1 Ndien edikem ete ami, Nephi, nyɔŋ nditiŋ ikɔ ye Jehovah ndi, nka tent ete mi.

2 Ndien edikem ete enye ɔdɔhɔ mi, ete: Sese ami medaba ndap, emi Jehovah ɔkɔnɔde mi uyo ete yak afo ye nditɔ eka fo iren efiak eka Jerusalem.

3 Koro sese, Laban akama ŋwed mme Jew nko ye mbuk emana mme ete ete mi, ndien emiŋ mmɔ ke mme usan brass.

4 Ke ntre, Jehovah ama ɔnɔ mi uyo ete yak afo ye nditɔ eka fo iren eka ufɔk Laban, enyuŋ ebɔ mme ŋwed oro, enyuŋ emen mmɔ esuhɔre edi mi ke wilderness.

5 Ndien idaha emi, sese nditɔ eka mi iren ekuni, ete ke edi ɔkpɔsɔŋ ŋkpɔ ke ami nyom nto mmɔ; edi sese ami nyomke emi nto mmɔ, edi edi uyo Jehovah.

6 Ke ntak oro ka, eyen mi, ndien ke Jehovah eyediɔŋ fi, koro afo mukunike.

7 Ndien edikem ete ami, Nephi, ndɔhɔ ete mi nte: Ami nyeka nyuŋ nnam mme ŋkpɔ emi Jehovah ɔnɔde uyo, koro ami mediɔŋɔ nte ke Jehovah inɔhɔ nditɔ owo ibet, ibɔhɔke enye anam usuŋ ɔnɔ mmɔ ete yak mmɔ ekan enam ŋkpɔ oro emi enye ɔnɔde mmɔ uyo.

8 Ndien edikem ete ke ini ete mi okopde mme ikɔ emi enye ama enem esit eti eti, koro enye ama ɔfiɔk ete ke Jehovah ɔdiɔŋ mi.

9 Ndien ami, Nephi, ye nditɔ eka mi iren imen isaŋ nnyin ika wilderness, ye mme tent nnyin, ndidɔk nka isɔŋ Jerusalem.

10 Ndien edikem ete ke ini nnyin ima ikedɔk ika isɔŋ Jerusalem, ami ye nditɔ eka mi iren ima ikɔk ibuot ye kiet eken.

11 Ndien nnyin isin afia—ite me anie ke otu nnyin edika ufɔk Laban. Ndien edikem ete ke afia ɔduɔ ke idem Laman; ndien Laman oduk ufɔk Laban, onyuŋ etiŋ ikɔ ye enye nte enye etiede ke ufɔk esie.

12 Ndien enye obup Laban mme ŋwed oro emi ekemiŋde ke mme usan brass, emi ɔdɔŋɔde mbuk emana ete mi.

13 Ndien sese, edikem ete Laban ayat esit, onyuŋ ebin enye efep ke iso esie; ndien iyakke enye enyene mme ŋwed oro. Ke ntre, enye ɔdɔhɔ enye ete: Sese afo edi inɔ, ndien ami nyewot fi.

14 Edi Laman efehe ɔkpɔŋ iso esie, onyuŋ etiŋ mme ŋkpɔ emi Laban ekenamde, ɔnɔ nnyin. Ndien nnyin itɔŋɔ ndifuhɔ ata eti eti, ndien nditɔ eka mi iren eyom ndifiak nyɔŋ mbine ete mi ke wilderness.

15 Edi sese ami ndɔhɔ mmɔ nte: Adaŋa nte Jehovah odude uwem, nko adaŋa nte nnyin idude uwem, nnyin idisuhɔkere ika ibine ete nnyin ke wilderness tutu nnyin inam ŋkpɔ emi Jehovah ɔkɔnɔde nnyin uyo.

16 Ke ntre, yak ibuɔt idem ke ndinim ibet Jehovah; ke ntak oro yak nnyin isuhɔre ika isɔŋ inyene ete nnyin, koro enye ama ɔkpɔŋ gold ye silver, ye kpukpru nsio nsio inyene. Ndien kpukpru emi enye ekenam ke ntak ibet Jehovah.

17 Koro enye ama ɔfiɔk ete ke ana esobo Jerusalem, ke ntak ibak mme owo.

18 Koro sese, mmɔ esin mme ikɔ mme prophet. Ke ntre, edieke ete mi oduŋde ke isɔŋ oro ke ema ekenɔ enye uyo ete yak enye efehe ɔwɔrɔ ke isɔŋ oro, sese, enye nko eyetak. Ke ntre, ana enye efehe ɔwɔrɔ ke isɔŋ oro.

19 Ndien sese, edi ifiɔk Abasi ete yak nnyin ibɔ mme ŋwed emi, man nnyin itim inim usem mme ete nnyin inɔ nditɔ nnyin;

20 Ndien nko man nnyin itim inim inɔ mmɔ mme ikɔ emi eketiŋde ke inua kpukpru mme ndisana prophet, emi ekenɔde mmɔ oto ke Spirit ye odudu Abasi, tɔŋɔ ke eritɔŋɔ ererimbot, tutu esim idaha ini emi.

21 Ndien edikem ete ke utɔ usuŋ usem ntem ke ami nkenam nditɔ eka mi iren enyime, man mmɔ ebuɔtidem ke ndinim ibet Abasi.

22 Ndien edikem ete nnyin isuhɔre ika isɔŋ inyene nnyin, ndien nnyin itaŋ gold nnyin, ye silver nnyin, ye mme ŋkpɔ uto nnyin ibok ɔtɔkiet.

23 Ndien ke nnyin ima iketaŋ mme ŋkpɔ emi ibok ɔtɔkiet, nnyin ifiak idɔk ika ufɔk Laban.

24 Ndien edikem ete nnyin ika iduk ibine Laban, inyuŋ idɔhɔ enye ete yak enye ɔnɔ nnyin mme ŋwed emi ekemiŋde ke mme usan brass, emi nnyin idinɔde enye gold nnyin, ye silver nnyin, ye kpukpru mme ŋkpɔ uto nnyin.

25 Ndien edikem ete ke ini Laban okutde inyene nnyin, ndien ke ema ewak ata eti eti, enye ɔdɔrɔ itɔŋ abaŋa enye, tutu enye otop nnyin osio, onyuŋ ɔdɔŋ nditɔ ufɔk esie ete ewot nnyin, man enye ɔbɔ inyene nnyin.

26 Ndien edikem ete nnyin ifehe nditɔ ufɔk Laban, ndien nnyin ikanke inyaŋa edi ikpɔŋ inyene nnyin inim, ndien enye ɔduɔ oduk ke mme ubɔk Laban.

27 Ndien edikem ete nnyin ifehe ika ke wilderness, ndien nditɔ ufɔk Laban isimeke nnyin, ndien nnyin idip idem nnyin ke aba itiat.

28 Ndien edikem ete Laman ayat esit ye ami, nko ye ete mi; ntre nko Lemuel ayat esit, koro enye ama akpaŋ utɔŋ ɔnɔ mme ikɔ Laman. Ke ntre Laman ye Lemuel ema etiŋ ediwak idiɔk ikɔ ye nnyin, mkpri nditɔ eka mmɔ iren, ndien mmɔ emia nnyin ke esaŋ.

29 Ndien edikem nte mmɔ emiade nnyin ye esaŋ, sese, angel Jehovah edi onyuŋ ada ke iso mmɔ, ndien enye ɔdɔhɔ mmɔ, ete: Ntak emi emiade ekpri eyen eka mbufo eren ye esaŋ? Nte mbufo ifiɔkke ete Jehovah emek enye ndidi andikara mbufo, ndien emi edi ke ntak mme idiɔk ŋkpɔ mbufo? Sese mbufo eyefiak edɔk eka Jerusalem, ndien Jehovah eyeyak Laban esin mbufo ke ubɔk.

30 Ndien ke angel ama eketiŋ ikɔ ɔnɔ nnyin, enye ɔnyɔŋ.

31 Ndien ke angel ama ɔkɔnyɔŋ, Laman ye Lemuel etɔŋɔ ntak etɔŋɔ ndikuni, ete: Didie ke Jehovah ediyak Laban isin mimɔ ke ubɔk? Sese, enye edi ɔkpɔsɔŋ owo, ndien enye ekeme ndinɔ aba ye duop uyo, iŋ, enye ekeme ndiwot aba ye duop; ndien ntak emi midihe nnyin?