Ai Matai Ni iVola i Nifai

Na Gauna ni Nona Lewa kei na Nona Veiqaravi Vakalotu

Na itukutuku kei Liai kei Seraia na watina, kei iratou na luvena tagane e lewe va; na yacadratou, (tekivu mai vua ka qase duadua) ko Leimani, Lemueli, Semi, kei Nifai. Sa vakaroti Liai na Turaga me lako tani mai na vanua ko Jerusalemi, ni sa parofisaitaka vei ira na nodra ivalavala ca na tamata ka ra segata kina me ra vakamatei koya. E siga tolu na nona lako tiko kei na nona vuvale ki na lekutu. Sa kauti iratou lesu tale na tuakana ko Nifai ki na vanua ko Jerusalemi, me ratou la’ki kauta mai na kedra ivolatukutuku na Jiu. Na itukutuku ni veika rarawa eratou sota kaya. Eratou sa tauri iratou na luvei Isimeli yalewa me watidratou. Era sa lako yani vakamatavuvale ki na lekutu. Na veika rarawa kei na leqa era sota kaya ena lekutu. Na sala era muria. Era sa yacova na wasawasa. Erau sa vorati Nifai na tuakana. Sa vakataqayataki rau, ka sa taya e dua na waqa. Era sa vakatoka na vanua ko ya ko Vanuasautu. Era sa kosova na wasawasa ka yaco ki na vanua yalataki, kei na veika tale e so. Oqo na itukutuku i Nifai; se, au sa vola na itukutuku oqo koi au ko Nifai.

Wase 1

Sa tekivutaka ko Nifai na kedra itukutuku na nona tamata—Sa raica ena raivotu ko Liai e dua na duru bukawaqa ka wilika e dua na ivola ni parofisai—Sa vakacaucautaka na Kalou, sa tukuna na nona lako mai na Mesaia, ka sa parofisaitaka ni na vakarusai ko Jerusalemi—Era sa vakararawataki koya ko ira na Jiu. Rauta na 600 B.K.

1 Koi au, ko Nifai; au a sucu mai vei rau na itubutubu yalovinaka, o koya au a vakavulici kina vakatikina ena veika kece a kila ko tamaqu; ka’u sa raica e vuqa na ka rarawa ena noqu bula, ia, sa lomani au vakalevu sara na Turaga ena noqu bula taucoko; io, au sa kila vinaka tu na loloma kei na veika vuni ni Kalou, o koya au sa vola kina e dua na itukutuku ni veika au a cakava ena noqu bula.

2 Io, au sa vola e dua na itukutuku ena vosa i tamaqu, ka okati kina na ivakavuvuli vaka-Jiu kei na nodra vosa na kai Ijipita.

3 Ia au kila ni sa itukutuku dina au vola, ka ni’u vola sara ga e ligaqu; ia au sa vola me vaka na noqu kilaka.

4 Ni sa yaco ena itekivu ni imatai ni yabaki ni lewa i Setekaia, na tui Juta, (sa dau vakaitikotiko voli ga mai Jerusalemi ko Liai na tamaqu, ena nona bula taucoko); ena yabaki ko ya era sa lako yani e vuqa na parofita, ka parofisai vei ira na tamata ni sa dodonu me ra veivutuni, kevaka e sega, ena vakarusai vakaidina na koro levu ko Jerusalemi.

5 O koya, a sa yaco kina ni sa lako yani, ko Liai na tamaqu, sa masu vua na Turaga, io, ena yalona taucoko, ena vukudra na kai nona.

6 Ka sa yaco ni sa masu tiko vua na Turaga, sa lako sobu mai e dua na duru bukawaqa ka mai toka ena dua na vatu ka tu e matana; ka sa raica ka rogoca ko koya e vuqa na ka; a sa sakure ka sautaninini vakalevu ena vuku ni veika e a raica ka rogoca.

7 Ka sa yaco ni sa lesu ki na nona vale mai Jerusalemi; ka sa taubitalaki koya ena nona imocemoce, ni sa luvuci ena Yalo, kei na veika e a raica.

8 Ia ni sa luvuci tu ena Yalo, sa kau yani ena dua na raivotu, ka sa raica kina ni sa tadola na lomalagi, ka nanuma ni sa raica na Kalou ni dabe tiko ena nona itikotiko vakaturaga, ka sa vakavolivoliti tu mai vei ira na agilosi e sega ni wiliki rawa, ka vaka me ra laga sere ka vakacaucautaka tiko na nodra Kalou.

9 Ka sa yaco ni sa raica ni siro sobu mai lomalagi e Dua, ka raica na nona iserau ni sa uasivia na iserau ni matanisiga ena sigalevu tutu.

10 A sa raica talega e lewe tinikarua tale eratou sa muri koya mai, kei na kedratou iserau sa uasivia na veikalokalo ni lomalagi.

11 Eratou sa siro sobu mai ka lako voli ena delai vuravura; ka sa lako mai o koya ka a liu mai ka mai tu ena matai tamaqu, ka solia vua e dua na ivola, ka vakaroti koya me wilika.

12 Ka sa yaco ni sa wilika tiko, sa vakasinaiti ena Yalo ni Turaga.

13 Ka sa wilika, ka kaya: Ena ca, ena ca, ki vei Jerusalemi, ni’u sa raica na nomu veika vakasisila! Io, a sa wilika ko tamaqu e vuqa na ka me baleti Jerusalemi—ni sa dodonu me na vakarusai, kei ira na lewena era sa tiko kina; e lewe vuqa era na mate ena iseleiwau, ka lewe vuqa era na kau vakavesu yani ki Papiloni.

14 Ka sa yaco ni sa wilika oti na ivola ko tamaqu ka raica e vuqa na ka lelevu ka talei, sa kailavaka e vuqa na ka vua na Turaga; me vaka: A ka levu ka talei na nomuni veicakacaka, oi kemuni na Turaga na Kalou Qaqa! Sa tu mai lomalagi e cake na nomuni itikotiko vakaturaga, kei na nomuni kaukauwa, kei na nomuni vinaka, kei na nomuni loloma cecere sa yacovi ira na lewei vuravura kecega; ia, ni ko ni sa dau yalololoma, ko ni na sega ni laivi ira era sa lako yani vei kemuni me ra rusa!

15 A sa vakaoqo na nona vosa na tamaqu ena nona vakacaucautaka na nona Kalou; ni a reki vakaidina na yalona, ka sa vakasinaiti na lomana taucoko, ena vuku ni veika e a raica, io, ka a vakaraitaka vua na Turaga.

16 Ia oqo koi au ko Nifai, au na sega ni vola taucoko na itukutuku a vola ko tamaqu, ni a vola ko koya e vuqa na ka e a raica ena raivotu kei na tadra; ka a vola talega na veika e vuqa e a parofisaitaka ka vosataka vei ira na luvena, ka’u na sega ni vola taucoko na kena itukutuku.

17 Ia au na vola ga na itukutuku ni veika au sa cakava ena noqu gauna. Raica, au sa vola e dua na ivakalekaleka ni itukutuku i tamaqu, ena peleti ka’u a bulia sara ga e ligaqu; ia, ni’u sa vakalekalekataka oti na itukutuku i tamaqu au na qai vola na itukutuku ni noqu bula.

18 Ia, au gadreva mo ni kila, ni sa vakaraitaka oti na Turaga e vuqa na ka talei vei Liai na tamaqu, io, me baleta na vakarusai nei Jerusalemi, raica sa lako yani ko koya ena kedra maliwa na tamata, ka tekivu me parofisai ka tukuna vei ira me baleta na veika e a raica ka rogoca.

19 Ka sa yaco ni ra a vakalialiai koya na Jiu ena vuku ni veika e a vakadinadinataka me baleti ira; ni a vakadinadinataka vakaidina ko koya na nodra caka ca kei na nodra itovo vakasisila; ka a vakadinadinataka ni veika e a raica ka rogoca, kei na veika talega e a wilika ena ivola, sa vakatakila vakamatata sara na nona lako mai e dua na Mesaia, kei na vueti ni vuravura.

20 Ia ni ra sa rogoca na veika oqo ko ira na Jiu, era sa cudruvi koya; io, me vaka vei ira na parofita ena gauna makawa ka ra a vakasava tani, vakaviriki ira ena vatu, ka vakamatei ira; ka ra a segata talega me ra kauta tani na nona bula. Ia raica, koi au, ko Nifai, au na vakaraitaka vei kemuni ni sa yalololoma dina na Turaga vei ira kecega sa digitaka ko Koya, ena vuku ni nodra vakabauta, me vakayacora me ra qaqa ka rawata kina na kaukauwa ni veisereki.