1 Voorts, die woord van die Here het vir my gesê: Neem jy ’n groot rol, en skrywe daarop met ’n mens se pen, aangaande Maher-sjalal-hasj-bas.

2 En ek het vir my betroubare getuies geneem om neer te skryf: Uría, die priester, en Sagaría, die seun van Jeberégja.

3 En ek het ingegaan by die profetes, en sy het swanger geword en ’n seun gebaar. Toe sê die Here vir my: noem sy naam, Maher-sjalal-hasj-bas.

4 Want kyk, die kind sal nie kennis hê om te roep, My vader, en my moeder, voordat die rykdom van Damaskus en die buit van Samaría weggeneem sal word voor die koning van Assur nie.

5 Die Here het ook weer met my gespreek, en gesê:

6 In soverre hierdie volk die waters versmaad van Silóa wat saggies vloei, en verbly in Resin en Remália se seun;

7 Nou daarom, kyk, die Here bring oor hulle die waters van die rivier, sterk en baie—en wel die koning van Assur en al sy heerlikheid; en hy sal bo al sy kanale styg en oor al sy walle gaan.

8 En hy sal beweeg deur Juda; en hy sal oorloop en oorgaan; hy sal selfs die nek bereik; en die uitstrekking van sy vlerke sal die breedte van u land vul, o Immánuel!

9 Verenig julleself, o julle volke, en julle sal in stukke gebreek word; en neig die oor al julle van verre lande; omgord julle, en julle sal in stukke gebreek word; omgord julle en julle sal in stukke gebreek word.

10 Neem saam’n besluit, en niks sal daarvan kom nie; spreek die woord, en dit sal nie staan nie; want God is met ons.

11 Want die Here het so met my gespreek met ’n sterk hand, en my vermaan dat ek nie moes wandel in die weg van hierdie volk nie, en gesê:

12 Sê julle nie, ’n Sameswering, aan al diegene aan wie hierdie volk sal sê, ’n Sameswering: nóg vrees julle hulle vrees, nóg wees bevrees.

13 Heilig die Here van die Leërskare, en laat Hom julle vrees wees, en laat Hom julle verskrikking wees.

14 En Hy sal soos ’n heiligdom wees; maar soos ’n struikelblok, en soos ’n rots van aanstoot, vir beide die huise van Israel, soos ’n vangnet en ’n strik vir die inwoners van Jerusalem.

15 En baie onder hulle sal struikel en val, en gebroke wees, en verstrik en gevang word.

16 Bind die getuienis toe, verseël die wet onder my dissipels.

17 En ek sal wag op die Here, wat sy aangesig verberg van die huis van Jakob, en ek sal Hom verwag.

18 Kyk, ek en die kinders wat die Here my gegee het, is vir tekens en vir wonderwerke in Israel van die Here van die Leërskare, wat op Berg Sion woon.

19 En wanneer hulle vir julle sal sê: Raadpleeg hulle wat geestebesweerders is, en die waarsêers wat piep en mompel—moet ’n volk nie hul God raadpleeg oor die lewendes om te hoor van die dooies nie?

20 Tot die wet en tot die getuienis; en as hulle nie spreek volgens hierdie woord nie, is dit omdat daar geen lig in hulle is nie.

21 En hulle sal daardeur gaan, swaar verdruk en honger; en dit sal gebeur dat wanneer hulle honger is, sal hulle hulself kwel, en hulle koning en hulle God vervloek, en opwaarts kyk.

22 En hulle sal na die aarde kyk, en moeilikheid en duisternis sien, ’n dofheid van angs, en sal gedrywe word na die duisternis.