Xchibal Svun Nefi

1 Ja’ o jech ta ts’acal ti vu’un Nefiune, c’alal laj co’nton ta xchanubtasel ti jbanquiltaque, ti jtotcutic Lehie jech ep c’usi la jyal ec xtoc: ti jech ep c’usi muc’tic la spas ti Cajvaltic ta stojolalic ti c’alal loq’uictal ta slumal Jerusalene.

2 Jech te la jyalbeic ti c’u x-elan tsots la spasic ta barco ti te ta vo’etique, ti jech ta slequilal xa no’ox yo’nton Riox la jyich’ic coltael, ti c’uxi muyuc sts’untsajic yalel ta nabe.

3 Xchi’uc la jyich’ic albel xtoc ti banamil bu albil o no’ox sc’oplal ti bu staojic xae; ti jech ja’ ep slequilal yo’nton ti Cajvaltic ti jech yalojbuncutic ti ac’o xi jloc’cutic ti te ta yosilal Jerusalene.

4 Yu’un jech la jyal, oy c’usi ac’bil quil vu’un jna’oj ti jteclum Jerusalene yich’oj xa vuq’uesel; ti yu’nuc o no’ox te oyuticuc ti te ta slumal Jerusalene, texa li jcham ti jechuque.

5 Jech la jyal ti stuque, jech ti ep xa jtaojtic ti vocolile, la xa jtatic ti banamil ti bu albil o no’ox sc’oplale, ti ja’ t’ujbil banamil ta sventa yantique, ti ja’ jun banamil ti Cajvaltic la jyalbun vu’un ti ja’ chc’ot ta spuculal osilic calab jnich’nabe, jech, Cajvaltic la jyac’bun ti li’ banamil ta sventa calab jnich’nab ta sbatel osil, xchi’uc ti boch’otic yantic lumetic ta xac’tal ta sc’ob ti Cajvaltique.

6 Ja’ jech, ti vu’un Lehiune, ta xcalbe sc’oplal jech cha c’u cha’al Espíritu ch-abtej ta jtojolale, ti muyuc boch’o xu’ ta xtal ti li’ ta banamil ti me muyuc ta xac’tal ta sc’ob Cajvaltique.

7 Jech ti li’ banamile yich’oj ts’uiltasel ta sventa ti boch’otic ta xic’tale, ja’ no’ox ti me ja’ jech spasic ti mantaletic jech chac c’u cha’al yac’oje, ja’ chc’ot ta banamil ta sventa c’uxi colemic o; ti c’uxi mu xa xu’ xich’ic uts’intaele; ti me jech to c’ot ta pasele, ja’ xa ta sventa sbolilic; ti me ja’ epaj ti sbolilique, jech tuch’bil ta utel chc’ot ti banamil ta sventa sbolilique; ti boch’otic lequique ja’ ta xich’ ts’uiltasel ta sbatel osil.

8 Ja’ jech, ja’ lec ti me mu to sna’ic yantic jteclum ti li’ banamile, yu’un oy ep jteclum ti jech nojem xa yu’nic ti banamile, ti jech muyuc xa bu tstaic spuculal yosilique.

9 Ja’ jech ti vu’un Lehiune, la xa jta c’uxubinel, jech cha c’u cha’al Cajvaltic ta xic’tal li’ ta sbanamil Jerusalen ti c’u x-elan xch’unbat ti smantaltaque, jech li’ ta x-oyiic li’ ta sba banamil xchi’uc jech ch’ayemic ta o’ntonal yu’un yantic jteclum, ti c’u xi xu’ ta xich’ic ti banamil ta sventa yu’un stuquique, jech ti me tspasic ti mantaletique, jech ta xich’ic benticion li’ ta sba banamil, xchi’uc muyuc boch’o ta xich’ic uts’intael xchi’uc muyuc boch’o xu’ ta spoj ti spuculal osilique, jech xu’ tsots yo’ntonic te oyicuc ta sbatel osil.

10 Ja’ jech c’alal me c’ot sc’ac’alil me ch’ay ta yo’ntonic ti xch’unolajel yo’ntonique, ti ta ts’acal ti jech oy xa jech ep staojbeic ti sbenticional sc’ob Cajvaltique—ti jech sna’ojic ti c’u x-elan la spas ti banamil xchi’uc ti viniquetique, jech xotquinic xa ti muc’tic xchi’uc ti jech alac’ sba ti yabteltac Cajvaltic ti jech o no’ox ta sliquebal banamile, ti jech yich’ojic ac’bel stsatsalic ti c’uxi xu’ c’usiuc spasic scotol jech chac c’u cha’al xch’unolajel yo’ntonique; ti jech yich’ojic scotol ti mantaletic ta sliquebal o no’oxe, ti jech la jyich’ic aq’uel tal ta bats’i slequil yo’nton ti li’ ta banamil ti bu ono’ox albil sc’oplale—jech, ta xcal ti me c’ot sc’ac’alil ti me muyuc la xch’unic ti Ch’ul Riox ta Israel ti Jcoltavanej ta bats’imelele, ti ja’ Jcoltavanej xchi’uc ti ja’ Rioxe, jech ti meltsanele ti boch’otic lequique te ta xc’ot ta stojolalic.

11 Jech ja’ ta xic’tal yantic lum ta stojolalic, ti boch’o xu’ ta xac’be stsatsale ti jech xu’ ta xich’ic pojbel ti sbanamilic buoyique, xchi’uc ta spas ti ac’o yat yo’ntonique xchi’uc ti ac’o stanij sbaique.

12 Jech, ti jcoj totil me’ile xchi’uc ti ta yantoe, ta smalbe sbaic xch’ich’alic xchi’uc oy c’usi muc’tic ep chopol ta xc’ot ta pasel ta stojolalic, ja’ jech, jnich’nabtac, ta jc’an ti ac’o xa vules ta ajolic xchi’uc ta jc’an ti ac’o xa va’ybicun ti jc’ope.

13 ¡Xchi’uc ti ac’o xa juloique; ti ac’o xa juloic ti ta avayelic ti tu j-ech’em bateme, jech ti ta avayelic ta sventa c’atinvaque, xchi’uc ac’o xa lilin a vaic ti ta xibalsba carena chuculoxuque, ti carena bu chuculic o ti snich’nab viniquetic ti c’uxi ta xich’ic iq’uel batel ta sbatel osil ta chuquel ta natil xab xchi’uc ta vocolil at o’ntonal xi’ele!

14 ¡Julovanic xchi’uc licanicme ti ta spucucale! ¡A’ybeic me ti ya’yej jun totil xibal sbae, ti mu ta jaluc cha bac’ ti a sbec’tal ti ta siquil xchi’uc ti ta xch’ijlan muquinaltique, ti bu muyuc jxanubal xu’ ta sut talele; jayibuc xa no’ox c’ac’al, xchi’uc ta jtam batel jbe ta scotol banamil.

15 Jech tana ti Cajvaltique sloq’uesoj xa jch’ulel ta c’atinvac; yu’un quilojbe xa xojobal xchi’uc slequilal, yu’un jech meybilun ta sc’obtac ta scotol c’ac’al ti jech sc’anojune.

16 Ti c’usi la jc’ane ja’ ti ac’o xa vules ta ajolic ti c’u x-elan lec pasbil ti c’alal smeltsanvan ti Cajvaltique, jech ti va’aye ja’ o no’ox sc’an ta sliquebal ti jch’ulele.

17 Jech ti co’ntone tu jchopol cha’ay baq’uintic xchi’uc ta xi xi’ ta sventa ti stsatsal a vo’ntonique, ti Cajvaltic ti ja’ Jrioxtique ta xtal sc’ac’al yo’nton ta atojolalic, jech cha vich’ic milel xchi’uc cha vich’ic lajesel ta sbatel osil.

18 O me ta xich’ic tuch’el ta utel epal c’ac’al ta stot ta sme’ic xchi’uc to ta yalab xnich’nabic, xchi’uc ta xich’ic ac’bel vocolil ta machitail xchi’uc ta vi’nal, xchi’uc mu xa xich’ic c’anel, xchi’uc ja’ xa te ta xich’ic iq’uel batel ti c’u x-elan tsc’an xchi’uc bu’oy ti xchuquinab pucuje.

19 Jech tana jnich’nabtac, mu me xc’ot ta pasel ti c’usitic va’aye, vo’xuc me lequil jteclumoxuc ti lec t’ujbil xchi’uc ti lec c’anbil yu’un ti Cajvaltique, ja’uc no’ox me xa pasic ti c’usitic tsc’ane, yu’un ti sbelale ja’ lec tuc’ ta scotol c’ac’al.

20 Yu’un ti stuque jech yaloj: jech ti c’u x-elan cha pasbun ti jmantaltaque, oy a cuxlejal li’ ta banamil; jech no’oxtoc ti c’u x-elan me muyuc cha pasbun ti jmantaltaque cha vich’ loq’uesel li’ ta jtojolal.

21 Jech tana, ti c’uxi xu’ ta sta xcuxetel yo’nton ti jch’ulel ta atojolalique, xchi’uc ti c’uxi cuxetuc no’ox co’nton chi loc’ ti li’ ta banamil ta atojolalique, ja’ no’ox venta ti me mu vu’nucun ta xquich’ iq’uel batel ta ch’ayel xchi’uc te ta xc’uxul muquinalile, licanic me ta spucucal, jnich’nabtac lec me vinic xa pas abaic, lec me xa pas a vaic ta jmoj, xchi’uc junuc no’ox me avo’ntonic, jmojuc me xa pas abaic ta scotol, ti c’uxi mu xa batic ta chuquele.

22 Ti c’uxi mu xa vich’ tsots tuch’el ta utele; ti c’uxi mu xa vich’tal ti c’usi mu sc’an ti jun Riox ti yu’un ja’ bats’i lec ta jtojolaltic ta sventa ti c’uxi chi yac’utic ta ch’ayele, jech, ta scotol c’ac’al ch’ayel, xchi’uc jbec’taltic xchi’uc jch’uleltic.

23 Julovanic me jnich’nabtac, ac’o me abaic ta sventa c’usitic lec, lilino me abaic ti ta carena bu chuculoxuc oe, xchi’uc loc’anic me ti ta ic’al osile, xchi’uc licanic me ta spucucal.

24 Jech mu xa me epuc xa ilinic ta sventa ti avits’inique, yu’un ti lo’iletique lec xa me c’otemic, yu’un ti boch’o xch’unoj o no’ox ti mantaletic ti c’alal li jloc’cutic talel ta Jerusalene; ja’ xa me yabtejeb c’otem ta sc’ob Riox ti c’uxi la jyic’utic talel li ta banamil ti bu albil o no’ox sc’oplale, ti manchuc o no’ox ti ja’ la scoltautique li jcham ta vi’nal te ta xocol banamil ma ti jechuque; jech to cha c’an cha milic o ti va’aye, jech xchi’uc staoj ep vocolil avu’nic.

25 Jech ep chi xi’ xchi’uc chi nic ti me jech tstato vocolil yan velta avu’nique, yu’un a tic’ojbeic smul ti ta scuy sba ta ajvalilal ta atojolalique; ti vu’une jna’oj ti muyuc bu scuyoj sba ta ajvalilal ta atojolalique; ja’ no’ox tsc’anbe slequilal Riox ta sventa jlequilaltic vu’tic ta sbatel osil.

26 Jech mucul c’opojemoxuc ti yu’un lec yac’oj sba ta atojolalique, acuyojic ti chopol c’usi ta spase, xchi’uc avalojic ti ilinem ta atojolalique, mo’oj pisini, yu’un ja’ tsots c’otem ti stsatsal ya’yej Riox ta stojolale, yu’un ti c’usi la cuyic ta c’ac’al o’nale ja’ ti c’usi ja’ ta bats’imelele, ja’ ti c’usi oy ta stojolal Rioxe, yu’un ti stuque mu xu’ ya’ay ti muyucuc la jyale, ja’ yo jech la jyal ta stsatsal ta sventa a bolilic.

27 Yu’un ja’ lec ti svu’el Riox te xchi’uque, ti c’usi cha spasoxuc ta mantale xa ch’unbeic, yu’un ma’uc no’ox stuc, yu’un ja’ espíritu Cajvaltic ti te oy ta stojolale, ti boch’o jambat o ye ti c’alal jech c’opoje, ja’ yu’un jech mu xu’ la smac.

28 Jech tana, jnich’nabtac, Lamán, xchi’uc vo’ot ec xtoc Lemuel xchi’uc Sam xchi’uc ec xtoc vo’xuc yantic jnich’nabtac, xchi’uc vo’xuc snich’nabtac Ismael, jech tana, me cha va’ybeic ti ya’yej Nefie, muyuc cha chamic, ti me cha va’ybeique li’ ta jcomtsan benticion, jech, ja’ ba’yuc jbenticion.

29 Ti me mu xac’an xa va’ybeique, jech ta jloq’ues ti ba’yuc jbenticione, jech ti jbenticione te ta xcom ta stojolal stuc.

30 Jech tana ta jc’opanot vo’ot Zoram, ti vo’ot yaj abtelot Labane, jech la vich’ loq’ueseltal ta yosilal Jerusalen, xchi’uc jech jna’oj ti ja’ jmoj avo’ntonic ta scotol c’ac’al a chi’uc ti jnich’on Nefie.

31 Jech tana, lec jch’unej mantalot, ti a nich’nabe jech ta staic benticion ta sventa xnich’nab ec, ti c’uxi oyuc lec jaluc xch’ielic li’ ta banamile, mu me ja’uc xbolibic ta stojolalic, yu’un me ta spasbeic chopol xnich’nabic li’ ta sba banamil ta sbatel osil.

32 Ja’ jech, ti me la ch’unic ti smantaltac Cajvaltique, ja’ stsu’iltasoj ti li’ banamil li’e ti lec q’uelbil yu’un ta sventa a nich’nab xchi’uc ta sventa snich’nab jnich’one.