1 ’E i muri a’era, ’ua ha’amori rāua i te Fatu, ’e ’ua pe’e mai rāua iā’u, ’e ’ua tarai ihora mātou i te mau rā’au, nā roto i te hāmanira’a ta’a ’ē roa. ’E ’ua fa’a’ite pinepine mai te Fatu iā’u i te huru nō te taraira’a i te mau rā’au o te pahī.

2 I teienei, ’aita vau, ’o Nephi, i tarai i te mau rā’au i tā te ta’ata nei huru ravera’a, ’e ’aita ho’i au i hāmani i te pahī mai tā te ta’ata nei huru hāmanira’a ; ’ua hāmani rā vau i te reira mai tā te Fatu i fa’a’ite mai iā’u ; nō reira, ’aita te reira i au i tā te ta’ata nei huru ravera’a.

3 ’E ’ua haere pinepine atu vau, ’o Nephi, i ni’a i te mou’a, ’e ’ua pure pinepine au i te Fatu ; nō reira, ’ua fa’a’ite mai te Fatu iā’u i te mau mea rahi.

4 ’E i muri a’era, ’ia fa’aoti a’era vau i te pahī, mai te au i te parau a te Fatu, ’ua ’ite mai ra tō’u nā taea’e ē, e mea maita’i ïa, ’e e mea nehenehe roa ho’i te hāmanira’a ; nō reira, ’ua fa’aha’eha’a fa’ahou rāua ia rāua iho i mua i te Fatu.

5 ’E i muri a’era, ’ua tae mai ra te reo o te Fatu i tō’u metua tāne, ’e e mea ti’a ia mātou ’ia haere i raro i roto i te pahī.

6 ’E i muri a’era, ’ia po’ipo’i a’era, i muri iho i tō mātou fa’aineinera’a i te mau mea ato’a, i te mau mā’a hotu e rave rahi, ’e te ’īna’i nō te mēdēbara mai, ’e te meli e rave rahi, ’e te mau mā’a ho’i mai te au i tā te Fatu i fa’aue mai ia mātou ra, ’ua haere atu mātou i raro i roto i te pahī ’e tā mātou mau tao’a ato’a ’e tā mātou mau huero, ’e te mau mea ato’a ho’i tā mātou i ’āfa’i mai nā muri ia mātou, te ta’ata ho’i mai te au i tōna matahiti ; nō reira, ’ua haere mātou ’e tā mātou mau vahine ’e tā mātou mau tamari’i ho’i i raro i roto i te pahī.

7 ’E i teienei, ’ua fānau tā tō’u metua tāne e to’opiti pu’e tamari’i tamāroa i roto i te mēdēbara ; ’ua ma’irihia tō te tamaiti pa’ari a’e i’oa ’o Iakoba, ’e tō te tamaiti ’āpī iho i’oa ’o Iosepha.

8 ’E i muri a’era, i muri iho i tō mātou tomora’a i roto i te pahī, ’e te ’āfa’ira’a atu i tā mātou mau mā’a ’e te mau mea i fa’auehia mai ia mātou ra, ’ua tere atu ra mātou nā ni’a i te moana ’e ’ua puhi-noa-hia mātou e te mata’i i te pae’au e tae atu ai i te fenua i fafauhia ra.

9 ’E i muri iho i tō mātou tūra’ira’ahia i mua i te mata’i nō te ārea e rave rahi mahana te maoro, inaha, ’ua ha’amata ihora tō’u nā tua’ana ’e te mau tamari’i tamāroa a Isema’ela ’e tā rātou ato’a mau vahine i te fa’a’ārearea ia rātou iho, ’e ’ua ha’amata ihora rātou i te ’ori, i te hīmene, ’e i te parau i te parau ha’uti tano ’ore, ’oia ïa, ’ua mo’e ia rātou te mana i tae ai rātou i reira ; ’oia ïa, ’ua fa’ateiteihia rātou i te peu ha’uti tano ’ore roa.

10 ’E ’ua ha’amata ihora vau, ’o Nephi, i te mata’u rahi ’o te riri mai te Fatu ia mātou, ’e ’o te tā’iri mai ia mātou nō tā mātou mau ’ohipa ’ī’ino, ’e ’o te horomi’ihia mātou i roto i te hōhonura’a o te moana ; nō reira, ’ua ha’amata ihora vau, ’o Nephi, i te parau atu ia rātou ma te ’ā’au marū ; inaha rā, ’ua riri mai rātou iā’u, ’e ’ua nā ’ō mai ra : ’Aita roa mātou e fa’ati’a i tō mātou teina ’ia riro ’ei fa’atere i ni’a a’e ia mātou.

11 ’E i muri a’era, ’ua rave mai ra Lamana rāua ’o Lemuela iā’u ’e ’ua ru’uru’u ihora iā’u i te taura, ’e ’ua hāmani ’ino mai ra iā’u ; ’āre’a rā, ’ua fa’ati’a te Fatu i te reira, ’ia ti’a iāna ’ia fa’a’ite mai i tōna mana, i te fa’ati’ara’a i tāna parau ’o tāna i parau mai nō ni’a i te feiā parauti’a ’ore.

12 ’E i muri a’era, i muri iho i tō rāua ru’uru’ura’a iā’u ’e nō reira ho’i ’aita i ti’a iā’u ’ia hā’uti’uti, ’ua pohe ihora te ’avei’a ’o tā te Fatu i fa’aineine.

13 Nō reira, ’aita rāua i ’ite i te vāhi nō te fa’ahaere i te pahī, nō te mea ’ua tupu mai te hō’ē vero rahi, ’oia ïa, te hō’ē verohuri rahi ’e te ri’ari’a, ’e ’ua tūra’i-noa-hia mātou i muri nā ni’a i te mau pape nō te ārea e toru mahana te maoro ; ’e ’ua tupu ihora tō rāua mata’u rahi ’o te paremo rātou i te miti ; ’āre’a rā ’aita roa rāua i tātara iā’u.

14 ’E i te maha o te mahana, ’a tūra’i-noa-hia ai mātou i muri, ’ua pūai roa mai te verohuri.

15 ’E i muri a’era, ’ua fātata roa mātou i te horomi’ihia i roto i te hōhonura’a o te moana. ’E i muri iho i tō mātou tūra’ira’ahia i muri nā ni’a i te mau pape nō te ārea e maha mahana te maoro, ’ua ’ite ihora tō’u nā tua’ana ē, tei ni’a ia rāua te mau ha’avāra’a a te Atua, ’e ’ia pohe rāua e ti’a ai, maori rā ’ia tātarahapa rāua i tā rāua mau ’ohipa ’ī’ino ; nō reira, ’ua haere mai ra rāua iā’u, ’e ’ua tātara ihora i te taura i ni’a i tō’u rima, ’e inaha ’ua ’oru’oru roa te reira, ’e ’ua ’oru’oru ato’a ho’i tō’u mōmoa ’āvae, ’e ’ua māuiui roa ho’i.

16 ’Āre’a rā, ’ua ti’aturi noa vau i tō’u Atua, ’e ’ua ha’amaita’i noa vau iāna i te tā’āto’ara’a nō te mahana ; ’e ’aita vau i amuamu i te Fatu nō tō’u ra mau ’ati.

17 I teienei, i parau na ho’i tō’u metua tāne, ’o Lehi, ’ia rāua ’e i te mau tamari’i tamāroa ato’a a Isema’ela ; inaha rā, ’ua fa’ahiti rāua i te mau parau ha’amata’u rahi i te feiā i parau i te mea maita’i nō ni’a iā’u ; ’e ’ua ro’ohia tō’u nā metua i te ma’i i ni’a i tō rāua ro’i nō tō rāua ruhiruhiāra’a, ’e nō te ’oto ho’i nō tā rāua mau tamari’i.

18 Nō tō rāua ’oto ’e tō rāua mihi rahi, ’e nō te mau ’ohipa ’ī’ino ho’i a tō’u nā tua’ana, i fātata ai rāua i te pohe roa ’e i te fa’aru’e mai i teie orara’a nō te fārerei atu i tō rāua Atua ; ’oia ïa, i fātata ai tō rāua rouru hinahina i te ta’oto i raro a’e i te repo ; ’oia ïa, i fātata ai ho’i rāua i te hurihia i raro i te mēnema nō te miti ra.

19 ’E nō te mau ’ati o tō rāua metua vahine i ’oto ai Iakoba rāua ’o Iosepha, nō te mea e mea ’āpī rāua ’e ’ua tītauhia ’ia fa’a’amu pinepine ia rāua i te mā’a ; ’e ’aita ho’i i ti’a i tā’u vahine ma tōna roimata ’oto, ’e tāna ho’i mau pure, ’e i tā’u ato’a ho’i mau tamari’i, ’ia tāmarū i te ’ā’au o tō’u ra nā tua’ana, ’ia tātara rātou iā’u.

20 ’Aita roa ho’i i ti’a i te hō’ē mea ’ia tāmarū i tō rāua ’ā’au, maori rā, te mana o te Atua tei ha’amata’u ia rāua i te pohe ; nō reira, ’ia ’ite a’era rāua ē, ’ua fātata rāua i te horomi’ihia i roto i te hōhonura’a o te moana, ’ua tātarahapa ihora rāua i te mea tā rāua i rave, ’e nō reira ho’i ’ua tātara ihora rāua iā’u.

21 ’E i muri a’era, i muri iho i tō rāua tātarara’a iā’u, inaha, ’ua rave ihora vau i te ’avei’a ’e ’ua tere ihora te reira mai te au i tā’u i hina’aro ra. ’E i muri a’era, ’ua pure atu ra vau i te Fatu ; ’e ’ia oti a’era tā’u pure, ’ua fa’aea ihora te mau mata’i, ’e ’ua fa’aea ihora te vero, ’e ’ua mania ihora.

22 ’E i muri a’era, ’ua fa’atere atu ra vau, ’o Nephi, i te pahī, ’e ’ua tere fa’ahou atu ra mātou i te pae e tae atu ai i te fenua i fafauhia ra.

23 ’E i muri a’era, ’a tere atu ai mātou nō te ārea e rave rahi mahana te maoro, ’ua tae atu ra mātou i te fenua i fafauhia ra ; ’e ’ua haere atu ra mātou i ni’a i te fenua, ’e ’ua fa’ati’a ihora i tō mātou mau ti’ahapa ; ’e ’ua ma’iri ihora mātou i tō te reira i’oa, te fenua i fafauhia ra.

24 ’E i muri a’era, ’ua ha’amata a’era mātou i te fa’a’apu i te fenua, ’e ’ua ha’amata ato’a mātou i te tanu i te mau huero ; ’oia ïa, ’ua tanu ihora mātou i tā mātou mau huero ato’a ’o tā mātou i ’āfa’i mai mai te fenua nō Ierusalema mai. ’E i muri a’era, ’ua tupu roa atu ra te reira ; ’e ’ua ha’amaita’i-rahi-hia mātou.

25 ’E i muri a’era, ’ua ’itea ia mātou i ni’a i te fenua i fafauhia ra, ’a tere ai mātou i roto i te mēdēbara ē, tē vai ra te mau huru ’ānimara ato’a i roto i te uru rā’au, te pua’atoro ufa ’e te pua’atoro oni, te ’āsini ’e te pua’ahorofenua, te pua’aniho, te pua’aniho ’ōviri, ’e te mau huru ’ānimara ’ōviri ato’a, tei fa’ata’ahia nō te ta’ata. ’E ’ua ’itea mai ia mātou te mau huru ’ōfa’i metalo ato’a, ’e te ’auro, ’e te ’ārio, ’e te veo.