1 Kag natabo ini nga ako, si Nefi, nagbalik halin sa pagpakighambal sa Ginuo, sa tolda sang akon amay.

2 Kag natabo ini nga naghambal sia sa akon nga nagasiling: Tan-awa nagdamgo ako sing isa ka damgo, nga sa diin ang Ginuo nagsugo sa akon nga ikaw kag ang imo mga utod magbalik sa Jerusalem.

3 Kay yari karon, yara kay Laban ang kasulatan sang mga Judio kag amo man ang lista sang kaliwatan sang akon mga katigulangan, kag ang mga ini ginkurit sa mga lamina nga saway.

4 Gani, ang Ginuo nagsugo sa akon nga ikaw kag ang imo mga utod dapat magkadto sa balay ni Laban, kag pangitaon ang mga kasulatan, kag dal-on ang mga ini padulong diri sa kamingawan.

5 Kag karon, tan-awa ang mga utod mo nagakulomuron, nga nagasiling nga isa ka mabudlay nga butang ang akon ginapangayo sa ila; apang tan-awa wala ako magpangayo sini sa ila, kundi isa ini ka kasugoan sang Ginuo.

6 Gani maglakat ka, anak ko, kag pagabuligan ka sang Ginuo, bangod kay wala ka magkumod.

7 Kag natabo ini nga ako, si Nefi, nagsiling sa akon amay: Malakat ako kag himuon ang mga butang nga ginasugo sang Ginuo, kay nahibal-an ko nga ang Ginuo wala nagahatag sang mga kasugoan sa mga anak sang katawhan, luwas lang nga magahanda sia sang paagi para sa ila agud mahimo nila ang butang nga iya ginasugo sa ila.

8 Kag natabo ini nga sang mabatian sang akon amay ining mga pulong nalipay gid sia, kay iya nahibal-an nga ginpakamaayo ako sang Ginuo.

9 Kag ako, si Nefi, kag ang akon mga utod nagpanglakaton sa kamingawan, dala ang amon mga tolda, sa pagtaklad padulong sa duta sang Jerusalem.

10 Kag natabo ini nga sang makataklad na kami sa duta sang Jerusalem, ako kag ang akon mga utod nagsugilanonay.

11 Kag naggabutgabot kami—kon sin-o sa amon ang masulod sa balay ni Laban. Kag natabo ini nga ang kapalaran nagtupa kay Laman; kag si Laman nagsulod sa balay ni Laban, kag nakighambal sia sa iya samtang nagapungko sia sa sulod sang iya balay.

12 Kag ginpangayo niya kay Laban ang mga kasulatan nga nakurit sa mga lamina nga saway, nga nagaunod sang lista sang kaliwatan sang akon amay.

13 Kag tan-awa, natabo ini nga naakig si Laban, kag gintiklod sia pagwa halin sa iya atubang; kag indi sia magsugot nga makuha niya ang mga kasulatan. Gani, nagsiling sia sa iya: Tan-awa isa ikaw ka kawatan, kag patyon ko ikaw.

14 Apang si Laman nalagyo sa iya atubang, kag ginsugid ang mga butang nga ginhimo ni Laban sa amon. Kag nagsugod kami nga mangin tuman kamasinulub-on, kag ang akon mga utod naghana nga magbalik sa akon amay sa kamingawan.

15 Apang tan-awa nagsiling ako sa ila nga: Pareho nga buhi ang Ginuo, kag pareho nga nagakabuhi kita, indi kita manaog sa aton amay sa kamingawan tubtob nga mahimo naton ang butang nga ginasugo sa aton sang Ginuo.

16 Gani, magtutum kita sa pagtuman sang mga kasugoan sang Ginuo; gani magdulhog kita sa duta nga palanublion sang aton amay, kay tan-awa ginbilin niya ang bulawan kag pilak, kag tanan nga sari sang manggad. Kag ini tanan iya nahimo tungod sang mga kasugoan sang Ginuo.

17 Kay nahibal-an niya nga ang Jerusalem pat-od gid nga pagalaglagon, tungod sang kalainan sang katawhan.

18 Kay tan-awa, ginsikway nila ang mga pulong sang mga propeta. Gani, kon ang akon amay magpabilin sa kadutaan pagkatapos nga ginsugo sia nga magpalagyo diri, tan-awa, mapatay man sia. Gani, kinahanglan gid nga magpalagyo sia sa sining lugar.

19 Kag tan-awa, kinaalam ini sa Dios nga dapat naton makuha ining mga kasulatan, agud maamligan naton para sa aton mga anak ang lengguahe sang aton mga amay;

20 Kag amo man nga maamligan naton para sa ila ang mga pulong nga ginpahayag paagi sa baba sang tanan nga balaan nga propeta, nga ginhatag sa ila sang Espiritu kag gahum sang Dios, halin pa sang pagsugod sang kalibutan, bisan tubtob sa sining panahon.

21 Kag natabo ini nga sa amo sini nga sari sang paghambal nakumbinsi ko ang akon mga utod, agud mangin matutum sila sa pagtuman sang mga kasugoan sang Dios.

22 Kag natabo ini nga nagdulhog kami padulong sa duta nga amon palanublion, kag ginpanipon namon ang amon bulawan, kag ang amon pilak, kag ang amon malahalon nga mga butang.

23 Kag pagkatapos nga mapanipon namon ining mga butang, nagtaklad kami liwat padulong sa balay ni Laban.

24 Kag natabo ini nga nagkadto kami kay Laban, kag ginpangabay sia nga ihatag niya sa amon ang mga kasulatan nga ginkurit sa mga lamina nga saway, nga bilang baylo sang mga ini amon ihatag sa iya ang amon bulawan, kag ang amon pilak, kag ang tanan namon nga malahalon nga mga butang.

25 Kag natabo ini nga sang makita ni Laban ang amon mga pagkabutang, kag nga tuman ini kadamo, naibog sia sa sini, sa bagay nga ginpaniklod niya kami pagwa, kag ginmandoan ang iya mga suloguon nga pamatyon kami, agud maangkon niya ang amon mga pagkabutang.

26 Kag natabo ini nga nalagyo kami sa mga suloguon ni Laban, kag napilitan kami nga bayaan ang amon mga pagkabutang, kag nahulog ini sa mga kamot ni Laban.

27 Kag natabo ini nga nalagyo kami padulong sa kamingawan, kag ang mga suloguon ni Laban wala makalab-ot sa amon, kag nanago kami sa guab sang isa ka bato.

28 Kag natabo ini nga naakig si Laman sa akon, kag amo man sa akon amay; kag amo man si Lemuel, kay namati sia sa mga hambal ni Laman. Gani sanday Laman kag Lemuel naghambal sang madamo nga masakit nga mga tinaga sa amon, nga ila mga manghod, kag ginpanghanot nila kami sang baston.

29 Kag natabo ini nga samtang ginahanot nila kami sang baston, tan-awa, isa ka anghel sang Ginuo ang nag-abot kag nagtindog sa ila atubang, kag naghambal sia sa ila nga nagasiling: Ngaa ginahanot ninyo ang inyo manghod sang baston? Wala bala ninyo mahibal-i nga pinili sia sang Ginuo nga mangin inyo tagdumala, kag ini bangod sang inyo mga kalainan? Tan-awa magtaklad kamo liwat sa Jerusalem, kag igatugyan sang Ginuo si Laban sa inyo mga kamot.

30 Kag pagkatapos nga makahambal sa amon ang anghel, naghalin sia.

31 Kag pagkatapos nga maghalin ang anghel, sanday Laman kag Lemuel nagsugod liwat sa pagkulomuron, nga nagasiling: Paano matabo nga itugyan sang Ginuo si Laban sa aton mga kamot? Tan-awa, isa sia ka gamhanan nga tawo, kag makasarang sia sa pagmando sa singkwenta, huo, masarangan gani niya magpatay bisan singkwenta; kita pa ayhan ang indi?