1 Jech tana, quermanotac ti vu’un lec jc’anojoxuque la xa jq’uel ti c’usitic li’e ta sventa ti c’uxi xu’ xa na’ic o ti c’usi sc’anoj ti Cajvaltic la jyal ta scotol snailal Israele.

2 Ti ja’ stuc la jyal ta jamal ta stojolal Judioetic ta ye xch’ul vinictac jech chac c’u cha’al ta sliquebal o no’oxe, ta jujucoj ta jujucoj ta a nich’nabic ja’ to me sta yorail ti baq’uin ta xich’ aq’uel yanvelta ti xch’ulna xchi’uc ti scoral te’ Riox ta bats’imelele, ti c’alal me la jyich’ic tsobel ti te ta spuculal banamilique xchi’uc ti me te xa oyic ti te ta banamil ti bu albil o no’ox sc’oplal yu’un Rioxe.

3 Ja’ jech quermanotac ti vu’un lec jc’anojoxuque, ta xcal ti c’usitic li’e ti c’uxi xcuxetuc a vo’ntonic xchi’uc xa toy a jolic ta scotol c’ac’al, ta sventa sbenticiontac Jcoltavanej Riox ta xac’ ta stojolal anich’nabique.

4 Yu’un jna’oj ti a va’yojbeic lec ep smelolale, epoxuc van vo’xuc ti cha c’an cha na’ic ta sventa ti c’usi ta to xc’ot ta pasele; ja’ jech vu’un jna’oj ti vo’xuc xa na’ic ti jbec’taltique ta ono’ox ta xlaj xchi’uc ta xchame; ti manchuque, xchi’uc jbec’taltic ta xquiltic Riox ti jechuque.

5 Jech vu’un jna’oj ti xa na’ic ti ta xac’ sba ta ilel xchi’uc sbec’tal ta stojolalic ti boch’otic te ta Jerusalen, ti bu to ox oyutique, yu’un ja’ cu’untic jech ja’uc yu’nic ec. Yu’un ja’ lec ti muc’ta jmeltsanej banamil ta xac’ sba ta vinic ta xich’ sbec’tal ti ta xcham ta sventa scotol viniquetique, ti ja’uc comuc ta jpas mantal yu’nic viniquetique.

6 Yu’un ja’ jech chac c’u cha’al ti chamen xa ta sventa scotol viniquetique, ja’ ti c’uxi c’otuc ta pasel ti slequilal yaloj ti muc’ul jpas banamile, xchi’uc ja’ lec ti yu’nuc oyuc stsatsal ti cha’ cuxesele, ti cha’, cuxesele te ta xtal ta vinic ti c’uxi yal ta mulil Adane, ti c’uxi yal ta mulil Adane ja’ ta scoj ti mulile, ti jech yal ta mulile yich’ loq’uesel ta stojolal ti Cajvaltique.

7 Ja’ jech, ja’ lec ti oyuc boch’o tstoj ta scotol ti mulil ta sbatel osile, ti muyucuc boch’o tstoj ti mulil ta sbatel osile, ti c’usitic chopole mu stac’ pasel ta lec ti jechuque, ja’ yu’un ti ba’yuc meltsanel tal ta stojolal ti vinique, li’oy o ta scotol c’ac’al ti jechuque, ja’ yo jech ti bec’talile ta xbat ca’uc xchi’uc ta xbat cunijuc ta sme’ banamil, ti yu’un jech mu xa xu’ xlic ta baq’uine.

8 Jech ti c’usi sna’oj ti Rioxe, ti slequilal xchi’uc ti yutsilale, yu’un ti li’e, ti me muyuc xa xlic ti bec’talile, yu’un ti jch’uleltique te ta xich’ pasel ta mantal o yu’un ti abatil ti bu yal ta mulil ta stojolal Riox ta sbatel osile, ti jech c’ataj ta pucuje, ti jech muyuc xa bu ta xlic o ta baq’uine.

9 Jech Ti jch’uleltique ja’ jech tspas jech chac c’u cha’al stuc, ti vu’tique pucujutic ti jechuque, yabatutic pucuj, jech voc’olutic ta stojolal Riox ja’ te oyutic ta stojolal ti totil epal c’ope, ta uts’intael jech chac c’u cha’al stuc, jech ja’ jech chac c’u cha’al boch’o la slo’la ba’yuc jtotic jme’tic ti boch’o la sc’atajes sba chac c’u cha’al xojobal Abat ti chalbe snich’nab viniquetic ti ac’o stsob sbaic ta mucul ti c’uxi ac’o bat smilic yan quirisianoetic xchi’uc scotol ti c’usitic stac’ pasel ta ac’ubaltique.

10 Jech tu jmuc’ ti sc’anojutic Rioxe, ti jech ta smeltsan ti c’uxi xu’ chi jcolutic batel ta sc’ob ti c’usi tu jxibal sbae, jech ja’ ti xibal sba chamel xchi’uc c’atinvaque, ti la jyal ti te bu chcham o bec’talil xchi’uc ti bu chcham o ch’ulelale.

11 Ta sventa ti c’u x-elan chi scoltautic Riox, ti ch’ul Riox ta Israele, ti va’ay la jcale, ja’ no’ox ti li’ ta banamil chi jchamutique, ti va’ay chamele ja’ ti muquinaltique.

12 Ti va’ay chamel la jcale, ja’ ti chamel ta ch’ulelale, ta xac’ ta c’abal ti xchameltaque; ti va’ay chamel ta ch’ulelale, ja’, ti c’atinvaque, ti va’ay chamel xchi’uc c’atinvaque ta xac’ batel ti s-animataque, ti c’atinvaque ta xac’ batel ti ch’ulelal bu tiq’uilic ta chuquele, ti muquinaltique ja’ ti bu chuculic, bec’talile ti sbec’taltac xchi’uc xch’uleltac ti viniquetique ta xich’ liquesel yan velta ta jujuntal, ja’ xa ta stsatsal c’u x-elan icha’cuxi Ch’ul Riox ta Israel.

13 ¡Tu j-ech’em muc’ ti c’usi tsc’an tspas ti Rioxe! Jech ti lequil banamil yu’un Rioxe ja’ ta xac’be ta sc’ob xch’ulel boch’otic lequic, ti ta muquinaltique ja’ te ta xac’be sbec’talic boch’otic lequic; ti ch’ulelale xchi’uc ti bec’talile ta xich’ cha’ liquesel yan velta ta jujuntal, scotolic xa ti viniquetique mu xa sna’ic xchamic o; yu’un ja’ xa cuxul ch’ulelaletic o, xchi’uc sna’ojanic xa o lec jech chac c’u cha’al vu’tic ti li’to oy jbec’taltique, ja’ xa no’ox yu’un ti c’usi ta jna’tique ja’ xa ta bats’imelel.

14 Yu’un ta xa jna’tic ta bats’imelel scotol ti jmultique, xchi’uc ti c’u x-elan quic’ubaltique; xchi’uc ti c’u x-elan t’analutique, yu’un ti boch’otic lequique ja’ xa me pixilic o ta lequilal, jech ja’ xa te ta sna’ic o lec ti c’u x-elan xcuxetel yo’ntonique xchi’uc ti c’u x-elan slequilalique.

15 Xchi’uc chc’ot ta pasel ti c’alal me jeloic xa ti viniquetic ta ba’yuc lajel ti li’ cu’xulique, ti c’alal me pasic xa ti ta mu sna’ xchamic oe, ja’ te chbatic ti te bu smeltsanvan Riox yu’un Israele, jech ja’o chtal ti meltsanele, jech ja’ o te chq’uelbat stalelic jech cha c’u cha’al meltsanel yu’un Riox.

16 Jech chac c’u cha’al ta bats’imelel cuxul ti Cajvaltique, yu’un ti Cajvaltic Rioxe yaloj ti ja’ ya’yej ta sbatel osile, ti jech mu stac’ xlaje, ti boch’otic lequique stac’to xc’otic ta lec xchi’uc ti boch’otic muyuc lequique jech muyuc lequic o, yu’un jech ti boch’otic muyuc lequique ja’ yu’ntac pucuj xchi’uc ja’ yabat tac; jech ta xbatic ta c’oc’ ta sbatel osil ti bu meltsanbil ta stojolalique; ti stsatsal svocolique jech chac c’u cha’al snabil c’oc’ xchi’uc yac’alil, ti stilemale jech te oy o ta scotol c’ac’al, xchi’uc muyuc slajebal.

17 ¡Jeh tu jmuc’ xchi’uc tu jlec’ ti Jrioxtique! Yu’un ja’ ta spas ta melel scotol ti sc’optac c’usi loq’uemic ta yee. Ti smantaltaque stac’ ch’unel.

18 Ja’ jech, ti boch’otic lequique, ti tuq’uic ta sventa Ch’ul Riox ta Israele xchi’uc ti boch’o chcuch yu’nic ti scurusal sventa sbejel banamile xchi’uc ti me muyuc chq’uexoic ta sventae, ti va’yique ja’ te ta xbatic ti bu tspas mantal ti Riox ti bu yich’ o no’ox meltsanel ta sventaic ti c’alal meltsaj o no’ox banamile, jech ti xcuxetel yo’ntonique ja’ te ta xich’ic ac’bel ta scotol c’ac’al.

19 Jech ti smuc’ul xc’uxul yo’nton ti Jrioxtique, ti ja’ Ch’ul Riox ta Israele! Ja’ ta scoltaanan xch’ul vinictac ta sc’ob ti c’usi xibal sbae, ta pucuj, xchi’uc ti chamel ta c’atinvaque, ti te ta snabil c’oc’ xchi’uc yac’alil ti ja’ vocolil muyuc slajebale.

20 Jech tu jmuc’ ti slequilal Jrioxtique, yu’un ja’ sna’ojan scotol ti c’usitic oyique, yu’un muyuc c’usi ti mu sna’e.

21 Jech ta xal ta sbejel banamil ti c’uxi chtal scolta scotol viniquetique, ti me la jya’ybeic ti sc’ope, yu’un ti va’aye ja’ ta xil svocol ta sventa viniquetic, jech ta smulic scotolic boch’otic chopolic, jech chac c’u cha’al viniquetic xchi’uc antsetic xchi’uc ololetic, ti boch’otic ja’ic snailal Adane.

22 Ti jech ta xil svocole, ja’ ta sventa ti c’uxi c’otuc ta stojolal scotol viniquetic ti cha’ cuxesele, ti c’uxi scotolicuc xac’ sbaic ta ilel ta stojolal me c’ot ti smuc’ta sc’ac’alil meltsanele.

23 Ti stuque ja’ ta spas ta mantal scotol viniquetic ti ac’o sutes yo’ntonic yu’un smulic xchi’uc ti ac’o xich’ic vo’ ta sbie. Xchi’uc ti oyuc xch’unolajel yo’ntonic ta bats’imelel ti ta Ch’ul Riox yu’un Israele, ti me mo’oje mu xu’ ta xcolic ti te bu ta spas mantal Rioxe.

24 Ti me muyuc ta sutes yo’ntonique, xchi’uc ti me muyuc chch’unbeic ti sbie, xchi’uc me mu xich’ic vo’ ta sbie, xchi’uc ti me muyuc c’usi lec tspasic ta slajebal c’ac’ale, jech ta xich’ic aq’uel ta ch’ayel: yu’un ti Cajvaltic Riox ta ch’ul Israele jech yaloj.

25 Jech ja’ yac’oj jun mantal, yu’un ti bu muyuc ac’biluc junuc mantale, muyuc vocolil, yu’un ti bu muyuc vocolile, muyuc ch’ayel, xchi’uc ti bu muyuc ch’ayele, ti yutsilal Ch’ul Riox ta Israele xu’ xa te ta xac’ sba ta stojolalic ta sventa ti c’uxi tojbat smulique, yu’un ja’ xa te ta xcolic o ta stsatsal stuc.

26 Yu’un ti c’u x-elan ta stoj mulile, ja’ ta sventa slequilal ti boch’otic muyuc to yich’ojic ac’bel mantale. Ti c’uxi xich’ic coltael ta sc’ob ti c’usi tu jxibal sbae, ti chamel ta c’atinvaque, xchi’uc ti ta pucuje, xchi’uc ti ta stilemal c’oc’ ti ja’ tu jtsots xchi’uc ti muyuc slajebe, jech ta xich’ic loq’uesel yan velta ta Riox ti boch’o la jyac’ yich’ic iq’ue, ti ja’ Ch’ul Riox ta Israele.

27 Ja’ tu j-abul sba ti boch’o lajxa yich’ ac’bel mantaletique, jech, ti ja’ xa te yich’oj scotol ti smantaltac Rioxe, jech chac c’u cha’al vu’tic, ti me muyuc la jyich’ic ta muc’, ti jeche’ no’ox ta xixtolanic ti sc’ac’alil sprevailique, ja’ xa me tu jtsots chopol o.

28 ¡Tu jchopol c’usi tsnop ti boch’o chopole! ¡Jeche’ no’ox ti yatel yo’ntonic c’usi chtun yu’nic ti viniquetique! Ti c’alal me la jyich’ic albele ta scuy sbaic ti yu’un tu j-ech’em sna’ique, yu’un mu sc’an xa’ybeic ti smantal Rioxe, yu’un ta sbajbeic, yu’un tscuyic ti sna’ojic no’ox ta jech stuquique; ja’ jech ti c’usi sna’ique ja’ chuvajil, yu’un muyuc c’usi tsta stu yu’nic; jech ta xlajic o.

29 Lec no’ox xtoc ti me oy c’usi ech’em jna’tique, ja’ no’ox venta me ta xquich’tic ta muc’ ti smantaltac Rioxe.

30 Ja’ ¡ech’em chopolic ti jc’ulejetique, ti boch’otic jc’ulejetique ja’ no’ox oy sc’ulejalic ti ta c’usitic oy li’ ta banamile! Jech ti yu’un jc’ulejetique ja’ ta sbajic ti boch’otic me’onique, ja’ ta snutsic ti boch’otic manchuetique, ti yo’ntonique ja’ te oy ta sc’ulejalic, jech, ti sc’ulejalique ja’ Srioxic, ja’ jech ti sc’ulejalique co’ol ta xcham xchi’uquic.

31 ¡Abul sbaic ti boch’otic macal xchiquinic ti mu sc’an xa’yique! Yu’un ta xchamic.

32 Abul sbaic ti boch’otic ma’satetic ti mu sc’an sq’uelique! yu’un ta xchamic ec xtoc.

33 ¡Abul sbaic ti boch’otic muyuc senyail yo’ntonique! Yu’un ti c’usi sna’ic ta sventa sbolilique ja’ ta xich’ic tuch’esel ta slajebal c’ac’al.

34 ¡Abul sba ti j-epalc’ope! yu’un ta xich’ jipel batel ta c’atinvac.

35 ¡Abul sba ti jmilvanej ta xmilvane yu’un ta xcham.

36 ¡Abul sbaic ti boch’otic ta xmulivajique yu’un ta xich’ic jipel batel ta c’atinvac.

37 Jech ¡abul sbaic ti boch’otic ta xich’ictamuc’ loc’ometique, yu’un ja’ pucuj ta scotol li’ pucujetique jech xcuxet no’ox yo’nton ta stojolalic.

38 Ta slajeb xae, ¡abul sbaic ti boch’otic ta xchamic xchi’uc smulique! Yu’un ta sutic batel ta Xrioxic, jech ta xilbeic sat xchi’uc te ta xcom xchi’uc smulic.

39 Jech quermanotac ti vu’un lec jc’anojoxuque, xa na’ic ti chopolil ti c’alal me muyuc la jch’untic ti smantaltac va’ay Ch’ul Rioxe, xchi’uc ti chopolil ti me ja’ ta jch’untic ti c’u x-elan chlo’lavan ti jlo’lavanej pucuje. Ja’ no’ox ac’o la’ jna’tic ti c’usi tsc’an jbec’taltique ja’ sventa chamel, ti me ja’ ta jc’antic ti c’usi tsc’an jch’uleltique ja’ c’uxlejal ta sbatel osil.

40 ¡Jech quermanotac ti vu’un lec jc’anojoxuque, a’ybicun ti ca’yejtaque! Vuleso ta ajolic c’u x-elan smuc’ul ti Ch’ul Riox ta Israele; mu me xavalic ti c’opojemun ta tsatsal c’opetic ta atojolalique, ti me la pas jeche, ja’ la contrain ti c’usi ja’ ta bats’imelele; yu’un ja’ c’opojemun ta ya’yejtac Jcoltavanej cu’untic. Jna’oj ti lo’iletic ta sventa bats’imelele ja’ tsots ta sventa ti c’usitic chopolique; pero ti boch’otic lequique mu xi’ic, yu’un ja’ sc’anojic ti c’usi ja’ ta bats’imelele, xchi’uc ja’ te yac’oj sbaic o.

41 Ja’ jech cha’e, quermanotac ti vu’un lec jc’anojoxuque, la’ic ta stojolal Cajvaltic, ti ja’ ch’ul leque, na’ic me ti yu’un ja’ bats’i lec ti sbelale, yu’un jech, ti be yu’un vinique ja’ biq’uit xchi’uc ja’ te tuc’ chbat ta stojolal; xchi’uc ti jchabi ti’nae ja’ ti Ch’ul Riox ta Israele; yu’un ti tee muyuc chac’ junuc yaj abtel; xchi’uc muyuc bu yan ochebal ja’ no’ox ti te ta sti’e, yu’un ti stuque mu stac’ lo’lael, yu’un ti sbie ja’ ti Cajvaltic Rioxe.

42 Ti boch’o ta xc’opoje, ja’ ta sjambe, ti me ja’ic ti boch’otic sna’ojanic leque, xchi’uc ti boch’otic albilic xae, xchi’uc ti boch’otic jc’ulejetique, xchi’uc ti muc’ no’ox cha’ay sbaic ti ta sventa c’usi sna’ic xchi’uc sc’ulejalique, jech, ti va’aye ja’ ti mu sc’ane, ja’ xa no’ox me la scomtsanic ti c’usitic va’aye, ti me ja’ xa no’ox ch’ay sbaic me muyuc lec spasoj sbaic ta stojolal Rioxe xchi’uc ti me muyuc tspas sbaic ta biq’uite, ti va’aye muyuc ta sjambe.

43 Jech ti c’usitic yu’nic ti boch’otic sna’ojanic leque, xchi’uc ti boch’otic lequique lec ta xich’ic nac’bel ta scotol c’ac’al; jech, ja’ ti va’ay bu meltsanbil cuxetel o’ntonal ta scotol ch’ul viniquetique.

44 ¡Jech, quermanotac ti vu’un lec jc’anojoxuque, na’ic me ti ca’yejtaque! Yu’un ti li’e, ta jloq’ues jc’u’tac xchi’uc ta jlilin ta asatic; ta jc’anbe Riox ti boch’o chi scoltaun ti ac’o sq’uelun ta sat ti yu’un ja’ scotol xil o e; ja’ jech cha na’ic ta slajebal c’ac’al ti scotol viniquetique ta xich’ic q’uelbel stalelic jech chac c’u cha’al yabtelic la spasic, ti Riox ta Israele la jyil ti la jlilin abolilic ta jch’ulele, xchi’uc la jyac’un ta saquil osil ta stojolal, xchi’uc sacubenun xa ta a ch’ich’alic.

45 ¡Jech quermanotac ti vu’un lec jc’anojoxuque, loq’ueso me a vaic ti ta amulique! Lilinic me ta atojolalic ti carenaetic ti tsc’an tsots cha xchuquique, la’ic me ta stojolal ti Riox ti bu ja’ stonal xu’ chi jc’ol oe.

46 Meltsano me lec a ch’ulelic ti ta sc’ac’alil c’alal me tal xojobal xchi’uc slequilal ta sventa chq’uelbat stalelic ti boch’otic lequique, jech, ta sc’ac’alil ti c’alal chq’uelbat stalelique, ja’ ti c’uxi mu xa moch a ba ta xi’el yu’un ti bu tu jxibal sbae; ti c’uxi mu xa vules ta ajol ti bu tu jyan sba mulil apasoje, ta van xa va’ay tioy boch’o ta sujot ta yalele; ¡ch’ul lec ti meltsanel a vu’une, vo’ot Riox ti xu’ a vu’un scotole; jech xcotquin ti jmule; muyuc la jquich’ ta muc’ ti a mantaltaque, ja’ xa o cu’un ti c’usi muyuc la jch’une, yu’un ja’ la stsalun ti pucuje, yu’un ja’ xa te oyun o ta chuquel yu’un ti te ta xibal sba uts’intaele!

47 Ja’ jech, vo’xuc quermanotac, ¿yu’un ja’ lec ya’eluc ti vu’un ta jvic’ a satic ti te ta xibal sba c’usitic va’aye? Me ta van xac’ c’usi chopol cha’ay a ch’ulelic ti me lec sac ti c’usi cha nopique? ¿Lecvan oyun ta atojolalic, jech chac c’uc cha’al saquil ti c’usi ja’ ta bats’imelel ti me muyuc a vac’oj a vaic ta mulile?

48 Ja’ jech ti me lec a pasoj a vaique, jech cha c’opojic ta c’usitic lequic; chac’ ti muyuc lequicoxuque, ja’ yo cha cuyicun ta jun jchanubtasvanej avu’nic, yu’un ja’ lec ti ta jchanubtasoxuc ta sventa ti c’usi xu’ cha pasic ta sventa amulique.

49 Ja’ jech ti jch’ulele mu xa sc’an ti mulile, xchi’uc ti co’ntone ja’ lec cha’ay ti c’usitic lequique, ja’ ta xich’ ta muc’ ti xch’ul bi Jrioxe.

50 La’ic quermanotac vu’un, a cotolic ti boch’otic taquin yo’ntonique, la’ic ti li’ ta vo’etique, xchi’uc ac’o taluc ti boch’o muyuc staq’uine, ac’o sman xchi’uc ac’o sbeic; jech, ac’o tal sman vo’ xchi’uc lech, muyuc staq’uinal xchi’uc muyuc stojol.

51 Ja’ jech mu xa lajes a taq’uin ti ta c’usi muyuc stue, xchi’uc me ja’uc avabtelic ti ta c’usi muyuc stu avu’nique, a’ybicun me lec, xchi’uc taic me ta na’el ti ca’yejtac caloje; xchi’uc talanic ti ta Ch’ul Riox yu’un Israele xchi’uc ja’ xa ve’ic ti bu mu sna’ xlaje, xchi’uc ti bu mu sna’ soque, xchi’uc ja’uc lec’ubtaso a ch’ulelic ti ta saquil osile.

52 Jech tana, quermanotac ti vu’un lec jc’anojoxuque, taic me ta na’el ti ya’yejtac Jrioxtique; c’opojanic ta stojolal ta jujuliquel ta sbejel c’ac’al, xchi’uc xa tojbeic ta vocol xch’ul bi ta ac’ubaltic. Cuxetuc no’ox me avo’ntonic.

53 Xehi’uc na’ic me ti tu jmuc’tic ti c’usi yalojan ono’ox Cajvaltique, xchi’uc ti slequilal ta snich’nab viniquetique, ta sventa no’ox smuc’ul xchi’uc ta c’usi lec yich’oj xchi’uc ta yutsilal ti la jyalbuncutic ta sventa jnich’nabtic ti muyuc ta xich’ic o soquesel ta jmojele, jech chac c’u cha’al bec’talil, yu’un ta to xich’ o lec q’uelel calab jnich’nabtic ti ta baq’uin ta xc’ot ta pasel jun lequil c’ob te’ ta sna Israele.

54 Lec tana quermanotac, ta to jc’an ep cha jc’opanic; oc’omto ta xcal ti c’uyepalto muyuc caloj ca’yeje. Jechuc.