1 Kag natabo ini nga nagpadayon kami liwat sang amon pagpanglakaton sa kamingawan; kag nagpanglakaton kami halos pa-este sumugod sadto nga tion. Kag nagpanglakaton kami kag nag-ubog sa tunga sang madamo nga pag-antos sa kamingawan; kag ang mga babayi namon nagpamata sa kamingawan.

2 Kag dako kaayo ang mga bugay sang Ginuo sa amon nga samtang nagkabuhi kami sa hilaw nga karne sa kamingawan, ang mga babayi namon nagpasuso sing madamo nga gatas sa ila mga anak, kag mga makusog, huo, bisan pareho sang mga lalaki; kag nagsugod sila sa pagbatas sang ila mga pagpanglakaton nga wala sing mga kulomuron.

3 Kag gani makita naton nga ang mga kasugoan sang Dios kinahanglan gid nga matuman. Kag kon lamang ang mga anak sang katawhan nagatuman sang mga kasugoan sang Dios ginatatap niya sila, kag ginapabakod sila, kag ginahatagan sing mga paagi nga sa sini mahimo nila ang butang nga ginasugo niya sa ila; gani, naghatag sia sing mga paagi para sa amon samtang temporaryo kami nga nagpuyo sa kamingawan.

4 Kag temporaryo kami nga nagpuyo sa sulod sang madamo nga tinuig, huo, bisan walo ka tuig sa kamingawan.

5 Kag nakalab-ot kami sa duta nga amon gintawag nga Bugana, tungod sang iya sini madamo nga bungang-kahoy kag amo man ilahas nga dugus; kag ining tanan nga butang ginhanda sang Ginuo agud nga indi kami magkalamatay. Kag nalantawan namon ang dagat, nga amon gintawag nga Irreantum, nga, kon sayuron, madamo nga mga tubig.

6 Kag natabo ini nga nagpatindog kami sang amon mga tolda sa higad sang baybayon; kag bisan pa nga nagbatas kami sing madamo nga pag-antos kag tuman nga kabudlay, huo, bisan nga sa pagkadamo nga indi namon masulat ini tanan, nalipay gid kami sang nag-abot kami sa baybayon; kag gintawag namon ang lugar nga Bugana, tungod sang iya sini madamo nga bungang-kahoy.

7 Kag natabo ini nga pagkatapos nga ako, si Nefi, nakatinir sa duta sang Bugana sa sulod sing madamo nga inadlaw, nabatian ko ang tingug sang Ginuo nga nagasiling: Tindog, kag magtaklad sa bukid. Kag natabo ini nga nagtindog ako kag nagtaklad sa bukid, kag nagpakitluoy sa Ginuo.

8 Kag natabo ini nga ang Ginuo naghambal sa akon nga nagasiling: Magpasad ka sing isa ka sakayan-dagat, suno sa paagi nga akon ipakita sa imo, agud nga madala ko ang imo katawhan patabok sa sining mga tubig.

9 Kag nagsiling ako: Ginuo, diin ako makadto agud makakita sang mga milinahon nga tunawon, agud nga makahimo ako sang mga galamiton sa pagpasad sang sakayan-dagat suno sa paagi nga imo ginpakita sa akon?

10 Kag natabo ini nga ginsugiran ako sang Ginuo kon diin ako makadto agud makakita sang mga milinahon, agud nga makahimo ako sang mga galamiton.

11 Kag natabo ini nga ako, si Nefi, naghimo sing isa ka hungkuyan nga panghuyop sa kalayo, halin sa mga panit sang mga sapat; kag pagkatapos nga nakahimo ako sing isa ka hungkuyan, agud nga may panghuyop ako sa kalayo, nagbag-id ako sing duha ka bato agud nga makapasiga ako sang kalayo.

12 Kay ang Ginuo wala magtugot tubtob subong nga maghimo kami sing madamo nga kalayo, samtang nagapanglakaton kami sa kamingawan; kay nagsiling sia: Himuon ko ang inyo pagkaon nga mangin manamit, nga indi na ninyo ini paglutuon;

13 Kag ako man ang inyo mangin kasanag sa kamingawan; kag ihanda ko ang alagyan sa inyo atubang, kon lamang tumanon ninyo ang akon mga kasugoan; gani, kon magtuman kamo sang akon mga kasugoan pagatuytuyan kamo padulong sa duta nga ginpanaad; kag mahibal-an ninyo nga paagi sa akon nga kamo gintuytuyan.

14 Huo, ang Ginuo nagsiling man nga: Pagkatapos nga makaabot kamo sa duta nga ginpanaad, mahibal-an ninyo nga ako, ang Ginuo, amo ang Dios; kag nga ako, ang Ginuo, amo ang nagluwas sa inyo halin sa kalaglagan; huo, gindala ko kamo pagwa sa duta sang Jerusalem.

15 Gani, ako, si Nefi, nagtinguha gid sa pagtuman sang mga kasugoan sang Ginuo, kag ginlaygayan ko ang akon mga kauturan tuhoy sa katampad kag katutum.

16 Kag natabo ini nga naghimo ako sang mga galamiton halin sa milinahon nga akon gintunaw halin sa bato.

17 Kag sang makita sang akon mga kauturan nga nagahana na ako sa pagpasad sing isa ka sakayan-dagat, nagsugod sila sa pagkulomuron batok sa akon nga nagasiling: Ang aton utod isa ka buang, kay nagahunahuna sia nga makahimo sia sing isa ka sakayan-dagat; huo, nagahunahuna man sia nga makatabok sia sining dako nga mga tubig.

18 Kag gani ang akon mga kauturan nagreklamo batok sa akon, kag luyag nga indi sila magpangabudlay, kay wala sila nagapati nga makahimo ako sing isa ka sakayan-dagat; kag wala man sila nagapati nga gintudloan ako sang Ginuo.

19 Kag karon natabo ini nga ako, si Nefi, tuman kamasinulub-on tungod sang katig-a sang ila mga tagipusuon; kag karon sang makita nila nga nagsugod ako nga mangin masinulub-on malipayon sila sa ila mga tagipusuon, sa bagay nga nagkasadya sila sa akon pagpangasubo nga nagasiling: Nahibal-an namon nga indi ka makapasad sing isa ka sakayan-dagat, kay nahibal-an namon nga kulang ka sa ihibalo; gani, indi mo mahimo ining tuman kadako nga hilimuon.

20 Kag pareho ka sa aton amay nga ginpatalang sang binuang nga mga imahinasyon sang iya tagipusuon; huo, gindala niya kita pagwa sa duta sang Jerusalem, kag nagdalang-dalang kita sa kamingawan sa sulod sining madamo nga tinuig; kag ang mga babayi naton nagpangabudlay, nga dako na ang ila ginabusong; kag nagpamata sila sa kamingawan kag nag-antos sang tanan nga butang, luwas lamang sang kamatayon; kag maayo pa nga nagkalamatay sila antes naggwa sa Jerusalem sangsa nagbatas sining mga pag-antos.

21 Tan-awa, sining madamo nga tinuig nag-antos kita sa kamingawan, nga sa amo nga panahon kuntani nakapagusto kita sang aton mga pagkabutang kag sang duta nga aton palanublion; huo, nangin malipayon kuntani kita.

22 Kag nahibal-an namon nga ang mga katawhan nga yara sa duta sang Jerusalem isa ka matarong nga katawhan; kay nagtuman sila sang mga pagsulundan kag mga paghukom sang Ginuo, kag sang tanan niya nga mga kasugoan, suno sa layi ni Moises; gani, nahibal-an namon nga isa sila ka matarong nga katawhan; kag ang aton amay nagkondenar sa ila, kag gindala kita palayo bangod namati kita sa iya mga pulong; huo, kag ang amon utod pareho man sa iya. Kag sa amo nga sahi sang mga panghambal nagkinumod kag nagreklamo ang akon mga kauturan batok sa amon.

23 Kag natabo ini nga ako, si Nefi, naghambal sa ila nga nagasiling: Nagapati bala kamo nga ang aton mga amay, nga mga anak ni Israel, nagiyahan pagwa sa mga kamot sang mga Egiptohanon kon wala sila magpamati sa mga pulong sang Ginuo?

24 Huo, nagahunahuna bala kamo nga ayhan nahilway sila pagwa sa pagkaulipon, kon ang Ginuo wala nagsugo kay Moises nga hilwayon niya sila halin sa pagkaulipon?

25 Karon nahibal-an ninyo nga ang mga anak ni Israel yara sa pagkaulipon; kag nahibal-an ninyo nga ginpabug-atan sila sang mga hilimuon, nga mabudlay batason; gani, nahibal-an ninyo nga kinahanglan gid nga mangin isa ini ka maayo nga butang para sa ila, nga madala sila pagwa sa pagkaulipon.

26 Karon nahibal-an ninyo nga si Moises ginsugo sang Ginuo nga himuon inang dako nga buluhaton; kag nahibal-an ninyo nga paagi sa iya pulong ang mga tubig sang Pula nga Dagat gintunga diri kag didto, kag nag-agi sila sa tunga sa mamala nga duta.

27 Apang nahibal-an ninyo nga ang mga Egiptohanon nagkalalumos sa Pula nga Dagat, nga amo ang mga kasoldadohan sang Faraon.

28 Kag inyo man nahibal-an nga ginpakaon sila sang mana sa kamingawan.

29 Huo, inyo man nahibal-an nga ginhampak ni Moises ang bato, paagi sa iya pulong suno sa gahum sang Dios nga yara sa iya, kag nagtubod ang tubig, agud ang mga anak ni Israel maumpawan sa ila kauhaw.

30 Kag bisan pa nga ginpangunahan sila, ang Ginuo nga ila Dios, ang ila Manunubos, nga nagauna sa ila, nga nagatuytoy sa ila sa adlaw kag nagahatag sang kasanag sa ila sa gab-i, kag nagahimo sang tanan nga butang para sa ila nga kinahanglanon nga mabaton sang tawo, ginpatig-a nila ang ila mga tagipusuon kag ginbulag ang ila mga kaisipan, kag nagpasipala batok kay Moises kag batok sa matuod kag buhi nga Dios.

31 Kag natabo ini nga suno sa iya pulong ginlaglag niya sila; kag suno sa iya pulong ginpangunahan niya sila; kag suno sa iya pulong ginhimo niya ang tanan nga butang para sa ila; kag wala sing bisan ano nga butang nga nahimo nga indi paagi sa iya pulong.

32 Kag pagkatapos nga matabok nila ang suba sang Jordan ginhimo niya sila nga gamhanan sa pagtabog sang mga anak sang kadutaan, huo, sa paglapta sa ila sa kalaglagan.

33 Kag karon, nagahunahuna bala kamo nga ang mga anak sini nga duta, nga didto sa duta sang panaad, nga ginapanabog sang aton mga amay, nagahunahuna bala kamo nga mga matarong sila? Tan-awa, ginasiling ko sa inyo, Indi.

34 Nagahunahuna bala kamo nga ang aton mga amay nangin labaw nga pinili sangsa ila kon sila sadto nangin matarong? Ginasiling ko sa inyo, Indi.

35 Tan-awa, ginakabig sang Ginuo nga ang tanan nga unod isa lang; sia nga matarong ginapasulabi sang Dios. Apang tan-awa, ining katawhan nagsikway sang tagsa ka pulong sang Dios, kag luto na sila sa kalainan; kag ang kabug-osan sang kaakig sang Dios yara sa ila; kag ginsumpa sang Ginuo ang duta batok sa ila, kag ginpakamaayo ini para sa aton mga amay; huo, ginsumpa niya ini batok sa ila tuhoy sa ila kalaglagan, kag ginpakamaayo niya ini para sa aton mga amay tuhoy sa ila pag-angkon sang gahum sa sini.

36 Tan-awa, gintuga sang Ginuo ang duta agud puy-an ini; kag gintuga niya ang iya mga anak agud sila ang magpanag-iya sini.

37 Kag ginabayaw niya ang isa ka matarong nga nasyon, kag ginalaglag ang mga nasyon sang mga malain.

38 Kag ginadala niya palayo ang mga matarong sa halandumon nga kadutaan, kag ang mga malain iya ginapanglaglag, kag ginasumpa ang duta sa ila tungod sa ila.

39 Nagahari sia sa kahitaasan sang mga langit, kay iya ini trono, kag ining duta amo ang iya palatungan.

40 Kag ginapalangga niya inang mga magabaton sa iya nga mangin ila Dios. Tan-awa, palangga niya ang aton mga amay, kag nakighisugot sia sa ila, huo, bisan kanday Abraham, Isaac, kag Jacob; kag gindumdum niya ang mga kasugtanan nga iya ginhimo; gani, gindala niya sila pagwa sa duta sang Egipto.

41 Kag ginsilotan niya sila sa kamingawan paagi sa iya bilugon; kay ginpatig-a nila ang ila mga tagipusuon, bisan pareho sa inyo; kag ginsilotan sila sang Ginuo tungod sang ila kalainan. Ginpadala Niya ang nagadabadaba nga mga man-og nga nagalupad sa tunga nila; kag pagkatapos nga mapangagat sila naghanda sia sing isa ka paagi agud mabulong sila; kag ang pagpangabudlay nga himuon lamang nila amo ang magtulok; kag tungod sang kamag-an sang paagi, ukon sang kahapos sini, madamo ang nagkalamatay.

42 Kag ginpatig-a nila ang ila mga tagipusuon sa nagkalain-lain nga tion, kag ginpasipalahan nila si Moises, kag amo man ang Dios; apang, nahibal-an ninyo nga gintuytuyan sila sang iya wala’y tupong nga gahum padulong sa duta sang panaad.

43 Kag karon, pagkatapos sining tanan nga butang, ang tion nag-abot nga nangin malain sila, huo, halos tubtob sa pagkaluto; kag wala ako makahibalo apang sila sa sini nga adlaw madali na lang nga laglagon; kay nahibal-an ko nga ang adlaw pat-od gid nga magaabot nga kinahanglan gid sila nga laglagon, luwas sa pila lamang, nga pagadal-on sa pagkabihag.

44 Gani, ang Ginuo nagsugo sa akon amay nga dapat sia magkadto sa kamingawan; kag ang mga Judio nagtinguha man nga patyon sia; huo, kag nagtinguha man kamo nga patyon sia; gani, mga manugpatay-tawo kamo sa inyo mga tagipusuon kag pareho man kamo sa ila.

45 Maabtik kamo maghimo sang kalainan apang mahinay sa pagdumdum sang Ginuo nga inyo Dios. Nakakita kamo sing isa ka anghel, kag naghambal sia sa inyo; huo, nabatian ninyo ang iya tingug kon san-o nga nagakaigo; kag naghambal sia sa inyo sa isa ka mahinay kag diutay nga tingug, apang kabalan kamo, sa bagay nga indi ninyo mabatyagan ang iya mga pulong; gani, naghambal sia sa inyo pareho sang tingug sang daguob, nga nagtuga sang duta nga mag-uyog nga daw sa magkalapihak ini.

46 Kag nahibal-an man ninyo nga paagi sa kusog sang iya makagagahum nga pulong mahimo niya ang duta nga ini nga magtaliwan; huo, kag nahibal-an ninyo nga paagi sa iya pulong mahimo niya nga ang kudol-kudol nga mga lugar mangin matapan, kag ang matapan nga mga lugar magkalabungkag. O, kon amo, ngaa bala, nga sa pagkatig-a gid sang inyo mga tagipusuon?

47 Tan-awa ang akon kalag napilas sa kalisud tungod sa inyo, kag ang akon tagipusuon nasakitan; nahadlok ako nga basi pagasikwayon kamo tubtob sa wala’y katapusan. Tan-awa, napuno ako sang Espiritu sang Dios, sa bagay nga ang akon lawas wala na sing kusog.

48 Kag karon natabo ini nga sang nahambal ko ining mga pulong naakig sila sa akon, kag luyag nga ihaboy ako sa kadalumon sang dagat; kag samtang nagapalapit sila sa pagpadapat sang ila mga kamot sa akon naghambal ako sa ila nga nagasiling: Sa ngalan sang Dios nga Makagagahum, ginasugo ko kamo nga indi ninyo ako pagtandugon, kay napuno ako sang gahum sang Dios, bisan tubtob sa pagkaupos sang akon unod; kag kon sin-o man ang magpadapat sang iya mga kamot sa akon malaya bisan pareho sing isa ka laya nga kugon; kag mangin wala sia sing pulos sa atubang sang gahum sang Dios, kay ang Dios magasakit sa iya.

49 Kag natabo ini nga ako, si Nefi, nagsiling sa ila nga indi na sila magkulomuron pa batok sa ila amay; kag indi man nila pag-idumili ang ila pagpangabudlay sa akon, kay ang Dios nagsugo sa akon nga magpasad ako sing isa ka sakayan-dagat.

50 Kag nagsiling ako sa ila: Kon ang Dios nagsugo sa akon sa paghimo sang tanan nga butang mahimo ko ina. Kon suguon niya ako nga magsiling ako sa sini nga tubig, mangin duta ikaw, ini mangin duta; kag kon magsiling ako sini, mahimo ini.

51 Kag karon, kon ang Ginuo may amo sina kadako nga gahum, kag nakahikot sing madamo nga milagro sa tunga sang mga anak sang katawhan, paano nga indi niya ako matudloan nga magpasad ako sing isa ka sakayan-dagat?

52 Kag natabo ini nga ako, si Nefi, nagsiling sang madamo nga butang sa akon mga kauturan, sa bagay nga natapna sila kag indi makapakigbais batok sa akon; ukon wala na sila nagpadapat sang ila mga kamot sa akon ukon nagtandog sa akon sang ila mga tudlo, bisan sa sulod sang madamo nga inadlaw. Karon wala na sila naghimo sini kay basi malaya sila sa akon atubang, sa pagkagamhanan sang Espiritu sang Dios; kag gani nahikot ini sa ila.

53 Kag natabo ini nga ang Ginuo nagsiling sa akon: Untayon mo liwat ang imo kamot sa imo mga kauturan, kag indi sila malaya sa imo atubang, apang kibuton ko sila, siling sang Ginuo, kag ini akon himuon, agud ila mahibal-an nga ako ang Ginuo nga ila Dios.

54 Kag natabo ini nga gin-untay ko ang akon kamot sa akon mga kauturan, kag wala sila nalaya sa akon atubang; apang gin-uyog sila sang Ginuo, bisan suno sa pulong nga iya ginhambal.

55 Kag karon, nagsiling sila: Nahibal-an namon sing may kapat-uran nga ang Ginuo yara sa imo, kay nahibal-an namon nga gahum sang Ginuo ang nag-uyog sa amon. Kag nagluhod sila sa akon atubang, kag simbahon na ako kuntani, apang wala ko sila pagtugoti nga nagasiling: Utod ninyo ako, huo, bisan ang inyo manghod; gani, simbaha ang Ginuo nga inyo Dios, kag tahura ang inyo amay kag ang inyo iloy, agud nga ang inyo mga inadlaw magalawig sa duta nga ihatag sa inyo sang Ginuo nga inyo Dios.