1 ’E teie fa’ahou : ’A fa’aro’o mai na, ’outou e te ’utuāfare o ’Īserā’ela, ’outou pā’āto’a ’o tei ’ōfene-’ē-hia e tei ti’avaruhia nō te mau ’ohipa parauti’a ’ore a te mau ’orometua o tō’u ra mau ta’ata ; ’oia ïa, ’outou pā’āto’a tei ’ōfene-’ē-hia, ’e tei ha’apurara-’ē-hia, ’outou tō tō’u nei mau ta’ata, ’e te ’utuāfare o ’Īserā’ela ē. ’A fa’aro’o mai na iā’u e tō te mau motu, ’e ’a ha’apa’o mai e te mau ta’ata i te ātea ’ē ra ; ’ua pi’i te Fatu iā’u mai roto mai ā i te ’ōpū ; ’e mai te ’ōpū mai ā o tō’u metua vahine ’ua fa’ahiti ’oia i tō’u nei i’oa.

2 ’E ’ua fa’ariro ’oia i tō’u nei vaha ’ei ’o’e ’oi ; ’ua huna ’oia iā’u i roto i te maru o tōna rima, ’e ’ua fa’ariro iā’u ’ei te’a ’ana’ana ; ’ua huna ’oia iā’u i roto i tāna vaira’a te’a.

3 ’E ’ua parau mai ra ’oia iā’u : ’O tō’u tāvini ’oe, e ’Īserā’ela, ’e ’ia ’oe na ho’i au nei e fa’ahanahanahia ai.

4 ’Ua parau atu ra vau : Rohirohi faufa’a ’ore tō’u ; ’ua fa’ahope noa vau i tō’u pūai ’ei mea faufa’a ’ore ; nā te Fatu rā vau nei e ha’avā, ’e te utu’a o tā’u ’ohipa, tei tō’u Atua ïa.

5 ’E teienei, tē nā ’ō mai ra te Fatu—’o tei fa’atupu mai iā’u mai te ’ōpū mai ’ei tāvini nōna, nō te fa’aho’i mai ia Iakoba iāna ra—noa atu ē ’aita ā ’Īserā’ela i ha’aputuputuhia mai, e fa’ahanahanahia rā vau i te aro o te Fatu, ’e ’o tō’u Atua ra tō’u pūai.

6 ’E ’ua parau mai ra ’oia : E mea iti tenā ’ia riro mai ’oe ’ei tāvini nō’u nei, nō te fa’ati’a mai i te mau ’ōpū nō Iakoba, ’e nō te fa’aho’i mai i tō ’Īserā’ela i fa’ahereherehia na. E hōro’a ato’a atu vau ia ’oe ’ei ti’arama nō te mau ’Ētene, ’e ’ei fa’aorara’a ’oe nō’u ē tae noa atu i te mau hope’a o te fenua nei.

7 Tē nā ’ō mai ra te Fatu, te Tāra’ehara o ’Īserā’ela, Tei Mo’a iāna ra, i tei vahavahahia e te ta’ata ra, i tei au-’ore-hia e tō te mau nūna’a ; i te tāvini o te mau tāvana ra : E ’ite atu te hui ari’i ’e e ti’a atu rātou i ni’a, ’e te mau tamaiti ari’i ato’a e ha’amori atu ïa, nō te mea e mea ha’apa’o maita’i te Fatu.

8 Tē nā ’ō mai ra te Fatu : ’Ua fa’aro’o vau ia ’oe i te taime au ra, ’e te mau motu o te moana ē, ’e i te mahana nō te fa’aorara’a ’ua tauturu vau ia ’oe ; ’e e fa’aherehere au ia ’oe, ’e e hōro’a atu vau i tō’u tāvini ia ’oe ’ei fafaura’a i te ta’ata nei, ’ia pāpū tō ’outou fa’aeara’a i te fenua nei, ’e ’ia ha’apārahihia ’outou i te mau vāhi i tu’ua i te ano ra.

9 ’Ia parau atu ’oe i te feiā mau ’āuri : ’A haere i rāpae ; ’e tō roto i te pōiri ra : ’A fa’a’ite mai ia ’outou iho. E ’amu haere rātou nā te pae ’ē’a, ’e tā rātou ’āua ’amura’a tei ni’a ïa i te mau vāhi teitei.

10 E ’ore rātou e po’ia, e ’ore ho’i e po’ihā ; e ’ore ho’i rātou e pohe i te ve’ave’a ’e te mahana ; nā tei aroha ia rātou e arata’i ia rātou, ē tae noa atu i te pape piha’a ra.

11 E hāmani ho’i au i te ’ē’a nā ni’a i te mau mou’a ato’a nō’u ra ; e fa’ateiteihia te mau ’ē’a teitei i ni’a.

12 ’Ei reira, e te ’utuāfare o ’Īserā’ela ē, inaha, e haere mai ai teie mai te ātea roa mai ; ’e inaha, nō te ’apato’erau teie ’e nō te tō’o’a o te rā ra ; ’e teie nō te fenua ra nō Sinima.

13 ’A hīmene, e te mau ra’i ē ; ’a ’oa’oa, e te fenua ē ; e fa’ati’ahia te ’āvae ’o tei pārahi i te hiti’a o te rā ra ; e te mau mou’a ē, ’a hīmene pūai mai na ’outou ; e ’ore ho’i rātou e tā’irihia ē a muri noa atu ; ’ua ha’amāhanahana mai te Fatu i tōna ra mau ta’ata, ’e e aroha mai ’oia i tōna ra mau ta’ata i ro’ohia i te ’ati ra.

14 Inaha rā, i parau mai Ziona ē : ’Ua fa’aru’e mai te Fatu iā’u, ’e ’ua ha’amo’e tō’u Fatu iā’u—’āre’a rā e fa’a’ite mai ’oia ē, ’aita roa ’oia i nā reira.

15 E ha’amo’e ānei ho’i te hō’ē metua vahine i tāna ’aiū ’aru’aru, ’e ’aita atu ra e ’ite i te aroha i te tamaiti nō tōna iho ra ’ōpū ? ’Oia ïa, e mo’e paha ïa iāna, e’ita rā ’oe e mo’e iā’u, e te ’utuāfare o ’Īserā’ela ē.

16 Inaha, ’ua pāpa’i ha’amau vau ia ’oe i ni’a i tō’u nā ’apu rima ; ’e tē vai noa ra tō mau patu i mua iā’u nei.

17 E rū noa mai tā ’oe ra mau tamari’i i te feiā i pau ai ’oe ra ; ’e tei ha’amou ia ’oe ra, e reva ’ē atu ïa nā roto ia ’oe ra.

18 ’A nānā na i tō mata ’e ’a hi’o na ē ’ati noa a’e ; ’ua putuputu ’āmui ato’a mai teie ia rātou iho, ’e e haere mai rātou ia ’oe ra. ’E mai iā’u e ora nei, tē nā reira mai ra te Fatu, e fa’a’ahu ’oe ia ’oe ’e rātou ato’a ra, i te ’ahu ’una’una maita’i ra ; ’e e ha’amau haere i ni’a ia ’oe ra mai te vahine fa’aipoipo ra.

19 ’E tō ’oe ho’i mau vāhi pau tei fa’aru’ehia ra, ’e tō ’oe fenua i ha’amouhia ra, e apiapi roa ïa i te ta’ata i teienei ; ’e te feiā i fa’aapiapi ia ’oe ra, e hōpoi-’ē-hia ïa i te ātea ’ē.

20 Te mau tamari’i e roa’a ia ’oe ra, ’a mo’e ’ē ai ia ’oe i tei muta’a ihora, e parau mai ā rātou i roto i tō ’oe ra pū tari’a : ’Ua riro teie nei vāhi ’ei vāhi piriha’o nō’u ; ’a hōro’a mai na i te hō’ē vāhi nō’u, ’ia ō vau ’ia pārahi.

21 E riro ho’i ’oe i te parau i roto i tō ’ā’au na ē : Nā vai tā’u mau tamari’i nei i fānau mai ? ’Ua ’ere ho’i au i tā’u mau tamari’i, ’e ’ua mo’emo’e noa a’era, e ta’ata fa’aru’ehia vau e te ti’avaruhia i terā vāhi ’e i terā vahi ? ’E nā vai teie i fa’a’amu ? Inaha, ’ua toe ihora vau ana’e ; ’e i hea ana’e ho’i rātou ?

22 Tē nā ’ō mai ra te Fatu te Atua : Inaha, e fa’ateitei atu vau i tō’u nei rima i te mau ’Ētene ra, ’e e fa’ati’a ho’i i tō’u reva i te mau ta’ata ; ’e e hōpoi mai rātou i tā ’oe mau tamari’i tamāroa i roto i tō rātou mau rima, ’e tā ’oe mau tamari’i tamāhine i ni’a iho i tō rātou ra mau tapono.

23 E riro te mau ari’i tāne ’ei metua tāne fa’a’amu nō ’oe, ’e tā rātou mau ari’i vahine ’ei metua vahine fa’a’amu nō ’oe ; e tīpapa rātou i raro i mua ia ’oe, ma tō rātou mata i raro i te repo ra, ’e e mitimiti ho’i rātou i te repo i tō ’āvae ra ; ’e e ’ite ho’i ’oe ē, ’o te Fatu vau ; e ’ore ho’i rātou ’o tē tīai mai iā’u nei e ha’amā.

24 E noa’a mai ānei ho’i te mā’a haru i haruhia nō ’ō mai i te ta’ata pūai ra, ’e te feiā parauti’a i haruhia ra, e noa’a mai ānei ’ia haru ?

25 ’E tē nā ’ō mai ra te Fatu : E haru-fa’ahou-hia te feiā tītī i riro na i te ta’ata pūai, ’e te mā’a haru i noa’a i te ta’ata ri’ari’a ra, e noa’a fa’ahou mai ïa ; ’e e ’aro atu vau iāna ’o tē aro mai ia ’oe ra, ’e e fa’aora vau i tā ’oe ra mau tamari’i.

26 ’E nā’u e fa’a’amu ia rātou ’o tei hāmani ’ino mai ia ’oe ra ’ia ’amu i tō rātou iho tino ; e ta’ero ho’i rātou i tō rātou iho toto mai te ta’ero uaina ’āpī ra ; ’e e ’ite ho’i te mau ta’ata ato’a ē, ’o vau, ’o te Fatu, tō ’oe Fa’aora ’e tō ’oe Tāra’ehara, Tei Pūai nō Iakoba nei.