1 Jech lec tana, ja’ jech, quermanotac ti vu’un lec jc’anojoxuque, jna’oj ti cha nop ta a vo’ntonic ti c’usi xu’ cha pasic ta ts’acal ti c’alal me la ochic xa ti ta bee, jech tana. ¿C’u yu’un cha nop ta a vo’ntonic ti c’usitic va’aye?

2 ¿Me mu xa na’ic ti la jcal ta ts’acal ti c’alal me la vich’ic Ch’ul Espíritu, ti jech xu’ xa xac’opojic ta yoc’ abatetique? ¿Xchi’uc c’uxi xu’ cha c’opoj ic ta yoc’ abatetic ti me ma’uc ta Ch’ul Espíritu?

3 Ti abatetique ta xc’opojic ta stsatsal Ch’ul Espíritu; ti c’uxi xu’ ta xalic ti ya’yejtac Cristoe, ja’ yo jech la jcal; Cuxetuc no’ox me a vo’ntonic ta ya’yejtac Cristo; yu’un ti ya’yejtac Cristoe, ja’ ta xal ti c’usitic xu’ cha pasique.

4 Ja’ jech, ta ts’acal ti c’alal me laj co’nton ta yalel ti c’usitic va’ay a’yejetique, ti me jech muyuc xa va’ybeic lec smelolale, yu’un muyuc bu cha c’anic xchi’uc muyuc bu cha c’opojic; ti me jeche, muyuc bu cha vich’ic aq’uel batel ta saquil osil, ja’ no’ox te oyoxuc o ta ic’al osil.

5 Yu’un ti li’e, ta xcal yanvelta, ti me cha ochic ti te ta sbelal xchi’uc me cha vich’ic ti Ch’ul Espíritue, Ja’ stuc ta xac’ ta ilel scotol ti c’usitic xu’ cha pasique.

6 Ja’ jech, ti li’e ja’ ti slequil c’optac Cristoe, yu’un muyuc xa bu ta xich’ aq’uel yan lequil c’op, ja’ to ta ts’acal ti c’alal me tal yac’sba ta ilel xchi’uc sbec’tale, ti c’alal me tal yac’sba ta ilel xchi’uc sbec’tale, scotol ti c’usitic ta xale yu’un ja’ cha vaq’uic persa xch’unel.

7 Jech tana, ti vu’un Nefiune, mu xa xu’ c’usi ep xcal; yu’un ti Espíritue ta xa xac’ ac’o lajuc o co’nton ti ta lo’ile, ja’ xa no’ox chi com jtuc ta at o’nton yu’un ti vocolil xchi’uc ti c’usitic chopole, xchi’uc ti ta c’usi mu xotquinic bu oyic ti viniquetique, yu’un mu sc’an st’unic ti c’usi stac’ na’ele, ja’ yo lec ac’bil ta saquil osil, jech, ja’ ta scotol saquil jamal lo’iletic.

8 Jech lec tana, quermanotac ti vu’un lec jc’anojoxuque, ta xquil ti cha chi’in ta lo’il a vo’ntonique, jech c’ux chca’ay ti jech ta jchi’noxuc ta lo’il ta sventa li’e, ti me cha va’ybe ti Espíritu ti ta xchanubtas viniquetic c’u x-elan ta c’opanel Rioxe, a na’oj ti ja’ lec ti ta jc’opantic Rioxe; yu’un ti chopol Espíritue mu xchanubtas viniquetic c’u x-elan ta c’opanel Riox, ja’ no’ox ti ac’o mu sc’opanic Rioxe.

9 Jech ti li’e, ta xcal ti ac’o xa c’opanic Riox ta scotol c’ac’ale, mu me xbat ach’ulelic; yu’un muyuc c’usi xu’ cha pasic ta stojolal Cajvaltic, ti me mu bayucuc cha c’opanic ti Riox ta sbi Cristo, ti c’uxi ja’uc xac sbenticion ti ta c’usi cha pasique, ti c’uxi ja’uc lec ta sventa a ch’ulelic ti c’usitic a avabtelique.