1 Ep to jech ti li’e, ti ta to x-epajic ti ta sc’ac’alil ti c’alal me la jpas junuc abtelal alac’ sba ta stojolalic ti c’uxi xu’ ta jna’o ti c’usi caloj ta jpas ta stojolal xnich’nab viniquetique, ti c’uxi xu’ ta jtel jc’ob xchibal veltae, ti c’uxi xu’ ta jliques yanvelta ti boch’otic te ta jteclumal ti ja’ic snailal Israele.

2 Xchi’uc ti c’uxi ta jvules ta jol ti c’usi calojbot vo’ot, Nefi, xchi’uc ta a tot, jech ta to jna’ ti anich’nabtaque, xchi’uc ti c’usi ta xalic anich’nabtaque ja’ ta xloc’ ta que ti ta sventa anich’nabtaque, xchi’uc ti ca’yejtaque ta xich’ alel ta scotol banamil ti c’uxi ja’uc senyailicuc jteclum al ti ja’ic snailal Israele.

3 Yu’un ti ca’yejtaque tato xich’ alel—Oyto ep boch’otic ma’icuc snailal Israel ti jech ta xalique: ¡Jun Biblia! ¡Jun Biblia! Oy cu’untic jun Biblia, jech mu xa xu’ xtal yan Biblia!

4 Ti Cajvaltic Rioxe ja’ jech ta xal: Vo’oxuc ti mu xa ch’unic mantale, ta to xa taic jun Biblia, ti te ta xtal ta judioetique, ti te ta jteclumal ti bu c’usi la jcal ta vo’neje: ¿C’usi tojbel ta vocol cha vac’beic ti Judioetic ta sventa ti Biblia ti ja’ ta yu’nic la vich’ique? Jech, ¿c’usi cha c’an cha valbe ti va’ay boch’otic ma’icuc snailal Israele? ¿Jech sna’ojanic stuquic xchi’uc yabtelic xchi’uc ti svocolic yu’un judioetique, xchi’uc ti c’u x-elan la jchi’nic batel vu’un ti c’uxi la jyich’ic coltael batel boch’otic ma’icuc snailal Israele.

5 Jechuc ti Vo’xuc ma’ucoxuc snailal Israele, ¡me vulem ta a jolic ti Judioetic ti ja’ jteclumal ta vo’nej ti te bu c’usi caloje? Mo’oj; ti ta ba’yuque la vut comel xchi’uc ech’ a vo’ntonic yu’nic, xchi’uc jech muyuc bu aliquesoj ta ach’, jech tana, ti li’e vu’un ta xc’ac’ sutuc batel ta sba ajolic scotol ti c’usitic va’ye, yu’un ti vu’un Cajvalticune, muyuc ch’ayem ta co’nton ti jteclumale.

6 Vo’xuc ti mu xa ch’unic mantale, ti vo’xuc chavalic: Jun Biblia, oy cu’untic jun Biblia muxa xtun cu’untic yan Biblia. ¿Me oy van avu’nic jun Biblia ti manchuc ja’ ta yu’nic Judioetique?

7 ¿Me mu xa na’ic ti oyto ep jteclume? ¿Me mu xa na’ic ti vu’un Cajvalticun ti ja’ a Rioxicun la jpas scotol ti viniquetique, xchi’uc jna’ojan ti boch’otic nacajtic ta banamiletic ta nabe, xchi’uc ti vu’un ta jq’uel li’ to ta stoylejal vinajel xchi’uc ti li’ to ta olon banamile; xchi’uc ta xcal ca’yejtac ta snich’nab viniquetic ta scotol slumal banamile?

8 ¿Cu yu’un ti cha mucul c’opoj ti c’alal me la vich’ ep ti c’ayejtaque? ¡Me mu xa na’ ti c’usi chalic ta jamal ti chib lum ja’ jun textico ta jventa ti vu’un Rioxune, ti jech lec jna’oj ti jun lum jech chac c’u cha’al yane? Ja’, jech chi c’opoj ta co’ol sba lo’il jech chac c’u cha’al ta jun, ja’ no’ox jech ta yan lum, ti baq’uin me la stsob sbaic ta jun ti chib lume, ti c’usi ta xalic ta jamal xchibalique ta stsob sba ec xtoc.

9 Ti jech ta jpase ja’ ti c’uxi ep chcac’ ta ilel ti yu’un co’olun o jech chac c’u cha’al volje, li’ ta ora xchi’uc ta scotol c’ac’ale, xchi’uc ta xcal ca’yej jech chac c’u cha’al ta jc’ane, muyu’nuc cha valic ti me la jcal jbel lo’il ti jech mu xa xu’ xcal yane; yu’un sc’anto xlaj ti cabteltaque, me ja’ uc chlaj c’alal me laj ti vinique, me ja’uc o no’ox chlaj ta slajebal c’ac’al me ja’uc to ta sbatel osil.

10 Ma’uc no’ox yu’un ti oy xa jun Biblia ti cha valic ti te xa oy o scotol ca’yejtaque, xchi’uc mu xa valic ti me muyuc xa bu c’ac’oj ta ts’ibael epe.

11 Yu’un ta jpas ta mantal scotol viniquetic, jech chac c’u cha’al ta sloq’uem c’ac’al, xchi’uc jech chac c’u cha’al ta smaleb c’ac’al, jech chac c’u cha’al ta xocon sloq’uem c’ac’al xchi’uc jech chac c’u cha’al ta jot xocon smaleb c’ac’al, xchi’uc te to ta sbanamilal nabetic, ti ac’o sts’ibaic ti jc’optac ti vu’un ta jc’opanique; yu’un ti libroetic ta sts’ibaique, ja’ jech ta jq’uelbe o stalel sbejel banamil, ta jujuntal ja’ jech chac c’u cha’al yabtelic; ja’ me ja’ jech x-elan jech chac c’u cha’al ts’ibabile.

12 Yu’un ti li’e ta to jc’opan ti Judioetique, xchi’uc ta sts’ibaic xchi’uc ta jc’opanic xtoc ti Nefitaetique, ti va’aye ta sts’ibaic, xchi’uc ta jc’opan xtoc ti yan jvoc’ snailal Israel ti bu yich’ic aq’uel batel ta nome, xchi’uc ta sts’ibaic, xchi’uc ta jc’opan scotol lumetic ta banamil, ja’ stuquic ta sts’ibaic.

13 Jech ta to xc’ot ta pasel, ti Judioetique ta xich’beic ti ya’yejtac Nefitaetique, jech ti Nefitaetique, ta to xich’beic ti ya’yejtac Judioetique, ti Nefitaetic xchi’uc ti Judioetique ta to xich’beic mati ya’yejtac jvoc’ snailal Israel bu ch’ayemique, ti va’yique ta to xich’beic ti ya’yejtac nefitaetic xchi’uc Judioetique.

14 Ta to xc’ot ta pasel ta jteclumal, ti ja’ snailal Israele, ti jech ta to xich’ tsobel yanvelta ti te ta banamil bu ja’ yu’nique, xchi’uc ti ca’yeje ta xich’ tsobel ta jun ec xtoc, xchi’uc ta to xcalbeic ti boch’otic tsots ta spasic c’op ta sventa ca’yejtac xchi’uc ta sventa jteclumal ti ja’ic snailal Israele, ti vu’un Rioxun, la jcalbe Abraham ti jech ta to jta ta na’el ti snich’nab ta scotol c’ac’ale.