Yoxlajunebal Xcha’vinic Capitulo
Ti ya’yejtac Nefie yu’un jech ta bats’imelel—Ti li’i ja’ ta xal ta jamal ta sventa Cristo—To boch’otic ta xch’unic Cristoe ta xch’unic xtoc ti ya’yejtac Nefie—Ti li’e ta xich’ aq’uel jech chac c’u cha’al ta xal ta jamal ta baq’uin ta xich’ q’uelel talelile.
1 Jech lec tana, ti vu’un Nefiune, mu stac’ jts’iba scotol ti c’usitic la jyich’ic chanubtasel jteclumale, yu’un muyuc jvu’el ta ts’ib jech chac c’u ch’al chi lo’ilaje, yu’un ti c’alal me jun vinic chlo’ilaj ta stsatsal Ch’ul Espíritue, ta stsatsal Ch’ul Espíritu ta xc’ot ta yo’ntonic xnich’nab viniquetic.
2 Jech ti li’e, oyto boch’otic ep ti tsots ta spas yo’ntonic ta scontrainel ti Ch’ul Espíritue, ti c’uxi mu x-och ta stojolalique, ja’ jech, ta xaq’uic ta jech no’ox ti c’usitic ep ts’ibabile xchi’uc ta snopic ti muyuc stu jlec’uque.
3 Jech ti vu’un, Nefiune, la jts’iba ti c’usi jts’ibaoje; xchi’uc quich’oj ta muc’ ti yu’un tsots sc’oplale, jech ti ja’ ta sventa jteclumale. Ta jc’anbeic ta jujuliquel ta c’ac’altic, xchi’uc ti jsate ta xatintas jxonjol ta ac’ubaltic ta sventaic; xchi’uc ta jc’anbe Riox ta sventa xch’unolajel co’nton, xchi’uc jech jna’oj ti ta xa’ybun ti c’usi chcale,
4 Xchi’uc jna’oj ti Cajvaltic Riox ta stsu’iltas ti c’u x-elan ta jc’opan Riox ta sventa slequilal jteclumale. Xchi’uc ti c’opetic jts’ibaoj ta c’une ta xich’ pasel ta tsots ta stojolalic; xchi’uc ta xal ti ac’o spasic c’usitic leque; xchi’uc ta xich’ic albel ta sventa stotic; xchi’uc ta xc’opojic ta sventa Jesús, xchi’uc ta xich’ic albel ti ja’uc ac’o xch’unique, xchi’uc ti ac’o sq’uel sbaic lec c’alal to ta slajebal c’ac’al, ti ja’ cuxlejal ta sbatel osile.
5 Xchi’uc tsots chopol chc’opoj ta sventa mulil, jech chac c’u cha’al saquil ti c’usi ja’ ta bats’imelele, ja’ jech, muyuc boch’o ch-ilin ta sventa ti c’opetic jts’ibaoje. Ja’ xa no’ox ti me ja’ S-espíritu Pucuje.
6 Xcuxet co’nton ta sventa saquil osil, xcuxet co’nton ta sventa c’usi ja’ ta bats’imelel, xcuxet co’nton ta sventa Jesús, yu’un ja’ la sloq’uesbun jch’ulel ta c’atinvac.
7 Oy yutsil co’nton ta sventa jteclumal, xchi’uc muc’ xch’unolajel co’nton ta sventa Cristo, ti te bu ta spas mantale xu’ ta jta epal ch’ulelaletic ti muyuc yic’ubalique.
8 Oy yutsil co’nton ta sventa Judioetic; ta xcal Judio, ta sventa ti boch’otic ta sventa li tal vu’une.
9 Oy yutsil co’nton xtoc ti ta boch’otic ma’icuc snailal Israele. Ja’ j’ech, ti va’yique muyuc boch’o jpatoj co’nton yu’un, ja’ xa no’ox ti me la ch’unic ti Cristoe xchi’uc ti me ch-ochic ti ta biq’uit ti’nae, xchi’uc ti me chanoic ti ta tuq’uil be ti ja’ ch-ic’van batel ta cuxlejale, xchi’uc ti me ja’ te oyic o ti ta be c’alal to ta slajebal c’ac’ale.
10 Jech lec tana, quermanotac ti vu’un lec jc’anojoxuque, xchi’uc vo’xuc Judioetic xchi’uc ta scotol banamil, a’yic me ti li’ c’opetique xchi’uc ch’unic me ti Cristoe, ti me mu xa ch’unic ti li’ c’opetique, ti me ja’ no’ox cha ch’unic ti Cristoe, ti me cha ch’unic Cristoe, xchi’uc cha ch’unic xtoc ti li’ c’opetique, yu’un ja’ ya’yejtac Cristo, xchi’uc ja’ la jyac’bun, xchi’uc ta xchanubtasvan ta scotol viniquetic ti ja’uc ac’o spasic ti leque.
11 Xchi’uc ti me ma’uc ya’yejtac Cristoe, q’uelic lec; yu’un ti ta slajebal c’ac’ale, Cristo ta xal ta jamal ta stsatsal xchi’uc ta smuc’ul slequilal ti ja’ ya’yej stuque, xchi’uc ta slajebal c’ac’ale ta xquil jbatic ta jujuntal jsattic, vo’xuc xchi’uc vu’un, xa na’ic ti ja’ stuc la spasun ta mantal ti ta jts’iba ti c’usitic li’e, jech ac’o me tu jc’unun.
12 Jech ta jc’anbe Riox ta sbi Cristo ti ma’uc no’ox eputicuque yu’un jcotolticuc, ac’o colcuticuc ti bu ta spas mantal stuc ti ta smuc’ul slajebal c’ac’ale.
13 Jech lec tana, quermanotac ti vu’un lec jc’anojoxuque, acotolic ti boch’ooxuc snailal Israele, xchi’uc a cotolic vo’xuc, ¡ta scotol banamil! ta jc’opanoxuc jech chac c’u cha’al jun ta xc’opoj c’alalto ta spucucale: Batcun, ja’ to te ta jq’uel jbatic me sta sc’ac’alil ti muc’ta slajebal c’ac’ale.
14 Vo’oxuc, ti boch’otic ti mu xa c’an—xa vich’ic ti slequilal Rioxe, xchi’uc ti mu xa vich’beic ta muc’ ti sc’optac Judioetique, xchi’uc ti ca’yejtaque, xchi’uc ti ya’yejtac chloc’ ta ye ti xch’ium chij Rioxe, Jech tana, jech ta jc’opanoxuc xa comel ta sbatel osil, yu’un ti li’ lo’iletique ja’ me ta x-ac’van ta ch’ayel ta slajebal c’ac’al.
15 Ti c’usi ta xcal comel ta banamile, ja’ me ta xich’ aq’uel ta atojolalic ti c’alal ta xq’uelat atalelique: yu’un me jech la spasun ta mantal ti Cajvaltique, ja’ yo ja’ stac’ jch’unbe. Jechuc.