1 Ja’ o jech ti vu’un Nefiune, ep la jc’opan Cajvaltic ti ja’ Jrioxe, ta sventa ti sc’ac’al yo’nton jbanquiltaque.

2 Ja’ jech, ti sc’alal yo’ntonique ech’em to i epaj ta jtojolal, yu’un ta xa ox sc’an chi smilicun.

3 Jech, mucul c’opojic ta jtojolal, jech la jyalic: Ti quits’intique ta sc’an x-och ta ajvalilal ta jtojolaltic, jech ep xa jtaojtic vocolil ta sventa, la’ jmiltic cha’e ti c’uxi mu xa jtatic ep vocolil ta sventa ya’yejtaque, yu’un ti li’e mu jc’antic ti ja’ chi spasutic ta mantal ti vu’tic sbanquilutique. Yu’un vu’tic ta cac’oltic spasel ta mantal ti li’ jteclume xi’ic.

4 Ja’ jech, muyuc ta jts’iba scotol ta ba taq’uin vunetic ti c’uyepal mucul c’opojic ta jtojolale, xu’ no’ox chca’ay ti chcal ti ta xa ox sc’an chi smilicune.

5 Ja’ o c’opoj Cajvaltic ta jtojolal, vu’un Nefiun, ti ac’o jvoc’ jba ta stojolalique ti jech ac’o jech xi jato batel ta xocol banamil jchi’uc scotolic ti boch’otic tsc’an bat xchi’nicune.

6 ja’ o jech, ti vu’un, Nefiune, la jquic’ batel ti jnailale, Zoram xchi’uc snailal, xchi’uc snailal Sam ti ja’ jbanquile, xchi’uc Jacob xchi’uc José ti ja’ quits’inabtaque, xchi’uc xtoc ti jvixubtac xchi’uc ti boch’otic la sc’an la xchi’nicun batele. Ti va’ay boch’otic la sc’an la xchi’nicun batele ja’ic ti boch’otic ta xch’unic ti c’usi chi yalbun xchi’uc ti c’usi ta xac’bun quil ti Rioxe, ja’ yo jech la jya’ybicun ti jc’ope.

7 La jquich’cutic batel jnacutic ta poc’ scotol ja’ to ti c’uxi xu’ cu’uncutic la jquich’cutic batele, jech li xanocutic batel te ta xocol banamil epal c’ac’al, ta ts’acal ti c’alal li xanocutic batel epal c’ac’ale, la jpascutic jnacutic ta poq’uetic.

8 Ti jlumale la sc’an ti ja’uc xcac’becutic sbiin Nefi ti tee; ja’ jech, la jcac’becutic sbiin Nefi.

9 Scotolic ti boch’otic te oyic ta jtojolale la st’ujic ti ja’uc sbiin slumal Nefie.

10 La jcac’jbacutic ta xch’unel ti mantaletique, xchi’uc ti c’u x-elan tsc’an smantaltac ti Cajvaltic ti ta scotol c’usitic oye; ja’ jech chac c’u cha’al smantaltac Moisese.

11 Ti Cajvaltique te jchi’uccutic, jech te ep li toycutic, yu’un la jts’uncutic bec’ ts’unubiletic, jech te ep loc’ cu’uncutic. Xchi’uc te lic jch’itescutic epal ta chop chon bolometic.

12 Ti vu’un Nefiune, jech te quich’ojtal ti poco’ lo’iletic te ts’ibabil ta c’anal c’unil taq’uin vunetique, xchi’uc ti volvol c’anal taq’uin xchi’uc yacuxail ti bu ta sc’ob Cajvaltic la smeltsan ta sventa jtote, ja’ jech chac c’u x-elan yich’oj ts’ibaele.

13 Ja’ jech te ep li toycutic, xchi’uc te ep li epajcutic ti ta jteclume.

14 Ti vu’un Nefiune, la jtsac ti xmachita Labane, ja’ te la jpas o epal machitaetic, yu’un ja’ o jech ti yajvaltac jteclum ti Lamanita sbiinoj ta orae, talic ta jtojolalcutic, yu’un tsc’an ta svuq’uesuncutic. Ti vu’une xcotquin o no’ox ti c’u x-elan mu sc’anicune, xchi’uc ti jnich’nabe xchi’uc ti boch’otic ja’ sbiinojic jteclumale.

15 Ti jteclumale la jchanubtas ta spasel muc’tiquil naetic xchi’uc ti abtejicuc ta scotol ta chop te’etique, xchi’uc ti ta tsatsal taq’uine, xchi’uc ti ta c’anal c’unil taq’uine, xchi’uc ti ta taq’uin ti capbil o ta c’anal c’unil taq’uine, xchi’uc ti taq’uin pasbil o ta tsatsal taq’uine, xchi’uc ti c’anal taq’uine, xchi’uc ti ta saquil taq’uine, xchi’uc ti ta alaq’uic sba taq’uinetic ti yu’un tu j-ech’em o yepal tee.

16 Ti vu’un Nefiune, la jpas jun Templo, ja’ jech la jpas jech chac c’u cha’al stemplo Salomone, ja’ no’ox yu’un muyuc la jyich’ pasel ta c’usi alaq’uic sba, yu’un muyuc la jtacutic ti te ta va’ay banamile, ja’ yu’un, mu jechuc pas jech chac c’u cha’al stemplo Salomón, ti c’u x-elan la jyich’ pasele ja’ jech chac c’u cha’al stemplo Salomón, ti yabtelale tu jben lec alac’ sba bat.

17 Ja’ o jech Ti vu’un Nefiune, la jpas jteclumal ti ac’ouc sna’icuc spasel xchi’uc ti ac’o abtejicuc ta sc’obique.

18 Ja’ o jech la sc’anic ti vu’un comcun ta Sreyique. Ti vu’un Nefiune, ta jc’an ox ti muyucuc Sreyique; ja’ o jech, la jpas ta stojolalic ti c’alal oy ta jtojolale.

19 Ja’ jech c’ot ta pasel ti ya’yejtac Riox la jyal ta stojolalic jbanquiltaque, ti lo’iletic la yich’ic albel ti vu’un chi c’ot ta jpas mantal xchi’uc ta ajvalilal yu’nique, ja’ yo jech vu’un jpas mantalun xchi’uc ajvalilun jech cha c’u cha’al smantaltac Riox, ja’ o no’ox ti c’alal tsc’an chi smilicune.

20 Ja’ jech c’ot ta pasel ti ya’yej Cajvaltic la jyalbune, ti jech la jyal: Ti baq’uin mu sc’an xa’yic ti ac’optaque, ta xich’ic voq’uel ta stojolal Cajvaltic. Ja’ jech, yich’ic voq’uel batel ta stojolal.