1 ’E i muri a’era, ’ua ha’aputuputu mātou i te mau huru huero ato’a, te mau huru huero sītona ato’a, ’e te mau huru huero ato’a o te mā’a hotu.

2 ’E i muri a’era, ’a pārahi noa ai tō’u metua tāne i te mēdēbara ra, ’ua parau mai ra ’oia ia mātou, nā ’ō mai ra : Inaha, ’ua moemoeāhia vau i te hō’ē moemoeā ; ’oia ho’i, ’ua ’ite au i te hō’ē ’ōrama.

3 ’E inaha, nō te mau mea tā’u i ’ite, e ti’a ai iā’u ’ia ’oa’oa i te Fatu nō Nephi ’e nō Samu ato’a ; nō te mea tē vai mau ra te tumu i mana’o ai au ē, e fa’aorahia rāua ’e te tahi pae rahi ato’a ho’i o tō rāua hua’ai.

4 Inaha rā, e pe’ape’a rahi tō’u ia ’ōrua na, e Lamana ’e e Lemuela ; inaha ho’i, ’ua mana’o vau ē, ’ua ’ite au i roto i tā’u moemoeā, i te hō’ē mēdēbara pōiri ’e te ano roa.

5 ’E i muri a’era, ’ua ’ite atu ra vau i te hō’ē ta’ata, ’e ’ua fa’a’ahuhia ’oia i te hō’ē ’ahu teatea ; ’e ’ua haere mai ra ’oia ’e ’ua ti’a mai ra i mua iā’u.

6 ’E i muri a’era, ’ua paraparau mai ra ’oia iā’u, ’e ’ua fa’aue mai ra iā’u ’ia pe’e atu iāna.

7 ’E i muri a’era, ’a pe’e ai au iāna ra, ’ua ’ite a’era vau ē tei roto vau i te hō’ē vāhi pōiri ’e te ano roa.

8 ’E i muri iho i tō’u haerera’a nō te ārea e rave rahi hora te maoro i roto i te pōiri, ’ua ha’amata ihora vau i te pure i te Fatu ’ia fa’atae mai i tōna aroha i ni’a iā’u, ’ia au i te rahi o tōna ra aroha iti.

9 ’E i muri a’era, i muri iho i tō’u purera’a i te Fatu, ’ua ’ite atu ra vau i te hō’ē ’āua rahi ’e te ’ā’ano.

10 ’E i muri a’era, ’ua ’ite atu ra vau i te hō’ē tumu rā’au, ’e e mea hina’arohia ho’i tōna hotu nō te fa’a’oa’oa i te ta’ata.

11 ’E i muri a’era, ’ua haere atu ra vau ’e ’ua ’amu ihora i te hotu nō ni’a mai ra, ’e ’ua ’ite ihora vau ē, e mea monamona roa te reira i tō te mau mea ato’a tā’u i tāmata na. ’Oia ïa, ’e ’ua ’ite au ē, e mea teatea tōna hotu, hau atu i te teatea i tō te mau mea ato’a tā’u i ’ite na.

12 ’E ’a ’amu ai au i taua hotu ra, ’ua ’ī ihora tō’u vārua i te ’oa’oa rahi roa ; nō reira, ’ua tupu ihora tō’u hina’aro ’ia ’amu ato’a tō’u ’utuāfare i te reira ; nō te mea ’ua ’ite au ē, e mea hina’aro-roa-hia a’e te reira i tō te mau hotu ’ē ato’a.

13 ’E ’ia hi’o a’era tō’u mata ē ’ati noa a’e, penei a’e ’o te ’ite ato’a atu vau i tō’u ra ’utuāfare, ’ua ’ite atu ra vau i te hō’ē ’ānāvai pape ; ’e tē tahe ra te reira nā pīha’i iho i te tumu rā’au nō reira mai te hotu tā’u i ’amu ra.

14 ’E ’ua hi’o atu ra vau nō te ’ite ē nō hea mai te reira i te haerera’a mai ; ’e ’ua ’ite atu ra ho’i au i te tumu nō te reira i te ātea iti a’e ; ’e i te tumu nō te reira ’ua ’ite atu ra vau i tō ’ōrua metua vahine ra ia Saria, ’e ia Samu, ’e ia Nephi ; ’e tē ti’a ra rātou mai te mea ra ē, ’aita rātou i ’ite i te vāhi tā rātou e haere ra.

15 ’E i muri a’era, ’ua tārape atu ra vau ia rātou ; ’e ’ua parau ato’a atu ra vau ia rātou ma te reo pūai ’ia haere mai rātou iā’u ra, ’e ’ia ’amu i te hotu, ’o tei hina’aro-roa-hia a’e i tō te mau hotu ’e’ē ato’a ra.

16 ’E i muri a’era, ’ua haere mai ra rātou iā’u, ’e ’ua ’amu ato’a ihora i taua hotu ra.

17 ’E i muri a’era, ’ua hina’aro ato’a ho’i au ’ia haere ato’a mai Lamana rāua ’o Lemuela e ’amu i taua hotu ra ; nō reira, ’ua hi’o atu ra tō’u mata i te ha’amatara’a o taua ’ānāvai ra, penei a’e ’o te ’ite atu vau ia rāua.

18 ’E i muri a’era, ’ua ’ite atu ra vau ia rāua, ’aita rā rāua e haere mai iā’u nō te ’amu i taua hotu ra.

19 ’E ’ua ’ite atu ra vau i te hō’ē ’āuri tāpe’ara’a, ’e nā te pae ’ānāvai tōna torora’a, ’e ’ua tae roa mai i te tumu rā’au tei reira vau i te ti’ara’a.

20 ’E ’ua ’ite ato’a atu ra vau i te hō’ē ’ē’a piriha’o ’e te oaoa, ’e ’ua tae roa mai te reira nā pīha’i iho i taua ’āuri tāpe’ara’a ra, ’e i te tumu rā’au tei reira vau i te ti’ara’a ; ’e ’ua toro ato’a atu te reira i te ha’amatara’a o te pape piha’a, i roto i te hō’ē ’āua rahi ’e te ’ā’ano, mai te mea ra ē, ’o te hō’ē ao te reira.

21 ’E ’ua ’ite atu ra vau i te mau pupu ta’ata e rave rahi e’ita e hope ’ia tai’o, ’e tē haere ti’a mai ra rātou e rave rahi ’ia noa’a ia rātou te ’ē’a ’o tē arata’i ti’a atu i te tumu rā’au tei reira vau i te ti’ara’a.

22 ’E i muri a’era, ’ua haere mai ra rātou, ’e ’ua ha’amata ihora i te haere nā te ’ē’a ’o tē arata’i ti’a atu i taua tumu rā’au ra.

23 ’E i muri a’era, ’ua tupu a’era te māhu pōiri ; ’oia ïa, e māhu pōiri ta’ota’o roa, ’e nō reira ho’i ’ua mo’e roa te ’ē’a o te mau ta’ata i ha’amata i te haere nā te ’ē’a ra, ’e ’ua haere ’ē noa atu ra rātou ’e mo’e roa atu ra.

24 ’E i muri a’era, ’ua ’ite atu ra vau i te tahi atu ā mau ta’ata i te haere-ti’a-ra’a mai, ’e ’ua haere mai ra rātou ’e ’ua mau ihora i te hope’ara’a o taua ’āuri tāpe’ara’a ra ; ’e ’ua haere ti’a mai ra rātou nā roto i te māhu pōiri, ma te mau pāpū i taua ’āuri tāpe’ara’a ra, e tae roa mai ra rātou i taua tumu rā’au ra ’e ’amu ihora i te hotu o te tumu rā’au.

25 ’E i muri iho i tō rātou ’amura’a i te hotu nō taua tumu rā’au ra, ’ua hi’o noa a’era tō rātou mata ē ’ati noa a’e, mai te mea ra ē, ’ua ha’amā rātou.

26 ’E ’ua hi’o noa ato’a a’era tō’u mata ē ’ati noa a’e, ’e ’ua ’ite atu ra vau i te hō’ē fare rahi ’e te ’ā’ano i te tahi pae mai o te ’ānāvai pape, ’e tē ti’a ra te reira mai te mea ra ē, tei roto ïa i te reva, i ni’a roa a’e i te fenua.

27 ’E ’ua ’ī roa ho’i te reira i te ta’ata, te feiā pa’ari ’e te feiā ’āpī, te tāne ’e te vahine ; e mea maita’i roa ho’i tō rātou ’ahu ; ’e tē tāhitohito mai ra ’e tē fa’atoro mai ra ho’i rātou i tō rātou mau manimani rima i te mau ta’ata i haere mai i reira ’e ’o tē ’amu ra i taua hotu ra.

28 ’E i muri iho i tō rātou ’amura’a i taua hotu ra, ’ua ha’amā ihora rātou, nō te mau ta’ata i tāhitohito mai ia rātou ra ; ’e ’ua tāiva ihora rātou i roto i te mau ’ē’a i rāhuihia ’e mo’e atu ra.

29 ’E i teienei, ’aita vau, ’o Nephi, e parau i te mau parau ato’a a tō’u ra metua tāne.

30 ’Āre’a rā, nō te ha’apoto noa i te pāpa’ira’a, inaha, ’ua ’ite ’oia i te tahi atu ā mau pupu ta’ata i te haere-ti’a-ra’a mai ; ’e ’ua haere mai ra rātou ’e ’ua mau ihora i te hope’ara’a o taua ’āuritāpe’ara’a ra ; ’e ’ua haere ti’a noa mai rātou i mua, ma te mau māite noa i taua ’āuri tāpe’ara’a ra, ’e tae roa mai ra rātou i reira, ’e ’ua ma’iri ihora rātou i raro ’e ’amu ihora i te hotu o taua tumu rā’au ra.

31 ’E ’ua ’ite ato’a atu ’oia i te tahi atu ā mau pupu ta’ata i te ’imira’a i tō rātou ’ē’a ’e tae atu ai i taua fare rahi ’e te ’ā’ano ra.

32 ’E i muri a’era, e rave rahi tei paremo i roto i te mau hōhonura’a nō te pape piha’a ; ’e e rave rahi ho’i tei mo’e ’ē atu i tōna ra mata, i te haerera’a atu nā te mau ’ē’a ’e’ē ra.

33 E pupu ta’ata rahi ho’i tei tomo atu i roto i taua fare huru ’ē ra. ’E i muri iho i tō rātou tomora’a atu i roto i taua fare ra, ’ua fa’atoro mai ra rātou i tō rātou manimani rima nō te tāhitohito iā’u ’e i te mau ta’ata ato’a ho’i e ’amu ra i taua hotu ra ; ’aore rā mātou i ha’apa’o noa atu ia rātou.

34 Teie te mau parau a tō’u metua tāne : Te mau ta’ata ato’a ho’i i ha’apa’o atu ia rātou ra, ’ua tāiva ’ē atu ïa rātou.

35 E ’aita Lamana rāua ’o Lemuela i ’amu i taua hotu ra, ’ua nā reira mai tō’u metua tāne.

36 ’E i muri a’era, ’ia fa’aoti a’era tō’u metua tāne i te fa’a’ite mai i te mau parau ato’a nō tāna ra moemoeā ’e ’aore rā ’ōrama, ’e e rave rahi ho’i te reira, ’ua nā ’ō mai ra ’oia ia mātou, nō te mau mea tāna i ’ite i roto i taua ’ōrama ra, ’ua pe’ape’a roa ’oia nō Lamana ’e Lemuela ; ’oia ïa, ’ua pe’ape’a ’oia ’o te ti’avaruhia rāua mai mua atu i te aro o te Fatu.

37 ’E ’ua a’o atu ’oia ia rāua ma te aroha ato’a o te hō’ē metua here, ’ia ha’apa’o rāua i tāna mau parau, penei a’e ’o te aroha mai te Fatu ia rāua, ma te ’ore e fa’aru’e ia rāua ; ’oia ïa, ’ua a’o atu tō’u metua tāne ia rāua.

38 ’E i muri iho i tōna a’ora’a atu ia rāua, ’e te tohura’a ho’i ia rāua i te mau mea e rave rahi ra, ’ua fa’aue atu ra ’oia ia rāua ’ia ha’apa’o i te mau fa’auera’a a te Fatu ; ’e ’ua fa’aea ihora ’oia i reira i te parau atu ia rāua.