1 Ndien nko: Ekpaŋutɔŋ, O mbufo ufɔk Israel, kpukpru mbufo emi ebuŋde esio ndien ebin esio ke ntak ibak mme ɔkwɔrɔ ikɔ ikɔt mi; iŋ, kpukpru mbufo emi ebuŋde esio, emi esuande ke anwa, emi edide ikɔt mi, O ufɔk Israel. Ekpaŋutɔŋ, O mme isuo inyaŋ, enɔ mi, enyuŋ ekpaŋutɔŋ mbufo mme owo emi edude ke anyan usuŋ; Jehovah okot mi tɔŋɔ ke itie-eyen; tɔŋɔ ke idibi eka mi ke enye akasiak enyiŋ mi.

2 Ndien enye anam inua mi nte ofut emi ɔsɔpde; ke mfit ubɔk esie ke enye edip mi, onyuŋ anam mi utiga esemde; ke odip-idaŋ esie ke enye edip mi;

3 Ndien ɔdɔhɔ mi ete: Afo edi owo emi, O Israel, ke enye ke editoro mi.

4 Ndien ami ndɔhɔ nte, ami menam utom ke ikpikpu, ami mebiat odudu mi ke ukpɔk ukpɔk ye ke ikpikpu; ke akpanikɔ ubiere ikpe mi odu ye Jehovah, ndien utom mi odu ye Abasi mi.

5 Ndien idahaemi, Jehovah ɔdɔhɔ—emi okobotde mi tɔŋɔ ke itie-eyen man ami ndi owo esie, ndifiak nda Jacob nsɔk enye—edi iditaŋke Israel ibon, edi ami nyedi ediye ke mme enyin Jehovah, ndien Abasi mi eyedi odudu mi.

6 Ndien enye ɔdɔhɔ ete: Edi mfefere ŋkpɔ ete afo edi owo mi ndimenere mme ubon Jacob, nyuŋ mfiak nnim ke itie Israel emi eketimde enim. Ami nko nyenɔ fi nte unwana nnɔ mme Gentile, man afo edi erinyaŋa mi ke utit ererimbot.

7 Ntem ke Jehovah ɔdɔhɔ, Andifak Israel, Ata Edisana esie, enye emi owo ekesinde, enye emi mme idut ekesuade, eyen ufɔk mme andikara: Ndidem eyekut enyuŋ edada ke enyɔŋ, mbɔŋ nko eyekpono, ke ntak Jehovah emi anamde ŋkpɔ ke akpanikɔ.

8 Ntem ke Jehovah ɔdɔhɔ ete: Ke ini ɔfɔnde ke ami nkokop fi, O mme isuo inyaŋ, ndien ke usen erinyaŋa ke ami nkanwam fi; ndien ami nyetim fi nnim, nyuŋ nnɔ fi owo mi nte ediomi mbio-obio, man eneŋere ererimbot enim, man eda se ibiarade enyene;

9 Man afo ɔdɔhɔ mbon ŋkpɔkɔbi ete: Eka; ebine mmɔ emi etiede ke ekim: Ewut idem mbufo. Mmɔ eyedia ŋkpɔ ke mme usuŋ, ndien mme ŋkpɔ udia mmɔ eyedu ke kpukpru ŋkoŋ-ŋkoŋ ebiet.

10 Biɔŋ ididɔŋke mmɔ itɔŋ idinyuŋ isatke mmɔ, nko eyo mme utin idimiaha mmɔ; koro enye emi enyenede mbɔm ɔnɔ mmɔ ayada mmɔ usuŋ, kpa ke ɔtɔ emi mmɔŋ otode ɔwɔrɔ ke enye edida mmɔ ika.

11 Ndien ami ŋyanam kpukpru mme obot mi edi usuŋ, ndien eyemenere mme ɔkpɔ usuŋ mi.

12 Ndien idahaoro, O ufɔk Israel, sese, mmɔ emi eyeto anyan idut edi; ndien sese, mmɔ eto edem edere ye edem usop utin; ndien mmɔ eto isɔŋ Sinim.

13 Ekwɔ, O mme heaven; enyuŋ edara, O ererimbot; koro eye esiak ikpat mmɔ oro edude ke edem usiaha utin; enyuŋ ebumere ke ikwɔ, O mme obot; koro owo idimiaha mmɔ aba; koro Jehovah ɔdɔŋ ikɔt esie esit, ndien eyenyene mbɔm abaŋa mbon ukut esie.

14 Edi, sese, Zion ɔdɔhɔ ete: Jehovah ɔkpɔŋ mi, ndien Jehovah mi efre mi—edi enye oyowut ete ke enye ifreke.

15 Nte ŋwan ekeme ndifre eyen-nsek esie, tutu enye etre ndinyene mbɔm mbaŋa eyen idibi esie? Iŋ, mmɔ ekeme ndifre, edi ami ndifreke fi, O ufɔk Israel.

16 Sese, ami mmakap fi ke mme eka ubɔk mi; mme ibibene fo edu mi ke iso kpukpru ini.

17 Nditɔ fo eyesɔp enwana ye mme andisobo fi; ndien mbon emi ebiatde fi eyewɔrɔ ekpɔŋ fi.

18 Menere enyin fo kanare kuk nyuŋ sese; kpukpru emi ebok idem mmɔ kiet, ndien mmɔ eyedi etiene fi. Ndien ma uwem mi, Jehovah ɔdɔhɔ, afo ke akpanikɔ eyesine mmɔ kpukpru, nte ŋkpɔ mbana, onyuŋ ɔbɔbɔ mmɔ ke idem nte ŋwan ndɔ.

19 Koro mme ebiet fo emi ewuride enyuŋ esomode, ye isɔŋ nsobo fo, eyefaha ke emi ekan mme andiduŋ; ndien mmɔ emi ekemende mbufo eyedu ata nsan nsan.

20 Nditɔ emi afo edinyenede, ke ini afo ama akanana akpa, eyefiak edɔhɔ ke mme utɔŋ fo ete: ebiet oro afaha akaha ɔnɔ mi; nnɔ mi itie man ami nduŋ.

21 Ke ini oro ke afo edidɔhɔ ke esit fo ete: Anie okobon mmɔ ɔnɔ mi, ke okutde ete ami mma nnana nditɔ mi, ndien ami ndi ada, owo ŋkpɔkɔbi, ndien nka iso ye edem? Ndien anie ɔkɔbɔk emi? Sese, ekeyak mi ikpɔŋ; emi, mmɔŋ ke mmɔ ekedu?

22 Ntem ke Jehovah Abasi ɔdɔhɔ ete: Sese, ami nyemenere ubɔk mi nnɔ mme Gentile, nyuŋ nnim udomo mi nnɔ mme owo; ndien mmɔ eyeda nditɔ iren mbufo edi ke ubɔk mmɔ, ndien eyemenere nditɔ iban mbufo ke afara mmɔ.

23 Ndien ndidem eyedi mme ete edibɔkde mbufo, ndien mbɔŋ iban mmɔ edi mme eka edibɔkde mbufo; mmɔ eyesuk ibuot enɔ mbufo ye iso mmɔ ke isɔŋ, enyuŋ edei ntɔŋ ikpat mbufo; ndien mbufo eyediɔŋɔ ete ke ami ndi Jehovah; koro but idinamke mmɔ emi ebetde mi.

24 Koro unam emi unam efen omumde man ata ɔyɔbɔhɔ ke ubɔk andikpon, mme eyenyaŋa owo emi mbet okomumde?

25 Edi ntem ke Jehovah ɔdɔhɔ, tutu osim mme owo emi andikpon okomumde eyetaŋ mmɔ edaha, ndien mmɔ emi andidiɔk okomumde eyebɔhɔ; koro ami nye neni ye enye emi enenide ye afo, ndien ami nyenyaŋa nditɔ fo.

26 Ndien ami nyebɔk mmɔ emi efikde fi ye obuk idem mmɔ; iyip mmɔ eyenam mmɔ nte edinem mmin; ndien kpukpru obukidem eyefiɔk ete ke ami, Jehovah, ndi Andinyaŋa ye Andifak, Ɔkpɔsɔŋ Abasi Jacob.