1 Ndien edikem ete nnyin ifiak imen isaŋ nnyin ika wilderness; ndien nnyin isaŋa ikpere edem usiak utin tɔŋɔ ke ini oro ka. Ndien nnyin ima isaŋa inyuŋ iwɔk ibe ukut eti eti ke wilderness; ndien iban nnyin ema eman nditɔ ke wilderness.

2 Ndien ata akamba ekedi mme edidiɔŋ Jehovah ɔnɔde nnyin, ete ke ini nnyin ikedude uwem ito ndisi unam ke wilderness, iban nnyin ema enɔ nditɔ mmɔ ediwak mmɔŋ eba, ndien esɔŋ idem, iŋ, kpa ukem ukem nte ikpɔ owo; ndien mmɔ etɔŋɔ ndiyɔ isaŋ mmɔ inyuŋ ikunike.

3 Ke emi nnyin ikut ite ke ana ibet Abasi osu. Ndien edieke edide ete ke nditɔ owo enim ibet Abasi enye eyebɔk mmɔ, onyuŋ ɔsɔŋɔ mmɔ idem, onyuŋ ɔnɔ mmɔ usuŋ emi mmɔ edinamde ŋkpɔ emi enye ɔnɔde mmɔ uyo; ke ntre, enye ama ɔnɔ nnyin usuŋ ke ini nnyin ikedude ke wilderness.

4 Ndien nnyin idu ke ufaŋ ediwak isua, iŋ, tutu isua itiaita ke wilderness.

5 Ndien nnyin ima idisim isɔŋ emi nnyin ikekotde Bountiful, ke ntak ediwak mfri esie ndien nko ɔbɔruduk aran ɔkwɔk; ndien kpukpru mme ŋkpɔ emi edi Jehovah akanam man nnyin ukutak. Ndien nnyin ikut inyaŋ, emi nnyin ikekotde Irreantum, emi, ke ini ekabare, edi ediwak mmɔŋ.

6 Ndien edikem ete nnyin iwuk mme tent nnyin ke mben inyaŋ; okposuk edi ete ke nnyin ima iyɔ ediwak ukut ye ɔkpɔsɔŋ nsɔŋɔ ŋkpɔ, iŋ, tutu esim ete nnyin idikanke iwet mmɔ kpukpru, nnyin ima idara ata eti eti ke ini nnyin ikesimde mben inyaŋ; ndien nnyin ikot ebiet oro Bountiful, ke ntak ediwak mfri esie.

7 Ndien edikem ete ke ini ami, Nephi, mma nkodu ke isɔŋ Bountiful ke ufaŋ ediwak usen, uyo Jehovah edi ɔnɔ mi, ete: Dahada, nyuŋ dɔk ka enyɔŋ obot. Ndien edikem ete ami ndahanda nyuŋ ndɔk nka enyɔŋ obot, nyuŋ nseme nnɔ Jehovah.

8 Ndien edikem ete Jehovah ɔdɔhɔ mi, ete: Afo eyekɔŋ ubom, ke usuŋ nte ami ndiwutde fi, man ami ntaŋ ikɔt fo mbe mme mmɔŋ emi.

9 Ndien ami ndɔhɔ nte: Jehovah, Mmɔŋ ke ana ami nka man ŋkut ukwak nditara, man ami nnam mme ŋkpɔ utom ndikɔŋ ubom ke usuŋ emi afo owutde mi?

10 Ndien edikem ete Jehovah ɔdɔhɔ mi ebiet emi anade nte ami ŋka ŋkokut ukwak, man mkpenam mme ŋkpɔ utom.

11 Ndien edikem ete ami, Nephi, mma nnam ibit utim emi ndidade mfum ikaŋ, nto mme ikpa unam; ndien ke ini emi mma nkanam ibit utim, man ami nyene se ndade mfum ikaŋ, ami mma nkwak itiat iba man ami ndomo ikaŋ.

12 Koro tutu idahaemi Jehovah ikiyakke ete nnyin idomo ediwak ikaŋ, nte nnyin ikesaŋade ke wilderness; koro enye ɔkɔdɔhɔ ete: Ami nyenam udia mbufo akabare enem, ke mbufo mitemke enye;

13 Ndien ami nko nyedi unwana mbufo ke wilderness; ndien ami nyetim usuŋ ke iso mbufo, edieke edide ete ke mbufo eyenim ibet mi; ke ntre, edieke mbufo edinimde ibet mi eyeda mbufo eka ke isɔŋ enwɔŋɔ; ndien mbufo eyefiɔk ete ke oto ke ami ke eda mbufo usuŋ.

14 Iŋ, ndien Jehovah ɔdɔhɔ ŋko ete: Ke ini mbufo ema esim isɔŋ enwɔŋɔ, mbufo eyefiɔk ete ami, Jehovah, ndi Abasi; ndien ete ke ami, Jehovah, nkanam mbufo ebɔhɔ ke nsobo; iŋ, ete ke ami ŋkada mbufo ŋwɔrɔ ke isɔŋ Jerusalem.

15 Ke ntre, ami, Nephi, mma ndomo ndinim ibet Jehovah, ndien ami mma mbeŋe nditɔ eka mi iren nte etiŋ enyin enyuŋ esinifik.

16 Ndien edikem ete ami mma nnam mme ŋkpɔ utom eke ukwak emi ŋkataradede nsio ke itiat.

17 Ndien ke ini nditɔ eka mi iren ekekutde ete ke ami ŋkoyom ndikɔŋ ubom, mmɔ ema etɔŋɔ ndikuni ye ami, ete: Eyen eka nnyin edi ndisime, koro enye ekere ke imɔ imekeme ndikɔŋ ubom; iŋ, ndien enye nko ekere ke imɔ imekime ndibe mme akwa mmɔŋ emi.

18 Ndien ntem ke nditɔ eka mi iren eketɔhɔ ye ami, ndien enyene udɔŋ ete mmɔ idinamke utom, koro mmɔ ikenimke ete ke ami mmekeme ndikɔŋ ubom; ndien mmɔ ikinimke ete ke edi Jehovah eketeme mi.

19 Ndien idahaemi edikem ete ami, Nephi, mma mfuhɔ ata eti eti ke ntak isɔŋesit mmɔ; ndien idahaemi ke ini mmɔ ekutde ete ke ami mmɔtɔŋɔ ndifuhɔ mmɔ edara ke esit mmɔ, tutu mmɔ ema edara ke ntak mi, ete: Nnyin ima ifiɔk ite ke afo udukanke ukɔŋ ubom, koro nnyin ima ifiɔk ite ke afo amanana ifiɔk; ke ntre, afo ukemeke ndinam uto akamba utom oro.

20 Ndien afo etie nte ete nnyin, emi mme ndisime ekikere esit esie edade enye ewɔrɔ; iŋ, enye ada nnyin ɔwɔrɔ ke isɔŋ Jerusalem, ndien nnyin imiyo ke wilderness ke mme ediwak isua emi; ndien iban nnyin enam utom, emi ekperede ndiman eyen; ndien mmɔ eman nditɔ ke wilderness enyuŋ ebɔ kpukpru ndutuhɔ, ibɔhɔke mkpa; ndien ɔkpɔkefɔn ete mmɔemaekpa mbemiso mmɔ ewɔrɔ ke Jerusalem akan ndutuhɔ ye mme ukut emi.

21 Sese, ediwak isua emi nnyin imiyene ndutuhɔ ke wilderness, ini emi nnyin ikpikopde inem inyene nnyin ye isɔŋ enwɔŋɔ nnyin; iŋ, ndien nnyin ikpinem esit.

22 Ndien nnyin imifiɔk ete ke mme owo emi ekedude ke Jerusalem ekedi ndinen owo; koro mmɔ ema enim mme ewuhɔ ye ubiere ikpe Jehovah, ye kpukpru ibet esie, etiene mbet Moses; ke ntre, nnyin ifiɔk ite ke mmɔ edi ndinen owo; ndien ete nnyin ama ebiere ikpe ɔnɔ mmɔ, ndien ada nnyin ɔwɔrɔ ke ntak emi nnyin idikpaŋde utɔŋ inɔ mme ikɔ esie; iŋ, ndien eyen eka nnyin etie nte enye. Ndien ke utɔ usuŋ usem emi ke nditɔ eka mi iren ekekuni enyuŋ etɔhɔ ye nnyin.

23 Ndien edikem ete ami, Nephi, ntiŋ ye mmɔ, nte: Ndi mbufo emenim ete ke mme ete nnyin, emi ekedide nditɔ Israel, ke ekpekeda mmɔ ewɔrɔ ke ubɔk mme Egyptian edieke mmɔ mikikpaŋke utɔŋ inɔ mme ikɔ Jehovah?

24 Iŋ, ndi mbufo ekere ete ke ekpekeda mmɔ ewɔrɔ ke ufin, edieke Jehovah mikinɔhɔ Moses uyo ete enye ada mmɔ ɔwɔrɔ ke ufin?

25 Idahaemi mbufo emefiɔk ete ke nditɔ Israel ekedu ke ufin; ndien mbufo emefiɔk ete ke ema enɔ mmɔ utom, emi ɔkɔsɔŋde ndinam; ke ntre, mbufo emefiɔk ete ke ekedi eti ŋkpɔ ɔnɔ mmɔ, ete eda mmɔ ewɔrɔ ke ufin.

26 Idahaemi mbufo emefiɔk ete ke Jehovah ɔkɔnɔ Moses uyo ete yak anam akamba utom oro; ndien mbufo emefiɔk ete ke ikɔ esie ke mme mmɔŋ Ididuot Inyaŋ ekebahade iba, ndien mmɔ esaŋa ebe ke nsat isɔŋ.

27 Edi mbufo emefiɔk ete ke mme Egyptian ema esip ke Ididuot Inyaŋ, emi ekedide mbon ekɔŋ Pharaoh.

28 Ndien mbufo nko emefiɔk ete ke ekebɔk mmɔ ye manna ke wilderness.

29 Iŋ, ndien mbufo nko emefiɔk ete ke Moses; oto ke ikɔ esie etiene odudu Abasi emi okodude ke enye, amia itiat, ndien mmɔŋ ɔwɔrɔ edi, man nditɔ Israel esuk nsat itɔŋ mmɔ.

30 Ndien okposukedi ete ke eda mmɔ, Jehovah Abasi mmɔ, Andifak mmɔ, asaŋa ke iso mmɔ, ada mmɔ usuŋ ke usen onyuŋ ɔnɔ mmɔ unwana ke okoneyo, onyuŋ anam kpukpru ŋkpɔ ɔnɔ mmɔ emi eke ɔfɔnde ete owo ɔbɔ, mmɔ esɔŋ esit mmɔ enyuŋ enam esit mmɔ edi nnan, enyuŋ esuŋi Moses ye akpanikɔ ye odu uwem Abasi.

31 Ndien edikem ete ke etiene ikɔ esie enye ama osobo mmɔ; ndien etiene ikɔ esie enye ama ada mmɔ usuŋ; ndien etiene ikɔ esie enye ama anam kpukpru ŋkpɔ ɔnɔ mmɔ; ndien owo ikanamke ŋkpɔ ndomo kiet ibɔhɔke ekedi ke ikɔ esie.

32 Ndien ke ini mmɔ ema ekebe akpa Jordan enye ama anam mmɔ enyene odudu ke ndibin nditɔ isɔŋ oro nsio, iŋ, ke ndisuan mmɔ nsin ke nsobo.

33 Ndien idahaemi, ndi mbufo ekere ete ke nditɔ isɔŋ emi, emi ekedude ke isɔŋ enwɔŋɔ, emi mme ete nnyin ekebinde esio, ndi mbufo ekere ke mmɔ ekedi ndinen owo? Sese, ami ndɔhɔ mbufo, Iŋ iŋ.

34 Ndi mbufo ekere ete ke ekpemek mme ete nnyin ekan mmɔ edieke mmɔ ekpedide ndinen owo? Ami ndɔhɔ mbufo, Iŋ iŋ.

35 Sese, Jehovah ese kpukpru obuk ukem ukem; enye emi enende Abasi ɔdiɔŋ enye. Edi sese, mme owo emi ema esin kpukpru ikɔ Abasi, ndien mmɔ ema edat ke ukwaŋ-ŋkpɔ; ndien uyɔhɔ iyaresit Abasi ama esim mmɔ; ndien Jehovah ama osuŋi isɔŋ abaŋa mmɔ, onyuŋ ɔdiɔŋ enye ɔnɔ mme ete nnyin; iŋ, enye ama osuŋi enye abaŋa mmɔ ɔnɔ nsobo mmɔ, ndien enye ama ɔdiɔŋ enye ɔnɔ mme ete nnyin ɔnɔ ndibɔ odudu mbaŋa enye.

36 Sese, Jehovah obot ererimbot ete yak eduŋ ke enye; ndien enye obot nditɔ esie man mmɔ eduŋ ke enye.

37 Ndien enye emenere edinen idut, onyuŋ osobo mme idut idiɔk owo.

38 Ndien enye ada ndinen owo ɔwɔrɔ aka mme isɔŋ emi emekde, ndien idiɔk owo enye osobo, onyuŋ osuŋi isɔŋ ɔnɔ mmɔ ke ntak mmɔ.

39 Enye akara ke enyɔŋ ke mme heaven, koro edi ebekpo esie, ndien ererimbot emi edi udori ukot esie.

40 Ndien enye ama mmɔ oro emi edinyenede enye nte Abasi mmɔ. Sese, enye ama ama mme ete nnyin, ndien enye anam ediomi ye mmɔ, iŋ, tutu Abraham, Isaac, ye Jacob; ndien enye eti mme ediomi emi enye akanamde; ke ntre, enye ama ada mmɔ ɔwɔrɔ ke isɔŋ Egypt.

41 Ndien enye ama ababa mmɔ ke wilderness ye esaŋ esie; koro mmɔ ema esɔŋ esit mmɔ, ukem ukem nte mbufo esɔŋde; ndien Jehovah ababa mmɔ ke ntak ukwaŋ-ŋkpɔ mmɔ. Enye ɔdɔŋ edisak urukikɔt ekesaŋade ke ufɔt mmɔ; ndien ke ini ema ekedom mmɔ enye ɔnɔ usuŋ man ekɔk mmɔ; ndien utom emi eke akanade nte mmɔ enam ekedi ndise; ndien ke ntak mmem mmem usuŋ emi, mme ke enye ememde ndinam, ediwak ema edu emi eketakde.

42 Ndien mmɔ ema esɔŋ esit mmɔ ke ini ke ini, ndien mmɔ ema esuŋi Moses, ndien nko ye Abasi; edi, mbufo emefiɔk ete ke anana mbiet odudu esie akada mmɔ aka ekesin ke isɔŋ enwɔŋɔ.

43 Ndien idahaemi, ke ini kpukpru mme ŋkpɔ emi ema ekebe, ini edikem emi mmɔ ekabare edi mme idiɔk owo, iŋ, ekpere ndidat; ndien ami nkere ke mfin emi ke mmɔ ekpere nsobo; koro ami mɔfiɔk nte ke akpanikɔ ke usen ana edi emi anade esobo mmɔ, ibɔhɔke ibat ibat owo ifaŋ ikpɔŋ, emi edidade iwɔrɔ isin ke nkpɔkɔbi.

44 Ke ntre, Jehovah ama ɔnɔ ete mi uyo ete yak enye ɔwɔrɔ aka wilderness; ndien mme Jew nko ema eyom ndimen uwem esie mfep; iŋ, ndien mbufo nko emeyom ndimen uwem esie mfep; ke ntre, mbufo edi mme owot owo ke esit mbufo ndien mbufo etie nte mmɔ.

45 Mbufo emesɔp ndinam ukwaŋ-ŋkpɔ edi isɔpke nditi Jehovah Abasi mbufo. Mbufo emekut angel, ndien enye ama etiŋ ikɔ ye mbufo; iŋ, mbufo emekop uyo esie kini kini; ndien enye etiŋ ikɔ ye mbufo ke suŋ-suŋekpri uyo, edi esit mbufo odoro ufiɔn, ndien mbufo ikanke ikop mme ikɔ esie, ke ntre, enye etiŋ ikɔ ye mbufo nte uyo obuma, emi akanamde isɔŋ enyek nte ekpebahare enye enim nsio nsio.

46 Ndien mbufo nko emefiɔk ete ke oto ke odudu ikɔ esie emi okponde akan enye ekeme ndinam ererimbot ete enye ebe efep; iŋ, ndien mbufo emefiɔk ete ke ikɔ esie enye ekeme ndinam mme ebiet midɔrɔke ekabare edɔrɔ, ndien eyebuŋ mme ndɔdɔrɔ itie. O, ndien, ntak emi, mbufo ekande esɔŋ ntem ke esit mbufo?

47 Sese, ukpɔŋ mi awaha ye ndutuhɔ ke ntak mbufo, ndien esit mi ɔfuhɔ; ami mfehe ndik mbak edibin mbufo eduɔk ke nsinsi. Sese, ami nyɔhɔ ye Spirit Abasi, tutu ete ke idem mi inyeneke odudu.

48 Ndien edikem ete ke ini ami mma nketiŋ mme ikɔ emi mmɔ eyat esit ye ami, ndien enyene udɔŋ nditop mi nsin ke mme udem inyaŋ; ndien nte mmɔ eke edide ndimum mi ami ndɔhɔ mmɔ, nte: Ke enyiŋ Abasi Ibom, ami nnɔ mbufo uyo nte yak mbufo ekutuk mi, koro ami nyɔhɔde ye odudu Abasi, tutu esim ndita obukidem mi; ndien owo eke ededi eke edimumde mi eye eyemere nte nsat nyayaŋa; ndien enye eyedi ikpikpu ke iso odudu Abasi, koro Abasi eyemia enye.

49 Ndien edikem ete ami, Nephi, ndɔhɔ mmɔ nte yak mmɔ ekukuni aba ye ete mmɔ; yak mmɔ nko ekusin ndinam utom ye ami, koro Abasi ama ɔnɔ mi uyo ete yak ami ŋkɔŋ ubom.

50 Ndien ami ndɔhɔ mmɔ nte: Edieke Abasi ɔkɔnɔde mi uyo ndinam kpukpru ŋkpɔ ami nyenam mmɔ. Edieke enye ɔnɔde mi uyo ete yak ami ndɔhɔ mmɔŋ emi, ete enye edi isɔŋ; ndien edieke ami ntiŋde, eyenam.

51 Ndien idahaemi, edieke Jehovah enyenede utɔ akwa odudu oro, ndien anam ata ediwak utibe ŋkpɔ ke ufɔt nditɔ owo, didie kedi ke enye ikemeke nditeme mi, ete yak ami nkɔŋ ubom?

52 Ndien edikem ete ami, Nephi, ntiŋ ediwak ŋkpɔ nnɔ nditɔ eka mi iren, tutu ete ke but anam mmɔ ndien mmɔ ikanke itɔhɔ ye ami; ndien mmɔ inyeneke uko ndimum mi mme ndituk mi ye mme nnuenubɔk mmɔ, tutu ke ufaŋ ediwak usen. Idahaemi mmɔ inyeneke uko ndinam emi mbak mmɔ ediyemere ke iso mi, Spirit Abasi ama ɔsɔŋ odudu ata eti eti, ndien ntre ke enye akanam ye mmɔ.

53 Ndien edikem ete Jehovah ɔdɔhɔ mi ete: Fiak nyan ubɔk fo nnɔ nditɔ eka fo iren, ndien mmɔ eidiyemekere ke iso fo, edi ami nyenam idem akpa mmɔ, Jehovah ɔdɔhɔ, ndien emi ke ami ndinam, man mmɔ efiɔk ete ke ami ndi Jehovah Abasi mmɔ.

54 Ndien edikem ete ami nyan ubɔk mi nnɔ nditɔ eka mi iren, ndien mmɔ ikiyemekere ke iso mi; edi Jehovah ama enyeŋe mmɔ, kpa nte ikɔ emi enye eketiŋde.

55 Ndien idahaemi, mmɔ edɔhɔ ete: Nnyin imefiɔk ke akpanikɔ ete ke Jehovah odu ye afo, koro nnyin imifiɔk ete ke edi ke odudu Jehovah ke enyeŋe nnyin. Ndien mmɔ eduɔ ke isɔŋ ke iso mi, ndien eyom ndikpono mi, edi ami nyakke mmɔ, nte: Ami ndi eyen eka mbufo, iŋ, kpa ekpri eyen eka mbufo, ke ntre, ekpono Jehovah Abasi mbufo, enyuŋ ekpono ete ye eka mbufo, man mme usen mbufo ekpebige ke isɔŋ emi Jehovah Abasi mbufo edinɔde mbufo.