1 Ket ita siak, ni Jacob, makisaoak manen kadakayo, patpatgek a kakabsatko, maipanggep iti daytoy nalinteg a sanga a nasaokon.

2 Ta kitaen, para kadatayo dagiti kari a nagun-odtayo a mayannurot iti nainlasagan a bagi; gapuna, kas naipakitan kaniak nga adu kadagiti annaktayo ti matayto iti lasag gapu iti kaawan pammati, nupay kasta, adu ti kaasianto ti Apo; ket maisublinto dagiti annaktayo, tapno makaumaydanto iti dayta a mangted kadakuada iti pudno a pannakaammo iti Mannubbotda.

3 Gapuna, kas nasaokon kadakayo, kasapulan a nasken a ni Cristo—ta imbaga kaniak ti anghel iti napalabas a rabii a daytoyto ti naganna—umayto kadagiti Hudio, kadakuada a nadangdangkes a paset ti lubong; ket ilansadanto iti krus isuna—ta maiparbeng iti Diostayo, ket awan ti sabali a pagilian iti daga a mangilansanto iti krus iti Diosda.

4 Agsipud ta no maaramidto dagiti milagro kadagiti dadduma a pagilian agbabawidanto, ken maammuanda nga isu ti Diosda.

5 Ngem gapu kadagiti panaginsasaserdote ken kinadakes, agsukirto a maibusor kenkuana dagiti adda iti Jerusalem, ta mailansanto isuna iti krus.

6 Gapuna, mapasamakto kadakuada dagiti pannakadadael, panagbisin, angol, ken naranggas a panangpapatay gapu kadagiti kinamanagbasolda; ket dagiti saan a madadael maiwaraswarasto kadagiti amin a pagilian.

7 Ngem kitaen, kinuna ti Apo a Dios: Inton dumteng ti aldaw a mamatida kaniak, a siak ti Cristo, iti kasta nakitulagak kadagiti kapuonanda a maisublidanto ti nainlasagan a bagida, iti daga, kadagiti daga a tawidda.

8 Ket mapasamakto a maummongdanto manipud iti napaut a pannakawaraswarasda, manipud kadagiti isla iti baybay, ken manipud kadagiti uppat a paset ti daga; ken agbalinto a naindaklan dagiti pagilian ti Gentil iti imatangko, kinuna ti Dios, iti pannakaitundada kadagiti daga a tawidda.

9 Wen, dagitinto ari dagiti Gentil ti ama a mangtagtagibinto kadakuada, ken dagitinto reynada ti agbalin nga inna a mangtagibi kadakuada; gapuna, naindaklan dagiti kari ti Apo kadagiti Gentil, ta nasaona daytoy, ket asino ti mangsuppiat?

10 Ngem kitaen, daytoy daga, kinuna ti Dios, agbalinto a daga a tawidyo, ket maparaburanto dagiti Gentil iti daytoy a daga.

11 Ket agbalinto daytoy a daga a daga ti wayawaya kadagiti Gentil, ket awanto dagiti ari iti daytoy a daga, nga agtaud kadagiti Gentil.

12 Ket patibkerekto daytoy a daga a maibusor iti amin a pagilian.

13 Ket kinuna ti Dios a ti lumaban a maibusor iti Zion ket matayto.

14 Ta matayto ti asino man a mangpataud ti ari a maibusor kaniak, ta siak, ti Apo, ti ari ti langit, ti aridanto, ket siakto ti agnanayon a silaw kadakuada, a dumngeg kadagiti balikasko.

15 Gapuna, agsipud iti daytoy a panggep, a maipatungpal dagiti katulagak nga inaramidko kadagiti sangkataw-an, nga aramidekto kadakuada bayat ti kaaddada iti nainlasagan a bagi, kasapulan a dadaelek dagiti nalimed nga aramid ti kinasipnget, ken dagiti panagpapatay, ken dagiti makarimon nga aramid.

16 Gapuna, matayto ti asinoman a manglaban a maibusor iti Zion, agpada a Hudio man wenno Gentil, agpada a balud man wenno nawaya, agpada a lalaki man wenno babai; ta isuda dagiti balangkantis iti amin a daga, agsipud ta dagiti saan a para kaniak isuda dagiti maibusor kaniak, kinuna ti Dios.

17 Ta tungpalekto dagiti karik kadagiti sangkataw-an, nga aramidekto kadakuada bayat ti kaaddada iti nainlasagan a bagi—

18 Gapuna, ay-ayatek a kakabsatko, kinuna ti Dios: Parigatekto dagiti kaputotam babaen ti ima dagiti Gentil; nupay kasta, paluknengekto ti puspuso dagiti Gentil, tapno agbalindanto a kasla ama kadakuada; gapuna, maparaburanto dagiti Gentil ket maibilangdanto iti balay ti Israel.

19 Gapuna, ikonsagrarkonto daytoy a daga kadagiti kaputotam, ken kadakuada a maibilang kadagiti kaputotam, iti agnanayon, para iti daga a tawidda; ta napili daytoy a daga, kinuna ti Dios kaniak, a nangnangruna iti amin a dagdaga, gapuna pagnaedekto dita ti amin a tao tapno dayawendakto, kinuna ti Dios.

20 Ket ita, ay-ayatek a kakabsatko, kas panangbigbig iti inted kadatayo ti naasi a Dios ti naindaklan a pannakaammo iti maipanggep kadagitoy a banag, laglagipentayo isuna, ket iwaksitayo dagiti basoltayo, saantayo nga agkurno, ta saantayo a nailaksid; nupay kasta, napapanawtayo iti daga a tawidtayo; ngem naiturongtayo iti nasaysayaat a daga, agsipud ta inaramid ti Apo ti baybay a dalantayo, ket nakapantayo iti isla ti baybay.

21 Ngem nabileg dagiti kari ti Apo kadakuada nga adda kadagiti isla iti baybay; gapuna kas kinunana nga isla, masapul pay nga ad-adu ngem iti daytoy, ket nagindegan met ida dagiti kakabsattayo.

22 Ta kitaen, impanaw ti Apo a Dios iti sumagmamano a daras manipud iti balay ti Israel, a mayannurot iti pagayatan ken pakaragsakanna. Ket ita kitaen, malagip amin ti Apo ida a naisina, gapuna malagipnatayo met.

23 Ngarud, paragsakenyo dagiti pusoyo, ken laglagipenyo a nawayakayo nga agtignay iti bagbagiyo—a mangpili iti dana ti awan inggana nga ipapatay wenno iti dana ti agnanayon a biag.

24 Gapuna, ay-ayatek a kakabsatko, itunosyo ti bagiyo iti pagayatan ti Dios, ket saan nga iti pagayatan ti sairo ken ti lasag; ket laglagipenyo, kalpasan ti pannakitunosyo iti Dios, nga iti laeng ken babaen ti parabur ti Dios ti pakaisalakananyo.

25 Gapuna, bangonennakayo koma ti Dios manipud iti ipapatay babaen ti bileg ti panagungar, ken kasta met a manipud iti awan inggana a patay babaen ti bileg ti pannubbot, tapno maawatkayo koma iti agnanayon a pagarian ti Dios, a dayawenyo ti nailangitan a paraburna. Amen.