1 Kag natabo ini nga ginpanipon namon ang tanan nga sari sang tagsa ka sahi sang binhi, sang uyas sang tagsa ka sahi, kag amo man sang mga binhi sang tanan nga sahi sang bungang-kahoy.

2 Kag natabo ini samtang nagapabilin ang akon amay sa kamingawan naghambal sia sa amon nga nagasiling: Tan-awa, nagdamgo ako sing isa ka damgo; ukon, sa iban nga pulong, nakakita ako sing isa ka panan-awon.

3 Kag tan-awa, tungod sang butang nga akon nakita, may rason ako sa pagkasadya sa Ginuo tungod kay Nefi kag amo man kay Sam; tungod kay may kabangdanan ako sa pagpati nga sila, kag madamo man sang ila mga kaliwatan, maluwas.

4 Apang tan-awa, Laman kag Lemuel, tuman ako nga nahadlok tungod sa inyo; kay tan-awa, nadumduman ko nga nakita ko sa akon damgo ang isa ka madulom kag masubo nga kamingawan.

5 Kag natabo ini nga nakakita ako sing isa ka lalaki, kag nagasuksok sia sing isa ka puti nga panapton; kag nagpalapit sia kag nagtindog sa akon atubang.

6 Kag natabo ini nga naghambal sia sa akon, kag ginhambalan ako nga magsunod sa iya.

7 Kag natabo ini nga samtang nagasunod ako sa iya nakita ko ang akon kaugalingon nga yara ako sa isa ka madulom kag masubo nga kamingawan.

8 Kag pagkatapos nga nagpanglakaton ako sa sulod sing madamo nga oras sa kadulom, nagsugod ako sa pagpangamuyo sa Ginuo nga kaluoyan niya ako, suno sa kabugana sang iya mapinalanggaon nga mga kaluoy.

9 Kag natabo ini, pagkatapos nga nakapangamuyo ako sa Ginuo nakita ko ang isa ka dako kag malapad nga patag.

10 Kag natabo ini nga nakakita ako sing isa ka kahoy, nga ang bunga sini halandumon agud makapalipay sing isa ka tawo.

11 Kag natabo ini nga nagpalapit ako kag nagkaon sang bunga sini; kag nakita ko nga tuman ini katam-is, labaw sa tanan nga akon na natilawan. Huo, kag nakita ko nga ang bunga sini maputi, nga labaw pa sa tanan nga kaputian nga akon na nakita.

12 Kag sang ginkaon ko ang bunga sini nagpuno ini sang akon kalag sing tuman kadako nga kalipay; gani, nagsugod ako sa paghandum nga ang akon panimalay makakaon man sini; kay nahibal-an ko nga halandumon ini labaw sa tanan nga bunga.

13 Kag sang naglantaw ako sa palibot, agud basi masalapoan ko man ang akon panimalay, nakita ko ang isa ka suba nga may tubig; kag nagailig ini, kag malapit ini sa kahoy nga ang bunga sini akon ginakaon.

14 Kag nagtulok ako agud makita kon diin ini naghalin; kag nakita ko ang ginhalinan sini sa unhan diutay; kag sa ginhalinan sini nakita ko ang inyo iloy nga si Saria, kag si Sam, kag si Nefi; kag nagatindog sila nga daw indi mahibal-an kon diin sila dapat makadto.

15 Kag natabo ini nga ginpaypay ko sila; kag gintawag ko man sila sa isa ka mabaskog nga tingug nga magpalapit sila sa akon, kag magkaon sang bunga, nga halandumon labaw sa tanan nga bunga.

16 Kag natabo ini nga nagpalapit sila sa akon kag nagkaon man sang bunga.

17 Kag natabo ini nga naghandum ako nga magpalapit man sanday Laman kag Lemuel kag magkaon man sang bunga; gani, nagtulok ako sa ginhalinan sang suba, agud basi makita ko sila.

18 Kag natabo ini nga nakita ko sila, apang indi sila magpalapit sa akon kag magkaon sang bunga.

19 Kag nakita ko ang isa ka barandilya nga salsalon, kag nagauntay ini sa kalabaon sang pangpang sang suba, kag nagapadulong sa kahoy sa tupad sang akon ginatindogan.

20 Kag nakita ko man ang isa ka mapiot kag makitid nga banas, nga nagausoy sa barandilya nga salsalon, padulong gid sa kahoy sa tupad sang akon ginatindogan; kag nagauntay man ini sa tupad sang ginhalinan sang tuburan, padulong sa isa ka dako kag malapad nga patag, nga daw isa ini ka kalibutan.

21 Kag nakita ko ang di-maisip nga kadam-an sang katawhan, nga ang madamo sa ila nagaduso gid, agud nga malab-ot nila ang banas nga nagapadulong sa kahoy sa tupad sang akon ginatindogan.

22 Kag natabo ini nga nagpadulong sila, kag nagsugod sa banas nga nagapadulong sa kahoy.

23 Kag natabo ini nga may nagtuhaw nga isa ka panganod sang kadudulman; huo, isa ka tuman kadako nga panganod sang kadudulman, sa bagay nga sila nga nagsugod sa banas nagtalalang sa ila alagyan, nga nagtalang sila kag nagkaladula.

24 Kag natabo ini nga nakita ko ang iban nga nagaduso gid, kag nakalab-ot sila kag nagkapyot sa punta sang barandilya nga salsalon; kag nagduso sila sa tunga sang panganod sang kadudulman, nga nagahawid sa barandilya nga salsalon, bisan tubtob nga nakalab-ot sila kag nakakaon sang bunga sang kahoy.

25 Kag pagkatapos nga nakakaon sila sang bunga sang kahoy nagtulutan-aw sila sa palibot nga daw nahuya sila.

26 Kag naglantaw man ako sa palibot, kag nakita, sa pihak sang suba nga may tubig, ang isa ka dako kag maligwa nga bilding; kag nagatindog ini nga daw yara sa hangin, nga mataas sa ibabaw sang duta.

27 Kag puno ini sang mga tawo, nga mga tigulang kag mga bataon, nga mga lalaki kag mga babayi; kag ang ila sari sang pamiste tuman kaanyag; kag yara sila sa akto nga nagapangyaguta kag nagaturisok sang ila mga tudlo sa mga nagkaladto kag nagkalaon sang bunga.

28 Kag pagkatapos nga nakatilaw sila sang bunga nahuya sila, tungod sang mga nagapangyaguta sa ila; kag nagtalalang sila pakadto sa ginadilian nga mga banas kag nagkaladula.

29 Kag karon ako, si Nefi, wala nagasugid sang tanan nga pulong sang akon amay.

30 Kundi, agud nga mapalip-ot sa pagsulat, tan-awa, nakita niya ang iban pa nga mga kadam-an nga nagaduso gid; kag nakalab-ot sila kag nagkapyot sa punta sang barandilya nga salsalon; kag nagduso sila sa ila paglakat, nga dalayon nga nagahawid sing hugot sa barandilya nga salsalon, tubtob nga nakalab-ot sila kag nagkalatumba kag nakakaon sang bunga sang kahoy.

31 Kag iya man nakita ang iban pa nga kadam-an nga nagapangarapkap sa ila alagyan padulong sa sining dako kag maligwa nga bilding.

32 Kag natabo ini nga madamo ang nagkalalumos sa kadalumon sang tuburan; kag madamo ang nagkaladula sa iya panan-awan, nga nagadalang-dalang sa di-sunado nga mga dalan.

33 Kag dako ang kadam-an nga nagsulod sa sinang di-kinaandan nga bilding. Kag pagkatapos nga nakasulod sila sa sina nga bilding nagturisok sila sang tudlo sa pagtamay sa akon kag sa mga nagakalaon man sang bunga; apang wala namon sila pagsapaka.

34 Amo ini ang mga pulong sang akon amay: Kay ang tanan nga nagpamati sa ila, nagtalalang.

35 Kag sanday Laman kag Lemuel wala magkaon sang bunga, siling sang akon amay.

36 Kag natabo ini nga pagkatapos nga nahambal sang akon amay ang tanan nga pulong parte sa iya damgo ukon panan-awon, nga madamo, nagsiling sia sa amon, tungod sining mga butang nga iya nakita sa isa ka panan-awon, tuman sia nga nahadlok para kanday Laman kag Lemuel; huo, nahadlok sia nga basi pagasikwayon sila sa atubang sang Ginuo.

37 Kag ginlaygayan niya sila dayon upod ang bug-os nga balatyagon sing isa ka mapinalanggaon nga ginikanan, nga magpamati sila sa iya mga pulong, agud basi pa lang nga ang Ginuo maluoy sa ila, kag indi sila pag-isikway; huo, ang akon amay nagwali sa ila.

38 Kag pagkatapos nga nagwali sia sa ila, kag nagpropesiya man sa ila sang madamo nga butang, ginhambalan niya sila nga magtuman sang mga kasugoan sang Ginuo; kag nag-untat sia sa paghambal sa ila.