1 Ao e koro bukina bwa, I taetae nakoia tariu, ni kangai: Ti na manga nako riki nako Ierutarem, ao ti riai ni kakaonimaki nakon ana tua te Uea; bwa noria e korakora riki nakon te aonaba ni kabane, ao bukin tera ngkai e na aki korakora riki nakon Raban ma ana nimangaun, eng, ke nakon ana bwi ni ngaa?

2 Mangaia ae ti na waerake; ti na kakorakoraira n ai aron Mote; bwa e koaua ae e taetae nakon ranin Taari are Uraura ao a bwenaaki nako ikai ao nako ikekei, ao a rinanona ara bakatibu, n otinako man te tautaekanaki, i aon te tano ae mwau, ao a rimwia ana tautia Bwarao ao a bwabwa i nanon ranin Taari are Uraura.

3 Ngaia ae noria, kam ataia bwa e koaua aio; ao kam ataia naba bwa e a tia n taetae nakoimi te anera; ao kam na kanga n raraoma? Ti na nako ni waerake; e kona te Uea ni kamaiura, n ai aroia ara bakatibu, ao n tiringa Raban, n ai aroia I-Aikubita.

4 Ao ngke I a tia n taekin taeka aikai, ao a bon teimatoa naba n un, ao a waaki nako ni ngurengure; ma a n irai ni karokoa ae ti roko i tinanikun oon Ierutarem.

5 Ao e a bong; ao I tuangiia bwa a na karabaia i tinanikun te oo. Ao ngke a tia ni karabaia, Ngai Nibwaai, I waerikiriki nako nanon te kaawa ao ni waaki nakon ana auti Raban.

6 Ao I kairaki iroun te Tamnei, n aki atai moa baika I riai ni karaoi.

7 E ngae n anne ao I waaki nako, ao ngke I a kaan ma ana auti Raban, ao I a noora te mwaane ae bwaka nako aontano imwaiu bwa e a koro ni manging n te wain.

8 Ao ngke I a roko irouna I a kinaa bwa bon Raban.

9 Ao I noora ana kabaang, ao I kaotinakoa mani nnena; ao e karaoaki bwain tauana man te koora, ao moan te nakoraoi aron karaoana, ao I a noria naba bwa e karaoaki wiina man te biti ae moan te kakaawaki.

10 Ao e koro bukina bwa I a kairoroaki iroun te Tamnei bwa N na riai n tiringa Raban; ma I taku i nanou: I tuai mai i mwain aio ni kabwaroa raraan te aomata. Ao I kerikaaki bwa tera ngke arona bwa N aki tiringnga.

11 Ao e a manga taku riki te Tamnei nakoiu: Noria e a tia te Uea n anga nako nanon baim. Eng, ao I ataia naba bwa e a tia ni kataia n anaa maiu; eng, ao e aki kan ongo naba n ana tua te Uea; ao e a tia naba n anai ara bwai.

12 Ao e koro bukina bwa e a manga taku te Tamnei nakoiu: Tiringnga bwa e a tia te Uea n anga nako nanon baim;

13 Noria e tiringia aika buakaka te Uea bwa e aonga ni kakoroi bukin ana waaki aika a raoiroi. E tamaroa riki ngkana e mate temanna nakon ae a na kerikaaki ao a na mate n aia aki onimaki te botannaomata.

14 Ao ngkai, Ngai Nibwaai, ngke I a tia n ongo taeka aikai, ao I a uring ana taeka te Uea ake e taekin nakoiu i nanon te rereua, ake a kangai: Ngkana a kakaonimaki kanoam ni kaawakin au tua, a na bon rikirake aroia n te aba ni berita.

15 Eng, ao I taku naba bwa a bon aki kona ni kaawakin ana tua te Uea n aron are ana tua Mote, ma ti ngkana iai te tua irouia.

16 Ao I ataia naba bwa e koreaki te tua iaon taian bwaatua aika buraati.

17 Ao I ataia riki bwa e a tia te Uea n anga Raban nako nanon baiu ibukin te bwai aio—bwa I aonga ni karekei taian rekooti n aron ana tua.

18 Mangaia are I ongeaba ni bwanaan te Tamnei, ao I a tabeka atuun Raban n iran atuna, ao I a kabongana ana kabaang ni kabakua roroana iai.

19 Ao ngke I a tia ni kabakua roroana n oin ana kabaang, I anai ana kunnikai Raban ao I karin iaou; eng, kunnikaina ni kabane; ao I kabaea ana kabaang irarikiu.

20 Ao ngke I a tia ni karaoa aio, ao I a nako nakon ana tabo ni kaawakin mwane Raban. Iaon kawaiu nakon ana tabo ni kaawakin mwane Raban, ao akea bwa I a noora ana toro Raban are taui kiingin te tabo ni mwane. Ao I kabongana bwanaan Raban n tuangnga bwa e na irai nako nanon te tabo ni mwane.

21 Ao e taku bwa ngai ana toka, ae Raban, bwa e noori ana kunnikai ao ana kabaang naba are e bae irarikiu.

22 Ao e kaakarabakau nakoiu ibukiia unimwaanen Iutaia, bwa e ataia ae ngaia raon ana toka, ae Raban, n te tairiki anne.

23 Ao I kaakarabakau nakoina n aiaron ae aongkoa Raban ngai.

24 Ao I tuangnga naba bwa I riai ni uoti koroboki, ake iaon bwaatua aika buraati, nakoia tariu aika ikawai, ake a mena i tinanikun te o.

25 Ao I tuangnga naba bwa e na irai.

26 Ao ngaia, e taku n ana iango bwa I taekinia taari i nanon te ekaretia, ao n taku naba bwa bon ngai Raban are I a tia n tiringnga, mangaia are e a irai.

27 Ao e mwaiti ana tai ni kaakarabakau riki nakoiu ni kaineti ma taekaia unimwaanen Iutaia, iaoni kawaira nakoia tariu, ake i tinanikun te o.

28 Ao e koro bukina bwa ngke e noorai Reimwan ao e a taonaki n te maaku ae korakora, ai uana naba ma Remuera ao Taam. Ao a biri nako mai irou; bwa a taku bwa ngai Raban, ao a taku bwa e a tia n tiringai ao iaon kawaina nakoia ngkai bwa e na anai naba maiuia.

29 Ao e koro bukina bwa I weewete nakoia, ao a ongo bwanaau; mangaia are a aikoa biri nako mai irou.

30 Ao e koro bukina bwa ngke e nooriia tariu ana toro Raban, ao e a taonaki n te ruru, ao e nang bon biri nako maiirou n okira te kaawa are Ierutarem.

31 Ao ngai, Nibwaai, ngkai bon te mwaane ngai ae i buubura, ao n tia naba ni karekea te korakora mai iroun te Uea, mangaia are I a taua ana toro Raban bwa e na aki biri nako.

32 Ao e koro bukina bwa I taetae nakoina, bwa ngkana e ongo n au taeka, ngkai e maiu te Uea, ao ngkai I maiu, ngkana e ongo n ara taeka, ao ti na kamaura maiuna.

33 Ao I taetae nakoina, ma te taeka n tuea, bwa e na aki maaku; bwa e na riki bwa te aomata ae inaomata n ai arora ngkana e nako nakon te rereua ma ngaira.

34 Ao I taku naba nakoina, ni kangai: E koaua ae e a tia te Uea n tua bwa ti na karaoa te bwai aio; ao e riai bwa ti na kakaonimaki nakon ana tua te Uea ke ti na aki? Mangaia ae ngkana ko iri nakon Tamau n te rereua ao e na reke nnem iroura.

35 Ao e koro bukina bwa e kaungaki nanon Tioram ni baike I taekin. Tioram bon aran te toro arei; ao e berita bwa e na nakon tamara n te rereua. Eng, e tuea nakoira naba bwa e na tiku iroura ni moa man te tai arei.

36 Ao ti tangiria bwa e na tiku iroura ibukin aei, bwa a aonga n aki ataa taekan birinakora Iutaia nakon te rereua, bwa a rawa n rimwira ao n tiringira.

37 Ao e koro bukina bwa ngke e a tia ni tuea Tioram nakoira, ao a mauna raraomara irouna.

38 Ao e koro bukina bwa ti anai bwaatua aika buraati ma ana toro Raban, ao ti mwananga nakon te rereua n okira ana umwanrianna tamara.