1 Ndien edikem ete mmɔ ema ekpono Jehovah, enyuŋ eka ye ami; ndien nnyin inam mme eto emi ikidade ini inam. Ndien Jehovah ama owut mi kini kini utɔ usuŋ emi ami anade nnam mme eto ubom oro.

2 Idahaemi ami, Nephi, nkenamke mme eto emi ke usuŋ emi mme owo ekekpepde, ŋko ami ŋkekɔŋke ubom emi ke usuŋ eke mme owo; edi ami mma nkɔŋ enye ke usuŋ emi Jehovah okowutde mi; ke ntre, ikidihe ke usuŋ eke mme owo.

3 Ndien ami, Nephi, mma nwak ndika ke obot, ndien ami mma nwak ndibɔŋ akam nnɔ Jehovah; ke ntre Jehovah ama owut mi mme ikpɔ ŋkpɔ.

4 Ndien edikem ete ke ini ami mma ŋkekure ubom oro, ntiene ikɔ Jehovah, nditɔ eka mi iren ekut ete ke enye ɔfɔn, ndien ke ubɔk utom esie ama eye ata eti eti; ke ntre, mmɔ ema efiak esuhɔre-idem ke iso Jehovah.

5 Ndien edikem ete uyo Jehovah edi ɔnɔ ete mi, ete yak nnyin idaha ida inyuŋ isuhɔre ika ikiduk ubom oro.

6 Ndien edikem ete ke mkpɔŋ, ke ini nnyin ima iketim kpukpru ŋkpɔ, ediwak mfri ye unam ito wilderness, ndien aranɔkwɔk eke minyeneke ibat, ye mme ŋkpɔ udia etiene nte se Jehovah eke ɔkɔnɔde nnyin uyo, nnyin ima isuhɔre ika ikiduk ubom oro, ye kpukpru mbiomo nnyin ye mme mkpasip nnyin, ye ŋkpɔ eke ededi emi nnyin ikimende idi ye nnyin, kiet kiet etiene isua esie; ke ntre, nnyin kpukpru ima isuhɔre ika ikoduk ubom oro, ye iban nnyin ye nditɔ nnyin.

7 Ndien idahaemi, ete mi ama obon nditɔ iren iba ke wilderness; andikpon nkan ekekot Jacob ndien ekpri oko Joseph.

8 Ndien edikem ke ini kpukpru nnyin ima ikesuhɔre ika ikoduk ubom oro, ndien ke ima ikeda ye nnyin mme ŋkpɔ udia nnyin ye mme ŋkpɔ emi eke enɔde nnyin uyo, nnyin ima iwat iwɔrɔ inyaŋ ndien iwat inɔ iso iso ke iso ofum ika isɔŋ enwɔŋɔ.

9 Ndien ke ini ema ekewat nnyin enɔ iso iso ke iso ofum ke ufaŋ ediwak usen, sese, nditɔ eka mi iren ye nditɔ iren Ishmael ndien nko iban mmɔ etɔŋɔ ndinem idem mmɔ esit, tutu mmɔ etɔŋɔ ndinek unek, ye ndikwɔ ikwɔ, ye nditiŋ ikɔ ye ata usɔŋenyin, iŋ, tutu ete ke mmɔ ema efre odudu emi akadade mmɔ edisim ebiet oro; iŋ, ema emenere mmɔ esim ata usɔŋenyin.

10 Ndien ami, Nephi, ntɔŋɔ ndifehe ndik ata eti eti nte Jehovah ayayat esit ye nnyin, onyuŋ amia nnyin ke ntak ukwaŋ-ŋkpɔ nnyin, ete yak emen nnyin ke mme udem inyaŋ; ke ntre, ami, Nephi, ntɔŋɔ nditiŋ ikɔ ye mmɔ ye ata uteŋe; edi sese mmɔ eyat esit ye ami, ete: Nnyin idiyakke ete ekpri eyen eka nnyin edi andikara nnyin.

11 Ndien edikem ete Laman ye Lemuel emum mi enyuŋ ebɔp mi ye mme uruk, ndien mmɔ enam ŋkpɔ ye ami ye ata nsɔŋ ido; edi, Jehovah ama ayak ete edi ntre man enye owut odudu esie, ke ndinam ikɔ esie osu emi enye eketiŋde kabaŋa idiɔk owo.

12 Ndien edikem ete ke ini mmɔ ema ekebɔp mi tutu ete ami nke nkanke mmenere idem, ŋkpɔ emi ekedade nnyin usuŋ, emi edide Jehovah akanam, ama etre ndinam utom.

13 Ke ntre, mmɔ ikifiɔkke usuŋ emi mmɔ enade nte ewat ubom eka, tutu ete akamba oyobio adaha, iŋ, akamba ye enyene ndik ɔkpɔsɔŋ oyobio, ndien awat nnyin ɔnɔ edem edem ke mme mmɔŋ ke ufaŋ usen ita; ndien mmɔ etɔŋɔ ndifehe ndik ata eti eti efehe ete mmɔ edisip ke inyaŋ; edi mmɔ ikitatke mi iyak.

14 Ndien ke ɔyɔhɔ usen inaŋ, emi ekewatde nnyin enɔ edem edem, ɔkpɔsɔŋ oyobio oro ɔtɔŋɔ ndidiɔk ata eti eti.

15 Ndien edikem ete ke akayak esisit man emen nnyin ke mme udem inyaŋ. Ndien ke ini ema ekewat nnyin enɔ edem edem ke mme mmɔŋ ke ufaŋ usen inaŋ, nditɔ eka mi iren etɔŋɔ ndikut ete ke mme ubiere ikpe Abasi esim mmɔ, ndien ete ke ana mmɔ etak ibɔhɔke ete mmɔ ekabare esit ke mme ukwaŋ-ŋkpɔ mmɔ; ke ntre, mmɔ edi etiene mi, enyuŋ etat mme uruk emi eke edude ke mme itɔŋ ubɔk mi, ndien sese mmɔ ema efut ata eti eti, ndien nko mme itɔŋ ukot mi ema efut eti eti, ndien akamba ekedi ubiak mmɔ.

16 Edi, ami mma nse Abasi mi, ndien ami mma ntoro enye ke ofuri usen; ndien ami nkekunike ye Jehovah ke ntak mme ukut mi.

17 Idahaemi ete mi, Lehi, ama etiŋ ediwak ŋkpɔ ye mmɔ, ndien nko ye nditɔ iren Ishmael; edi, sese, mmɔ ema efime ediwak ikɔ-ndik ye owo ekededi emi editiŋde ikɔ inɔ mi; ndien ete ye eka mi ema ekeka ke usɔŋ, ndien ke ntak ekeyɔde ediwak ndutuhɔ ke ntak nditɔ mmɔ, ema eda mmɔ esuhɔre, iŋ, tutu ke nna udɔŋɔ mmɔ.

18 Ke ntak mfuhɔ ye ediwak ndutuhɔ mmɔ, ye ukwaŋ-ŋkpɔ nditɔ eka mi iren, ema eda mmɔ ekpere tutu ndimen mmɔ nwɔrɔ ke ini emi man ekesobo ye Abasi mmɔ; iŋ, ama ekpere ndida iwat mmɔ nsuhɔre nna ke ntan; iŋ, tutu ekpere mfuhɔ mmɔ nditop mmɔ nsin ke udi mmɔŋ.

19 Ndien Jacob ye Joseph nko, ke ntak ekedide mkpri, ye ke ntak ekenyenede ediwak udia, ema efuhɔ ke ntak mme ukut eka mmɔ; ndien nko nwan mi ye mme mmɔŋeyet ye mme akam, ndien nko nditɔ mi, ikimemke mme esit nditɔ eka mi iren ete mmɔ etat mi eyak.

20 Ndien ŋkpɔ ndomo kiet ikiduhe ke mibɔhɔke odudu Abasi, emi ɔkpɔhɔde mmɔ ye nsobo, akpanam esit mmɔ emem; ke ntre, ke ini mmɔ ekekutde ete ke ana nte emen mmɔ ke mme udem inyaŋ mmɔ ekabare esit kabaŋa ŋkpɔ emi mmɔ ekenamde, tutu ete mmɔ etat mi eyak.

21 Ndien edikem ete mmɔ etat mi eyak, sese, ami mmen ŋkpɔ emi akadade nnyin usuŋ, ndien enye anam utom nte ami nyenede udɔŋ nte enye anam. Ndien edikem ete ami mbɔŋ akam nnɔ Jehovah; ndien ke ini mma nkɔbɔŋ akam mme ofum ema etre, ndien oyobio ama etre, ndien akamba emem odu.

22 Ndien edikem ete ami, Nephi, mma nwat ubom oro, ndien nnyin ifiak iwat ika isɔŋ enwɔŋɔ.

23 Ndien edikem ete ke ini nnyin ima ikiwat ke ufaŋ ediwak usen nnyin ima esim isɔŋ enwɔŋɔ; ndien nnyin idɔk ika ke isɔŋ oro, ndien iwuk mme tent nnyin; ndien nnyin ima ikot enye isɔŋ enwɔŋɔ.

24 Ndien edikem ete nnyin ima itɔŋɔ nditibi isɔŋ, ndien nnyin itɔŋɔ nditɔ mme mkpasip; iŋ, nnyin ima isin kpukpru mkpasip nnyin ke isɔŋ, emi nnyin ikedade ito isɔŋ Jerusalem. Ndien edikem ete mmɔ ema ekɔri ata eti eti; ke ntre, ema ediɔŋ nnyin ata eti eti.

25 Ndien edikem ete nnyin ima ikut ke isɔŋ enwɔŋɔ, nte nnyin ikisaŋade ke wilderness, ete ke unam ikɔt ema edu ke ikɔt ke kpukpru utɔ, mbiba enaŋ ye ox, ndien ass ye horse, ye ebot ye ebot ikɔt, ye kpukpru utɔ mme unam ikɔt, emi ekedide ete mme owo ekama. Ndien nnyin ima ikut kpukpru utɔ ukwak, mbiba eke gold, ye silver, ye copper.