1 Ia oqo, koi au, ko Jekope, au sa vosa tale vei kemudou na wekaqu lomani, me baleta na tabana yalododonu ka’u a vosa tiko kina.

2 Ia raica, na vosa ni yalayala eda sa rawata sa vosa ni yalayala vei keda ena bula vakayago oqo; ia, e dina ga ni sa vakaraitaki vei au ni ra na mate vakayago e vuqa na luveda ena vuku ni tawavakabauta, ia, ena lomani ira ga e lewe vuqa na Kalou; ka ra na vakalesui tale na noda kawa, me ra na sotava na ka ena solia vei ira mera kila vakaidina kina na nodra Dauveivueti.

3 O koya, me vaka au sa kaya oti vei kemudou, sa dodonu kina me lako mai ena kedra maliwa na Jiu, ena kedra maliwa na dau caka ca vakalevu cake e vuravura, ko Karisito—sai koya oqo na yacana ka a tukuna vei au na agilosi ena bogi—ka ra na vakoti Koya ki na kauveilatai—ni sa loma ni noda Kalou me vakakina, ni sa sega tale na matanitu e vuravura me na vakota rawa na nona Kalou ki na kauveilatai.

4 Ia kevaka me a vakayacori na cakacaka mana lelevu vei ira na veimatanitu tale e so, ke ra na veivutuni, ka kila ni sai Koya na nodra Kalou.

5 Ia ena vuku ni nodra ivakavuvuli na bete vakailasu kei na nodra caka cala, era na vakadomodomoqataki ira kina vua ko ira era sa tiko mai Jerusalemi, ka vakoti koya ki na kauveilatai.

6 O koya, ena vuku ni nodra caka cala, ena yaco kina vei ira na veivakarusai, na dausiga, na mate dauveitauvi, kei na vakadave dra; ia ko ira era na sega ni vakarusai era na veiseyaki ena kedra maliwa na veimatanitu kecega.

7 Ia raica, sa kaya vakaoqo na Turaga na Kalou: Ni sa yaco mai na siga ka ra sa vakabauti au kina, ni sai au ko Karisito, au a sa veiyalayalati kei ira na nodra qase ni ra na vakalesui tale kina ena bula vakayago oqo, e delai vuravura, ki na veivanua sa nodra ivotavota vakawa.

8 Ka na qai yaco ni ra na vakasoqoni vata tale mai na nodra veiseyaki tu vakadede, mai na veiyanuyanu ni wasawasa, mai na va na iwasewase kei vuravura; ia era na cecere e mataqu na veimatanitu ni kai Matanitu Tani, sa kaya na Kalou, ni ra na colati ira yani ki na vanua sa nodra ivotavota vakawa.

9 Io, era na tama ni veisusu vei ira ko ira na tui ni Veimatanitu Tani, kei ira na nodra ranadi era na tina ni veisusu; o koya, sa ka levu kina na vosa ni yalayala ni Turaga vei ira na kai Matanitu Tani; ni sa cavuta ko koya, ia ko cei me veiletitaka rawa?

10 Ia raica, sa kaya na Kalou, na vanua oqo sa nomudou ivotavota vakawa, ka ra na vakalougatataki na kai Matanitu Tani ena vanua oqo.

11 Ia ena vanua ni bula galala na vanua oqo vei ira na kai Matanitu Tani, ka na sega ni dua na tui ena vanua, me tubu cake vei ira na kai Matanitu Tani.

12 Ka’u na taqomaka na vanua oqo mai vei ira na veimatanitu kecega.

13 Ka na mate ko koya sa veivala kei Saioni, sa kaya na Kalou.

14 Ia ko koya sa bulia e dua na tui me saqati au ena mate, ni’u na nodra tui ga koi Au na Turaga, na tui kei lomalagi, ka’u na rarama ki vei ira era sa rogoca na noqu vosa me sega ni mudu.

15 O koya gona, me vakayacori kina na noqu veiyalayalati ka’u a cakava vei ira na luve ni tamata, ni’u na vakayacora vei ira ena nodra bula vakayago oqo, sa kilikili me’u na vakarusa mada na cakacaka vuni ni butobuto, kei na laba, kei na itovo vakasisila.

16 Ia, o koya sa veivala kei Saioni, o ira na Jiu kei ira na kai Matanitu Tani, na bobula kei na galala, na tagane kei na yalewa, ena mate; ni sai ira oqo na dautagane ni vuravura taucoko; ia ko ira sa sega ni totaki au era sa veisaqasaqa kei au, sa kaya na noda Kalou.

17 Ni’u na vakayacora na noqu vosa ni yalayala ka’u a cakava vei ira na luve ni tamata, ni’u na cakava vei ira ena nodra bula vakayago oqo—

18 Ia, oi kemudou na wekaqu lomani, sa kaya vakaoqo na noda Kalou: Au na vakararawataki ira na nomudou kawa ena ligadra na kai Matanitu Tani; ia, au na vakamalumalumutaka na lomadra na kai Matanitu Tani, me ra na vaka na tama vei ira; o koya, era na vakalougatataki kina na kai Matanitu Tani ka wili vata kei ira na mataqali i Isireli.

19 Ia, au na vakatabuya na vanua oqo ki vei ira na nomu kawa, kei ira era na wili vata kei ira na nomu kawa, ka sega ni mudu, me nodra ivotavota vakawa; ni sa vanua digitaki cake sara na vanua oqo mai vei ira na veivanua kecega, sa kaya vei au na Kalou; o koya au na vakaroti ira kina na tamata kecega era sa tiko kina me ra qaravi au, sa kaya na Kalou.

20 Ia oqo, oi kemudou na wekaqu lomani, me vaka ni sa solia vei keda na noda Kalou yalololoma me da kila vinaka na veika oqo, me da nanumi Koya sara, ka biuta tani na noda ivalavala ca, ka kakua ni vakacuvara sobu na uluda, ni da sa sega ni muduki tani; ia, eda sa vakasevi tani mai na vanua sa noda ivotavota vakawa, ia eda sa tuberi ki na dua na vanua e vinaka cake, ni sa qisia na wasaliwa na Turaga me noda sala, ka da sa tiko ena dua na yanuyanu ni wasawasa.

21 Ia sa ka levu na nona vosa ni yalayala na Turaga vei ira ka tiko ena veiyanuyanu ni wasawasa; ia, ni tukuni na veiyanuyanu, sa kena ibalebale ni sa dodonu me tu tale e so, ka ra sa tawani tale tu ga mai vei ira na wekada.

22 Ia raica, sa tubera tani na Turaga na Kalou e so tale mai na mataqali i Isireli ena veigauna e so, me vaka na nona inaki kei na nona gagadre. Ia oqo raica, sa nanumi ira kecega era sa muduki tani na Turaga, ka sa nanumi keda talega ko koya.

23 O koya me reki kina na lomamudou, ka mo dou nanuma ni dou sa galala mo dou lewa ga vakai kemudou na ka mo dou cakava—mo dou digitaka na sala ni mate tawavakaiyalayala se na sala ni bula tawamudu.

24 O koya gona, oi kemudou na wekaqu lomani, mo dou vakaduavatataki kemudou ki na lewa ni Kalou, ka kakua ki na lewa ni tevoro kei na gagadre vakayago; ka mo dou nanuma, ni dou sa vakaduavatataki oti vua na Kalou, ni sa loloma soli wale duadua ga ni Kalou dou sa vakabulai kina.

25 O koya, me vakaturi kemudou cake mada kina na Kalou mai na mate ena kaukauwa ni tucake tale mai na mate, ka vakakina mai na mate tawavakaiyalayala ena kaukauwa ni nona veisorovaki, mo dou curu rawa kina ki na matanitu tawamudu ni Kalou, ka mo dou vakacaucautaki koya ena nona loloma soli wale. Emeni.