1 Ja’ jech, quermanotac ti vu’un lec jc’anojoxuque, vu’un Nefiun, lajxa co’nton ta acholbelic ti jc’optaque, mu stac’ jts’iba ep ja’ no’ox ta jts’iba jayibuc no’ox ti c’usi ta bats’imelel ta to xc’ot ta pasele, xchi’uc mu stac’ jts’iba ep ti ya’yejtac ti quermano Jacobe.

2 Ja’ jech ti c’usitic jts’ibaoje xu’ xa no’ox o chca’ay, ja’ xa no’ox jaybeluc xu’ chi c’opoj ta sventa slequil c’optac Cristo, ja’, jech chi c’opoj ta jamal jech chac c’u cha’al saquil la jcholanan c’opetique.

3 Yu’un ti jch’ulele ja’ lec cha’ay ti saquil osile; yu’un ja’ jech ti Cajvaltic Riox ta x-abtej ta sventa xnich’nab viniquetique, yu’un ti Rioxe ta sacubtas ti c’uxi xu’ xa’ybeic lec smelolale, yu’un ti stuque ja’ jech ta sc’opan viniquetic jech chac c’u cha’al c’opal xc’opojic stuquique, ta sventa ti c’uxi xu’ xa’ybeic lec smelolale.

4 Jech tana, ta jc’an ti ac’o xa taic ta na’el ti c’u x-elan c’opojemun ta sventa lequil vinic ti bu Cajvaltic la jyac’bun ta ilele, ti bu ja’ ta xac’ ta vo’ xchi’uc chij Riox ti ja’ ta sloq’ues ta smultac scotol banamile.

5 Jech tana, ti me xch’ium chij Riox, ti lec ch’ul vinic, ti jech tsots sc’oplal ti ta xich’ vo’ ta vo’ ti c’uxi chc’ot ta ch’unel ta scotol lequilale, ¡c’uto smuc’ul o ti stuque, ja’ yo ti vu’tique, vu’tic to jmulavilutic, ja’ tsc’an ti ta xquich’tic vo’ jech ta vo’e.

6 Xchi’uc jech tana, ta jc’an cha jac’boxuc ti vo’xuc quermanooxuc lec jc’anojoxuque, ¿C’uxi c’ot ta pasel yu’un ti xch’ium chij Riox ti jech ta scotol lequilal la jyich’ vo’ ta vo’e?

7 ¿Me mu xa na’ic ti ja’ ch’ul vinique? Ep to jech ti ja’ o no’ox ch’ul vinique, ja’ stuc ta xac’ ta ilel ta snich’nab viniquetic jech chac c’u cha’al bec’talil, ti jech ta sbic’tajes sba ta stojolal Rioxe, xchi’uc ta stsac ta texticoal Riox ti yu’un ja’ jch’unej mantal o yu’un, jech chac c’ucha’al ta xilbe smantaltaque.

8 Ja’ o jech, ta ts’acal ti c’alal jech laj xa ox yich’ vo’ ta vo’e, ti Ch’ul Espíritue vul ta stojolal xco’laj xchi’uc paluma.

9 Jech ti va’aye, ja’ ta xac’ ta ilel ta stojolal xnich’nab viniquetic c’u x-elan sbiq’uital ti bee, xchi’uc c’u x-elan yuni jamalil ti ti’ na bu xu’ ta x-ochic ti stuquique, ja’ yo la jyac’ ta ilel stuc ta ba’yuc be.

10 Xchi’uc jech la jyal ta stojolal xnich’nab viniquetic: Ts’aclinicuntal. Ja’ jech, vo’xuc quermanotac, stac’ jts’aclintic batel ti Jesuse, ja’ no’ox venta me ta jc’antic ta jpastic ti smantaltac jtotique.

11 Xchi’uc ti jtotique jech la jyal: Suteso me a vo’ntonic, suteso me a vo’ntonic xchi’uc ich’ic me vo’ ta sbi jnich’on ti bu tu jlec’ jc’anoje.

12 Xchi’uc xtoc, tal ya’yej ta jtojolal ti nich’nalile, jech la jyal: Ti voch’o ta xich’ vo’ ta jbie, ti jtotique ta xac’ Ch’ul Espíritu, jech chac c’u cha’al vu’un, ja’ jech ts’aclinicunme xchi’uc pasic me ti c’usitic la vilic la jpase.

13 Ja’ jech, quermanotac vu’un jna’oj ti me cha ts’aclinic ti nich’onil ta scotol a vo’ntonique, ti me muyuc c’usi chaval ta stojolal Rioxe ti me ta bats’imelel cha c’an cha sutes a vo’nton ta sventa a multaque, ti me cha val ta jamal ta stojolal jtotic ti yu’un a valojbe xa a vo’nton ti cha tsacbe sbi ta a tojolal ti Cajvaltic ta sventa ich’ vo’e, jech, ja’ cha ts’aclinic ti Cajvaltic xchi’uc ti Jcoltavanej ti jech cha muc abaic ta vo’e, ja’ jech chac c’u cha’al ya’yej, ti li’e cha vich’ ti Ch’ul Espíritue; jech, ja’ xa chtal ti ich’ vo’ ta c’oq’ue xchi’uc ti Ch’ul Espíritue; ja’ xa jech xu’ xa c’opoj ta yoc’ abatetic ti jech chq’uejinic ta q’uejimoletic ta Ch’ul Riox yu’un Israele.

14 Ja’ jech, quermanotac ti vu’un lec jc’anojoxuque, yu’un ja’ jech tal ta jtojolal ti ya’yej nich’nalile, jech la jyal: Ta ts’acal ti c’alal me la sutes ti avo’ntonic ta sventa amulic ti jech cha valic ta jamal ta stojolal ti jtotique, ti cha vich’ic vo’ ta vo’e, ti yu’un a valojbe xa avo’ntonic ti cha ch’unic ti smantaltaque, xchi’uc ti me avich’ojic xa ti vo’ ta c’oc’ xchi’uc ti Ch’ul Espíritu ti jech xu’ xa c’opojic ta ach’ oq’uile, jech, ti ta yoc’tac abatetique, jech ti me ta ts’acal mu xa valune, ja’ van lec ti manchuc o no’ox a votquinune xi.

15 Xchi’uc la jca’ybe ya’yej jtotic jech la jyal: jech ti ya’yejtac ti boch’o lec Jc’anoje, yu’un ja’ ta bats’imelel xchi’uc lec tuc’. Ti boch’o lec ta sq’uel sba ta slajebal c’ac’ale, ti va’aye ja’ ta xcol xi.

16 Jech tana, quermanotac ti vu’un lec jc’anojoxuque, ti va’aye jna’oj ti me jun vinic muyuc lec ta sq’uel sba c’alalto ta slajebal c’ac’ale, ti me ma’uc tspas ti c’usi la spas ti snich’on cuxul Rioxe, mu xu’ ta xcol.

17 Ja’ jech pasic me ti c’usi caloj ta spas Jcoltavaneje; yu’un me jech smelolal ti c’uxi jech la jquich’ ac’bel quile, ti c’uxi xu’ cha na’ c’u x-elan ti ti’na bu xu’ cha oche, yu’un ti ti’na bu xu’ cha oche, ja’ ti sutesub o’ntonale xchi’uc ti ich’ vo’ ta vo’e, ja’ to te ta xtal o ti c’u x-elan ta xch’ay jmultic ta c’oc’ xchi’uc ta Ch’ul Espíritue.

18 Jech ja’ te chataic ti tuq’uil xchi’uc ti biq’uit be ti bu ja’ ta x-ic’ban batel ta cuxlejal ta sbatel osile, jech ti me ochemot xa ti ta ti’nae, xchi’uc ti ja’ jech la pas jech chas c’u cha’al smantaltac Riox xchi’uc nich’onile; xchi’uc ti avich’oj xa ti Ch’ul Espíritu ti ja’ ta xal ta jamal ta sventa totil Riox xchi’uc nich’onil ta sventa ti c’uxi ac’o xc’ot ta pasel ti c’usi la jyal stuc cha vich’ ti me la och ta sbelale.

19 Jech tana quermanotac ti vu’un lec jc’anojoxuque, ta ts’acal ti jech la ochic ti ta tuq’uil xchi’uc ti ta biq’uit bee, ta jc’an cha jac’boxuc ti me te xa pasbil o c’ot scotole, jech ti vu’une ta xcal ti mo’oje; yu’un muyuc vulemoxuc li’ to c’alal ti manchuc ja’ ta ya’yej Cristoe, xchi’uc ti ta smuc’ul xch’unolajel a vo’ntonic ta stojolale, xchi’uc ti apatojic a vo’ntonic yu’un ti c’u x-elan ta xcoltavan ti yu’un ja’ tsots xu’ yu’un ta xcoltavane.

20 Jech ja’ no’ox me tsc’an ti ja’uc xa ts’aclinic batel lec tuc’ ti Cristoe, xchi’uc a na’ojic lec ti c’u x-elan slequilal xchi’uc chc’anvan ti Riox ta scotol viniquetique. Xchi’uc jech, ti me ja’ cha pasic batel ti Mantaletique, xcuxet no’ox a vo’ntonuc yu’un ti ya’yejtac Cristoe, xchi’uc ti me cha q’uel a vaic lec c’alalto ta slajebal c’ac’ale, yu’un jech ta xal ti Rioxe: Oy a cuxlejalic ta sbatel osil xi.

21 Jech tana quermanotac ti vu’un lec jcanojoxuque, ti li’e ja’ ti bee, yu’un muyuc bu yan be, xchi’uc biil ti ac’bil li’ ta yolon vinajel ti c’u x-elan biil xu’ ta xcoltavan ti te bu tspas mantal Rioxe, jech tana ti li’e, ja’ ti ya’yejtac Cristoe, ti ja’ no’ox o stuc xchi’uc ti ja’ ta bats’imelel ya’yej Riox xchi’uc nich’onil, xchi’uc Ch’ul Espíritu, ti ja’ic junic Riox muyuc slajebe, jechuc.