1 ’E i teienei, i muri a’era, ’ua tai’o atu ra vau, ’o Nephi, i taua mau mea ra i ’ō’otihia i ni’a iho i te mau ’api veo ra, ’ua haere mai ra tō’u nā tua’ana iā’u, ’e ’ua nā ’ō mai ra iā’u : E aha te aura’a o teie mau mea tā ’oe i tai’o iho nei ? Inaha, e ’itea ānei te reira nā roto i te mau mea pae vārua, ’o tē tupu mai te au i tā te vārua ’eiaha i tā te tino nei ?

2 ’E ’ua parau atu ra vau, ’o Nephi, ’ia rāua : Inaha, ’ua fa’a’itehia mai te reira i te peropheta nā roto i te reo o te Vārua ra ; ’e nā roto ho’i i te Vārua e fa’a’itehia mai ai i te mau peropheta te mau mea ato’a ’o tē tae mai i ni’a i te mau tamari’i a te ta’ata nei mai te au i te ha’apa’ora’a o te tino nei.

3 Nō reira, te mau mea tā’u i tai’o iho nei, ’o te mau mea ïa nō te pae tino nei ’e nō te pae vārua ato’a ho’i ; ’ua mana’ohia ē, tē vai ra te tau e ha’apurara-noa-hia ai te ’utuāfare o ’Īserā’ela nā roto i te ao ato’a nei, ’e i rotopū ho’i i te mau nūna’a ato’a.

4 ’E inaha, ’ua mo’e roa te mau ta’ata e rave rahi i tō Ierusalema ra i teienei. ’Oia ïa, i arata’i-’ē-hia te tahi pae rahi o te mau ’ōpū ato’a ; ’e ’ua ha’apurarahia rātou i terā vāhi ’e i terā vāhi i ni’a i te mau motu o te moana ; ’e ’aore tātou i ’ite i te vāhi i pārahihia e rātou ra, ’āre’a rā ’ua ’ite tātou ē, ’ua arata’i-’ē-hia atu rātou.

5 ’E i muri a’e i tō rātou ra arata’i-’ē-ra’a-hia, ’ua tohuhia teie mau mea nō ni’a ia rātou, ’e nō ni’a ato’a i te mau ta’ata ato’a ’o tē ha’apurarahia ’e ’o tē ’āno’i-haere-hia i muri iho nō Tei Mo’a i ’Īserā’ela nei ; ’e e fa’a’eta’eta ho’i rātou i tō rātou ’ā’au iāna ; nō reira, e ha’apurarahia rātou i rotopū i te mau nūna’a ato’a ’e e ’ino’inohia ho’i rātou e te mau ta’ata ato’a.

6 ’Āre’a rā, ’ia oti rātou i te tauturuhia e te mau ’Ētene, ’e ’ia fa’atoro mai te Fatu i tōna rima i ni’a i te mau ’Ētene ra, ’e ’ia fa’ariro ’oia ia rātou ’ei reva, ’e ’ia hōpoihia tā rātou mau tamari’i i roto i tō rātou ra mau rima, ’e ’ia hōpoihia ho’i tā rātou mau tamāhine i ni’a i tō rātou ra mau tapono, inaha, nō te pae tino teie mau mea i parauhia iho nei ; ’o te reira ïa te mau fafaura’a a te Fatu i tō tātou ra mau metua ; ’e tē fa’a’ite nei te reira nō te mau mea tē tupu ia tātou i te mau mahana e haere mai nei, ’e i tō tātou mau taea’e ho’i nō te ’utuāfare o ’Īserā’ela.

7 ’E ’o teie te aura’a, e tae mai te tau e ha’apurarahia ai ’e e ’āno’i-haere-hia te ’utuāfare pā’āto’a o ’Īserā’ela ; ’ei reira e fa’atupu ai te Fatu te Atua i te tahi nūna’a mana rahi i rotopū i te mau ’Ētene ra ; ’oia ïa, i ni’a i teie nei fenua ; ’e nā rātou ho’i e ha’apurara i tō tātou ra hua’ai.

8 ’E ’ia ha’apurarahia tō tātou ra hua’ai, e fa’atupu te Fatu te Atua i te hō’ē ’ohipa māere rahi i rotopū i te mau ’Ētene ra, ’o tē riro ïa ’ei mea faufa’a rahi roa i tō tātou ra hua’ai ; nō reira, ’ua fa’aauhia te reira i ni’a i tō rātou fa’a’amura’ahia ’e te mau ’Ētene ra ’e i te hōpoira’ahia i roto i tō rātou ra mau rima ’e i ni’a i tō rātou ra mau tapono.

9 E riro ato’a te reira ’ei mea faufa’a rahi i te mau ’Ētene ; e ’ere rā i te mau ’Ētene ana’e ra, i te ’utuāfare pā’āto’a rā o ’Īserā’ela, i te fa’a’itera’a atu i te mau fafaura’a a te Metua o te ra’i ia Aberahama, i te nā-’ō-ra’a mai ē : nā roto i tō ’oe hua’ai e ha’amaita’ihia ai te mau ’ōpū ato’a o te ao nei.

10 ’E ’ua hina’aro vau, e tō’u nā tua’ana, ’ia ’ite ’ōrua ē, e ’ore te mau ’ōpū ato’a o te ao nei e ha’amaita’ihia, maori rā ’ia fa’a’ite mai ’oia i tōna rima i mua i te aro o te mau nūna’a ato’a ra.

11 Nō reira, e ha’amata te Fatu te Atua i te fa’a’ite mai i tōna rima i mua i te aro o te mau nūna’a ato’a, nō te hōro’a mai i tāna mau fafaura’a ’e tāna ’evanelia ia rātou nō te ’utuāfare o ’Īserā’ela ra.

12 Nō reira, e arata’i fa’ahou mai ’oia ia rātou i rāpae i te fa’atītīra’a, ’e e ha’aputuputu-’āmui-hia rātou i tō rātou ra fenua ’āi’a ; ’e e arata’ihia rātou i rāpae i te vāhi mo’emo’e ’e i rāpae ho’i i te pōiri ; ’e e ’ite rātou ē, ’o te Fatu tō rātou Fa’aora ’e tō rātou Tāra’ehara, Tei Pūai i ’Īserā’ela nei.

13 E iri mai ho’i te toto o taua ’ēkālesia rahi ’e te vi’ivi’i ra, ’oia te vahine tai’ata o te ao ato’a nei, i ni’a i tō rātou ihora upo’o ; ’e e ’aro ho’i rātou i rotopū ia rātou iho ; ’e e ma’iri ho’i te ’o’e tei roto i tō rātou iho rima i ni’a i tō rātou ihora upo’o, ’e e ta’ero ho’i rātou i tō rātou ihora toto.

14 ’E te mau nūna’a ato’a e ’aro mai ia ’oe, e te ’utuāfare nō ’Īserā’ela, e riro ïa rātou i te ’aro atu i te tahi ’e i te tahi, ’e e topa ho’i rātou i roto i te ’āpo’o tā rātou i ’ō nō te mārei i te mau ta’ata o te Fatu. ’E te mau ta’ata ato’a e tama’i mai ia Ziona ra e ha’amouhia ïa rātou, e taua vahine tai’ata rahi ra, ’o tei ha’api’o i te mau ’ē’a ti’a o te Fatu ra, ’oia ïa, taua ’ēkālesia rahi ’e te vi’ivi’i ra, e ma’iri ïa ’oia i raro i te repo, ’e e pararī rahi ’oia.

15 Inaha ho’i, tē nā ’ō mai ra te peropheta ē, tē fātata roa mai nei te tau e fa’a’orehia ai tō Sātane mana i ni’a i te ’ā’au o te mau tamari’i a te ta’ata nei ; tē fātata mai nei ho’i te tau e riro ai te feiā te’ote’o ato’a ’e te feiā i rave i te parauti’a ’ore, mai te ’aihere ; ’e e tae mai ho’i te mahana e ’ama ai rātou.

16 Tē fātata mai nei ho’i te tau e nīni’ihia mai ai te ’īra’a o te riri ’ū’ana o te Atua i ni’a i te mau tamari’i ato’a a te ta’ata nei ; nō te mea e ’ore ’oia e vaiiho noa atu i te feiā parauti’a ’ore ’ia ha’amou i te feiā parauti’a.

17 Nō reira, e fa’aora ’oia i te feiā parauti’a nā roto i tōna ra mana, noa atu e nīni’ihia mai te ’īra’a nō tōna ra riri ’ū’ana, ’e e fa’aorahia te feiā parauti’a, ’e e ha’amouhia tō rātou ra mau ’enemi i te auahi. Nō reira, ’eiaha te feiā parauti’a e mata’u ; tē nā ’ō mai ra te peropheta, e fa’aorahia rātou noa atu e nā roto mai i te auahi.

18 Inaha, e tō’u nā tua’ana, tē parau atu nei au ia ’ōrua, ’ia fātata mai teie mau mea i te tupu e ti’a ai ; ’oia ïa, ’ia tae mai te toto, ’e te auahi, ’e te māhu au auahi e ti’a ai ; ’e e mea ti’a roa ho’i ’ia tae mai i ni’a iho i te fenua nei ; ’e e tae mai ho’i te reira i ni’a iho i te ta’ata i te tino nei, mai te mea e fa’a’eta’eta rātou i tō rātou ’ā’au i Tei Mo’a i ’Īserā’ela nei.

19 Inaha ho’i, e ’ore te feiā parauti’a e mou ; nō te mea e tae mai te tau e tāpū-’ē-hia atu ai te feiā ato’a e tama’i mai ia Ziona ra.

20 E fa’aineine ho’i te Fatu i te tahi ’ē’a nō tōna ra mau ta’ata, nō te fa’ati’a i te mau parau tā Mose i parau, i te nā-’ō-ra’a ē : E fa’atupu te Fatu ra tō ’outou Atua i te hō’ē peropheta nō ’outou, mai iā’u nei te huru ; e fa’aro’o ho’i ’outou iāna i te mau mea ato’a tāna e parau mai ia ’outou ra. ’E a muri a’era ē, te mau ta’ata ato’a ’o tē ’ore e fa’aro’o i taua peropheta ra, e tāpū-’ē-hia ïa rātou mai rotopū atu i te mau ta’ata.

21 ’E teienei, tē fa’a’ite atu nei au, ’o Nephi, ’ia ’ōrua ē, ’o taua peropheta i parauhia e Mose ra, ’o Tei Mo’a ïa i ’Īserā’ela nei ; nō reira e ha’avā ’oia ma te parauti’a.

22 ’E ’eiaha te feiā parauti’a e mata’u, nō te mea e ’ore rātou e ha’amouhia. ’O te bāsileia rā o te diabolo ’o tē fa’ati’ahia i rotopū i te mau tamari’i a te ta’ata nei, ’e ’ua fa’ati’ahia taua bāsileia ra i rotopū i te mau ta’ata i te tino nei—

23 Tē fātata roa mai nei ho’i te tau, ’o te mau ’ēkālesia ato’a i fa’ati’ahia ’ia roa’a te moni, ’e tei fa’ati’ahia ’ia roa’a te mana i ni’a iho i te ta’ata nei, ’e tei fa’ati’ahia ’ia riro ’ei mea auhia e te mata o tō te ao nei, ’e tei ’imi i te mau hina’aro vi’ivi’i o te tino nei ’e te mau mea o teie nei ao, ’e ’ia rave ho’i i te mau huru ’ohipa ’ī’ino ato’a ; ’oia ïa, ’o rātou ato’a tei roto i te bāsileia o te diabolo ra, e mea ti’a ia rātou ’ia mata’u, ’e ’ia rurutaina, ’e ’ia ’āueue ; ’o rātou ho’i tē ti’a ’ia fa’aha’eha’ahia i raro i te repo ; ’e ’o rātou ho’i tē ti’a ’ia ’ama mai te ’aihere ra ; ’e ’ua au ho’i te reira i te mau parau a te peropheta ra.

24 Tē fātata roa mai nei te tau e arata’ihia ai te feiā parauti’a mai te mau fanau’a pua’atoro fa’a’amu ra, ’e i reira Tei Mo’a i ’Īserā’ela e fa’atere ari’i ai ma te pūai, ’e te mana, ’e te hanahana rahi.

25 E ha’aputuputu mai ’oia i tāna ra mau tamari’i mai nā tufa’a e maha o te ao nei ; ’e nāna ho’i i tai’o i tāna ra mau māmoe, ’e ’ua ’ite ho’i rātou iāna ; ’e e riro ho’i ’ei nana hō’ē ’e ’ei tīa’i hō’ē ; ’e nāna ho’i tāna mau māmoe e fa’a’amu ; ’e i roto ho’i iāna e roa’a ia rātou te mā’a.

26 ’E nō te parauti’a o tōna ra mau ta’ata, ’ua ’ore tō Sātane mana ; ’e nō reira, ’aita ’oia e ti’a ’ia tu’uhia nō te ārea e rave rahi matahiti te maoro ; ’aita ho’i tōna e mana i ni’a i te ’ā’au o te mau ta’ata, nō te mea tē pārahi ra rātou ma te parauti’a, ’e tē ari’i nei ho’i Tei Mo’a i ’Īserā’ela nei.

27 ’E i teienei, inaha, tē parau atu nei au, ’o Nephi, ’ia ’ōrua ē, e tupu mai iho ā teie mau mea mai te au i tō te tino nei.

28 Inaha rā, e pārahi hau tō te mau nūna’a ato’a, ’e tō te mau ’ōpū ato’a, ’e tō te mau reo ato’a, ’e te mau ta’ata ato’a i roto i Tei Mo’a i ’Īserā’ela nei, mai te mea e tātarahapa rātou.

29 ’E i teienei, tē fa’aoti nei au, ’o Nephi ; nō te mea ’aita vau i hina’aro ’ia parau ā nō ni’a i teie nei mau mea.

30 Nō reira, e tō’u nā tua’ana, ’ua hina’aro vau ’ia feruri ’ōrua ē, e parau mau te mau mea i pāpa’ihia i ni’a iho i te mau ’api veo ra ; ’e tē fa’a’ite pāpū mai nei te reira ē, e mea ti’a i te ta’ata ’ia ha’apa’o i te mau fa’auera’a a te Atua.

31 Nō reira, ’eiaha ’ōrua e mana’o ē, ’o vau e tō’u metua tāne ana’e tei fa’a’ite pāpū mai, ’e tei ha’api’i mai ho’i i te reira. Nō reira, mai te mea e ha’apa’o maita’i ’ōrua i te mau fa’auera’a ma te fa’aitoito noa ē tae noa atu i te hope’a ra, e fa’aorahia ïa ’ōrua i te mahana hope’a ra. ’E ’oia mau roa ïa. ’Āmene.