1 Ang pulong nga nakita ni Isaias, anak ni Amoz, bahin sa Juda ug Jerusalem:

2 Ug mahitabo sa kataposang mga adlaw, sa panahon nga ang bukid sa balay sa Ginoo matukod sa tumoy sa kabukiran, ug ipataas ibabaw sa kabungtoran, ug ang tanang kanasoran mangadto niini.

3 Ug daghan nga katawhan ang mangadto ug moingon, Dali kamo, ug motungas kita sa bukid sa Ginoo, ngadto sa balay sa Dios ni Jacob; ug siya motudlo kanato sa iyang pamaagi, ug mosubay kita sa iyang mga dalan; kay gikan sa Zion mogawas ang balaod, ug ang pulong sa Ginoo gikan sa Jerusalem.

4 Ug siya ang mohukom sa kanasoran, ug mobadlong sa daghan nga katawhan: ug himoon nila ang ilang mga espada nga mga daro, ug ang ilang mga bangkaw nga pangdughit—ang usa ka nasod dili moisa sa espada batok sa laing nasod, ni magbansay pa alang sa gubat.

5 O balay ni Jacob, dali kamo ug manglakaw kita sa kahayag sa Ginoo; oo, dali, kay kamong tanan nahisalaag, matag usa sa daotan niyang binuhatan.

6 Busa, O Ginoo, imong gipasagdan ang imong katawhan, ang balay ni Jacob, tungod kay sila napuno sa mga tuo-tuo gikan sa sidlakan, ug nagpatalinghog sa giingon nga mga tigtagna sama sa mga Filistehanon, ug naglingaw sila sa ilang mga kaugalingon pinaagi sa mga anak sa mga langyaw.

7 Ang ilang yuta usab puno sa mga pilak ug bulawan, ug dili maihap ang ilang mga bahandi; ang ilang yuta puno usab sa mga kabayo, dili maihap ang ilang mga karwahe.

8 Ang ilang yuta puno usab sa mga dios-dios; nagsimba sila sa binuhat sa kaugalingon nilang mga kamot; nga binuhat sa kaugalingon nilang mga tudlo.

9 Ug ang tawo nga kasarangan dili moyukbo, ug ang tawo nga dungganan dili mopaubos sa iyang kaugalingon, busa, ayaw siya pasayloa.

10 O kamong mga daotan, sulod kamo sa dakong bato, ug tago kamo sa abog, kay ang kahadlok sa Ginoo ug ang himaya sa iyang pagkaharianon mosakit kaninyo.

11 Ug mahitabo nga ang mapahitas-ong mga panagway sa tawo mapaubos, ug ang pagkamapagarbohon sa mga tawo mapayukbo, ug ang Ginoo lamang ang pagahimayaon niana nga adlaw.

12 Kay ang adlaw sa Ginoo sa mga Panon hapit na moabot sa tanang kanasoran, oo, sa matag usa; oo, sa mga mapagarbohon ug mapahitas-on, ug sa matag usa nga mapalabilabihon, ug siya igapaubos.

13 Oo, ug ang adlaw sa Ginoo moabot sa tanang kahoy nga sedro sa Lebanon, kay mga tag-as kini ug habog; ug diha sa tanang kahoy nga encina sa Bashan;

14 Ug sa tanang tag-as nga kabukiran, ug sa tanang kabungtoran, ug sa tanang kanasoran nga mapalabilabihon, ug sa matag katawhan;

15 Ug sa matag tag-as nga tore, ug sa matag gipalig-on nga paril;

16 Ug diha sa tanang barko sa dagat, ug sa tanang barko sa Tarsis, ug sa tanang makahimuot nga mga talan-awon.

17 Ug ang pagkamapahitas-on sa tawo ipaubos, ug ang pagkamapagarbohon sa mga tawo himoong mapaubsanon; ug ang Ginoo lamang ang pagahimayaon niana nga adlaw.

18 Ug ang mga dios-dios laglagon niya sa hingpit.

19 Ug mamasok sila sa mga lungag sa dagkong bato, ug sa mga langob sa yuta, kay ang ilang kahadlok sa Ginoo mopatigbabaw kanila ug ang himaya sa iyang pagkaharianon mosilot kanila, kon siya mobarog na aron sa pag-uyog og kusog sa yuta.

20 Niana nga adlaw ang usa ka tawo mosalibay sa iyang mga dios-dios nga pilak, ug sa iyang mga dios-dios nga bulawan nga iyang gihimo alang sa iyang kaugalingon aron simbahon, ngadto sa mga ilaga ug mga kabog;

21 Aron moadto sa mga pangpang sa mga dagkong bato, ug sa kinatumyan sa gansang-gansangon nga dagkong mga bato, kay ang ilang kahadlok sa Ginoo modangat kanila ug ang pagkaharianon sa iyang himaya mosilot kanila, kon siya mobarog na aron sa pag-uyog og kusog sa yuta.

22 Hunonga ang pagsalig sa tawo, kansang gininhawa anaa sa iyang ilong; kay unsa may basihan sa iyang bili?