yu’un la jca’ybetic ya’yej; jech ti li’ quits’intique ja’ jech x-elan tspas sba ec, ja’ jech x-elan sba ti ta xmucul c’opojic ti jbanquiltaque, ti jech ta sc’anic parteal ta jtojolalcutique.

23 Ja’ o jech ti vu’un, Nefiune, la jc’opanic, jech la jcalbeic: ¿Me cha ch’unic ya’eluc ti jtotic, ti ja’ snich’on Israele, ti c’alal jech yich’ic pojel ta sc’ob Egipcioetic, ti c’alal manchuc jech ya’yojbeic ti ya’yejtac Cajvaltique?

24 Jech, ¿chavalic van vo’xuc me la jyich’ic loq’uesel ta chuquel, ti manchuc Cajvaltic la spas ta mantal Moiss ti jech la sloq’ues ta mosoinele?

25 Vo’xuc xa na’ic lec ti snich’nab Israeletic ti oyic to’ox ta mosoinele; xchi’uc xa na’ic ti te nojemic ta tarialil abtelal ti jech tu jtsots ta pasele, ja’ jech, xa na’ic ti texavan lec xayic ti yich’ic loq’uesel ti te bu tsobolic ta mosoinele,

26 Xchi’uc xa na’ic ti Moisese ta Cajvaltic la jyich’ ac’bel Mantaletic ti c’ac’al jech la spas muc’ta abtelal ti ta sc’op no’ox ti jech la svoc’ sba ti ya’lel tsajal nabe, ti jech ta taquin banamil jeloic o ta jot nabe.

27 Xchi’uc xa na’ic ti Egipcioetic ti boch’o la xchi’inic batel ti yaj soltarotac Faraon ti jech te jic’oic ta tsajal nabe.

28 Xchi’uc xa na’ic ti snich’nab Israeletic ti jech yich’ic mac’linel ta pan ti muyuc toyol stojol ti te ta xocol banamile.

29 Jech xchi’uc xa na’ic ti Moisés, ti ta sc’op no’ox, jech chac c’u cha’al stsatsal Riox ti te oy ta stojolal, ti jech la scach sba yu’un ti muc’ta ton ti jech loc’ otal vo’e, ti c’uxi xch’abi o ti staqui ti’ilic ti snich’nab Israeletique.

30 Ti c’alal jech ic’bilic batel yu’un ti Cajvaltic ti Srioxic ti ja’ jcoltavaneje, ja’ ba’yuc be batel yu’nic, ja’ jech yich’ic beiltasel ta c’ac’altic xchi’uc te ch-ac’bat slusic ta ac’ubaltic, ja’ jech la spas cha c’u cha’al jtunel yu’un ti vinique, ja’ jech te tsatsubtasbat yo’ntonic jech muyuc c’usi snopic xchi’uc muyuc c’usi la jyalbeic ti Moisese xchi’uc ti Riox ta bats’imelel ti ja’ cuxule.

31 Ja’ o jech, chac c’u cha’al ti ya’yeje la tsvuq’uesan, jech chac c’u cha’al ya’yeje, la jyalbe bu xu’ chbatic; jech chac c’u cha’al ya’yeje, ep c’usi la spasanan ta stojolalic, yu’un muyuc c’usi yan xu’yunic spasel ti me mu ja’uc ta ya’yeje.

32 Ta ts’acal ti c’alal la stuch’ic ti yuc’umal Jordane, ja’ la yac’be stsatsalic ti c’uxi la snutsic loq’uel ti te yajvaltac banamile, yo ti jech la snutsique ja’ ti c’uxi xchamic oe.

33 Jech tana, ¿vo’xuque chanopic van ti yajvaltac ti va’ay banamile, ti te oyic ti te ta banamil ti bu albil ono’oxe, ti yu’un ja’ la jyich’ic aq’uel batel yu’un jtotique, tavan xa nopic ti me yu’un jch’unej mantaletique?, ti vu’une ta xcal ti mu jechuque.

34 ¿Tavan xa nopic vo’xuc, ti jtotique ja’ ep staojic slequilalic jech chac c’u cha’al stuquic ti yu’nuc ja’uc lequicuque? ti vu’une ta xcal ti mu jechuque.

35 Jech tana, ti Cajvaltique co’ol sc’anojan scotol jbec’taltic; ti boch’o jch’unej mantale ja’ tsta slequilal yu’un Riox, ja’ no’ox jech, ti boch’otic li’oyic ta jteclume muyuc la sc’anbeic ti ya’yej Rioxe, xchi’uc tsots c’otemic ta stsatsal bolilil, xchi’uc ti sc’ac’al yo’nton Rioxe te oy ta stojolalic, xchi’uc muyuc sts’uiltas Cajvaltic ti banamil ta sventaique, ja’ la sts’uiltas ta sventa jtotic; xchi’uc jech la jyich’ ts’uiltasel ta sventa jtotic ti c’uxi cuxetuc no’ox yo’ntonic ta sventae.

36 Ja’ jech, ti Cajvaltique la spas banamil ti jech oyuc yajvale; xchi’uc la spas snich’nab ti ja’uc yajvalicuque.

37 Ja’ ta stoy ti bu lequil jteclume, ja’ ta svuq’uesbe steclumal ti boch’otic chopolique.

38 Ja’ ta xac’be boch’o jch’unej mantaletic ti lequil banamile, ja’ ta soques ti bu chopole, muyuc sts’uiltas ta sventa sbolilic.

39 Te ta spas mantal ta staylejal vinajel. Yu’un ja’ spasub mantal, ti li’ banamile ja’ scajleb yacan.

40 Xchi’uc sc’anojan ti boch’otic xch’unojic ti ja’ Srioxique, jech xtoc, ja’ la sc’an ti jtotique, xchi’uc oy c’usi la jyal ta spas ta stojolalic. Abraham, Isaac xchi’uc Jacob; jech te la sna’ ti oy c’usi yaloy ta spase; jech te la sloq’ues ta slumal Egipto.

41 Te la jyac’be yat yo’ntonic ta taquinal bamamiltic ta snamte’, yu’un la stsatsubtas yo’ntonic jech chac c’u cha’al vo’xuc cha pasique, jech Cajvaltic la jyac’be yat yo’ntonic yu’un sbolilic. Jech la stactalel ta stojolalic c’ac’al chonetic sna’ xvilujic, ti c’alal la jyich’ic ti’ele, la jyal c’uxi ta poxtael, ti starialic ta spasique ja’ no’ox ac’o sq’uelic; ta sventa ti yu’un sc’unilique, ti jech yu’un tu jc’unique, ep boch’otic chamic o.

42 Jech ta stsatsubtas ti yo’ntonic ta baq’uintique, jech te la sbajic ti Moisese, xchi’uc ti Rioxe, jech, a na’ojic ti yu’un ja’ ta sventa stsatsalic, ti jech yich’ic aq’uel batel ti te ta banamil ti bu albil ono’ox sc’oplale.

43 Jech, ta ts’acal ti c’alal jech c’ot ta pasele, c’ot sc’ac’alil ti jech mu xch’unic mantale, jech, ja’tic to o ti c’uxi malubique, ja’ mu jna’ me ja’ te ta sc’ac’alil ti c’alal jech xa ox ta xich’ic vuq’uesele, ja’ no’ox jna’oj ti chc’ot sc’ac’alil ti jech ta xich’ic vuq’uesele, ti ja’ xa no’ox jutuc jayibicucvan ti ta xich’ic iq’uel batel ta chuquele.

44 Ja’ o jech ti Cajvaltique la spas ta mantal jtot ti ac’o batuc ta xocol banamile. Jech ti Judioetique, ta ox sc’an ta smilic, jech, ti vo’xuque eq’ue ta ox xa c’an cha milic ec. Jech ti vo’xuque jmilbanejoxuc ta a vo’ntonic ja’ jechoxuc jech chac c’u cha’al stuquic.

45 Vo’xuque ta anil no’ox cha pasic ti c’usi chopole, ja’ c’unoxuc ta stael ta na’el ti Cajvaltic ti ja’ Arioxique, oy to avilojbeic yabat un bi, ti jech la sc’opanoxuque, ti oy to jech ava’yojbeic ya’yej ta baq’uintique, ti jech la sc’opanoxuc ta c’unil lo’il xchi’uc ta lec lequil lo’il, ti jech a comtsanoj xa ta snopele, ti jech muyuc bu la c’anbe ti c’usi la jyale; ti jech tsots xa la xchi’noxuc ta lo’il ti xco’laj xa xchi’uc chauc ya’eluc ti ya’yej ti jech la sniques ti banamile ti xco’laj xa xchi’uc tsjab sba ta chib ti banamil yu’une.

46 Vo’xuc xa na’ic ti ta stsatsal no’ox ya’yej ti boch’o tsots xu’ yu’une, xu’ ta slajes ti banamile, jech xchi’uc xa na’ic ti ta ya’yej no’oxe xu’ ta spas ta lequil banamil ti bu chopol banamile. Jech, ¿c’u yu’un, ti jech tu jtsots ti avo’ntonique?

47 Jech, ti jch’ulele ta xat yo’nton ta atojolalic; xchi’uc ti co’ntone ta xti’van xa, yu’un ta xi’ ti me jech xa vich’ic aq’uel ta ch’ayel ta sbatel osile. Jech nojemun ta S-espíritu Riox, jech ti muyuc xa spersa ti jbec’tale.

48 Ja’ o jech ti c’alal la jcal ti jech va’ay lo’iletique, te ilinic ta jtojolal ta sjipicun ox sc’anic ta chac nab, ti c’alal nopajic tal ti jech ta stsaquicune te la jc’opanic, jech la jcalbeic: Ta sbi Riox ti voch’o tsots xu’ yu’une, ta xcal ti mu xa piquicune, yu’un nojemun ta stsatsal Riox ac’ouc me jbec’tal no’ox; boch’ouc no’ox ti ta xac’ sc’ob ta jbec’tale xu’ ta xtaquij jech chac c’u cha’al jun taquinal vale’. Ja’ jech muyuc xa stu xc’ot ta stojolal Riox, yu’un Riox ta syayijes.

49 Ja’ o jech ti vu’un, Nefiune, te la jcalbeic ti mu xa epuc smuc’ul c’optaic ti stotique; xchi’uc jech mu xu’ sbajbicun ti abtelale, yu’un Riox spasojun ta mantal ti ta jpas jun barcoe.

50 Xchi’uc jech la jcalbeic: Ti me Riox ta spasun ta mantal ti c’usi xu’ ta jpase, jech xu’ ta jpas, ti me jech tspasun ta mantal ti ac’o xcalbe ti vo’etic li’: Ti jech ac’o pasuc ta banamile, jech xu’ ta spas ta banamil, ti me jech ta xcale ta spas jech.

51 Ja’ jech, ti Cajvaltique yu’un tu jmuc’ no’ox ti svu’ele, xchi’uc oy ep yac’oj ta ilel svu’el ta sat viniquetic, ¿C’uxi mu xu’ xi xchanubtas c’uxi ta meltsanel jun barco?

52 Ja’ o jech ti vu’un Nefiune, ep c’usi la jcalbeic ti jbanquiltaque, ti jech muyuc xaybeic smelolal c’uxi batique xchi’uc ti jech muyuc xu’ yu’nic c’usi chopol la spasbicune, xchi’uc ti muyuc xu’ yu’nic la jyac’ sc’obic ta jtojolale, me ja’ uc la spiquicun ta sbic’tal sc’obic, jech epal c’ac’al. Muyuc c’usi xi spasbicun yu’un xi’elic ti jech chlajic ta jsate. Jech tu jtsots ti S-espíritu Rioxe, ja’ jech x-elan ti abtej ta stojolalique.

53 Ja’ o jech ti Cajvaltique la jyalbun: vecho a c’ob ti te buoyic ti abanquiltaque, ti jeche mu xlajic o te ta asat, ja’ no’ox ta jniquesic, xi ti Cajvaltique. Ti jech ta jpase ja’ ti c’uxi xu’ ac’o sna’ic ti vu’un Cajvalticun ti ja’ Srioxique.

54 Ja’ o jech la jbech ti jc’ob ta stojolalic jbanquiltaque, jech muyuc bu xlajic ta jsat, ti Cajvaltique la sniquesananic jech chac c’u cha’al yaloj o no’ox ta ya’yeje.

55 Ti stuquique ja’ o jech la jyalic, jna’ojcutic ta bats’imelel ti Cajvaltic oy ta a tojolale, jech jna’ojcutic ti ja’ stsatsal Cajvaltic ti la sniquesuncutique, jech te la squejan sbaic ta jtojolal. Jech ta xa ox xich’icun ta muc’, jech muyuc la jc’an, jech te la jcalbeic: Vu’un a chi’ilicun, ta bats’imelel vu’un a avits’inicun; jech tana ja’ xa vich’ic ta muc’ ti Cajvaltic ti ja’ Jrioxtique, xchi’uc ja’ la’ jc’antic ti jtotique xchi’uc ti jme’tique ti c’uxi xu’ natubuc ti jc’ac’aliltic li’ ta banamil ti jtotic Riox ti ja’ Jrioxtic chi yac’butique.