1 Kay tan-awa, natabo ini nga ang Ginuo naghambal sa akon amay, huo, bisan sa isa ka damgo, kag nagsiling sa iya: Bulahan ikaw Lehi, tungod sang mga butang nga imo ginhimo; kag tungod kay ikaw nangin tampad kag nagpahayag sa sining katawhan sang mga butang nga akon ginsugo sa imo, tan-awa, nagatinguha sila sa pagpatay sa imo.

2 Kag natabo ini nga ang Ginuo nagsugo sa akon amay, bisan sa isa ka damgo, nga dapat niya dal-on ang iya panimalay kag magkadto sa kamingawan.

3 Kag natabo ini nga nagmatinumanon sia sa pulong sang Ginuo, gani ginhimo niya ang ginsugo sang Ginuo sa iya.

4 Kag natabo ini nga nagpanglakaton sia padulong sa kamingawan. Kag ginbayaan niya ang iya balay, kag ang duta nga iya palanublion, kag ang iya bulawan, kag ang iya pilak, kag ang iya malahalon nga mga butang, kag wala sia sing gindala luwas sa iya panimalay, kag mga pagkaon, kag mga tolda, kag nagpanglakaton padulong sa kamingawan.

5 Kag nagdulhog sia sa may dulonan nga malapit sa baybayon sang Pula nga Dagat; kag nagpanglakaton sia sa kamingawan sa mga dulonan nga mas malapit sa Pula nga Dagat; kag nagpanglakaton sia sa kamingawan upod ang iya panimalay nga ginatapuan sang akon iloy nga si Saria, kag sang akon mga magulang nga lalaki nga sanday Laman, Lemuel, kag Sam.

6 Kag natabo ini nga sang makapanglakaton na sia sing tatlo ka adlaw sa kamingawan, nagpatindog sia sang iya tolda sa isa ka patag malapit sa pangpang sing isa ka suba nga may tubig.

7 Kag natabo ini nga nagpatindog sia sing isa ka altar nga bato, kag naghimo sang halad sa Ginuo, kag naghatag sang pasalamat sa Ginuo nga aton Dios.

8 Kag natabo ini nga iya ginhingalanan ang suba nga Laman, kag ini nagailig padulong sa Pula nga Dagat; kag ang patag yara sa mga dulonan malapit sa baba sini.

9 Kag sang makita sang akon amay nga ang tubig sang suba nagailig padulong sa tuburan sang Pula nga Dagat, naghambal sia kay Laman nga nagasiling: O kuntani mangin pareho ka sa sining suba, dalayon nga nagailig padulong sa tuburan sang tanan nga pagkamatarong!

10 Kag naghambal man sia kay Lemuel: O kuntani mangin pareho ka sa sining patag, mabakod kag malig-on, kag di-malingkang sa pagtuman sang mga kasugoan sang Ginuo!

11 Karon ini iya ginpanghambal tungod sang kabatinggilan nanday Laman kag Lemuel; kay tan-awa nagkumod sila sa madamo nga butang batok sa ila amay, bangod isa sia ka tawo nga may mga panan-awon, kag gindala sila pagwa sa duta sang Jerusalem, sa pagbiya sang duta nga ila palanublion, kag ila bulawan, kag ila pilak, kag ila malahalon nga mga butang, agud magkalamatay sa kamingawan. Kag ini siling nila iya nahimo tungod sa binuang nga mga imahinasyon sang iya tagipusuon.

12 Kag gani sanday Laman kag Lemuel, bilang mga kamagulangan, nagkulomuron batok sa ila amay. Kag nagkulomuron sila bangod wala nila mahangpan ang mga pagpakigbagay sinang Dios nga nagtuga sa ila.

13 Wala man sila nagapati nga ang Jerusalem, inang dako nga siyudad, mahimo nga malaglag suno sa mga pulong sang mga propeta. Kag pareho sila sang mga Judio nga didto sa Jerusalem, nga nagtinguha sa pagpatay sa akon amay.

14 Kag natabo ini nga ang akon amay naghambal sa ila sa patag sang Lemuel, upod ang gahum, nga napuno sang Espiritu, tubtob nga nangurog ang ila mga lawas sa iya atubang. Kag gintapna niya sila, sa bagay nga wala na sila naghambal batok sa iya; gani, nagtuman sila suno sa iya sugo sa ila.

15 Kag ang akon amay nagpuyo sa isa ka tolda.

16 Kag natabo ini nga ako, si Nefi, nga tuman pa kabataon, apang nga dako sing panglawason, kag may dako man nga mga handum nga makahangop sang mga misteryo sang Dios, gani, nagpakitluoy ako sa Ginuo; kag tan-awa ginbisita niya ako, kag ginpahumok ang akon tagipusuon nga nagpati ako sa tanan nga pulong nga ginpanghambal sang akon amay; gani, wala ako nagrebelde batok sa iya pareho sang akon mga utod nga lalaki.

17 Kag nakighambal ako kay Sam, kag ginpanugid sa iya ang mga butang nga ginpakita sa akon sang Ginuo paagi sa iya Balaan nga Espiritu. Kag natabo ini nga nagpati sia sa akon mga pulong.

18 Apang, tan-awa, sanday Laman kag Lemuel indi mamati sa akon mga pulong; kag tungod nga nasuboan bangod sang katig-a sang ila mga tagipusuon nagpakitluoy ako sa Ginuo para sa ila.

19 Kag natabo ini nga ang Ginuo naghambal sa akon nga nagasiling: Bulahan ka, Nefi, tungod sang imo pagtuo, kay matutum ka nga nagpangita sa akon, nga may pagpaubos sang tagipusuon.

20 Kag kon magtuman kamo sang akon mga kasugoan, magauswag kamo, kag tuytuyan sa isa ka duta sang panaad; huo, bisan isa ka duta nga akon ginhanda para sa inyo; huo, isa ka duta nga pinili labaw sa tanan nga iban pa nga kadutaan.

21 Kag kon ang imo mga kauturan magrebelde batok sa imo, pagasikwayon sila sa presensya sang Ginuo.

22 Kag kon magtuman ka sang akon mga kasugoan, pagahimuon ka nga isa ka tagdumala kag manunudlo sang imo mga kauturan.

23 Kay tan-awa, sa sina nga adlaw nga magrebelde sila batok sa akon, pagasumpaon ko sila sing isa ka masakit nga sumpa, kag wala sila sing gahum sa imo kaliwatan luwas lang kon magrebelde man sila batok sa akon.

24 Kag kon magrebelde sila batok sa akon, mangin silot sila sa imo kaliwatan, agud pukawon sila sa mga dalan sang pagpanumdum.