1 Ndien edikem ete ami ndɔhɔ nditɔ eka mi iren, nte: Yak nnyin ifiak idɔk ika Jerusalem, ndien yak nnyin ibuɔtidem ke ndinim ibet Jehovah; koro sese enye okpon akan kpukpru ererimbot, ndien ntak mikponke ikan Laban ye aba ye duop esie, iŋ, mme ikan mme thousand ke itie duop?

2 Ke ntak oro yak nnyin idɔk ika; yak nnyin inyene odudu nte Moses; koro enye ke akpanikɔ ama etiŋ ikɔ ɔnɔ mme mmɔŋ Ididuot Inyaŋ ndien mmɔ esiaha edem mbiba, ndien mme ete nnyin esaŋa ebe, ewɔrɔ ke nkpɔkɔbi, ke nsat isɔŋ, ndien mbon ekɔŋ Pharaoh etiene enyuŋ esip ke mme mmɔŋ Ididuot Inyaŋ.

3 Idahaemi sese mbufo emefiɔk ete ke emi edi akpanikɔ; ndien mbufo nko emefiɔk ete angel ama etiŋ ikɔ ɔnɔ mbufo; ke ntre ndi mbufo eye eyighe? Yak nnyin idɔk ika; Jehovah enyene ukeme ndi nyaŋa nnyin, kpa nte mme ete nnyin, ndien ndisobo Laban, kpa nte mme Egyptian.

4 Ndien ke ini mma nketiŋ mme ikɔ emi, mmɔ eka iso eyat esit, ndien eka iso ekuni; edi mmɔ etiene mi edɔk tutu nnyin idisim ke anwa mme ibibene Jerusalem.

5 Ndien ekedi ke okoneyo; ndien ami nnam ete yak mmɔ edip idem mmɔ ke anwa mme ibibene obio. Ndien ke ebede mmɔ ema edip idem mmɔ, ami, Nephi, ndibe nduk obio oro nyuŋ nka ke ŋkaŋ ufɔk Laban.

6 Ndien edi Spirit ekeda mi usuŋ, nkebemke iso mfiɔk mme ŋkpɔ emi ekenade nte ami nnam.

7 Edi ami nka iso, ndien nte ami nkade mkpere ufɔk Laban ami nkut owo, ndien enye ama ɔduɔ ke isɔŋ ke iso mi, koro enye ekekpade mmin.

8 Ndien ke ini ami nkesimde enye ami nkut nte ke ekedi Laban.

9 Ndien ami nkut ofut esie, ndien ami nyuŋ nsio enye ke efɔk esie; ndien ito esie ekedi eke ata gold, ndien enam enye eye ata eti eti, ndien ami nkut ete ke mbubara esie ekedi eke okpoho eke ɔsɔŋde urua.

10 Ndien edikem ete Spirit enyik mi ete yak ami nwot Laban; edi ami ndɔhɔ ke esit mi: Ekenanam ke ini ndomo kiet ami nduɔkke iyip owo. Ndien ami mmeŋe ndien ami nsin ndiwot enye.

11 Ndien Spirit afiak ɔdɔhɔ mi ete: Sese Jehovah ayak enye esin fi ke ubɔk. Iŋ, ndien ami nko mma mfiɔk ete ke enye ama oyom ndimen uwem mi mfep; iŋ, ndien ke enye ikpaŋke utɔŋ inɔ ibet Jehovah; ndien enye nko ama ada inyene nnyin.

12 Ndien edikem ete Spirit afiak ɔdɔhɔ mi ete: Wot enye, koro Jehovah ama ayak enye esin fi ke mme ubɔk;

13 Sese Jehovah owot idiɔk owo man ada nnen nnen uduak esie edi. Ɔfɔn ete yak owo kiet atak akan ete obio ataha onyuŋ atak ke unana mbuɔtidem.

14 Ndien idaha emi, ke ini ami, Nephi, mma nkekop mme ikɔ emi, ami mma nti mme ikɔ Jehovah emi enye eketiŋde ɔnɔ mi ke wilderness, ɔdɔhɔde ete: Adaŋa nte ikɔt fo edinimde ibet mi, mmɔ eyeforo ke isɔŋ enwɔŋɔ.

15 Iŋ, ndien ami nko mma mkpep nte ke mmɔ ikekanke inim ibet Jehovah itiene mbet Moses, ibɔhɔke mmɔ enyene mbet oro.

16 Ndien ami nko mma mfiɔk nte ke mbet oro ke ekemiŋ enye ke mme usan brass.

17 Ndien nko, ami mma mfiɔk ete ke Jehovah ama ayak Laban esin ke mme ubɔk mi ke ntak emi—man mbɔ mme ŋwed oro nte asaŋade ye ibet esie.

18 Ke ntre ami mma nsuk ibuot nnɔ uyo Spirit, nyuŋ mmuŋ Laban ke idet ibuot, ndien ami nsibe ibuot esie mfep ye ofut esie mmɔŋ.

19 Ndien ke mma nkesibe ibuot esie mfep ye ofut esie mmɔŋ, ami mmen mme ɔfɔŋ Laban nyuŋ nsine mmɔ ke idem mi; iŋ, kpa ofuri ofuri; ndien ami mbɔbɔ ŋkpɔ ekɔŋ esie ke isin mi.

20 Ndien ke mma nkenam emi, ami nka ufɔk unim okuk Laban. Ndien nte ami nkade mkpere ufɔk unim okuk Laban, sese, ami nkut eyen ufɔk Laban emi eke akamade mme ukpɔhɔre ufɔk unim okuk. Ndien ami nnɔ enye uyo ke uyo Laban, nte yak enye aka ye ami okoduk ufɔk unim okuk.

21 Ndien enye ekere ke ami ndi ete ufɔk esie, Laban, koro enye okut mme ɔfɔŋ ndien nko ye ofut ke isin mi.

22 Ndien enye ɔdɔhɔ mi abaŋa mbiowo mme Jew, enye eke ɔfiɔkde ete ete ufɔk esie, Laban, ama ɔwɔrɔ ke okoneyo ke otu mmɔ.

23 Ndien ami ndɔhɔ enye nte nkedi Laban.

24 Ndien ami nko ndɔhɔ enye nte ke ana ami mmen mme ŋkpɔ emi ekemiŋde, emi ekedude ke mme usan brass, mbine mme ikpɔ nditɔ eka mi iren, emi ekedude ke anwa mme ibibene.

25 Ndien ami nko nnɔ enye uyo nte yak enye etiene mi.

26 Ndien enye, koro eke ekerede ete ke nketiŋ mbaŋa nditɔ eka iren ke ufɔk Abasi, ndien ete ami ke akpan ikɔ nkedi Laban oro emi ami nkewotde, ke ntre enye ama etiene mi.

27 Ndien enye etiŋ ɔnɔ mi ediwak ini abaŋa mbiowo mme Jew, nte ami nkade mbine nditɔ eka mi iren, emi ekedude ke anwa mme ibibene.

28 Ndien edikem ete ke ini Laman ekekutde mi enye efehe ndik ata eti eti, ndien nko Lemuel ye Sam. Ndien mmɔ efehe ekpɔŋ iso mi; koro mmɔ ekekerede ke edi Laban, ndien ke enye ama owot mi ndien onyuŋ oyom ndimen uwem mmɔ mfep nko.

29 Ndien edikem ete ami nkot mmɔ, ndien mmɔ ekop mi; ke ntre mmɔ etre ndifehe mkpɔŋ iso mi.

30 Ndien edikem ete ke ini eyen ufɔk Laban okutde nditɔ eka mi iren enye ɔtɔŋɔ ndiyek idem, ndien oyom ndifehe mkpɔŋ iso mi nyuŋ mfiak nyɔŋ obio Jerusalem.

31 Ndien idahaemi ami, Nephi, emi nkedide owo emi okponde ke idaha, ndien nko ke mma nkebɔ ediwak odudu nto Jehovah, ke ntak oro ami mma mmum eyen ufɔk Laban, nnyuŋ mmum enye, man enye idifehe.

32 Ndien edikem ete ami ndɔhɔ enye, nte edieke enye edikpaŋde utɔŋ inɔ mme ikɔ mi, adaŋa nte Jehovah odude uwem, nko adaŋa nte ami ndude uwem, kpa nko ete edieke enye edikpaŋde utɔŋ inɔ mme ikɔ nnyin, nnyin iyesuhɔ uwem esie.

33 Ndien ami ndɔhɔ enye, kpa ye uŋwɔŋɔ, ete yak enye ukufehe ndik; ete ke enye eyebɔhɔ nte mimɔ edieke enye edisuhɔrede ika ke wilderness ye nnyin.

34 Ndien ami nko ndɔhɔ enye, nte: Ke akpanikɔ Jehovah ama ɔnɔ nnyin uyo ete yak inam ŋkpɔ emi; ndien ndi nnyin idisinke ifik ke ndinim ibet Jehovah? Ke ntak oro, edieke afo edisuhɔre ika ke wilderness ibine ete mi afo eye enyene itie ye nnyin.

35 Ndien edikem ete Zoram ama enyene nsɔŋɔ ke mme ikɔ emi ami nketiŋde. Idaha emi Zoram ekedi enyiŋ eyen ufɔk oro; ndien enye ɔŋwɔŋɔ ete ke imɔ iyesuhɔre ika ke wilderness ibine ete nnyin. Iŋ, ndien enye nko ɔŋwɔŋɔ ye nnyin ete ke imɔ iyedu ye nnyin tɔŋɔ ke ini oro ka iso.

36 Idahaemi nnyin ikenyene udɔŋ ete yak enye odu ye nnyin ke ntak emi, man mme Jew idifiɔk ke abaŋa nnyin ndifehe nka ke wilderness, man mmɔ idibine nnyin nyuŋ nsobo nnyin.

37 Ndien edikem ete ke ini Zoram ama ekenam eŋwɔŋɔ ɔnɔ nnyin, ndik nnyin etre ke abaŋa enye.

38 Ndien edikem ete nnyin itaŋ mme usan brass ye eyen ufɔk Laban, inyuŋ iwɔrɔ ika ke wilderness, inyuŋ isaŋa ika tent ete nnyin.