1 ’E i muri a’era, ’ua fa’aue mai ra te Fatu iā’u, ’e nō reira ’ua hāmani ihora vau i te mau ’api i te ’ōfa’i metalo ra, ’ia ti’a iā’u ’ia pāpa’i i te pāpa’a parau o tō’u ra mau ta’ata. ’E i ni’a iho i te mau ’api ’o tā’u i hāmani ’ua ’ō’oti ihora vau i te pāpa’a parau o tō’u ra metua tāne, ’e tō mātou mau tere i roto i te mēdēbara, ’e te mau tohura’a a tō’u ra metua tāne ; ’e ’ua ’ō’oti ato’a vau i tā’u ihora mau tohura’a e rave rahi i ni’a ihora.

2 ’E ’aita vau i ’ite i te tau vau i hāmani ai i teie mau ’api ē, e fa’auehia vau e te Fatu ’ia hāmani i te reira ; nō reira, ’ua ’ō’otihia i ni’a i teie mau ’api mātāmua ’o tā’u i parau iho nei, te pāpa’a parau o tō’u ra metua tāne, ’e te tuatāpapara’a tupuna o tōna ra mau metua, ’e te tahi pae rahi nō te tā’āto’ara’a ïa o tō mātou mau tere i roto i te mēdēbara ; nō reira, te mau mea i tupu hou vau i hāmani ai i teie nei mau ’api, ’ua fa’ahiti-pāpū-roa-hia ïa i ni’a iho i te mau ’api mātāmua.

3 ’E i muri iho i tō’u hāmanira’a i teie nei mau ’api nā roto i te fa’auera’a, ’ua fāri’i ihora vau, ’o Nephi, i te hō’ē fa’auera’a ’ia pāpa’i i te mau ’ohipa mo’a ’e te mau tohura’a pāpū ’e te faufa’a rahi i ni’a iho i teie nei mau ’api ; ’e ’ia fa’ahereherehia teie mau mea i pāpa’ihia nō te ha’api’ira’a i tō’u ra mau ta’ata, ’o tē pārahi i ni’a i teie nei fenua, ’e nō te tahi atu ā mau ’ōpuara’a pa’ari, te mau ’ōpuara’a i ’itea i te Fatu ra.

4 Nō reira, ’ua pāpa’i au, ’o Nephi, i te hō’ē pāpa’a parau i ni’a iho i te tahi atu mau ’api, ’o tei fa’a’ite mai i te ’ā’amu, ’oia ho’i, te hō’ē ’ā’amu rahi atu nō ni’a i te mau tama’i ’e te mau mārōra’a ’e te pau rahi ho’i o tō’u ra mau ta’ata. ’E ’ua nā reira vau, ’e ’ua fa’aue ato’a atu vau i tō’u ra mau ta’ata i tā rātou e rave ’ia reva ’ē atu vau ; ’e ’ia tu’uhia atu teie mau ’api mai te tahi u’i i te tahi atu, ’e ’aore rā mai te tahi peropheta i te tahi atu, ē tae noa atu ’ua hōro’a mai te Fatu i te tahi atu mau fa’auera’a.

5 ’E e fa’a’itehia te ’ā’amu nō tā’u hāmanira’a i teie nei mau ’api i muri nei ; ’e i muri iho, inaha, e pāpa’i ai au mai tā’u i parau na ; ’e e nā reira ho’i au ’ia fa’ahereherehia te mau mea mo’a roa nō te ’ite o tō’u ra mau ta’ata.

6 ’Āre’a rā, ’aita vau e pāpa’i i te hō’ē mea i ni’a i teie mau ’api, maori rā ’o te mau mea i mana’ohia e au e mea mo’a. ’E i teienei, mai te mea e hape au, ’ua hape ato’a ho’i te feiā i tahito ra ; ’aore rā tō’u ’ōtohera’a nō te tahi atu mau ta’ata, nō te paruparu rā i roto iā’u nei, mai te au i tō te tino nei, tō’u ’ōtohera’a nei.

7 Nō te mea ’o te mau mea i mana’ohia e te tahi mau ta’ata ē, e mea faufa’a rahi roa nō te tino ’e nō te vārua ho’i, ’ua fa’aru’e-noa-hia ïa ’e ’ua ta’ata’ahi-noa-hia ho’i e te ’āvae o vetahi ’ē ra mau ta’ata. ’Oia ïa, tē ta’ata’ahi noa nei te ta’ata i te Atua mau o ’Īserā’ela i tō rātou ’āvae ; ’ua parau iho nei au ē ’ua tāta’ahihia e tō rātou ’āvae, e parau rā vau i te tahi atu ā parau, ’oia ho’i—’ua fa’aru’e rātou iāna, ’e ’aore ho’i rātou e fa’aro’o i te reo nō tāna ra mau a’ora’a.

8 ’E inaha, e haere mai ’oia i te ono hānere matahiti i muri a’e i te tau i fa’aru’e ai tō’u metua tāne i Ierusalema, mai te au i te mau parau a te melahi ra.

9 ’E nō te mau ’ohipa ’ī’ino a tō te ao nei, e ha’avā rātou iāna ’ei mea faufa’a ’ore ; nō reira, e tā’iri rātou iāna, ’e e fa’a’oroma’i ’oia ; ’e e tūpa’i rātou iāna, ’e e fa’a’oroma’i ’oia. ’Oia ïa, e tūtuha rātou i ni’a iho iāna, ’e e fa’a’oroma’i ’oia, nō tōna aroha rahi ’e tōna fa’a’oroma’ira’a roa i te mau tamari’i a te ta’ata nei.

10 ’E ’o te Atua o tō tātou mau metua, tei arata’ihia mai mai ’Aiphiti mai ra, ’e mai te fa’atītīra’a mai ra, ’e tei fa’aorahia ho’i e ana i roto i te mēdēbara ra ; ’oia ïa, te Atua o Aberahama, ’e te Atua o Isaaka, ’e te Atua o Iakoba ho’i, ’e ’ua tu’u atu ’oia iāna iho i te tino ta’ata nei, mai tā te melahi i parau mai ra, i te rima o te feiā parauti’a ’ore ra, ’e ’ia fa’ateiteihia, mai tā Zenoka i parau ra, ’e ’ia fa’asātaurohia, mai tā Neuma i parau ra, ’e ’ia tanuhia i roto i te mēnema mai tā Zenosa i parau ra, ’o tāna i fa’a’ite mai nō ni’a i nā mahana pōiri e toru ra, ’o tē riro ’ei tāpa’o nō tōna pohera’a i te feiā e pārahi i te mau motu o te moana ra ; i ha’apa’o-mau-hia ho’i nō te feiā o te ’utuāfare o ’Īserā’ela.

11 ’Ua nā ’ō mai ho’i te peropheta : ’E i taua mahana ra e tāho’o mau ai te Fatu te Atua i te mau ’utuāfare ato’a o ’Īserā’ela, te tahi pae i tōna ra reo, ’e e fāri’i ai rātou i tō rātou ’oa’oa rahi ’e te fa’aorara’a, nō tō rātou parauti’a rahi, ’e te tahi pae i te mau pātiri ’e te mau uira nō tōna ra mana, nā roto i te vero, ’e te auahi, ’e te au auahi, ’e te māhu pōiri, ’e te ’āmahamahara’a o te fenua, ’e te mau mou’a i te hōpoira’ahia i ni’a ra.

12 ’E ’ia tupu mau teie mau mea pā’āto’a e ti’a ai, tē nā reira mai ra te peropheta ra ’o Zenosa. E ’āfāfā te mau mato o te fenua ; ’e nō te autā rahi o te fenua e fa’auruhia ai te mau ari’i o te mau motu o te moana ra e te Vārua o te Atua ’o tē tae mai i ni’a iho ia rātou, i te fa’ahitira’a ē : Tē mamae nei te Atua o te nātura.

13 ’E nō te mau ta’ata e pārahi i Ierusalema ra, tē nā ’ō mai ra te peropheta, e hāmani-’ino-hia rātou e te mau ta’ata ato’a, nō te mea i fa’asātauro rātou i te Atua o ’Īserā’ela, ’e ’ua fa’afāriu ’ē atu i tō rātou ’ā’au, ma te pāto’i i te mau tāpa’o, ’e te mau ’ohipa ’ūmerehia, ’e te mana ’e te hanahana o te Atua o ’Īserā’ela ra.

14 ’E nō te mea, ’ua fa’afāriu ’ē atu rātou i tō rātou ’ā’au, tē nā reira mai ra te peropheta, ’e ’ua ’ino’ino ho’i i Tei Mo’a i ’Īserā’ela nei, e orihaere noa ïa rātou i te tino nei, ’e e mou, ’e e riro ho’i rātou ’ei fa’a’inora’a ’e ’ei tau’āparaura’a, ’e e ’ino’inohia ho’i rātou i rotopū i te mau nūna’a ato’a.

15 ’Āre’a rā, tē nā ’ō mai ra te peropheta, ’ia tae i taua mahana ra ’aita rātou e fa’afāriu ’ē atu i tō rātou ’ā’au i Tei Mo’a i ’Īserā’ela nei, ’ei reira e ha’amana’o ’oia i te mau fafaura’a tāna i fafau atu i tō rātou ra mau metua.

16 ’Oia ïa, ’ei reira e ha’amana’o ai ’oia i te mau motu o te moana ra ; ’oia ïa, tē nā ’ō mai ra te Fatu, e ha’aputuputu mai au i te mau ta’ata ato’a o te ’utuāfare o ’Īserā’ela nō ’ō mai i nā tufa’a e maha o te ao nei, mai tei parauhia e te peropheta ra e Zenosa.

17 ’Oia ïa, e ’ite ho’i tō te ao ato’a nei i te fa’aorara’a nō ’ō mai i te Fatu ra, tē nā reira mai ra te peropheta ; ’e e ha’amaita’ihia te mau nūna’a ato’a, ’e te mau ’ōpū ato’a, ’e te mau reo ato’a, ’e te mau ta’ata ato’a.

18 ’E ’ua pāpa’i ho’i au, ’o Nephi, i teie mau mea i tō’u ra mau ta’ata, penei a’e ’o te fa’afāriu mai au ia rātou ’ia ha’amana’o i te Fatu i tō rātou ra Tāra’ehara.

19 Nō reira, tē parau atu nei au i te ’utuāfare pā’āto’a o ’Īserā’ela, e mea ti’a roa ’āhiri ē roa’a ia rātou teie nei mau mea.

20 Inaha ho’i, tē vai nei tā’u mau ’ohipa i roto i te vārua, ’o tei ha’aparuparu mai iā’u nei, ’e ’ua paruparu ho’i tō’u mau ponaivi ato’a nō tō Ierusalema ra ; nō te mea ’āhiri ’aita te Fatu i aroha mai iā’u, nō te fa’a’ite mai ia rātou iā’u nei, mai tāna ho’i i fa’a’ite atu i te mau peropheta i tahito ra, ’ua pohe ato’a ïa vau.

21 ’E ’ua fa’a’ite mau ho’i ’oia i te mau mea ato’a nō ni’a ia rātou i te mau peropheta i tahito ra ; ’e ’ua fa’a’ite ato’a ’oia ia tātou i te mau peropheta e rave rahi ; nō reira, e mea ti’a roa ia mātou ’ia ’ite i te parau nō ni’a ia rātou nō te mea ’ua pāpa’ihia te reira i ni’a iho i te mau ’api veo ra.

22 ’E i muri a’era, ’ua ha’api’i atu ra vau, ’o Nephi, i teie mau mea i tō’u ra mau taea’e ; ’e i muri a’era ho’i, ’ua tai’o atu ra vau ia rātou i te mau mea e rave rahi tei ’ō’otihia i ni’a iho i te mau ’api veo ra, ’ia ’ite rātou i te mau ’ohipa a te Fatu i te tahi atu mau fenua ’ē, i rotopū i te feiā i tahito ra.

23 ’E ’ua tai’o atu vau ia rātou i te mau mea e rave rahi i pāpa’ihia i roto i te mau buka a Mose ra ; ’e nō te fa’afāriu māite mai ia rātou ’ia ti’aturi i te Fatu ra i tō rātou Tāra’ehara, ’ua tai’o atu vau ia rātou i te mau parau i pāpa’ihia e te peropheta ra e Isaia ; ’e ’ua fa’aau ho’i au i te mau pāpa’ira’a mo’a ato’a ia mātou, ’ia riro te reira ’ei maita’i ’e ’ei ha’api’ira’a ho’i nā mātou.

24 Nō reira ’ua parau atu ra vau ia rātou, nā ’ō atu ra : ’A fa’aro’o mai na ’outou i te mau parau a te peropheta, ’outou te hō’ē toe’a nō te ’utuāfare o ’Īserā’ela, te hō’ē ’āma’a i ’ōfati-’ē-hia mai ; ’a fa’aro’o mai na ’outou i te mau parau a te peropheta, tei pāpa’ihia i te ’utuāfare pā’āto’a o ’Īserā’ela, ’e tei fa’aauhia ho’i i ni’a ia ’outou, ’ia roa’a ia ’outou te ti’aturi, ’e i tō ’outou ra mau taea’e nō roto mai ’outou i tāpu-’ē-hia mai ai ; ’ua nā reira te peropheta i te pāpa’i.