1 Kag natabo ini nga nagsimba sila sa Ginuo, kag naglakat sila upod sa akon; kag namanday kami sang mga kahoy nga pulido ang pagkahimo. Kag ang Ginuo nagpakita sa akon kon san-o nga nagakaigo kon anhon ko ang pagpamanday sang mga kahoy sang sakayan-dagat.

2 Karon ako, si Nefi, wala nagpamanday sang mga kahoy suno sa paagi nga natun-an sang tawo, kag wala man ako nagpasad sang sakayan-dagat suno sa paagi sang tawo; kundi ginpasad ko ini suno sa paagi nga ginpakita sang Ginuo sa akon; gani, indi ini suno sa paagi sang tawo.

3 Kag ako, si Nefi, pirme nga nagataklad sa bukid, kag nagapangamuyo ako pirme sa Ginuo; gani ginpakita sang Ginuo sa akon ang dalagko nga mga butang.

4 Kag natabo ini nga pagkatapos nga nahuman ko ang sakayan-dagat, suno sa pulong sang Ginuo, nakita sang akon mga kauturan nga maayo ini, kag ang pagkahimo sini tuman katahum; gani, nagpaubos sila liwat sang ila mga kaugalingon sa atubang sang Ginuo.

5 Kag natabo ini nga nabatian sang akon amay ang tingug sang Ginuo, nga dapat kami maghimos kag magpanaog sa pagsakay sa sakayan-dagat.

6 Kag natabo ini nga pagkaaga, pagkatapos nga mahanda namon ang tanan nga butang, madamo nga prutas kag karne halin sa kamingawan, kag madamo kaayo nga dugus, kag mga balalunon suno sa sinang ginsugo sa amon sang Ginuo, nagpanaog kami sa pagsakay sa sakayan-dagat upod ang amon tanan nga dalal-on kag ang amon mga binhi, kag kon ano pa nga butang nga nadala namon, kada isa suno sa iya pangidaron; gani, nagpanaog kami tanan sa pagsakay sa sakayan-dagat upod ang amon mga asawa kag ang amon mga anak.

7 Kag karon, ang akon amay nakadugang sing duha ka anak nga lalaki sa kamingawan; ang magulang ginhingalanan kay Jacob kag ang manghod kay Jose.

8 Kag natabo ini nga pagkatapos nga nakapanaog na kami tanan sa pagsakay sa sakayan-dagat, kag nakadala sang amon mga pagkaon kag mga balalunon kag mga butang nga ginsugo sa amon, naglayag kami sa dagat kag ginpadpad sang hangin padulong sa duta nga ginpanaad.

9 Kag pagkatapos nga mapadpad kami sang hangin sa sulod sang madamo nga inadlaw, tan-awa, ang akon mga kauturan kag ang mga anak nga lalaki ni Ismael kag amo man ang ila mga asawa nagsugod sa pagkinasadya, sa bagay nga nagsugod sila sa pagsinaot, kag sa pagkinanta, kag sa paghambal sing tuman kabastos, huo, bisan nga nalipat sila kon paagi sa ano nga gahum sila gindala didto; huo, nangin tuman sila kabastos.

10 Kag ako, si Nefi, nagsugod nga mahadlok sing tuman kay basi maakig sa amon ang Ginuo, kag sakiton kami tungod sang amon kalainan kag lamunon kami sa kadalumon sang dagat; gani, ako, si Nefi, nagsugod sa pagpakighambal sa ila sing tuman kasinsero; apang tan-awa naakig sila sa akon nga nagasiling: Indi kami gusto nga ang amon manghod ang magadumala sa amon.

11 Kag natabo ini nga gindakop ako nanday Laman kag Lemuel kag gingapos ako sang mga lubid, kag ginpaagyan nila ako sang tuman nga kapintas; apang, gintugot ini sang Ginuo agud mapakita niya ang iya gahum, tuhoy sa katumanan sang iya pulong nga iya ginpahayag parte sa mga malain.

12 Kag natabo ini nga pagkatapos nga nagapos nila ako sa bagay nga indi na ako makahulag, ang kompas, nga ginhanda sang Ginuo, nag-untat sa paggiho.

13 Gani, indi nila mahibal-an kon diin nila ipadulong ang sakayan-dagat, tubtob nga may nagtuhaw nga isa ka dako nga unos, huo, isa ka dako kag mabaskog nga unos, kag ginpalid kami pabalik sa ibabaw sang mga tubig sa sulod sang tatlo ka adlaw; kag nagsugod nga kinulbaan sila sing labi nga basi nga magkalalumos sila sa dagat; apang, wala nila ako paghubari.

14 Kag sa ika-apat nga adlaw, nga ginpalid kami pabalik, ang unos nagsugod nga nangin tuman kabaskog.

15 Kag natabo ini nga halos na kami nga lamunon sa kadalumon sang dagat. Kag pagkatapos nga ginpalid kami pabalik sa ibabaw sang mga tubig sa sulod sang apat ka adlaw, nagsugod nga nahangpan sang akon mga kauturan nga ang mga paghukom sang Dios yara sa ila, kag nga pat-od gid nga magkalamatay sila luwas lang kon maghinulsol sila sang ila mga kalainan; gani, nagpalapit sila sa akon kag ginhubad ang mga gapos sa akon mga pulso, kag tan-awa nagpalanghubag sing tuman ang mga ini, kag ang akon mga buko-buko nagpalanghubag man sing labi kag tuman ang palanakit sini.

16 Apang, nagsalig ako sa akon Dios, kag nagdayaw sa iya sa bilog nga adlaw; kag wala ako nagkumod batok sa Ginuo tungod sang akon mga pag-antos.

17 Karon ang akon amay, nga si Lehi, naghambal sa ila sing madamo nga butang, kag amo man sa mga anak nga lalaki ni Ismael; apang, tan-awa, nagpabutyag sila sing madamo nga pagpaandam batok sa bisan sin-o nga makighambal para sa akon; kag ang akon mga ginikanan tungod tigulang na, kag tungod nag-antos sila sing tuman nga kalisud tungod sang ila mga anak, sa bagay nga nagmasakit sila, huo, bisan tubtob sa ila hiligdaan.

18 Tungod sang ila kalisud kag tuman nga kasubo, kag sang kalainan sang akon mga kauturan, nabutang sila sa kahimtangan nga malapit na gid lang nga dal-on halin sa sini nga tion sa pagpakigkita sa ila Dios; huo, ang ila ubanon nga mga buhok halos na gid lang nga ihamyang sa yab-ok; huo, bisan nga malapit na gid lang sila nga ihulog sing may kasubo sa tubigon nga lulubngan.

19 Kag si Jacob kag amo man si Jose, tungod mga bata pa, nga nagakinahanglan sing madamo nga pagkaon, nagkasubo tungod sang mga pag-antos sang ila iloy; kag amo man ang akon asawa upod ang iya mga luha kag mga pangamuyo, kag amo man ang akon mga anak, wala makapahumok sang mga tagipusuon sang akon mga kauturan agud hubaran nila ako.

20 Kag wala na sing iban luwas sa gahum sang Dios, nga nagpahog sa ila sang kalaglagan, ang makapahumok sang ila mga tagipusuon; gani, sang makita nila nga malapit na sila nga lamunon sang kadalumon sang dagat naghinulsol sila sang butang nga ila nahimo, sa bagay nga ginhubaran nila ako.

21 Kag natabo ini nga pagkatapos nga nahubaran nila ako, tan-awa, ginkuha ko ang kompas, kag naggiho ini bisan diin ko luyag. Kag natabo ini nga nagpangamuyo ako sa Ginuo; kag pagkatapos nga nakapangamuyo ako, nag-untat ang hangin, kag nag-untat ang unos, kag may dako nga kalinong.

22 Kag natabo ini nga ako, si Nefi, ang naggiya sang sakayan-dagat, kag nagpalayag kami liwat padulong sa duta nga ginpanaad.

23 Kag natabo ini nga pagkatapos nga nakapalayag kami sa sulod sing madamo nga inadlaw nag-abot kami sa duta nga ginpanaad; kag nanaog kami sa duta, kag nagpatindog sang amon mga tolda; kag gintawag namon ini nga duta nga ginpanaad.

24 Kag natabo ini nga nagsugod kami sa pag-uma sang duta, kag nagsugod kami sa pagtanom sang mga binhi; huo, ginpamutang namon sa duta ang tanan nga binhi namon, nga gindala namon halin sa duta sang Jerusalem. Kag natabo ini nga nagtubo ang mga ini sing maayo; gani, ginbugayan kami sing bugana.

25 Kag natabo ini nga natukiban namon sa duta sang panaad, samtang nagapanglakaton kami sa kamingawan, nga may tagsa ka sari sang mga sapat sa lasang, pareho sang baka kag sang toro, sang asno kag sang kabayo, kag sang kanding kag maila nga kanding, kag tanan nga sari sang sapat nga maila nga mapuslan sang tawo. Kag nasapwan namon ang tanan nga sari sang milinahon, pareho sang bulawan, kag sang pilak, kag sang saway.