1 Ug karon ako, si Jacob, mamulong na usab kaninyo, hinigugma kong mga igsoon, mahitungod niining matarong nga sanga nga akong gipamulong.

2 Kay tan-awa, ang mga saad nga atong naangkon mao ang mga saad ngari kanato sumala sa unod; mao nga, bisan og gipakita ngari kanako nga daghan sa atong mga anak mawad-an sa kinabuhi tungod sa kawalay pagtuo, bisan pa, ang Dios magmanggiluy-on ngadto sa daghan; ug ang atong mga anak ipahiuli, aron maangkon nila ang butang nga makahatag kanila og tinuod nga kahibalo bahin sa ilang Manunubos.

3 Mao nga, sama sa akong gisulti kaninyo, gikinahanglan gayod nga si Kristo—tungod kay sa miaging gabii ang anghel namulong ngari kanako nga mao gayod kini ang iyang ngalan—moabot taliwala sa mga Judeo, taliwala niadtong labing daotan nga mga bahin sa kalibotan; ug sila molansang kaniya sa krus—tungod kay kinahanglanon kini sa atong Dios, ug walay laing nasod sa ibabaw sa yuta nga molansang sa krus sa ilang Dios.

4 Kay kon ang talagsaon nga mga milagro himoon ngadto sa ubang mga nasod sila maghinulsol gayod, ug mahibalo nga siya mao ang ilang Dios.

5 Apan tungod sa pagkadaotan sa mga pari ug mga kadaotan, sila nga anaa sa Jerusalem mopatikig sa ilang mga liog batok kaniya, mao nga ilansang siya sa krus.

6 Mao nga, tungod sa ilang pagkadaotan, ang mga kalaglagan, mga kagutom, mga kamatay, ug pagbanaw sa dugo modangat kanila; ug kadto sila nga dili mangalaglag pagatibulaagon ngadto sa tanang kanasoran.

7 Apan tan-awa, kini ang giingon sa Ginoong Dios: Sa higayon nga moabot ang adlaw nga motuo sila kanako nga ako si Kristo, sa ingon niana ako nakigsaad sa ilang mga amahan nga ipahiuli sila sa unod, dinhi sa yuta, ngadto sa mga yuta nga ilang kabilin.

8 Ug mahitabo nga pundokon sila gikan sa dugay na nilang pagkatibulaag, gikan sa mga isla sa dagat, ug gikan sa upat ka bahin sa yuta; ug ang kanasoran sa mga Hentil mamahimong gamhanan sa akong mga mata, miingon ang Dios, sa pagdala kanila ngadto sa yuta nga ilang kabilin.

9 Oo, ang mga hari sa mga Hentil ang mamahimong tigmatuto nga mga amahan ngadto kanila, ug ang ilang mga rayna mahimong tigmatuto nga mga inahan; mao nga, ang mga saad sa Ginoo mahinungdanon ngadto sa mga Hentil, kay siya ang namulong niini, ug kinsa ang makalalis?

10 Apan tan-awa, kini nga yuta, miingon ang Dios, mamahimong yuta nga inyong kabilin, ug ang mga Hentil mapanalanginan dinhi sa yuta.

11 Ug kini nga yuta mamahimong yuta sa kalingkawasan ngadto sa mga Hentil, ug walay mga hari diha sa yuta, kinsa motungha ngadto sa mga Hentil.

12 Ug akong palig-onon kini nga yuta batok sa tanang kanasoran.

13 Ug siya nga makig-away batok sa Zion mamatay, miingon ang Dios.

14 Kay siya nga mopabarog og usa ka hari batok kanako mamatay, kay ako, ang Ginoo, ang hari sa kalangitan, mahimo nila nga hari, ug ako ang mahimo nga kahayag ngadto kanila hangtod sa hangtod, nga mamati sa akong mga pulong.

15 Mao nga, tungod niini nga hinungdan, ang akong mga pakigsaad nga akong gihimo ngadto sa mga anak sa katawhan matuman, nga akong pagahimoon ngadto kanila samtang sila anaa sa unod, kinahanglan gayod nga ako molaglag sa mga tinago nga buhat sa kangitngit, ug sa mga pagbuno, ug sa mga pagkasalawayon.

16 Mao nga, siya nga makig-away batok sa Zion, sa mga Judeo ug mga Hentil, sa mga ulipon ug mga gawasnon, sa mga lalaki ug mga babaye, mamatay; kay sila ang mga tigbaligya sa ilang dungog sa tibuok yuta; kay sila nga dili modapig kanako mao ang magabatok kanako, miingon ang Dios.

17 Kay akong tumanon ang akong mga saad nga akong gihimo ngadto sa mga anak sa katawhan, nga akong pagabuhaton ngadto kanila samtang sila anaa sa unod—

18 Mao nga, hinigugma kong mga igsoon, sa ingon niini miingon ang atong Dios: Ako mosakit sa inyong mga binhi pinaagi sa kamot sa mga Hentil; bisan pa, akong pahumokon ang mga kasingkasing sa mga Hentil, aron mahisama sila sa usa ka amahan diha kanila; mao nga, ang mga Hentil panalanginan ug pagaiphon nga sakop sa balay ni Israel.

19 Mao nga, akong ipahinungod kini nga yuta ngadto sa inyong binhi, ug ngadto kanila kinsa pagaiphon nga sakop sa inyong binhi sa hangtod, alang sa yuta nga ilang kabilin; kay kini usa ka pinili nga yuta, miingon ang Dios ngari kanako, labaw sa tanan nga yuta, mao nga akong gusto nga ang tanang tawo nga mopuyo niini mosimba kanako, miingon ang Dios.

20 Ug karon, hinigugma kong mga igsoon, kay nakita nga ang atong maluluy-on nga Dios naghatag kanato og daghan kaayo nga kahibalo mahitungod niini nga mga butang, kita mohinumdom kaniya, ug mobiya sa atong mga sala, ug dili moduko sa atong mga ulo, kay wala kita isalikway; bisan pa niana, gipalayas kita gikan sa yuta nga atong kabilin; apan gidala kita sa mas maayo nga yuta, kay ang Ginoo mihimo sa dagat nga atong dalan, ug ania kita sa usa ka isla sa dagat.

21 Apan mahinungdanon ang mga saad sa Ginoo ngadto kanila nga tua sa mga isla sa dagat; mao nga kay naghisgot man kini og mga isla, seguradong adunay mas daghan pa niini, ug gipuy-an usab kini sa atong mga igsuong lalaki.

22 Kay tan-awa, gidala sa Ginoong Dios ang katawhan sa lain-laing panahon gikan sa balay ni Israel, sumala sa iyang kabubut-on ug kahimuot. Ug karon tan-awa, ang Ginoo nahinumdom sa tanan kanila nga nahibulag, mao nga nahinumdom usab siya kanato.

23 Busa, lipaya ang inyong mga kasingkasing, ug hinumdomi nga kamo gawasnon sa paglihok alang sa inyong mga kaugalingon—sa pagpili sa dalan sa walay kataposan nga kamatayon o sa dalan sa kinabuhing dayon.

24 Mao nga, hinigugma kong mga igsoon, ipakig-uli ang inyong mga kaugalingon ngadto sa kabubut-on sa Dios, ug dili sa kabubut-on sa yawa ug sa unod; ug hinumdomi, human kamo makig-uli ngadto sa Dios, nga pinaagi lamang sa grasya sa Dios nga kamo naluwas.

25 Mao nga, hinaot nga ang Dios mopabangon kaninyo gikan sa pagkamatay pinaagi sa gahom sa pagkabanhaw, ug usab gikan sa walay kataposan nga kamatayon pinaagi sa gahom sa pag-ula, nga kamo dawaton ngadto sa mahangtoron nga gingharian sa Dios, aron kamo modayeg kaniya pinaagi sa grasya nga balaan. Amen.