1 Kag natabo ini nga naghambal ako sa akon mga utod nga nagasiling: Magtaklad kita liwat sa Jerusalem, kag magtutum kita sa pagtuman sang mga kasugoan sang Ginuo; kay tan-awa labaw pa sia nga gamhanan sangsa bug-os nga duta, gani ngaa indi mangin labaw pa nga gamhanan sangsa kay Laban kag sa iya singkwenta, huo, ukon bisan pa sangsa iya napulo ka linibo?

2 Gani magtaklad kita; magpakalig-on kita pareho kay Moises; kay sia matuod naghambal sa mga tubig sang Pula nga Dagat kag natunga ang mga ini diri kag didto, kag ang aton mga amay nag-agi sa tunga, pagwa sa pagkabihag, sa mamala nga duta, kag ang mga kasoldadohan sang Faraon nagsunod kag nagkalalumos sa mga tubig sang Pula nga Dagat.

3 Karon tan-awa nahibal-an ninyo nga ini matuod; kag nahibal-an man ninyo nga isa ka anghel ang nakighambal sa inyo; gani makaduhaduha pa bala kamo? Magtaklad kita; masarangan kita nga luwason sang Ginuo, pareho sang aton mga amay, kag patyon si Laban, pareho sang mga Egiptohanon.

4 Karon sang mahambal ko ining mga pulong, akig pa sila gihapon, kag nagpadayon pa sa pagkulomuron; apang nagsunod sila sa akon tubtob nga nakaabot kami sa gwa sang mga pader sang Jerusalem.

5 Kag gab-i sadto; kag ginpapanago ko sila sa gwa sang mga pader. Kag pagkatapos nga makapanago sila, ako, si Nefi, patago nga nagsulod sa siyudad kag nagpadulong sa balay ni Laban.

6 Kag gingiyahan ako sang Espiritu, kay wala ako makahibalo antes pa sang mga butang nga dapat ko himuon.

7 Bisan pa amo sini nagpadayon ako, kag sang nagahilapit na ako sa balay ni Laban nakakita ako sang isa ka tawo, kag natumba sia sa duta sa akon atubang, kay hubog sia sang alak.

8 Kag sang ginpalapitan ko sia nasapwan ko nga si Laban ini.

9 Kag nakita ko ang iya espada, kag akon ini ginkakas sa iya tagob; kag ang uluyatan sini hinimo sa puraw nga bulawan, kag ang pagkahimo sini tuman kapulido, kag nakita ko nga ang sulab sini hinimo sa pinakamalahalon nga salsalon.

10 Kag natabo ini nga ginpilit ako sang Espiritu nga dapat ko patyon si Laban; apang nagsiling ako sa akon tagipusuon: Bisan san-o wala pa gid ako makapaagay sang dugo sang tawo. Kag nagpalangupos ako sa kahadlok kag luyag nga indi ko na lang kuntani sia pagpatyon.

11 Kag ang Espiritu nagsiling liwat sa akon: Tan-awa gintugyan sia sang Ginuo sa imo mga kamot. Huo, kag nahibal-an ko man nga iya man gintinguhaan nga patyon ako; huo, kag indi sia mamati sa mga kasugoan sang Ginuo; kag gin-agaw man niya ang amon mga pagkabutang.

12 Kag natabo ini nga ang Espiritu nagsiling liwat sa akon: Patya sia, kay gintugyan sia sang Ginuo sa imo mga kamot;

13 Tan-awa ginapatay sang Ginuo ang malain agud matuman ang iya matarong nga mga katuyoan. Mas maayo pa nga isa ka tawo ang madula sangsa nga ang isa ka nasyon ang mag-usmod kag madula sa pagkawala’y pagtuo.

14 Kag karon, sang ako, si Nefi, nakabati sining mga pulong, nadumduman ko ang mga pulong sang Ginuo nga iya ginhambal sa akon sa kamingawan nga nagasiling: Kon ang imo kaliwatan magtuman sang akon mga kasugoan, magauswag sila sa duta sang panaad.

15 Huo, nakahunahuna man ako nga indi sila makatuman sang mga kasugoan sang Ginuo suno sa layi ni Moises, luwas lang kon yara sa ila ang layi.

16 Kag nahibal-an ko man nga ang layi nakurit sa mga lamina nga saway.

17 Kag sa liwat, nahibal-an ko nga gintugyan sang Ginuo sa akon mga kamot si Laban sa sini nga kabangdanan—agud maangkon ko ang mga kasulatan suno sa iya mga kasugoan.

18 Gani gintuman ko ang tingug sang Espiritu, kag ginkaptan ko si Laban sa buhok, kag ginpugutan ko sia sang ulo paagi sa iya kaugalingon nga espada.

19 Kag pagkatapos nga mapugutan ko sia sang ulo paagi sa iya kaugalingon nga espada, gin-uba ko ang mga biste ni Laban kag ginsul-ob sa akon kaugalingon nga lawas; huo, bisan ang tagsa ka tinipik; kag gintaklos ko ang iya hinganib sa akon mga balikawang.

20 Kag pagkatapos nga nahimo ko ini, nagkadto ako sa talagoan-manggad ni Laban. Kag sang nagapakadto ako sa talagoan-manggad ni Laban, tan-awa, nakita ko ang suloguon ni Laban nga nagakapot sang mga yabi sang talagoan-manggad. Kag ginmandoan ko sia sa paningug ni Laban, nga mag-upod sia sa akon sa talagoan-manggad.

21 Kag naghunahuna sia nga ako ang iya amo nga si Laban, kay nakita niya ang mga biste kag amo man ang espada nga nataklos sa akon mga balikawang.

22 Kag naghambal sia sa akon parte sa mga tigulang sang mga Judio, kay nahibal-an niya nga ang iya amo nga si Laban naggwa sina nga gab-i upod sa ila.

23 Kag naghambal ako sa iya nga kuno abi si Laban ako.

24 Kag naghambal man ako sa iya nga dal-on ko ang mga kinurit, nga yara sa mga lamina nga saway, sa akon mga magulang nga yara sa gwa sang mga pader.

25 Kag ginmandoan ko man sia nga magsunod sia sa akon.

26 Kag sia, nga nagahunahuna nga nagahambal ako parte sa mga kauturan sa simbahan, kag nga ako matuod inang si Laban nga akon ginpatay, gani nagsunod sia sa akon.

27 Kag naghambal sia sa akon sa madamo nga beses parte sa mga tigulang sang mga Judio, samtang nagapakadto ako sa akon mga utod, nga yara sa gwa sang mga pader.

28 Kag natabo ini nga sang makita ako ni Laman hinadlokan sia sing tuman, kag amo man sanday Lemuel kag Sam. Kag nagpalagyo sila halin sa akon atubang; kay naghunahuna sila nga ako si Laban, kag nga napatay niya ako kag luyag nga patyon man sila.

29 Kag natabo ini nga gintawag ko sila, kag nabatian nila ako; gani nagdulog sila sa pagpalagyo halin sa akon atubang.

30 Kag natabo ini nga sang makita sang suloguon ni Laban ang akon mga utod nagsugod sia sa pagpalangurog, kag naghana nga magpalagyo halin sa akon kag magbalik sa siyudad sang Jerusalem.

31 Kag karon ako, si Nefi, nga isa ka lalaki nga dako sing panglawason, kag nga nakaangkon man sing tuman nga kusog halin sa Ginuo, gani gindakop ko ang suloguon ni Laban, kag ginpunggan sia, agud nga indi sia makapalagyo.

32 Kag natabo ini nga nakighambal ako sa iya, nga kon mamati sia sa akon mga pulong, pareho nga buhi ang Ginuo, kag pareho nga nagakabuhi ako, sa amo man nga kon mamati sia sa amon mga pulong, pabayaan namon nga mabuhi sia.

33 Kag naghambal ako sa iya, bisan upod ang isa ka panumpa, nga indi sia kinahanglan nga mahadlok; nga mangin isa sia ka hilway nga tawo pareho sa amon kon magdulhog sia sa kamingawan upod sa amon.

34 Kag naghambal man ako sa iya nga nagasiling: Pat-od nga ginsugo kami sang Ginuo nga himuon ini nga butang; kag indi bala dapat nga mangin matutum kami sa pagtuman sang mga kasugoan sang Ginuo? Gani, kon magdulhog ka sa kamingawan sa akon amay may lugar ka sa amon.

35 Kag natabo ini nga si Zoram nagpakaisog sa mga pulong nga akon ginhambal. Karon si Zoram ang ngalan sang suloguon; kag nagpromisa sia nga magdulhog sa kamingawan sa amon amay. Huo, kag nanumpa man sia sa amon nga magapabilin sia upod sa amon sumugod sa sina nga tion.

36 Karon luyag namon nga magpabilin sia upod sa amon sa sini nga kabangdanan, agud indi mahibal-an sang mga Judio ang parte sa amon pagpalagyo padulong sa kamingawan, kay basi lagson nila kami kag pamatyon kami.

37 Kag natabo ini nga sang makapanumpa sa amon si Zoram, nadula ang amon kahadlok parte sa iya.

38 Kag natabo ini nga gindala namon ang mga lamina nga saway kag ang suloguon ni Laban, kag nagkadto sa kamingawan, kag nagpanglakaton padulong sa tolda sang amon amay.