1 ’E ’o te mau mea ato’a teie tā tō’u metua tāne i ’ite mata, ’e i fa’aro’o, ’e i parau, ’a pārahi ai ’oia i roto i te hō’ē ti’ahapa, i te peho ra nō Lemuela, ’e te mau mea e rave rahi atu ā ho’i, ’o tē ’ore e ti’a ’ia pāpa’ihia i ni’a i teie nei mau ’api.

2 ’E i teienei, mai tā’u i parau na nō ni’a i teie nei mau ’api, inaha, e ’ere teie i te mau ’api tā’u e ’ō’oti i te tā’āto’ara’a nō te ’ā’amu o tō’u ra mau ta’ata ; te mau ’api rā ’o tā’u e ’ō’oti i te tā’āto’ara’a nō te ’ā’amu o tō’u ra mau ta’ata, ’ua ma’iri ïa vau i tō te reira i’oa ’o Nephi ; nō reira, ’ua parauhia te reira te mau ’api a Nephi, i tō’u iho i’oa ; ’e ’ua ma’iri-ato’a-hia tō teie nei mau ’api i’oa, ’o te mau ’api a Nephi.

3 ’Āre’a rā, ’ua fāri’i au i te hō’ē fa’auera’a nō ’ō mai i te Fatu ’ia hāmani i teie nei mau ’api, nō te hō’ē ’ōpuara’a ta’a ’ē ia ’ō’otihia te hō’ē ’ā’amu nō te ’ohipa tāvinira’a a tō’u ra mau ta’ata.

4 ’E i ni’a i te tahi atu mau ’api ra, e ’ō’otihia te hō’ē ’ā’amu nō te fa’aterera’a a te mau ari’i, ’e te mau tama’i, ’e te mau mārōra’a a tō’u ra mau ta’ata ; nō reira, nō te ’ohipa tāvinira’a te pae rahi o teie nei mau ’api ; ’e te pae rahi o te tahi atu mau ’api ra nō te fa’aterera’a hau ïa a te mau ari’i, ’e te mau tama’i, ’e te mau mārōra’a a tō’u ra mau ta’ata.

5 Nō reira, ’ua fa’aue mai te Fatu iā’u ’ia hāmani i teie nei mau ’api nō te hō’ē ’ōpuara’a pa’ari iāna ra, ’aita ho’i au i ’ite i taua ’ōpuara’a ra.

6 ’Āre’a rā ’ua ite te Fatu i te mau mea ato’a mai te mātāmua mai ā ; nō reira, ’ua fa’aineine ’oia i te hō’ē rāve’a nō te fa’atupu i tāna ra mau ’ohipa ato’a i rotopū i te mau tamari’i a te ta’ata nei ; inaha ho’i, tei iāna pā’āto’a ra te mana nō te fa’atupura’a i tāna ra mau parau ato’a. ’E ’oia mau roa ïa. ’Āmene.