1 Ndien edikem ete ke ini ami, Nephi, mma ŋkokot mme ŋkpɔ emi emi ekemiŋde ke mme usan brass, nditɔ eka mi iren edi etiene mi enyuŋ edɔhɔ mi ete: Nso ke mme ŋkpɔ emi emi afo okotde ɔwɔrɔ? Sese, ndi ana nte efiɔk mmɔ nte mme ŋkpɔ edide eke spirit, emi edidide nte spirit ndien idige ke obukidem?

2 Ndien ami, Nephi, ndɔhɔ mmɔ nte: Sese ekeyarede mmɔ enɔ prophet ke uyo spirit; koro oto ke spirit ke enam mme prophet efiɔk kpukpru ŋkpɔ, emi edidide inɔ nditɔ owo ke obukidem.

3 Ke ntre, mme ŋkpɔ emi ami ŋkekotde edi mme ŋkpɔ emi abaŋade emi edibede ifep ye eke spirit mbiba; koro etie nte eyesuan ufɔk Israel, ke mibihike ikaha mme ke ini iso, ke kpukpru iso ererimbot, ndien nko ke kpukpru mme idut.

4 Ndien sese, ediwak edu emi esopde kaŋa ekpɔŋ ifiɔk mbon emi edude ke Jerusalem. Iŋ, eda ediwak ubak kpukpru mme idut ewɔrɔ; ndien esuan mmɔ enɔ iso ye edem ke mme isuo inyaŋ; ndien ebiet emi mmɔ edude nnyin ndomokiet ifiɔkke, ibɔhɔke ete ke nnyin imifiɔk ete ke eda mmɔ ewɔrɔ.

5 Ndien sia edade mmɔ ewɔrɔ, mme ŋkpɔ emi ke eketiŋ nte prophet ebaŋa mmɔ, ndien nko ebaŋa kpukpru mbon emi edisuande inyuŋ itimere ke ini emi ama ebe, ke ntak Edisana Owo Israel; koro ye enye ke mmɔ edisɔŋ esit mmɔ; ke ntre, eyesuan mmɔ ke kpukpru mme idut ndien kpukpru mme owo eye esua mmɔ.

6 Edi, ke ini mme Gentile ema ekesɔbɔ mmɔ, ndien Jehovah emenere ubɔk esie ɔnɔ mme Gentile onyuŋ enim mmɔ nte udomo, ndien emen nditɔ mmɔ ke ubɔk mmɔ, enyuŋ emen nditɔ iban mmɔ ke afara mmɔ, sese mme ŋkpɔ emi emi etiŋde edi emi edibede ifep; koro emi edi mme ediomi Jehovah ye mme ete nnyin; ndien enye abaŋa nnyin ke mme usen edidide, ndien nko kpukpru nditɔ nnyin emi edide eke ufɔk Israel.

7 Ndien enye ɔwɔrɔ ete ke ini ke edi kini ema esuan enyuŋ etimere kpukpru ufɔk Israel, ete ke Jehovah Abasi eye asiak ɔkpɔsɔŋ idut ke mme Gentile, iŋ, tutu ke iso isɔŋ emi; ndien oto ke mmɔ ke edisuan ubon nnyin.

8 Ndien kini esuande ubon nnyin Jehovah Abasi ayaanam utibe ŋkpɔ ke ufɔt mme Gentile, emi edinyenede akamba ufɔn inɔ ubon nnyin; ke ntre, edomo enye ye mme Gentile ndibɔk ye ndimen mmɔ ke ubɔk mmɔ ye ke afara mmɔ.

9 Ndien enye eyenyene ufɔn ɔnɔ mme Gentile, ndien idige inɔ mme Gentile ikpɔŋ edi edi ɔnɔ kpukpru ufɔk Israel, man enam efiɔk mme ediomi ete ke heaven ɔnɔde Abraham, ete: Edito ke ubon fo ke edidiɔŋ kpukpru iman ererimbot.

10 Ndien ami moyom, nditɔ eka mi iren, nte mbufo efiɔk ete ke owo ikemeke ndidiɔŋ kpukpru iman ererimbot ibɔhɔke enye ɔfuhɔre ubɔk esie ke enyin mme idut.

11 Ke ntre, Jehovah Abasi ɔyɔfuhɔre ubɔk esie ke enyin kpukpru mme idut, ke ndimen mme ediomi esie ye gospel esie nnɔ mbon emi edide eke ufɔk Israel.

12 Ke ntre, enye ayafiak osio mmɔ ke ŋkpɔkɔbi, ndien mmɔ eyeboho kiet ke mme isɔŋ inyene mmɔ; ndien eyeda mmɔ ewɔrɔ ke ebiet eketiede nnan-nnan enyuŋ ewɔrɔ ke ekim; ndien mmɔ eyefiɔk ete Jehovah edi Andinyaŋa mmɔ ye Andifak mmɔ, Ɔkpɔsɔŋ Abasi Israel.

13 Ndien iyip akamba ye mbubiam ufɔk Abasi oro, emi edide akpara eke ofuri ererimbot, eyedidoro ke ibuot mmɔ; koro mmɔ eyenwana ekɔŋ ye idem mmɔ, ndien ofut mmɔ ɔyɔduɔ ke ibuot mmɔ, ndien iyip mmɔ ayanam mmɔ.

14 Ndien kpukpru idut emi edinwanade ekɔŋ ye mbufo, O ufɔk Israel, eyewɔŋɔre enwana ye kiet eken, ndien mmɔ eyeduɔ eduk ke obube emi mmɔ eke etibide ndimum ikɔt Jehovah. Ndien eyesobo kpukpru owo emi enwanade ye Zion, ndien akamba akpara oro, emi eke akakwaŋade mme nnen nnen usuŋ Jehovah, iŋ, akamba ye mbubiam ufɔk Abasi oro, ɔyɔduɔ ke ntɔŋ ndien akamba edidi iduɔ esie.

15 Koro sese, prophet ɔdɔhɔ, ini ke edi usɔp usɔp emi Satan midinyeneke odudu aba ke mme esit nditɔ owo; koro usen ke ɔsɔp edi emi kpukpru mme ataŋidem ye mmɔ emi enamde ibak editiede nte etak nnyanyaŋa; ndien usen ke edi emi anade nte efɔp mmɔ.

16 Koro ini kɔsɔp edi emi ediwaŋade ɔyɔhɔ iyaresit Abasi idori kpukpru nditɔ owo ke idem; koro enye idiyakke ete idiɔk owo osobo ndinen owo.

17 Ke ntre, enye eyetim edinen owo enim ke odudu esie, tutu edieke ɔwɔrɔde nte ke ɔyɔhɔ iyaresit esie ana nte edi, ndien etim edinen owo onim, tutu ke nsobo mme asua mmɔ ke ikaŋ. Ke ntre, ndinen owo inyeneke ndifehe ndik; koro ntem ke prophet ɔdɔhɔ, eyenyaŋa mmɔ, tutu edieke ɔwɔrɔde nte ke ana edi ke ikaŋ.

18 Sese, nditɔ eka mi iren, ami ndɔhɔ mbufo, nte ke mme ŋkpɔ emi ke ɔsɔp edi; iŋ, kpa iyip, ye ikaŋ, ye uye nsuŋikaŋ ana nte edi; ndien ana nte edi ke iso ererimbot emi; ndien enye edi ɔnɔ mme owo ke obukidem edieke ɔwɔrɔde ete ke mmɔ eyesɔŋ esit mmɔ ye Edisana Abasi Israel.

19 Koro sese, edinen owo iditakke; koro ini ke akpanikɔ ana nte edi emi edisibede kpukpru mbon emi enwanade ye Zion isio.

20 Ndien Jehovah ke akpanikɔ eyenam usuŋ ɔnɔ ikɔt esie, man mme ikɔ Moses osu, emi enye ɔkɔɔdɔhɔde, ete: Prophet ke Jehovah Abasi edisio inɔ mbufo, ukem ukem nte ami; enye ke mbufo edikpaŋ utɔŋ inɔ ke kpukpru ŋkpɔ ekededi emi enye edidɔhɔde mbufo. Ndien eyedikem ete ke eyesibe kpukpru mmɔ emi midikpaŋke utɔŋ inɔ prophet oro isio.

21 Ndien idahaemi ami, Nephi, ndɔhɔ mbufo, nte ke prophet emi Moses eketiŋde abaŋa ekedi Edisana Owo Israel; ke ntre, enye eyebiere ikpe ke nnen nnen usuŋ.

22 Ndien ndinen owo inyeneke ndifehe ndik, koro mmɔ edide mbon oro emi owo miditimekere. Edi edi obio ubɔŋ satan, emi edisiakde ke ufɔt nditɔ owo, obio ubɔŋ emi esiakde ke ufɔt mmɔ emi edude ke obukidem—

23 Koro ini ke ɔsɔp edi emi kpukpru ufɔk Abasi emi ebɔpde man enyene udori, ye kpukpru emi ebɔpde man enyene odudu ekan obukidem, ye kpukpru emi ebɔpde man ewɔrɔ etop ke mme enyin ererimbot, ye mbon emi eyomde ndiɔi udɔŋ obukidem ye mme ŋkpɔ ererimbot, ndien enam utɔ kpukpru ukwaŋ-ŋkpɔ; iŋ, ke akpatre, kpukpru mbon emi esinede ke obio ubɔŋ satan edi mbon emi anade nte efehe ndik, enyuŋ enyek idem, enyuŋ enyeŋ; mmɔ edi mbon oro anade nte emen esuhɔhɔre ke ntɔŋ; mmɔ edi mbon oro anade ikaŋ ata nte etak nnyanyaŋa; ndien emi edi nte mme ikɔ prophet.

24 Ndien ini ke edi usɔp usɔp emi anade nte eda ndinen owo usuŋ nte nditɔ-enaŋ ŋkuhɔ, ndien Edisana Abasi Israel ana akara ke ukara, ye uko, ye odudu, ye akwa ubɔŋ.

25 Ndien enye ataŋ nditɔ esie obok oto ke ŋkaŋ isɔŋ mbinaŋ; ndien enye abat erɔŋ esie, ndien mmɔ efiɔk enye; ndien mmɔ eyekabare edi otu-erɔŋ kiet ye ekpeme-erɔŋ kiet; ndien ke enye ke mmɔ edikut udia.

26 Ndien ke ntak edinen ido ikɔt esie, Satan inyeneke odudu; ke ntre, owo ikemeke nditat enye ke ufaŋ ediwak isua; koro enye inyeneke odudu ke mme esit nditɔ owo, koro mmɔ edude ke edinen ido, ndien Edisana Owo Israel akara.

27 Ndien idahaemi sese, ami Nephi, ndɔhɔ mbufo nte ke kpukpru mme ŋkpɔ emi ana etibe ke obukidem.

28 Edi, sese, kpukpru mme idut, mme iman, mme usem, ye mme owo eyedu ke emen ye Edisana Abasi Israel edieke ɔwɔrɔde ete ke mmɔ eyekabare esit.

29 Ndien idahaemi ami, Nephi, ntre nditiŋ ikɔ; koro ami inaha nka iso ŋtiŋ ikɔ kabaŋa mme ŋkpɔ emi.

30 Ke ntre, nditɔ eka mi iren, ami nyom mbufo eti ete mme ŋkpɔ emi ewetde ke mme usan brass edi akpanikɔ; ndien mmɔ etie ntiense ete ke owo ana osuk ibuot ɔnɔ ibet Abasi.

31 Ke ntre, inaha nte mbufo ekere ete ke ami ye ete mi idi nkukure mbon emi etiede ntiense, ndien enyuŋ ekpepde mmɔ. Ke ntre, edieke mbufo edikopde item enɔ ibet, enyuŋ eyɔ tutu osim utit, eyenyaŋa mbufo ke akpatre usen. Ntem edi ntre. Amen.