1 ’A fa’aro’o mai na ’e ’a ha’apa’o mai na i teie, ’e te ’utuāfare o Iakoba, ’outou ’o tei ma’irihia te i’oa o ’Īserā’ela, ’e ’o tei haere mai i rāpae nā te mau pape mai o Iuda, ’e ’aore rā i rāpae nā te mau pape nō te bāpetizora’a, ’o tei tapu i te i’oa ra o te Fatu, ’e tei fa’ahiti i te Atua o ’Īserā’ela, ’e ’aore ho’i rātou i tapu ma te parau mau ’e ma te parauti’a.

2 ’Āre’a rā, ’ua parau rātou ē nō te ’oire mo’a mai rātou, ’aita rā rātou i ti’aturi māite i te Atua o ’Īserā’ela, ’oia te Fatu Sabaota ; ’oia ïa, ’o te Fatu Sabaota tōna ra i’oa.

3 Inaha, ’ua fa’a’ite atu vau i tei muta’a ihora mau mea e tupu mai te mātāmua mai ā ; ’e nō roto atu ho’i ïa i tō’u nei vaha, ’e ’ua fa’a’ite mau vau i te reira. ’Ua fa’a’ite ’oi’oi ho’i au i te reira ia rātou.

4 ’E ’ua nā reira vau nō te mea ’ua ’ite au i tō ’oe ’eta’eta, e uaua ’āuri tō ’oe ’a’ī, ’e tō ’oe rae, e rae veo ïa.

5 ’E ’ua parau atu vau ia ’oe mai te mātāmua mai ā ; ’e ’aita te reira i tupu, i fa’a’ite atu ai au ia ’oe ra ; ’e ’ua fa’a’ite atu vau i te reira ’ia ’ore ’oe ’ia parau ē—Nā tā’u ’īdolo te reira i rave, ’e nā tā’u hōho’a i taraihia, e tā’u ti’i i fa’atōhia ra i fa’aue i te reira.

6 ’Ua ’ite ’e ’ua fa’aro’o ho’i ’oe i taua mau mea ato’a ra ; ’e nō te aha ho’i ’aita ’oe e fa’a’ite i te reira ? ’E mai teie nei ’a fa’a’ite atu ai au ia ’oe i te parau ’āpī, ’o tei hunahia ra, ’e ’aita ā ’oe i ’ite i te reira.

7 ’Ua ravehia te reira i teienei, e ’ere mai te mātāmua mai ; ’e ’aita ā ho’i ’oe i fa’aro’o i te reira i fa’a’itehia ai ’oe i te reira, ’o te parau ho’i ’oe ē—Inaha, ’ua ’ite na ho’i au i te reira.

8 ’Oia ïa, ’e ’aita ā ho’i ’oe i fa’aro’o, ’oia ïa, ’e ’aita ā ho’i ’oe i ’ite ; ’oia ïa, ’aita ā ho’i tō tari’a i hina’aro ’ia fa’aro’o mai taua taime mai ā ; ’e ’ua ’ite ho’i au ē, e riro ’oe i te ha’avare, ’e tō ’oe ra i’oa ’o te ta’ata hara mai te ’ōpū mai ā.

9 ’Āre’a rā, nō tō’u i’oa nei i tāpe’a ai au i tō’u riri, ’e nō te ha’amaita’i iā’u i fa’atāere ai au i te riri ia ’oe, ’ia ’ore au ’ia tāpū ’ē atu ia ’oe ra.

10 Inaha ho’i, i tāmā na vau ia ’oe, ’e i ha’amaita’i roa na ho’i au ia ’oe i roto i te umu o te ’ati ra.

11 Nō’u iho, ’oia ïa, nō’u iho, e nā reira ai au ; e ’ore ho’i au e fa’ati’a ’ia ha’avi’ivi’ihia tō’u nei i’oa, ’e e ore ho’i au e hōro’a atu i tō’u nei hanahana ia vetahi ’ē.

12 ’A fa’aro’o mai na iā’u, e Iakoba, ’e ’o ’oe ho’i, e ’Īserā’ela, ’o tei mā’itihia e au ra, ’o vau nei ho’i teie ; ’o vau nei te mātāmeha’i ; ’e ’o vau nei ho’i te fa’ahope’a.

13 Nā tō’u nei rima ato’a i hāmani i te tumu o te fenua, ’e nā tō’u nei rima ’atau i hōhora i te mau ra’i. ’Ia pi’i au ia rātou, e ti’a ’āmui mai rātou.

14 ’A ha’aputuputu ’āmui mai ’outou pā’āto’a, ’e ’a fa’aro’o mai ; ’o vai tō rotopū ia rātou ’o tei fa’a’ite mai i teie nei mau mea ia rātou ? I herehia na ’oia e te Fatu ; ’oia ïa, e fa’atupu ’oia i tāna parau ’o tāna i fa’a’ite atu nā roto ia rātou ; ’e e rave ’oia i tōna hina’aro ia Babulonia, ’e e tae mai tōna rima i ni’a iho i te feiā nō Kaladaio ra.

15 ’Oia ato’a, tē nā ’ō mai ra te Fatu : ’O vau nei te Fatu, ’oia ïa, ’o vau nei tei parau atu ; ’oia ïa, ’ua pi’i au iāna nō te fa’a’ite atu, nā’u ’oia i arata’i mai, ’e e riro tōna tere i te manuia.

16 ’A ha’afātata mai na iā’u nei ; ’aita ho’i tā’u nei e parau huna ; mai te mātāmua mai ā, mai te ’anotau te reira i fa’ahitihia ai, i tohu na vau ; ’e nā te Fatu te Atua, ’e tōna Vārua, i tono mai iā’u.

17 ’E tē nā ’ō mai ra te Fatu, tō ’oe Tāra’ehara, Tei Mo’a i ’Īserā’ela nei ; nā’u ’oia i tono atu, nā’u nā te Fatu tō ’oe Atua ’o tei ha’api’i ia ’oe i te mea e maita’i ai ’oe ra, ’o tei arata’i ia ’oe nā te ’ē’a tā ’oe e haere, nā’u i rave i te reira.

18 ’Āhiri ’oe i ha’apa’o mai i tā’u nei mau fa’auera’a—’ua riro ïa tō ’oe hau mai te ’ānāvai ra, ’e tō ’oe parauti’a mai te mau ’are o te moana ra.

19 ’E tō hua’ai ra, mai te one ïa ; ’e tā tō ’ōpū e fānau ra, mai te mau ’iri’iri ïa ; e ’ore ho’i tōna i’oa e ’ō’oti-’ē-hia ’e e ’ore ho’i e ha’amouhia i mua iā’u nei.

20 ’A haere mai ’outou i rāpae i Babulonia, ’a ma’ue ’ē mai rotopū atu i te feiā nō Kaladaio ra ; ’a fa’a’ite i te reira ma te reo hīmene, ’a parau i te reira, ’e ’a puroro atu te reo i te hope’a o te fenua nei ; ’a parau ’outou ē : ’Ua fa’aora te Fatu i tōna tāvini ia Iakoba.

21 ’E ’aore ho’i rātou i po’ihā ; ’ua arata’i ’oia ia rātou nā te mau fenua marō ; ’ua fa’atahe mai ’oia i te mau pape nō roto mai i te mato nā rātou ; ’ua vāhi ato’a ’oia i te mato ’e ’ua puroro noa mai ra te mau pape.

22 ’E noa atu ’ua rave noa ’oia i taua mau mea ato’a ra, ’e ’ua rahi atu ā, tē nā ’ō mai ra te Fatu, ’aita roa tō te feiā parauti’a ’ore e hau.