1 Kag natabo ini nga ginsugo ako sang Ginuo, gani naghimo ako sang mga lamina halin sa milinahon agud nga mahimo ko nga makurit sa mga ini ang kasulatan sang akon katawhan. Kag sa mga lamina nga akon ginhimo ginkurit ko ang kasulatan sang akon amay, kag amo man ang amon mga pagpanglakaton sa kamingawan, kag ang mga propesiya sang akon amay; kag amo man ang madamo sang akon kaugalingon nga mga propesiya akon ginkurit sa mga ini.

2 Kag wala ko nahibal-an sa tion sang akon paghimo sang mga ini nga pagasuguon ako sang Ginuo sa paghimo sining mga lamina; gani, ang kasulatan sang akon amay, kag ang lista sang kaliwatan sang iya mga katigulangan, kag ang mas madamo nga bahin sang tanan namon nga mga kahimoan sa kamingawan nakurit sa sinang nauna nga mga lamina nga akon nasambit; gani, ang mga butang nga natabo antes ginhimo ining mga lamina, sa pagkamatuod, mas detalyado nga nasambit sa nauna nga mga lamina.

3 Kag pagkatapos nga nahimo ko ining mga lamina paagi sa kasugoan, ako, si Nefi, nakabaton sing isa ka kasugoan nga ang pag-alagad kag ang mga propesiya, ang mas maathag kag importante nga mga bahin sang mga ini, dapat nga isulat sa sining mga lamina; kag nga ang mga butang nga nasulat dapat nga halungan para sa ihibalo sang akon katawhan, nga magapanag-iya sang duta, kag amo man para sa iban pa nga maalam nga mga katuyoan, nga ang amo nga mga katuyoan nahibal-an sang Ginuo.

4 Gani, ako, si Nefi, naghimo sing isa ka kasulatan sa iban pa nga mga lamina, nga nagahatag sang kasaysayan, ukon nagahatag sing isa ka mas dako nga kasaysayan sang mga giyera kag mga pagbinaisay kag mga kalaglagan sang akon katawhan. Kag ini akon ginhimo, kag ginsugo ang akon katawhan kon ano ang ila dapat himuon pagkatapos nga wala na ako; kag nga ining mga lamina dapat nga ipasa-pasa halin sa isa ka henerasyon pakadto sa isa, ukon halin sa isa ka propeta pakadto sa isa, tubtob mag-abot ang dugang pa nga mga kasugoan sang Ginuo.

5 Kag isa ka kasaysayan sang akon paghimo sining mga lamina ang igahatag sa ulihi; kag dayon, tan-awa, magapadayon ako suno sa sinang akon ginhambal; kag ini akon ginahimo agud nga ang mas sagrado nga mga butang mahimo nga mahalungan para sa ihibalo sang akon katawhan.

6 Apang, wala ako nagasulat sing bisan ano sa mga lamina luwas lamang kon ini ginahunahuna ko nga sagrado. Kag karon, kon nagsayop man ako, bisan sila man nagsayop sang dumaan nga panahon; indi nga mangita ako sing balibad sa akon kaugalingon tungod sing iban nga tawo, kundi tungod sang kahuyang nga yari sa akon, suno sa unod, magapangayo ako sang pasaylo para sa akon kaugalingon.

7 Kay ang mga butang nga ginakabig sang iban nga tawo nga may dako nga bili, pareho sa lawas kag sa kalag, ginasikway sang iban kag ginatasak sang ila mga tiil. Huo, bisan ang Dios mismo sang Israel ginatasak sang mga tawo sang ila mga tiil; ginasiling ko, ginatasak sang ila mga tiil apang magahambal ako sa iban nga pulong—ginasikway nila sia, kag wala nagapamati sa tingug sang iya mga laygay.

8 Kag tan-awa magakari sia, suno sa mga pulong sang anghel, sa sulod sang anum ka gatos ka tuig halin sa tion nga nagbiya ang akon amay sa Jerusalem.

9 Kag ang kalibutan, tungod sang ila kalainan, magahukom sa iya nga isa ka butang nga wala pulos; gani bunalon nila sia, kag batason niya ini; kag sakiton nila sia, kag batason niya ini. Huo, duplaan nila sia, kag batason niya ini, tungod sang iya mahigugmaon nga kaluoy kag sang iya pagkamainantuson sa mga anak sang katawhan.

10 Kag ang Dios sang aton mga amay, nga ginpagwa sa Egipto, pagwa sa pagkaulipon, kag gin-amligan man niya sa kamingawan, huo, ang Dios ni Abraham, kag ni Isaac, kag ang Dios ni Jacob, nagtugyan sang iya kaugalingon, suno sa mga pulong sang anghel, bilang isa ka tawo, sa mga kamot sang malain nga mga tawo, agud alsahon, suno sa mga pulong ni Zenoc, agud ilansang sa krus, suno sa mga pulong ni Neum, kag agud ilubong sa isa ka pantyon, suno sa mga pulong ni Zenos, nga iya ginhambal parte sa tatlo ka adlaw sang kadulom, nga mangin isa ka tanda nga ihatag parte sang iya kamatayon sa ila nga magapuyo sa mga pulo sang dagat, ilabi na gid nga ginahatag sa ila nga iya sang panimalay ni Israel.

11 Kay amo ini ang ginhambal sang propeta: Pat-od gid nga bisitahan sang Ginuong Dios ang tanan nga panimalay ni Israel sa sina nga adlaw, ang pila paagi sa iya tingug, tungod sang ila pagkamatarong, tuhoy sa ila dako nga kalipay kag kaluwasan, kag ang iban paagi sa mga pagpanaguob kag sa mga pagpangilat sang iya gahum, paagi sa unos, paagi sa kalayo, kag paagi sa aso, kag usbong sang kadudulman, kag paagi sa pagkabuka sang duta, kag paagi sa mga bukid nga pataason.

12 Kag ining tanan nga butang pat-od gid nga magaabot, siling sang propeta nga si Zenos. Kag ang mga bato sang duta magakalapihak; kag tungod sang mga pag-ugayong sang duta, madamo sang mga hari sang mga pulo sang dagat ang maimpluwensya sang Espiritu sang Dios, sa pagsinggit: Ang Dios sang kalibutan nagaantos.

13 Kag parte sinang mga yara sa Jerusalem, siling sang propeta, pagasilotan sila sang tanan nga katawhan, bangod ginlansang nila sa krus ang Dios sang Israel, kag ginpatig-a ang ila mga tagipusuon, nga ginasikway ang mga tanda kag mga katilingalahan, kag ang gahum kag himaya sang Dios sang Israel.

14 Kag bangod ginpatig-a nila ang ila mga tagipusuon, siling sang propeta, kag ginsikway ang Balaan sang Israel, magadalang-dalang sila sa sini nga kabuhi, kag magakalamatay, kag pasipalahan kag yagutaon, kag dumtan sa tunga sang tanan nga nasyon.

15 Apang, kon mag-abot ina nga adlaw, siling sang propeta, sa bagay nga indi na sila magpatig-a sang ila mga tagipusuon batok sa Balaan sang Israel, iya pagadumdumon ang mga kasugtanan nga ginhimo niya sa ila mga amay.

16 Huo, dayon iya pagadumdumon ang mga pulo sang dagat; huo, kag ang tanan nga katawhan nga iya sang panimalay ni Israel, akon pagatiponon, siling sang Ginuo, suno sa mga pulong sang propeta nga si Zenos, halin sa apat ka pamusod sang duta.

17 Huo, kag ang bug-os nga duta makakita sang kaluwasan sang Ginuo, siling sang propeta; ang tagsa ka nasyon, kaliwat, lengguahe kag katawhan pagabugayan.

18 Kag ako, si Nefi, nagsulat sining mga butang sa akon katawhan, agud nga basi pa lang makumbinsi ko sila nga dumdumon nila ang Ginuo nga ila Manunubos.

19 Gani, nagahambal ako sa bug-os nga panimalay ni Israel, kon matabo nga maangkon nila ining mga butang.

20 Kay tan-awa, may mabaskog ako nga balatyagon sa espiritu, nga nagapakapoy sa akon bisan pa gani nga ang tanan ko nga lutalutahan maluya, tungod sa ila nga yara sa Jerusalem; kay kon indi nangin maluluy-on ang Ginuo, sa pagpakita sa akon parte sa ila, bisan pareho sang iya ginpakita sa mga propeta sang dumaan nga panahon, napatay man kuntani ako.

21 Kag pat-od gid nga ginpakita niya sa mga propeta sang dumaan nga panahon ang tanan nga butang parte sa ila; kag iya man ginpakita sa madamo ang parte sa amon; gani, kinahanglan gid nga mahibal-an namon ang parte sa ila kay ginsulat ang mga ini sa mga lamina nga saway.

22 Karon natabo ini nga ako, si Nefi, nagtudlo sining mga butang sa akon mga kauturan; kag natabo ini nga nagbasa ako sang madamo nga butang sa ila, nga ginkurit sa mga lamina nga saway, agud makahibalo sila parte sa mga kahimoan sang Ginuo sa iban pa nga mga kadutaan, sa tunga sang katawhan sang dumaan nga panahon.

23 Kag nagbasa ako sa ila sang madamo nga butang nga nasulat sa mga libro ni Moises; apang agud nga lubos ko sila nga makumbinsi sa pagpati sa Ginuo nga ila Manunubos nagbasa ako sa ila sinang mga ginsulat sang propeta nga si Isaias; kay gindapat ko ang tanan nga balaan nga kasulatan sa aton, agud nga mangin para ini sa aton kaayohan kag pagtuon.

24 Gani naghambal ako sa ila nga nagasiling: Pamatii ninyo ang mga pulong sang propeta, kamo nga mga nagkalabilin sang panimalay ni Israel, nga isa ka sanga nga ginbanggi; pamatii ninyo ang mga pulong sang propeta, nga ginsulat sa bug-os nga panimalay ni Israel, kag idapat ang mga ini sa inyo mga kaugalingon, agud nga makaangkon kamo sing paglaum pareho sang inyo mga kauturan nga kon kay sin-o kamo ginbanggi; kay sa amo sini nga paagi ang propeta nagsulat.